Murli du jour du vendredi 6 septembre 2024

06-09-2024 praatahmurli om shanti "baapdaada"' madhuban

“meethe bachche - tumhaari yeh padhaai source oph income hai, is padhaai se 21 janmon ke liye kamaai ka prabandha ho jaata hai''

prashn:- muktidhaam mein jaana kamaai hai ya ghaata?

uttar:- bhakton ke liye yeh bhi kamaai hai kyonki aadhaakalpa se shanti-shanti maangate aaye hain। bahut mehnat ke baad bhi shanti nahin mili। ab baap dvaara shanti milti hai arthaat muktidhaam mein jaate hain to yeh bhi aadhaakalpa ki mehnat ka phal hua isliye ise bhi kamaai kahenge, ghaata nahin। tum bachche to jeevanmukti mein jaane ka purooshaartha karte ho। tumhaari buddhi mein abhi saare world ki history-geography naach rahi hai।

om shanti। meethe-meethe roohaani bachchon ko roohaani baap ne yeh to samjhaaya hai ki rooh hi sab kuchh samajhti hai। is samay tum bachchon ko roohaani duniya mein baap le jaate hain। unko kaha jaata hai roohaani daivi duniya, isko kaha jaata hai jismaani duniya, manushyon ki duniya। bachche samajhte hain daivi duniya thi, woh daivi manushyon ki pavitra duniya thi। abhi manushya apvitra hain isliye un devtaaon ka gaayan poojan karte hain। yeh smriti hai ki barobar pahle jhaad mein ek hi dharma hoga। viraat roop mein jhaad par bhi samjhaana hai। is jhaad ka beejroop oopar mein hai। jhaad ka beej hai baap, phir jaisa beej vaisa phal arthaat patte nikalte hain। yeh bhi wonder hai na। kitni chhoti cheez kitna phal deti hai। kitna unka roop badalta jaata hai। is manushya srishti roopi jhaad ko koi nahin jaanta, isko kaha jaata hai kalpa vriksha, iska bas geeta mein hi varnan hai। sab jaante hain geeta hi number one dharma ka shaastra hai। shaastra bhi nambarvaar to hote hain na। kaise nambarvaar dharmon ki sthaapna hoti hai, yeh bhi sirf tum hi samajhte ho, aur koi mein bhi yeh gyaan hota nahin। tumhaari buddhi mein hai pahle-pahle kis dharma ka jhaad hota hai phir unmein aur dharmon ki vriddhi kaise hoti hai। isko kaha jaata hai viraat naatak। bachchon ki buddhi mein saara jhaad hai। jhaad ki utpatti kaise hoti hai, mukhya baat hai yeh। devi-devtaaon ka jhaad abhi nahin hai aur sab taal-taaliyaan khadi hain। baaki aadi sanaatan devi-devta dharma ka foundation hai nahin। yeh bhi gaayan hai - ek aadi sanaatan devi-devta dharma ki sthaapna karte hain, baaki aur sab dharma vinaash ho jaate hain। abhi tum jaante ho kitna chhota-sa daivi jhaad hoga। phir aur sab itne dharma honge hi nahin। jhaad pahle chhota hota hai phir bada hota jaata hai। badhte-badhte abhi kitna bada ho gaya hai। abhi inki aayu poori hoti hai, inse banyan tree ka misaal bahut achha samjhaate hain। yeh bhi geeta ka gyaan hai jo baap tumhein sammukh baith sunaate hain, jisse tum raajaaon ka raaja bante ho। phir bhakti maarga mein yeh geeta shaastra aadi banenge। yeh anaadi drama bana hua hai। phir bhi aise hi hoga। phir jo-jo dharma sthaapan honge unka apna shaastra hoga। sikkha dharma ka apna shaastra, Christian aur bauddhiyon ka apna shaastra hoga। abhi tumhaari buddhi mein saare world ki history-geography naach rahi hai। buddhi gyaan dance kar rahi hai। tum saare jhaad ko jaan gaye ho। kaise-kaise dharma aate hain, kaise vriddhi ko paate hain। phir apna ek dharma sthaapan hota hai, baaki khalaas ho jaate hain। gaate hain na - gyaan soorya pragta… abhi bilkul andhiyaara hai na। kitne dher manushya hain, phir yeh itne sab honge hi nahin। in lakshmi-naaraayan ke raajya mein yeh the nahin। phir ek dharma sthaapan hona hi hai। yeh knowledge baap hi aakar sunaate hain। tum bachche kamaai ke liye kitni knowledge aakar padhte ho। baap teacher bankar aate hain to aadhaakalpa tumhaari kamaai ka prabandha ho jaata hai। tum bahut dhanvaan ban jaate ho। tum jaante ho abhi ham padh rahe hain। yeh hai avinaashi gyaan ratnon ki padhaai। bhakti ko avinaashi gyaan ratna nahin kahenge। bhakti mein manushya jo kuchh padhte hain, unse ghaata hi hota hai। ratna nahin bante। gyaan ratnon ka saagar ek baap ko hi kaha jaata hai। baaki woh hai bhakti। usmein koi bhi em object hai nahin। kamaai hai nahin। kamaai ke liye to school mein padhte hain। phir bhakti karne ke liye guru ke paas jaate hain। koi javaani mein guru karte hain, koi budhaape mein guru karte hain। koi chhotepan mein hi sannyaas le lete hain। kumbha ke mele par kitne dher aate hain। satayug mein to yeh kuchh bhi nahin hoga। tum bachchon ki smriti mein sab baaten aa gai hain। rachta aur rachna ke aadi-madhya-ant ko tum jaan gaye ho। unhonne to kalpa ki aayu hi badi kar di hai। eeshvar sarvavyaapi kah diya hai। gyaan ka pata nahin hai। baap aakar agyaan neend se sujaag karte hain। abhi tumko gyaan ki dhaarna hoti jaati hai। battery bharti jaati hai। gyaan se hai kamaai, bhakti se hai ghaata। time par jab ghaate ka samay poora hota hai to phir baap kamaai karaane aate hain। mukti mein jaana - woh bhi kamaai hai। shanti to sab maangate rehte hain। shanti deva kahne se buddhi baap taraph chali jaati hai। kehte hain - vishwa mein shanti ho, parantu woh kaise hogi - yeh kisko bhi pata nahin hai। shantidham, sukhdhaam alag hote hain - yeh bhi nahin jaante hain। jo pahla number hai, unko bhi kuchh pata nahin tha। abhi tumko saari knowledge hai। tum jaante ho - ham is karma-kshetra par karma ka part bajaane aaye hain। kahaan se aaye hain? brahmalok se। niraakaari duniya se aaye hain is saakaari duniya mein part bajaane। ham aatma doosri jagah ki rahne vaali hain। yahaan yeh 5 tatvon ka shareer rehta hai। shareer hai tab ham bol sakte hain। ham chaitanya paartadhaari hain। abhi tum aise nahin kahenge ki is drama ke aadi-madhya-ant ko ham nahin jaante hain। aage nahin jaante the। apne baap ko, apne ghar ko, apne roop ko yathaartha reeti nahin jaante the। abhi jaante hain aatma kaise part bajaati rehti hai। smriti aai hai। pahle smriti nahin thi।

tum jaante ho sachcha baap hi sach sunaate hain, jisse ham sachkhanda ke maalik ban jaate hain। sach ke oopar bhi sukhamni mein hai। sat kaha jaata hai - sachkhanda ko। devtaayen sab sach bolne vaale hote hain। sach sikhlaane vaala hai baap। unki mahima dekho kitni hai। gaai hui mahima tumko kaam mein aati hai। shivbaaba ki mahima karte hain। vahi jhaad ke aadi-madhya-ant ko jaante hain। sach baap sunaate hain to tum bachche sachche ban jaate ho। sachkhanda bhi ban jaata hai। bhaarat sachkhanda tha। number one oonch te oonch teertha bhi yeh hai kyonki sarva ki sadgati karne vaala baap bhaarat mein hi aate hain। ek dharma ki sthaapna hoti hai, baaki sabka vinaash ho jaata hai। baap ne samjhaaya hai - sookshm vatan mein kuchh hai nahin। yeh sab saakshaatkaar hote hain। bhakti maarga mein bhi saakshaatkaar hota hai। saakshaatkaar nahin hota to itne mandir aadi kaise bante! pooja kyon hoti। saakshaatkaar karte hain, feel karte hain yeh chaitanya the। baap samjhaate hain - bhakti maarga mein jo kuchh mandir aadi bante hain, jo tumne suna dekha hai, woh sab repeat hoga। chakra phirta hi rehta hai। gyaan aur bhakti ka khel bana hua hai। hamesha kehte hain gyaan, bhakti, vairaagya। parantu detail kuchh nahin jaante। baap baith samjhaate hain - gyaan hai din, bhakti hai raat। vairaagya hai raat ka। phir din hota hai। bhakti mein hai duhkh isliye uska vairaagya। sukh ka to vairaagya nahin kahenge। sannyaas aadi bhi duhkh ke kaaran lete hain। samajhte hain pavitrata mein sukh hai isliye stri ko tyaag chale jaate hain। aajkal to dhanvaan bhi ban gaye hain kyonki sampatti bigar to sukh mil na sake। maaya vaar kar jangal se phir shahar mein le aati hai। vivekaananda aur raamkrishna bhi do bade sannyaasi hokar gaye hain। sannyaas ki taakat raamkrishna mein thi। baaki bhakti ka samjhaana karna, woh vivekaananda ka tha। donon ki pustaken hain। pustak jab likhte hain to ekaagrachit ho baith likhte hain। raamkrishna jab apni biography baith likhte the to shishya ko bhi kaha tum jaakar door baitho। tha bahut teekha kada sannyaasi, naam bhi bahut hai। baap aise nahin kehte ki stri ko maa kaho। baap to kehte hain unko bhi aatma samjho। aatmaayen to sab bhaai-bhaai hain। sannyaasiyon ki baat alag hai, usne stri ko maa samjha। maa ki baith badaai ki hai। yeh gyaan ka raasta hai, vairaagya ki baat alag hai। vairaagya mein aakar stri ko maa samjha। maata akshar mein criminal aai nahin hogi। behen mein bhi criminal drishti ja sakti hai, maata mein kabhi kharaab khyaal nahin jaayenge। baap ki bachchi mein bhi criminal drishti ja sakti hai, maa mein kabhi nahin jaayegi। sannyaasi stri ko maa samajhne laga। unke liye aise nahin kehte ki duniya kaise chalegi, paidaais kaise hogi? woh to ek ko vairaagya aaya, maa kah diya। unki mahima dekho kitni hai। yahaan behen-bhaai kahne se bhi bahuton ki drishti jaati hai isliye baba kehte hain - bhaai-bhaai samjho। yeh hai gyaan ki baat। woh hai ek ki baat, yahaan to prajaapita brahma ki santaan dher bhaai-behen hain na। baap baith sab baaten samjhaate hain। yeh bhi to shaastra aadi padha hua hai। woh dharma hi alag hai nivritti maarga ka, sirf purooshon ke liye hai। woh hai had ka vairaagya, tumko to saari behad ki duniya se vairaagya hai। sangam par hi baap aakar tumhein behad ki baaten samjhaate hain। abhi is puraani duniya se vairaagya karna hai। yeh bahut patit chhi-chhi duniya hai। yahaan shareer paavan ho na sake। aatma ko naya shareer satayug mein hi mil sakta hai। bhal yahaan aatma pavitra banti hai, parantu shareer phir bhi apvitra rehta hai, jab tak karmaateet avastha ho। sone mein khaad padti hai to jevar bhi khaad vaala banta hai। khaad nikal jaae to jevar bhi sachcha banega। in lakshmi-naaraayan ki aatma aur shareer donon satopradhaan hain। tumhaari aatma aur shareer donon hi tamopradhaan kaale hain। aatma kaam chita par baith kaali ban gai hai। baap kehte hain phir ham aakar saanvare se gora banaate hain। yeh gyaan ki saari baat hai। baaki paani aadi ki baat nahin। sab kaam chita par baith patit ban pade hain isliye raakhi bandhavaai jaati hai ki paavan banne ki pratigya karo।

baap kehte hain ham aatmaon se baat karte hain। main aatmaon ka baap hoon, jisko tum yaad karte aaye ho - baba aao, hamko sukhdhaam mein le chalo। duhkh haro, kaliyug mein hote hain apaar duhkh। baap samjhaate hain tum kaam chita par baith kaale tamopradhaan ho gaye ho। ab main aaya hoon - kaam chita se utaar gyaan chita par bithaane ke liye। ab pavitra ban svarga mein chalna hai। baap ko yaad karna hai। baap kashish karte hain। baba ke paas yugal aate hain - ek ko kashish hoti hai, doosre ko nahin hoti। puroosh ne phat se kah diya - ham is antim janma mein pavitra rahenge, kaam chita par nahin chadhenge। aise nahin ki nishchay ho gaya। nishchay agar hota to behad baap ko patra likhte, connection mein rehte। suna hai pavitra rehte hain, apne dhandhe aadi mein hi masta rehte hain। baap ki yaad hi kahaan hai। aise baap ko to bahut yaad karna chaahiye। stri-puroosh ka aapas mein kitna pyaar hota hai, pati ko kitna yaad karti hai। behad ke baap ko to sabse jaasti yaad karna chaahiye। gaayan bhi hai na - pyaar karo chaahe thukraao, ham haath kabhi nahin chhodenge। aise nahin, yahaan aakar rehna hai, woh to phir sannyaas ho gaya। gharbaar chhod yahaan aakar rahen। tumko to kaha jaata hai, grihastha vyavhaar mein rehte pavitra bano। yeh pahle to bhatthi banni thi, jisse itne taiyaar ho nikle, unka bhi bahut achha vritaanta hain। jo baap ka bankar andar (yagya mein) rahkarke roohaani service nahin karte woh jaakar daas-daasiyaan bante hain phir pichhaadi mein nambarvaar purooshaartha anusaar taaj mil jaata hai। unhon ka bhi gharaana hota hai, praja mein nahin aa sakte। koi baahar ka aae andar vaala nahin ban sakta। vallabhaachaari baahar vaalon ko kabhi andar aane nahin dete hain। yeh sab samajhne ki baaten hain। gyaan hai second ka, phir baap ko gyaan ka saagar kyon kaha jaata hai? samjhaate hi rehte hain pichhaadi tak samjhaate hi rahenge। jab raajdhaani sthaapan ho jaayegi tum karmaateet avastha mein aa jaayenge phir gyaan poora ho jaayega। hai second ki baat। parantu phir samjhaana padta hai। had ke baap se had ka varsa, behad ka baap vishwa ka maalik bana dete hain। tum sukhdhaam mein jaayenge to baaki sab shantidham mein chale jaayenge। vahaan to hai hi sukh hi sukh। yeh to khaatiri hai - baap aaye hain। ham nai duniya ke maalik ban rahe hain - raajayog ki padhaai se। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) is patit chhi-chhi duniya se behad ka vairaagya rakh aatma ko paavan banaane ka poora-poora purooshaartha karna hai। ek baap ki hi kashish mein rehna hai।

2) gyaan ki dhaarna se apni battery bharni hai। gyaan ratnon se svayan ko dhanvaan banaana hai। abhi kamaai ka samay hai isliye ghaate se bachna hai।

vardaan:- gyaan ratnon ko dhaaran kar vyartha ko samaapta karne vaale holeehans bhav

holeehans ki do visheshtaayen hain - ek hai gyaan ratna chugna aur doosra nirnay shakti dvaara doodh aur paani ko alag karna। doodh aur paani ka arth hai - samartha aur vyartha ka nirnay। vyartha ko paani ke samaan kehte hain aur samartha ko doodh samaan। to vyartha ko samaapta karna arthaat holeehans banna। har samay buddhi mein gyaan ratna chalte rahe, manan chalta rahe to ratnon se bharpoor ho jaayenge।

slogan:- sada apne shreshtha position mein sthit rah opposition ko samaapta karne vaale hi vijayi aatma hain।