Murli du jour du mardi 10 septembre 2024

10-09-2024 praatahmurli om shanti "baapdaada"' madhuban

“meethe bachche - maaya ko vash karne ka mantra hai manmanaabhav, isi mantra mein sab khoobiyaan samaai hui hain, yahi mantra tumhein pavitra bana deta hai''

prashn:- aatma ki safety ka number one saadhan kaun-sa hai aur kaise?

uttar:- yaad ki yaatra hi safety ka number one saadhan hai kyonki is yaad se hi tumhaare character sudharte hain। tum maaya par jeet pa lete ho। yaad se patit karmendriyaan shant ho jaati hain। yaad se hi bal aata hai। gyaan talvaar mein yaad ka jauhar chaahiye। yaad se hi meethe satopradhaan banenge। koi ko bhi naaraaz nahin karenge isliye yaad ki yaatra mein kamzor nahin banna hai। apne aapse poochhna hai ki ham kahaan tak yaad mein rehte hain?

om shanti। meethe-meethe roohaani bachchon ko roz-roz saavdhaani zaroor deni hoti hai। kaun si? safety first। safety kya hai? yaad ki yaatra se tum bahut-bahut safe rehte ho। mool baat hi bachchon ke liye yeh hai। baap ne samjhaaya hai - tum bachche jitna yaad ki yaatra mein tatpar rahenge utni khushi bhi rahegi aur manners bhi theek honge kyonki paavan bhi banna hai। characters bhi sudhaarna hai। apni jaanch karni hai - mera character kisko duhkh dene jaisa to nahin hai! mujhe koi deh-abhimaan to nahin aa jaata hai? yeh achhi reeti apni jaanch rakhni hai। baap baith bachchon ko padhaate hain। tum bachche padhte bhi ho to phir padhaate bhi ho। behad ka baap sirf padhaate hain। baaki to sab hain dehdhaari। ismen saari duniya aa jaati hai। ek baap hi videhi hai। woh tum bachchon ko kehte hain ki tumko bhi videhi banna hai। main aaya hoon tumko videhi banaane। pavitra bankar hi vahaan jaayenge। chhi-chhi ko to saath le nahin jaayenge isliye pahle-pahle mantra hi yeh dete hain। maaya ko vash karne ka yeh mantra hai। pavitra hone ka yeh mantra hai। is mantra mein bahut khoobiyaan bhari hui hain, inse hi pavitra banna hai। manushya se devta banna hai। zaroor ham hi devta the isliye baap kehte hain - apni safety chaaho, majboot mahaaveer banna chaaho to yeh purooshaartha karo। baap to shiksha dete rahenge। bhal drama bhi kehte rahenge। drama anusaar bilkul theek hi chal raha hai phir aage ke liye bhi samjhaate rahenge। yaad ki yaatra mein kamjor nahin banna hai। baahar rahne vaali baandheli gopikaaen jitna yaad karti hain, utna saamne rahne vaale bhi yaad nahin karte hain kyonki unko tadphan hoti hai shivbaaba se milne ki। jo mil jaate hain unhon ka pet jaise ki bhar jaata hai। jo bahut yaad karte hain, woh oonch pad pa sakte hain। dekha jaata hai - achhe-achhe, bade-bade centres sambhaalne vaale mukhya bhi yaad ki yaatra mein kamzor hain। yaad ka jauhar bahut achha chaahiye। gyaan talvaar mein yaad ka jauhar na hone kaaran kisko teer lagta hi nahin, poora marte nahin। bachche koshish karte hain gyaan ka baan lagaakar baap ka banaayen va marjeeva banaayen। parantu marte nahin, to zaroor gyaan talvaar mein gadbad hai। baba bhal jaante hain - drama bilkul accurate chal raha hai, parantu aage ke liye to samjhaate rahenge na। harek apni dil se poochho - ham kahaan tak yaad karte hain? yaad se hi bal aayega isliye kaha jaata hai - gyaan talvaar mein jauhar chaahiye। gyaan to bahut sahaj reeti samjha sakte hain।

jitna-jitna yaad mein rahenge utna bade meethe bante jaayenge। tum satopradhaan the to bahut meethe the। ab phir satopradhaan banna hai। tumhaara svabhaav bhi bahut meetha chaahiye। kabhi ranj (naaraaz) nahin hona chaahiye। aisa vaataavran na ho jo koi ranj ho। aisi koshish karni chaahiye kyonki yeh eeshvareey college sthaapan karne ki service bahut oonchi hai। vishwa vidyaalay to bhaarat mein bahut gaaye jaate hain। vaastav mein woh hain nahin। vishwa vidyaalay to ek hi hota hai। baap aakar sabko mukti-jeevanmukti dete hain। baap jaante hain saari duniya ke jo bhi manushya maatra hain, sab khatma hone hain। baap ko bulaaya bhi isliye hai ki chhi-chhi duniya ka khaatma aur nai duniya ki sthaapna karo। bachche bhi samajhte hain barobar baap aaya hua hai। abhi maaya ka pomp kitna hai। fall oph Pompey ka khel bhi dikhaate hain। bade-bade makaan aadi bana rahe hain - yeh hai pomp। satayug mein itne manzil ke makaan bante nahin hain। yahaan bante hain kyonki rahne ke liye jameen kam hai। vinaash jab hota hai tab sab bade-bade makaan bhi gir padte hain। aage itni badi-badi building nahin banti thi। bombs jab chhodenge to aise girenge jaise taash ke patte girte hain। iska matlab yeh nahin ki vahi marenge baaki doosre rah jaayenge। nahin, jo jahaan hoga chaahe samudra par ho, prithvi par ho, aakaash mein ho, pahaadon par ho, ud raha ho… sab khatma ho jaayenge। yeh puraani duniya hai na। jo bhi 84 laakh yoniyaan hain, yeh sab khatma ho jaani hain। vahaan nai duniya mein yeh kuchh bhi hoga nahin। na itne manushya honge, na machchhar, na jeev jantu aadi honge। yahaan to dher ke dher hain। ab tum bachche bhi devta bante ho to vahaan har cheez satopradhaan hoti hai। yahaan bhi bade aadmi ke ghar mein jaayenge to badi saphaai aadi rehti hai। tum to sabse jaasti bade devta bante ho। bade aadmi bhi nahin kahenge। tum bahut oonch devtaayen bante ho, yeh koi nai baat nahin hai। 5 hazaar varsha pahle bhi tum yeh bane the nambarvaar। yeh itna kichda aadi vahaan kuchh bhi nahin hoga। bachchon ko badi khushi hoti hai - ham bahut oonch devta bante hain। ek hi baap hamko padhaane vaala hai jo hamko bahut oonch banaate hain। padhaai mein hamesha nambarvaar position vaale hote hain। koi kam padhte hain, koi jaasti padhte hain। ab bachche purooshaartha kar rahe hain, bade-bade centres khol rahe hain isliye ki badon-badon ko maaloom pade। bhaarat ka praacheen raajayog bhi gaaya hua hai। khaas vilaayat vaalon ko jaasti utsukta hoti hai - raajayog seekhne ki। bhaaratvaasi to tamopradhaan buddhi hain। woh phir bhi tamo buddhi hain isliye unhon ko shauk rehta hai bhaarat ka praacheen raajayog seekhne ka। bhaarat ka praacheen raajayog naameegraami hai, jisse hi bhaarat svarga bana tha। bahut thode aate hain, jo poori reeti samajhte hain। svarga heaven paas ho gaya so phir hoga zaroor। heaven athva paradise hai sabse wonder oph world। svarga ka kitna naam baala hai। svarga aur narka, shivaalay aur veshyaalay। bachchon ko ab nambarvaar yaad hai ki hamko ab shivaalay mein jaana hai। vahaan jaane ke liye shivbaaba ko yaad karna hai। vahi panda hai sabko le jaane vaala। bhakti ko kaha jaata hai raat। gyaan ko kaha jaata hai din। yeh behad ki baat hai। nai cheez aur puraani cheez mein bahut pharka hota hai। ab bachchon ki dil hoti hai - itni oonch te oonch padhaai, oonche te oonche makaan mein ham padhaayen to bade-bade log aayenge। ek-ek ko baith samjhaana padta hai। vaastav mein padhaai va shiksha ke liye ekaanta mein sthaan hote hain। brahm-gyaaniyon ke bhi aashram shahar se door-door hote hain aur neeche hi rehte hain। itne oopar ki manzil par nahin rehte hain। abhi to tamopradhaan hone se shahar mein andar ghus pade hain। woh taakat khatma ho gai hai। is samay sabki battery khaali hai। ab battery ko kaise bharna hai - yeh baap ke sivaae koi bhi battery charge kar na sake। bachchon ko battery charge karne se hi taakat aati hai। uske liye mukhya hai yaad। usmein hi maaya ke vighna padte hain। koi to surgeon ke aage sach batlaate hain, koi chhipa lete hain। andar mein jo khaamiyaan hain, woh to baap ko batlaani pade। is janma mein jo paap kiye hain, woh avinaashi surgeon ke aage varnan karna chaahiye, nahin to woh dil andar khaata rahega। sunaane ke baad phir khaayega nahin। andar rakh lena - yeh bhi nuksaan-kaarak hai। jo sachche-sachche bachche bante hain, woh sab baap ko batla dete hain - is janma mein yeh-yeh paap kiye hain। din-pratidin baap zor dete rehte hain, yeh tumhaara antim janma hai। tamopradhaan se paap to zaroor hote honge na।

baap kehte hain main bahut janmon ke ant mein jo number one patit bana hai, unmein hi pravesh karta hoon kyonki unko hi phir number one mein jaana hai। bahut mehnat karni padti hai। is janma mein paap hue to hain na। kaiyon ko pata hi nahin padta hai ki ham yeh kya kar rahe hain। sach nahin batlaate hain। koi-koi sach batla dete hain। baap ne samjhaaya hai - bachche, tumhaari karmendriyaan shant tab hoti hain, jab karmaateet avastha banti hain। jaise manushya boodhe hote hain to karmendriyaan automatically shant ho jaati hain। ismen to chhotepan mein hi sab shant ho jaana chaahiye। yogbal mein achhi tarah rahe to in sab baaton ki end ho jaae। vahaan koi aisi gandi beemaari, kichadpatti aadi kuchh nahin hota hai। manushya bade saaph-shuddh rehte hain। vahaan hai hi raam raajya। yahaan hai raavan raajya, to anek prakaar ki gandagi ki beemaariyaan aadi hain। satayug mein yeh kuchh hoti nahin। baat mat poochho। naam hi kitna first class hai - svarga, nai duniya। badi saphaai rehti hai। baap samjhaate hain - is purooshottam sangamayug par hi tum yeh sab baaten sunte ho। kal nahin sunte the। kal mrityulok ke maalik the, aaj amar-lok ke maalik bante ho। nishchay ho jaata hai kal mrityulok mein the, abhi sangamayug par aane se amarlok mein jaane ke liye tum purooshaartha kar rahe ho। padhaane vaala bhi ab mila hai। jo achhi reeti padhte hain to paisa aadi bhi achha kamaate hain। balihaari padhaai ki kahenge। yeh bhi aise hai। is padhaai se tum bahut oonch pad paate ho। abhi tum roshni mein ho। yeh bhi sivaae tum bachchon ke aur koi ko maaloom nahin hai। tum bhi phir ghadi-ghadi bhool jaate ho। puraani duniya mein chale jaate ho। bhoolna maana puraani duniya mein chale jaana।

abhi tum sangamayugi braahmanon ko maaloom hai ki ham kaliyug mein nahin hain। yeh sadaiv yaad rakhna hai ham naye vishwa ke maalik ban rahe hain। baap hamko padhaate hi hain nai duniya mein jaane ke liye। yeh hai shuddh ahankaar। woh hai ashuddha ahankaar। tum bachchon ko to kabhi ashuddha khyaalaat bhi nahin aane chaahiye। purooshaartha karte-karte aakhreen pichhaadi mein result niklegi। baap samjhaate hain is samay tak sab purooshaarthi hain। imtahaan jab hota hai to nambarvaar paas ho phir transfer ho jaate hain। tumhaari hai behad ki padhaai jisko sirf tum hi jaante ho। tum kitna samjhaate ho। naye-naye aate rehte hain behad ke baap se varsa paane ke liye। bhal door rehte hain phir bhi sunte-sunte nishchay buddhi ho jaate hain - aise baba ke sammukh bhi jaana chaahiye। jis baap ne bachchon ko padhaaya hai, aise baap se sammukh to zaroor milna chaahiye। samajhkar hi yahaan aate hain। koi nahin samjhe hue hain to bhi yahaan aane se samajh jaate hain। baap kehte hain dil mein koi bhi baat ho, samajh mein nahin aati ho to bhal poochho। baap to chumbak hai na। jiski takdeer mein hai woh achhi reeti pakad sakte hain। takdeer mein nahin hai to phir khalaas। suna-ansuna kar dete hain। yahaan kaun baith padhaate hain? bhagwan। unka naam hai shiv। shivbaaba hi hamko svarga ki baadshaahi dete hain। phir kaun-si padhaai achhi? tum kahenge hamko shivbaaba padhaate hain jisse 21janmon ki baadshaahi milti hai। aise-aise samjhaate-samjhaate le jaate hain। koi to poora na samajhne kaaran itni service nahin kar sakte hain। bandhan ki janjeeron mein jakde rehte hain। shuru mein to tum kaise apne ko janjeeron se chhudaakar aaye। jaise koi mastaane hote hain। yeh bhi drama mein part tha jo kashish hui। drama mein bhatthi banni thi। jeete ji mare phir maaya ki taraph koi-koi chale gaye। yuddha to hoti hai na। maaya dekhti hai - isne badi himmat dikhaai hai। ab ham bhi thok kar dekhte hain ki pakke hain va nahin? bachchon ki kitni sambhaal hoti thi। sab kuchh sikhlaate the। tum bachche album aadi dekhte ho lekin sirf chitra dekhne se bhi samajh na saken। koi baith samjhaaye ki kya-kya hota tha। kaise bhatthi mein pade the, phir koi kaise nikle, koi kaise। jaise roopaye chhapte hain to bhi koi-koi kharaab ho padte hain। yeh bhi eeshvareey missionary hai। eeshvar baith dharma ki sthaapna karte hain। yeh baat kisko bhi pata nahin hai। baap ko bulaate bhi hain parantu jaise tavaai, samajhte hi nahin। kehte hain yeh kaise ho sakta hai। maaya raavan ekdam aisa bana deti hai। shivbaaba ki pooja bhi karte hain phir kah dete sarvavyaapi। shivbaaba kehte ho phir sarvavyaapi kaise hoga। pooja karte hain, ling ko shiv kehte hain। aise thode hi kehte ki ismen shiv baitha hai। ab patthar-thikkar mein bhagwan ko kehna.. to kya sab bhagwan hi bhagwan hain। bhagwan unlimited to nahin honge na। to baap bachchon ko samjhaate hain, kalpa pahle bhi aise samjhaaya tha। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) aisa meetha vaataavran banaana hai jismen koi bhi naaraaz na ho। baap samaan videhi banne ka purooshaartha karna hai। yaad ke bal se apna svabhaav meetha aur karmendriyaan shant karni hain।

2) sada isi nashe mein rehna hai ki abhi ham sangamayugi hain, kaliyugi nahin। baap humein naye vishwa ka maalik banaane ke liye padha rahe hain। ashuddha khyaalaat samaapta kar dene hain।

vardaan:- akaal takhta aur diltakhta par baith sada shreshtha karma karne vaale karmayogi bhav

is samay aap sabhi bachchon ko do takhta milte hain - ek akaal takhta, doosra dil takhta। lekin takhta par vahi baithta hai jiska raajya hota hai। jab akaal takhtansheen hain to svaraajya adhikaari hain aur baap ke dil takhtansheen hain to baap ke varse ke adhikaari hain, jismen raajya bhaagya sab aa jaata hai। karmayogi arthaat donon takhtansheen। aisi takhtansheen aatma ka har karma shreshtha hota hai kyonki sab karmendriyaan law aur order par rehti hain।

slogan:- jo sada svamaan ki seat par set rehte hain vahi gunvaan aur mahaan hain।