Murli du jour du jeudi 12 septembre 2024

12-09-2024 praatahmurli om shanti "baapdaada"' madhuban

“meethe bachche - brahman hain choti aur shoodra hain paanv, jab shoodra se brahman banen tab devta ban sakenge''

prashn:- tumhaari shubh bhaavna kaun-si hai, jiska bhi manushya virodh karte hain?

uttar:- tumhaari shubh bhaavna hai ki yeh puraani duniya khatma ho nai duniya sthaapan ho jaae iske liye tum kehte ho ki yeh puraani duniya ab vinaash hui ki hui। iska bhi manushya virodh karte hain।

prashn:- is indraprastha ka mukhya kaayda kya hai?

uttar:- koi bhi patit shoodra ko is indraprastha ki sabha mein nahin la sakte। agar koi le aate hain to us par bhi paap lag jaata hai।

om shanti। roohaani bachchon prati roohaani baap baith samjhaate hain। roohaani bachche jaante hain ham apne liye apna daivi raajya phir se sthaapan kar rahe hain kyonki tum brahmaakumaar-kumaariyaan ho, tum hi jaante ho। parantu maaya tumhein bhi bhula deti hai। tum devta banna chaahte ho to maaya tumko brahman se shoodra bana deti hai। shivbaaba ko yaad na karne se brahman shoodra ban jaate hain। bachchon ko yeh maaloom hai ki ham apna raajya sthaapan kar rahe hain। jab raajya sthaapan ho jaayega phir yeh puraani srishti nahin rahegi। sabko is vishwa se shantidham mein bhej dete hain। yeh hai tumhaari bhaavna। parantu tum jo kehte ho yeh duniya khatma ho jaani hai to zaroor log virodh karenge na। kahenge ki brahmaakumaariyaan yeh phir kya kehti hain। vinaash, vinaash hi kehti rehti hain। tum jaante ho is vinaash mein hi khaas bhaarat aur aam duniya ki bhalaai hai। yeh baat duniya vaale nahin jaante। vinaash hoga to sab chale jaayenge muktidhaam। abhi tum eeshvareey sampradaay ke bane ho। pahle aasuri sampradaay ke the। tumko eeshvar khud kehte hain maamekam yaad karo। yeh to baap jaante hain sadaiv yaad mein koi rah na sake। sadaiv yaad rahe to vikarma vinaash ho jaaen phir to karmaateet avastha ho jaae। abhi to sab purooshaarthi hain। jo brahman banenge vahi devta banenge। braahmanon ke baad hain devtaayen। baap ne samjhaaya hai brahman hain choti। jaise bachche baajoli khelte hain - pahle aata hai maatha choti। braahmanon ko hamesha choti hoti hai। tum ho brahman। pahle shoodra arthaat pair the। abhi bane ho brahman choti phir devta banenge। devta kehte hain mukh ko, kshatriy bhujaaon ko, vaishya pet ko, shoodra pair ko। shoodra arthaat kshudra buddhi, tuchchha buddhi। tuchchha buddhi unko kehte hain jo baap ko nahin jaante aur hi baap ki glaani karte rehte hain। tab baap kehte hain jab-jab bhaarat mein glaani hoti hai, main aata hoon। jo bhaaratvaasi hain baap unhon se hi baat karte hain। yada yadaahi dharmasya… baap aate bhi hain bhaarat mein। aur koi jagah aate hi nahin। bhaarat hi avinaashi khanda hai। baap bhi avinaashi hai। woh kabhi janma-maran mein nahin aate। baap avinaashi aatmaon ko hi baith sunaate hain। yeh shareer to hai vinaashi। abhi tum shareer ka bhaan chhodkar apne ko aatma samajhne lage ho। baap ne samjhaaya tha ki holi par koki pakaate hain to koki saari jal jaati hai, dhaaga nahin jalta। aatma kabhi vinaash nahin hoti hai। is par hi yeh misaal hai। yeh koi bhi manushya maatra ko maaloom nahin ki aatma avinaashi hai। woh to kah dete aatma nirlep hai। baap kehte hain - nahin, aatma hi achha va bura karma karti hai is shareer dvaara। ek shareer chhod phir doosra leti hai aur karmabhog bhogti hai, to woh hisaab-kitaab le aai na, isliye aasuri duniya mein manushya apaar duhkh bhogte hain। aayu bhi kam rehti hai parantu manushya in duhkhon ko bhi sukh samajh baithe hain। tum bachche kitna kehte ho nirvikaari bano phir bhi kehte hain vish bigar ham rah nahin sakte hain kyonki shoodra sampradaay hain na। kshudra buddhi hain। tum bane ho brahman choti। choti to sabse oonch hai। devtaaon se bhi oonch hai। tum is samay devtaaon se bhi oonch ho kyonki baap ke saath ho। baap is samay tumko padhaate hain। baap obedient servant bana hai na। baap bachchon ka obedient servant hota hai na। bachche ko paida kar, sambhaal kar, padhaakar phir bada kar jab budhe hote hain to saari milkiyat bachche ko dekar khud guru kar kinaare jaakar baithte hain। vaanaprasthi ban jaate hain। muktidhaam jaane ke liye guru karte hain। parantu woh muktidhaam mein to ja na saken। to maa-baap bachchon ki sambhaal karte hain। samjho maa beemaar padti hai, bachche tatti kar dete hain to baap ko uthaani pade na। to maa-baap bachche ke servant thahre na। saari milkiyat bachchon ko de dete hain। behad ka baap bhi kehte hain main jab aata hoon to koi chhote bachchon ke paas nahin aata hoon। tum to bade ho na। tumko baith shiksha dete hain। tum shivbaaba ke bachche bante ho to bi.ke. kahlaate ho। unse pahle shoodra kumaar-kumaari the, veshyaalay mein the। abhi tum veshyaalay mein rahne vaale nahin ho। yahaan koi vikaari rah na saken। hukm nahin। tum ho bi.ke.। yeh sthaan hai hi bi.ke. ke rahne liye। koi-koi bahut anaadi bachche hain jo yeh samajhte nahin ki shoodra kaha jaata hai patit vikaar mein jaane vaale ko, unhon ko yahaan rahne ka hukm nahin, aa nahin sakte। indra sabha ki baat hai na। indrasbha to yeh hai, jahaan gyaan varsha hoti hai। koi bi.ke. ne apvitra ko chhipaakar sabha mein bithaaya to donon ko shraap mil gaya ki patthar ban jaao। sachcha-sachcha yeh indraprastha hai na। yeh koi shoodra kumaar-kumaariyon ka satsang nahin hai। pavitra hote hain devtaayen, patit hote hain shoodra। patiton ko baap aakar paavan devta banaate hain। abhi tum patit se paavan ban rahe ho। to yeh ho gai indra sabha। agar bigar poochhe koi vikaari ko le aate hain to bahut saza mil jaati hai। pattharbuddhi ban jaate hain। yahaan paaras buddhi ban rahe ho na। to unko jo le aate hain, unko bhi shraap mil jaata hai। tum vikaariyon ko chhipaakar kyon le aai? indra (baap) se poochha bhi nahin। to kitni saja milti hai। yeh hain gupta baaten। abhi tum devta ban rahe ho। bade kade kaayde hain। avastha hi gir padti hai। ekdam pattharbuddhi ban padte hain। hain bhi pattharbuddhi। paarasbuddhi banne ka purooshaartha hi nahin karte। yeh gupta baaten hain jo tum bachche hi samajh sakte ho। yahaan bi.ke. rehte hain, unhon ko devta arthaat pattharbuddhi se paarasbuddhi baap bana rahe hain।

baap meethe-meethe bachchon ko samjhaate hain - koi bhi kaayda na tode। nahin to unhein 5 bhoot pakad lenge। kaam, krodh, lobh, moh, ahankaar - yeh 5 bade-bade bhoot hain, aadhaakalpa ke। tum yahaan bhooton ko bhagaane aaye ho। aatma jo shuddh pavitra thi woh apvitra, ashuddha, duhkhi, rogi ban gai hai। is duniya mein athaah duhkh hain। baap aakar gyaan varsha karte hain। tum bachchon dvaara hi karte hain। tumhaare liye svarga rachte hain। tum hi yogbal se devta bante ho। baap khud nahin bante hain। baap to hai servant। teacher bhi student ka servant hota hai। seva kar padhaate hain। teacher kehte hain ham tumhaara most obedient servant hoon। koi ko barrister, engineer aadi banaate hain to servant hua na। vaise hi guru log bhi raasta bataate hain। servant ban muktidhaam le jaane ki seva karte hain। parantu aajkal to guru koi le nahin ja sakte hain kyonki woh bhi patit hain। ek hi satguru sada pavitra hai baaki guru log bhi sab patit hain। yeh duniya hi saari patit hai। paavan duniya kaha jaata hai satayug ko, patit duniya kaha jaata hai kaliyug ko। satayug ko hi poora svarga kahenge। treta mein do kala kam ho jaati hain। yeh baaten tum bachche hi samajhkar aur dhaaran karte ho। duniya ke manushya to kuchh nahin jaante। aise bhi nahin, saari duniya svarga mein jaayegi। jo kalpa pahle the, vahi bhaaratvaasi phir aayenge aur satayug-treta mein devta banenge। vahi phir dvaapar se apne ko hindu kahlaayenge। yoon to hindu dharma mein ab tak bhi jo aatmaayen oopar se utarti hain, woh bhi apne ko hindu kahlaati hain lekin woh to devta nahin banengi aur na hi svarga mein aayengi। woh phir bhi dvaapar ke baad apne samay par utrengi aur apne ko hindu kahlaayengi। devta to tum hi bante ho, jinka aadi se ant tak part hai। yeh drama mein badi yukti hai। bahuton ki buddhi mein nahin baithta hai to oonch pad bhi nahin pa sakte hain।

yeh hai satya naaraayan ki katha। woh to jhoothi katha sunaate hain, usse koi lakshmi va naaraayan bante thode hi hain। yahaan tum practical mein bante ho, kaliyug mein hai hi sab jhooth। jhoothi maaya....... raavan ka raajya hai hi jhooth। sach khanda baap banaate hain। yeh bhi tum brahman bachche jaante ho, so bhi nambarvaar purooshaartha anusaar kyonki padhaai hai, koi bahut thoda padhte hain to fail ho padte hain। yeh to ek hi baar padhaai ho sakti hai। phir to padhna mushkil ho jaayega। shuru mein jo padhkar shareer chhodkar gaye hain to sanskaar woh lekar gaye hain। phir aakar padhte honge। naam-roop to badal jaata hai। aatma ko hi saara 84 ka part mila hua hai, jo bhinna-bhinna naam, roop, desh, kaal mein part bajaati hai। itni chhoti aatma unko kitna bada shareer milta hai। aatma to sabmen hoti hai na। itni chhoti aatma itne chhote machchhar mein bhi hai। yeh sab bahut sookshm samajhne ki baaten hain। jo bachche yeh achhi reeti samajhte hain vahi maala ka daana bante hain। baaki to jaakar paai paise ka pad paayenge। abhi tumhaara yeh phoolon ka bageecha ban raha hai। pahle tum kaante the। baap kehte hain kaam vikaar ka kaanta bada kharaab hai। yeh aadi, madhya, ant duhkh deta hai। duhkh ka mool kaaran hi hai kaam। kaam ko jeetne se hi jagatjeet banenge, ismen hi bahuton ko mushkilaaten feel hoti hain। bada mushkil pavitra bante hain। jo kalpa pahle bane the vahi banenge। samjha jaata hai kaun purooshaartha kar oonch te oonch devta banenge। nar se naaraayan, naari se lakshmi bante hain na। nai duniya mein stri-puroosh donon paavan the। ab patit hain। paavan the to satopradhaan the। abhi tamopradhaan ban gaye hain। yahaan donon ko purooshaartha karna hai। yeh gyaan sannyaasi de nahin sakte। woh dharma hi alag hai, nivritti maarga ka। yahaan bhagwan to stri-puroosh donon ko padhaate hain। donon ko kehte hain ab shoodra se brahman bankar phir lakshmi-naaraayan banna hai। sab to nahin banenge। lakshmi-naaraayan ki bhi dynasty hoti hai। unhon ne raajya kaise liya - yeh koi nahin jaante hain। satayug mein inka raajya tha, yeh bhi samajhte hain parantu satayug ko phir laakhon varsha de diya hai to yeh agyaanta hui na। baap kehte hain yeh hai hi kaanton ka jangal। woh hai phoolon ka bageecha। yahaan aane se pahle tum asur the। abhi tum asur se devta ban rahe ho। kaun banaate hain? behad ka baap। devtaaon ka raajya tha to doosra koi tha nahin। yeh bhi tum samajhte ho। jo nahin samajh sakte hain, unko hi patit kaha jaata hai। yeh hai brahmaakumaar-kumaariyon ki sabha। agar koi shaitaani ka kaam karte hain to apne ko shraapit kar dete hain। pattharbuddhi ban padte hain। sone ki buddhi nar se naaraayan banne vaale to hain nahin - proof mil jaata hai। third grade daas-daasiyaan jaakar banenge। abhi bhi raajaaon ke paas daas-daasiyaan hain। yeh bhi gaayan hai - kinki dabi rahegi dhool mein.......। aag ke gole bhi aayenge to zahar ke gole bhi aayenge। maut to aana hai zaroor। aisi-aisi cheejen taiyaar kar rahe hain jo koi manushya ki va hathiyaaron aadi ki darkaar nahin rahegi। vahaan se baithe-baithe aise bombs chhodenge, unki hava aise phailegi jo jhat khalaas kar degi। itne karodon manushyon ka vinaash hona hai, kam baat hai kya! satayug mein kitne thode hote hain। baaki sab chale jaayenge shantidham, jahaan ham aatmaayen rehti hain। sukhdhaam mein hai svarga, duhkhadhaam mein hai yeh narka। yeh chakra phirta rehta hai। patit ban jaane se duhkhadhaam ban jaata hai phir baap sukhdhaam mein le jaate hain। parampita paramatma abhi sarva ki sadgati kar rahe hain to khushi honi chaahiye na। manushya darte hain, yeh nahin samajhte maut se hi gati-sadgati honi hai। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) phoolon ke bageeche mein chalne ke liye andar jo kaam-krodh ke kaante hain, unhein nikaal dena hai। aisa koi karma nahin karna hai jisse shraap mil jaae।

2) sachkhanda ka maalik banne ke liye satya naaraayan ki sachchi katha sunni aur sunaani hai। is jhooth khanda se kinaara kar lena hai।

vardaan:- light ke aadhaar par gyaan-yog ki shaktiyon ka prayog karne vaale prayogshaali aatma bhav

jaise prakriti ki light science ke anek prakaar ke prayog practical mein karke dikhaati hai, aise aap avinaashi parmaatma light, aatmik light aur saath-saath practical sthiti ki light dvaara gyaan yog ki shaktiyon ka prayog karo। yadi sthiti aur swaroop double light hai to prayog ki saphalta bahut sahaj hoti hai। jab har ek svayan ke prati prayog mein lag jaayenge to prayogshaali aatmaon ka powerful sangathan ban jaayega।

slogan:- vighnon ke ansh aur vansh ko samaapta karne vaale hi vighna-vinaashak hain।