Murli du jour du mardi 17 septembre 2024

17-09-2024 praatahmurli om shanti "baapdaada"' madhuban

“meethe bachche - yeh raaz sabhi ko sunaao ki aabu sabse bada teertha hai, svayan bhagwan ne yahaan se sabki sadgati ki hai''

prashn:- kaun-si ek baat manushya agar samajh jaaen to yahaan bheed lag jaayegi?

uttar:- mukhya baat samajh len ki baap ne jo raajayog sikhaaya tha, woh abhi phir se sikha rahe hain, woh sarvavyaapi nahin hai। baap is samay aabu mein aakar vishwa mein shanti sthaapan kar rahe hain, uska jad yaadgaar delvaada mandir bhi hai। aadi dev yahaan chaitanya mein baithe hain, yeh chaitanya delvaada mandir hai, yeh baat samajh len to aabu ki mahima ho jaae aur yahaan bheed lag jaae। aabu ka naam baala ho gaya to yahaan bahut aayenge।

om shanti। bachchon ko yog sikhaaya। aur sab jagah sab aapehi seekhte hain, sikhlaane vaala baap nahin hota। ek-do ko aapehi sikhlaate hain। yahaan to baap baith sikhlaate hain bachchon ko। raat-din ka pharka hai। vahaan to bahut mitra-sambandhi aadi yaad aate rehte hain, itna yaad nahin kar sakte hain isliye dehi-abhimaani bahut mushkil bante hain। yahaan to dehi-abhimaani tumko bahut jaldi banna chaahiye, parantu bahut hain jinko kuchh bhi pata nahin hai। shivbaaba hamaari service kar rahe hain, hamko kehte hain apne ko aatma samajh baap ko yaad karo। jo baap ismen viraajmaan hain, yahaan viraajmaan hain, unko yaad karna padta hai। bahut bachche hain jinko yeh nishchay hi nahin hai ki shivbaaba brahma tan dvaara hamko sikhla rahe hain, jaise aur log kehte hain, ham kaise nishchay karen, aise yahaan bhi hain। agar poora nishchay hota to bahut pyaar se baap ko yaad karte-karte apne mein bal bharte, bahut service karte kyonki saare vishwa ko paavan banaana hai na। yog mein bhi kami hai to gyaan mein bhi kami hai। sunte to hain parantu dhaarna nahin hoti hai। dhaarna agar ho to phir auron ko bhi dhaarna karaaven। baba ne samjhaaya tha ve log conference aadi karte rehte hain, vishwa mein shanti chaahte hain parantu vishwa mein shanti kab thi, kis prakaar hui thi, woh kuchh bhi nahin jaante। kis prakaar ki shanti thi, vahi chaahiye na। yeh to tum bachche hi jaante ho vishwa mein sukh-shanti ki sthaapna ab ho rahi hai। baap aaya hua hai। kaise yeh delvaada mandir hai, aadi dev bhi hai aur oopar mein vishwa mein shanti ka nazaara bhi hai। kahaan bhi conference aadi mein tumko bulaate hain to tum poochho - vishwa mein shanti kis prakaar ki chaahiye? in lakshmi-naaraayan ke raajya mein vishwa mein shanti thi। woh to delvaada mandir mein poora yaadgaar hai। vishwa mein shanti ka sample to chaahiye na। lakshmi-naaraayan ke chitra se bhi samajhte nahin hain। pattharbuddhi hain na। to unhon ko bataana chaahiye ki ham bata sakte hain vishwa mein shanti ka sample ek to yeh lakshmi-naaraayan hain aur phir inhon ki raajdhaani bhi dekhna chaahte ho to woh bhi delvaada mandir mein chalkar dekho। model hi dikhaaya jaayega na, woh chalkar aabu mein dekho। mandir banaane vaale khud nahin jaante hain, jinhonne hi baith yeh yaadgaar banaaya hai, jiska delvaada mandir naam rakh diya hai। aadi dev ko bhi bithaaya hai, oopar mein svarga bhi dikhaaya hai। jaise woh jad hai vaise tum ho chaitanya। inko chaitanya delvaada naam rakh sakte hain। parantu pata nahin kitni bheed ho jaae। manushya hi moonjh jaaen yeh phir kya hai। sam-jhaane mein badi mehnat lagti hai। bahut bachche bhi nahin samajhte hain। bhal dar par, paas mein baithe hain - samajhte kuchh bhi nahin। pradarshani mein anek prakaar ke manushya jaate hain, dher math-panth hain, vaishnav dharma vaale bhi hain। vaishnav dharma ka arth hi nahin samajhte hain। shreekrishna ki baadshaahi kahaan hai, jaante hi nahin। shreekrishna ki raajaai ko bhi svarga, baikuntha kaha jaata hai।

baba ne kaha tha jahaan bulaava ho, vahaan jaakar tum samjhaao - vishwa mein shanti kab thi? yeh aabu sabse oonch te oonch teertha hai kyonki yahaan baap vishwa ki sadgati kar rahe hain, aabu pahaadi par unka sample dekhna ho to chalkar delvaada mandir dekho। vishwa mein shanti kaise sthaapan ki thi - unka sample hai। sunkar bahut khush honge। jaini log bhi khush honge। tum kahenge yeh prajaapita brahma hamaara baap hai aadi dev। tum samjhaate ho phir bhi samajhte nahin hain। kehte hain brahmaakumaariyaan pata nahin kya kehti hain। to ab tum bachchon ko aabu ki bahut oonchi mahima karke samjhaana chaahiye। aabu hai bade te bada teertha। baambe mein bhi samjha sakte ho - aabu pahaad bade te bada teertha hai kyonki parampita paramatma ne aabu mein aakar svarga ki sthaapna ki hai। kaise svarga ki rachna rachi hai - woh svarga ka aur aadi dev ka model sab aabu mein hai, jisko koi bhi manushya samajhte nahin। ham ab jaante hain, tum nahin jaante ho isliye ham tumko samjhaate hain। pahle to tum poochho ki vishwa mein shanti kis prakaar chaahte ho, kabhi dekha hai? vishwa mein shanti to inke (lakshmi-naaraayan ke) raajya mein thi। ek hi aadi sanaatan devi-devta dharma tha, inki dynasty ka raajya tha। chalo to inhon ki raajdhaani ka model aabu mein tumko dikhaayen। yeh to hai hi puraani patit duniya। nai duniya to nahin kahenge na। nai duniya ka model to yahaan hai, nai duniya ab sthaapan ho rahi hai। tum jaante ho tab batlaate ho। sabhi nahin jaante hain, na batlaate hain, na samajh mein hi aata hai। baat hai bahut sahaj। oopar mein svarga ki raajdhaani khadi hai, neeche aadi dev baitha hai jisko Adam bhi kehte hain। woh hai great-great grand father। aisi tum mahima sunaayenge to sunkar khush honge। hai bhi barobar accurate, kaho tum shreekrishna ki mahima karte ho parantu tum jaante to kuchh nahin ho। shreekrishna to baikuntha ka mahaaraaja, vishwa ka maalik tha। uska tum model dekhna chaahte ho to chalo aabu mein, tumko baikuntha ka model dikhlaayenge। kaise purooshottam sangamayug par raajayog seekhte hain, jisse phir vishwa ke maalik bane hain, woh bhi model dikhaaven। sangamayug ki tapasya bhi dikhaayen। practical jo hua tha unka yaadgaar dikhaayen। shivbaaba jisne lakshmi-naaraayan ka raajya sthaapan kiya, unka bhi chitra hai, amba ka bhi mandir hai। amba ko koi 10-20 bhujaayen nahin hain। bhujaayen to do hi hoti hain। tum aao to tumko dikhaayen। baikuntha bhi aabu mein dikhaayen। aabu mein hi baap ne aakar saare vishwa ko heaven banaaya hai। sadgati di hai। aabu sabse bada teertha hai, sab dharma vaalon ki sadgati karne vaala ek hi baap hai, unka yaadgaar chalo to aapko aabu mein dikhaayen। aabu ki to tum bahut mahima kar sakte ho। tumko sab yaadgaar dikhaayen। Christian log bhi jaanna chaahte hain - praacheen bhaarat ka raajayog kisne sikhaaya, kya cheez thi? bolo, chalo aabu mein dikhaayen। baikuntha bhi poora accurate banaaya hai oopar chhat mein। tum aisa nahin bana sakte ho। to yeh achhi reeti bataana hai। tourist dhakka khaate hain, woh bhi aakar samjhen। tumhaara aabu ka naam baala ho gaya to bahut aayenge। aabu bahut mashhoor ho jaayega। jab koi poochhte hain ki vishwa mein shanti kaise ho? sammelan aadi mein nimantran dete hain to poochhna chaahiye - vishwa mein shanti kab thi, woh jaante ho? vishwa mein shanti kaise thi - chalo ham samjhaayen, models aadi sab dikhaayen। aisa model aur kahaan bhi nahin hai। aabu hi sabse bada oonch te oonch teertha hai, jismen baap ne aakarke vishwa mein shanti, sarva ki sadgati ki hai। yeh baaten aur koi nahin jaante। tumhaare mein bhi nambarvaar hain, bhal bade mahaarthi, museum aadi sambhaalne vaale hain, parantu theek reeti kisko samjhaate hain va nahin, baba read to karte hain na। baba sab kuchh samajhte hain, jo bhi jahaan bhi hain, unko samajhte hain। kaun-kaun purooshaartha karte hain, kya pad paayenge? is samay agar mar pade to kuchh bhi pad pa nahin sakenge। yaad ke yaatra ki mehnat woh samajh nahin sakte। baap roz-roz nai baaten samjhaate hain, aise-aise samjhaakar le aao। yahaan to yaadgaar kaayam hai।

baap kehte hain main bhi yahaan hoon, aadi dev bhi yahaan hai, baikuntha bhi yahaan hai। aabu ki bahut bhaari mahima ho jaayegi। aabu pata nahin kya ho jaayega। jaise dekho kurookshetra ko achha banaane ke liye karodon roopaya udaate rehte hain। kitne dher manushya jaakar vahaan iktthe hote hain, itni badbu gandagi hoti hai, baat mat poochho। kitni bheed hoti hai। samaachaar aaya tha ki bhajan mandali ki ek bas nadi mein doob gai। yeh sab duhkh hai na। akaale mrityu hoti rehti hai। vahaan to aise kuchh hota hi nahin, yeh sab baaten tum samjha sakte ho। baatcheet karne vaala bada sensible chaahiye। baap gyaan ka pump kar rahe hain, buddhi mein bitha rahe hain। duniya thode hi in baaton ko samajhti hai। woh samajhte hain nai duniya ka sair karne jaate hain। baap kehte hain yeh duniya ab puraani gai ki gai। woh to kehte hain 40 hazaar varsha pade hain। tum to batlaate ho ki saara kalpa hi 5 hazaar varsha ka hai। puraani duniya ka to maut saamne khada hai। isko kaha jaata hai ghor andhiyaara। kumbhakran ki neend mein soye pade hain। kumbhakran aadhaakalpa sota tha, aadhaakalpa jaagta tha। tum kumbhakran the। yeh khel bada wonderful hai। in baaton ko sab thode hi samajh sakte hain। kai to aise hi bhaavna mein aa jaate hain। sunte hain yeh sab ja rahe hain to chal padte hain। unko bataate hain ham shivbaaba paas jaate hain, shivbaaba svarga ki sthaapna kar rahe hain। us behad ke baap ko yaad karne se behad ka varsa milta hai, bas। to woh bhi kah dete shivbaaba ham aapke bachche hain, aap se varsa zaroor lenge। bas, beda paar hai। bhaavna ka bhaada dekho kitna milta hai। bhakti maarga mein to hai alpakaal ka sukh। yahaan tum bachche jaante ho behad ke baap se behad ka varsa milta hai। woh to hai bhaavna ka, alpakaal ke sukh ka bhaada। yahaan tumko mila hai 21 janmon ke liye bhaavna ka bhaada। baaki saakshaatkaar aadi mein kuchh hai nahin। koi kehte hain saakshaatkaar ho, tab baba samajh jaate hain kuchh bhi samjha nahin hai। saakshaatkaar karna hai to jaakar naudha bhakti karo। usse kuchh milta nahin hai। karke doosre janma mein kuchh achha ban padenge। achha bhakta hoga to achha janma milega। yeh to baat hi nyaari hai। yeh puraani duniya badal rahi hai। baap hai hi duniya badalne vaala। yaadgaar khada hai na। bahut puraana mandir hai। kuchh tootta karta hai to phir marammat karaate rehte hain। parantu woh shobha to kam ho hi jaati hai। yeh to sab vinaashi cheezen hain। to baap samjhaate hain - bachche, ek to apne kalyaan ke liye apne ko aatma samajh baap ko yaad karo to vikarma vinaash hon। padhaai ki baat hai। baaki yeh jo mathura mein madhuban, kunja gali aadi baith banaaya hai, woh kuchh bhi hai nahin। na koi gop-gopiyon ka khel hai। yeh samjhaane mein badi mehnat karni padti hai। ek-ek point achhi reeti baith samjhaao। conference aadi mein bhi chaahiye yog vaala। talvaar mein jauhar nahin hoga, kisko teer lagega nahin। tab baap bhi kehte hain abhi deri hai। abhi maan len ki paramatma sarvavyaapi nahin hai to bheed lag jaae। parantu abhi time nahin hai। ek baat mukhya samajh jaaen ki raajayog baap ne sikhaaya tha, jo is samay sikhla rahe hain। iske badle naam uska daal diya hai jo ki abhi saanvara hai। kitni badi bhool hai। isse hi tumhaara beda doob gaya hai।

ab baap samjhaate hain - yeh padhaai source oph income hai, svayan baap manushya ko devta banaane ke liye padhaane aate hain, ismen pavitra bhi zaroor banna hai, daiveegun bhi dhaaran karne hain। nambarvaar to hote hi hain। jo bhi centres hain sab nambarvaar hain। yeh saari raajdhaani sthaapan ho rahi hai। maasi ka ghar thode hi hai। bolo, svarga kaha jaata hai satayug ko। parantu vahaan ka raajya kaise chalta hai, devtaaon ka jhunda dekhna ho to chalo aabu। aur koi aisi jagah hai nahin jahaan aise chhat mein raajaai dikhaai ho। bhal ajmer mein svarga ka model hai parantu woh aur baat hai। yahaan to aadi dev bhi hai na। satayug kisne aur kaise sthaapan kiya, yeh to accurate yaadgaar hai। abhi ham chaitanya delvaada naam likh nahin sakte hain। jab manushya khud samajh jaayenge to aapehi kahenge ki tum likho। abhi nahin। abhi to dekho thodi baat mein hi kya kar dete hain। krodhi bahut hote hain, deh-abhimaan hai na। dehi-abhimaani to koi ho na sake sivaae tum bachchon ke। purooshaartha karna hai। aise nahin ki jo naseeb mein hoga। purooshaarthi aise nahin kahenge। woh to purooshaartha karte rahenge phir jab fail hote hain tab kehte hain takdeer mein jo tha। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) dehi-abhimaani banne ka poora-poora purooshaartha karna hai। aise kabhi nahin sochna hai ki jo naseeb mein hoga। sensible banna hai।

2) gyaan sunkar use swaroop mein laana hai, yaad ka jauhar dhaaran kar phir seva karni hai। sabko aabu mahaan teertha ki mahima sunaani hai।

vardaan:- ek baba shabd ki smriti se yaad aur seva mein rahne vaale sachche yogi, sachche sevaadhaari bhav

aap bachche mukh se va man se baar-baar “baba'' shabd kehte ho, bachche ho to baba shabd yaad aana ya sochna hi yog hai aur mukh se baar-baar kehna ki baba aise kehte hain, baba ne ye kaha - yahi seva hai। lekin is baba shabd ko koi dil se kahne vaale hain koi knowledge ke dimaag se। jo dil se kehte hain unhein dil mein sada pratyaksha praapti khushi aur shakti milti hai। dimaag vaalon ko bolne samay khushi hoti sadaakaal ki nahin।

slogan:- paramatma rupi shama par phida hone vaale hi sachche parvaane hain।