Murli du jour du jeudi 19 septembre 2024

19-09-2024 praatahmurli om shanti "baapdaada"' madhuban

“meethe bachche - tumhaara kaam hai apne aapse baaten kar paavan banna, doosri aatmaon ke chintan mein apna time vesta mat karo''

prashn:- kaun-si baat buddhi mein aa gai to puraani sab aadten chhoot jaayengi?

uttar:- ham behad baap ki santaan hain to vishwa ke maalik thahre, humein devta banna hai - yeh baat buddhi mein aa gai to puraani sab aadten chhoot jaayengi। tum kaho, na kaho, aapehi chhod denge। ulta-sulta khaan-paan, sharaab aadi khud hi chhod denge। kahenge vaah! hamko to yeh lakshmi-naaraayan banna hai। 21 janmon ka raajya-bhaagya milta hai to kyon nahin pavitra rahenge!

om shanti। baap ghadi-ghadi bachchon ka attention khinchavaate hain ki baap ki yaad mein baithe ho? buddhi koi aur taraph to nahin bhaagti hai? baap ko bulaate hi isliye hain ki baba aakar humein paavan banaao। paavan to zaroor banna hai aur knowledge to tum kisko bhi samjha sakte ho। yeh srishti ka chakra kaise phirta hai, kisko bhi tum samjhaao to jhat samajh jaayenge। bhal pavitra nahin hoga to bhi knowledge to padh hi lega। koi badi baat nahin hai। 84 ka chakra aur harek yug ki itni aayu hai, itne janma hote hain। kitna sahaj hai। inka connection yaad se nahin hai, yeh to hai padhaai। baap to yathaartha baat samjhaate hain। baaki hai satopradhaan banne ki baat। woh honge yaad se। agar yaad nahin karenge to bahut chhota pad pa lenge। itna oonch pad pa nahin sakenge isliye kaha jaata hai attention। buddhi ka yog baap ke saath ho। inko hi praacheen yog kaha jaata hai। teacher ke saath yog to harek ka hoga hi। mool baat hai yaad ki। yaad ki yaatra se hi satopradhaan banna hai aur satopradhaan ban vaapas ghar jaana hai। baaki padhaai to bilkul sahaj hai। koi bachcha bhi samajh sakte hain। maaya ki yuddha is yaad mein hi chalti hai। tum baap ko yaad karte ho aur maaya phir apni taraph kheenchakar bhula deti hai। aise nahin kahenge ki mere mein to shivbaaba baitha hai, main shiv hoon। nahin, main aatma hoon, shivbaaba ko yaad karna hai। aise nahin mere andar shiv ki praveshta hai। aise ho nahin sakta। baap kehte hain main koi mein jaata nahin hoon। ham is rath par savaar hokar hi tum bachchon ko samjhaate hain। haan, koi dull buddhi bachche hain aur koi achha jigyaasu aa jaata hai to unki service arth main pravesh kar drishti de sakta hoon। sadaiv nahin baith sakta hoon। bahu roop dhaaran kar kiska bhi kalyaan kar sakte hain। baaki aise koi nahin kah sakte ki mere mein shivbaaba ki praveshta hai, mujhe shivbaaba yeh kehte hain। nahin, shivbaaba to bachchon ko hi samjhaate hain। mool baat hai hi paavan banne ki, jo phir paavan duniya mein ja sake। 84 ka chakra to bahut sahaj samjhaate hain। chitra saamne lage hue hain। baap bigar itna gyaan to koi de na sake। aatma ko hi knowledge milti hai। unko hi gyaan ka teesra netra kaha jaata hai। aatma ko hi sukh-duhkh hota hai, unko yeh shareer hai na। aatma hi devta banti hai। koi barrister, koi vyaapaari aatma hi banti hai। to ab aatmaon se baap baith baat karte hain, apni pahchaan dete hain। tum jab devta the, to manushya hi the, parantu pavitra aatmaayen thi। abhi tum pavitra nahin ho isliye tumhein devta nahin kah sakte। ab devta banne ke liye pavitra zaroor banna hai। uske liye baba ko yaad karna hai। aksar karke yahi kehte hain - baba, mere se yeh bhool hui jo ham deh-abhimaan mein aa gaya। baap baith bachchon ko samjhaate hain paavan zaroor banna hai। koi vikarma na karo। tumko sarvagun sampanna yahaan banna hai। paavan banne se muktidhaam mein chale jaayenge। aur koi prashn poochhne ki baat hi nahin hai। tum apne se baat karo, doosri aatmaon ka chintan nahin karo। kehte hain ladaai mein do karod mare। itni aatmaayen kahaan gai? are, woh kahaan bhi gaye, usmein tumhaara kya jaata hai। tum kyon time vesta karte ho? aur koi bhi baat poochhne ki darkaar nahin। tumhaara kaam hai paavan bankar paavan duniya ka maalik banna। aur baaton mein jaane se moonjh padenge। koi ko poora uttar nahin milta hai to moonjh padte hain।

baap kehte hain manamnaabhav। deh sahit deh ke sab sambandh chhodo, mere paas hi tumko aana hai। manushya marte hain to jab shamshaan mein le jaate hain us samay munh is taraph aur paanv shamshaan taraph rakhte hain phir jab shamshaan ke paas pahunchte hain to paanv is taraph aur munh shamshaan ki taraph kar dete hain। tumhaara bhi ghar oopar mein hai na। oopar mein koi patit ja nahin sakte। paavan banne ke liye buddhi ka yog baap ke saath lagaana hai। baap ke paas muktidhaam mein jaana hai। patit hain isliye hi bulaate hain ki ham patiton ko aakar paavan banaao, liberate karo। to baap kehte hain ab pavitra bano। baap jis bhaasha mein samjhaate hain, usmein hi kalpa-kalpa samjhaayenge। jo bhaasha inki hogi, usmein hi samjhaayenge na। aajkal hindi bahut chalti hai, aise nahin ki bhaasha badal sakti hai। nahin, sanskrit bhaasha aadi koi devtaaon ki to hai nahin। hindu dharma ki sanskrit nahin hai। hindi hi honi chaahiye। phir sanskrit kyon uthaate hain? to baap samjhaate hain yahaan jab baithte ho to baap ki yaad mein hi baithna hai, aur koi baaton mein tum jaao hi nahin। itne machchhar nikalte hain, kahaan jaate hain? earthquake mein dher ke dher phat se marte hain, aatmaayen kahaan jaati hain? ismen tumhaara kya jaata hai। tumko baap ne shreemat di hai ki apni unnati ke liye purooshaartha karo। auron ke chintan mein mat jaao। aise to anek baaton ka chintan ho jaayega। bas, tum mujhe yaad karo, jiske liye bulaaya hai us yukti mein chalo। tumhein baap se varsa lena hai, aur baaton mein nahin jaana hai isliye baba ghadi-ghadi kehte hain attention! kahaan buddhi to nahin jaati। bhagwan ki shreemat to maanni chaahiye na। aur koi baat mein phaayda nahin। mukhya baat hai paavan banne ki। yeh pakka yaad rakho - hamaara baba, baba bhi hai, teacher bhi hai, preceptor bhi hai। yeh zaroor dil mein yaad rakhna hai - baap, baap bhi hai, hamko padhaate hain, yog sikhlaate hain। teacher padhaate hain to buddhi ka yog teacher mein aur padhaai mein bhi jaata hai। yahi baap bhi kehte hain tum baap ke to ban hi gaye ho। bachche to ho hi, tab to yahaan baithe ho। teacher se padh rahe ho। kahaan bhi rehte baap ke to ho hi phir padhaai mein attention dena hai। shivbaaba ko yaad karenge to vikarma vinaash honge aur tum satopradhaan ban jaayenge। yeh knowledge aur koi de na sake। manushya to ghor andhiyaare mein hain na। gyaan mein dekho - kitni taakat hai। taakat kahaan se milti hai? baap se taakat milti hai jisse tum paavan bante ho। phir padhaai bhi simple hai। us padhaai mein to bahut maas lagte hain। yahaan to 7 roz ka course hai। usse tum sab kuchh samajh jaayenge phir usmein hai buddhi par madaar। koi jaasti time lagaate hain, koi kam। koi to 2-3 din mein hi achhi reeti samajh jaate hain। mool baat hai baap ko yaad karna, pavitra banna। vahi mushkilaat hoti hai। baaki padhaai to most simple hai। svadarshan chakradhaari banna hai। ek roz ke course mein bhi sab kuchh samajh sakte ho। ham aatma hain, behad ke baap ki santaan hain to zaroor ham vishwa ke maalik thahre। yeh buddhi mein aata hai na। devta banna hai to daiveegun bhi dhaaran karne hain, jisko buddhi mein aa gaya woh phat se sab aadten chhod denge। tum kaho, na kaho, aapehi chhod denge। ulta-sulta khaan-paan, sharaab aadi khud hi chhod denge। kehte hain - vaah, hamko yeh banna hai, 21 janmon ke liye raajya milta hai to kyon nahin pavitra rahenge। chatak jaana chaahiye। mukhya baat hai yaad ki yaatra। baaki 84 ke chakra ki knowledge to ek second mein mil jaati hai। dekhne se hi samajh jaate hain। naya jhaad zaroor chhota hoga। abhi to kitna bada jhaad tamopradhaan ban gaya hai। kal phir naya chhota ban jaayega। tum jaante ho - yeh gyaan kabhi kahaan se bhi mil nahin sakta। yeh padhaai hai, pahli mukhya shiksha bhi milti hai ki baap ko yaad karo। baap padhaate hain, yeh nishchay karo। bhagvaanuvaach - main tumko raajayog sikhlaata hoon। aur koi manushya aise kah na sake। teacher padhaate hain to zaroor teacher ko yaad karenge na। behad ka baap bhi hai, baap hamko svarga ka maalik banaate hain। parantu aatma kaise pavitra banegi - yeh koi bhi bata nahin sakte hain। bhal apne ko bhagwan kahen va kuchh bhi kahen parantu paavan bana nahin sakte। aajkal bhagwan to bahut ho gaye hain। manushya moonjh pade hain। kehte hain anek dharma nikalte hain, kya pata kaun-sa right hai। bhal tumhaari pradarshani va museum aadi ka udghaatan karte hain parantu samajhte kuchh bhi nahin। vaastav mein udghaatan to ho hi gaya hai। pahle foundation padta hai, phir jab makaan bankar taiyaar hota hai tab udghaatan hota hai। foundation lagaane ke liye bhi bulaaya jaata hai। to yeh bhi baap ne sthaapna kar di hai, baaki nai duniya ka udghaatan to ho hi jaana hai, usmein kiske udghaatan karne ki darkaar nahin rehti। udghaatan to svatah hi ho jaayega। yahaan padhkar phir ham nai duniya mein chale jaayenge।

tum samajhte ho abhi ham sthaapna kar rahe hain jiske liye hi mehnat karni hoti hai। vinaash hoga phir yeh duniya hi badal jaayegi। phir tum nai duniya mein raajya karne aa jaayenge। satayug ki sthaapna baap ne ki hai phir tum aayenge to svarga ki raajdhaani mil jaayegi। baaki opening ceremony kaun karega? baap to svarga mein aate nahin। aage chal dekhna hai svarga mein kya hota hai। pichhaadi mein kya hota hai! aage chal samjhenge। tum bachche jaante ho pavitrata bigar with honour to ham svarga mein ja nahin sakte। itna pad bhi nahin pa sakte hain isliye baap kehte hain khoob purooshaartha karo। dhandha aadi bhi bhal karo parantu jaasti paisa kya karenge। kha to sakenge nahin। tumhaare putra-potre aadi bhi nahin khaayenge। sab mitti mein mil jaayega isliye thoda stock rakho yukti se। baaki to sab vahaan transfer kar do। sab to transfer nahin kar sakte hain। gareeb jaldi transfer kar dete hain। bhakti maarga mein bhi transfer karte hain doosre janma ke liye। parantu woh hai indirect। yeh hai direct। patit manushyon ki patiton se hi len-den hai। abhi to baap aaye hain, tumhaari to patiton se len-den hai nahin। tum ho brahman, braahmanon ko hi tumhein madad karni hai। jo khud service karte hain, unko to madad ki darkaar nahin। yahaan gareeb saahookaar aadi sab aate hain। baaki karodapti to mushkil aayenge। baap kehte hain main hoon gareeb nivaaz। bhaarat bahut gareeb khanda hai। baap kehte hain main aata bhi bhaarat mein hoon, usmein se bhi yeh aabu sabse bada teertha hai jahaan baap aakar saare vishwa ki sadgati karte hain। yeh hai narka। tum jaante ho narka se phir svarga kaise hota hai। abhi tumhaari buddhi mein saari knowledge hai। baap yukti aisi bataate hain paavan banne ki, jo sabka kalyaan kar dete hain। satayug mein koi akalyaan ki baat, rona, peetna aadi kuchh bhi nahin hota। abhi jo baap ki mahima hai - gyaan ka saagar, sukh ka saagar hai। abhi tumhaari bhi yeh mahima hai, jo baap ki hai। tum bhi aananda ke saagar bante ho, bahuton ko sukh dete ho phir jab tumhaari aatma sanskaar le nai duniya mein jaayegi to vahaan phir tumhaari mahima badal jaayegi। phir tumko kahenge sarvagun sampanna… abhi tum hell mein baithe ho, inko kaha jaata hai kaanton ka jangal। baap ko hi baagvaan, khivaiya kaha jaata hai। gaate bhi hain hamaari naeeya paar karo kyonki duhkhi hain to aatma pukaarti hai। mahima bhal gaate hain parantu samajhte kuchh bhi nahin। jo aaya so kah dete hain। oonch te oonch bhagwan ki ninda karte rehte hain। tum kahenge ham to aastik hain। sarva ka sadgati daata jo baap hai, unko ham jaan gaye hain। baap ne khud parichay diya hai। tum bhakti nahin karte ho to kitna tang karte hain। woh hai majority, tumhaari hai minority। jab tumhaari majority ho jaayegi, tab unhon ko bhi kashish hogi। buddhi ka taala khul jaayega। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) apni unnati ka hi chintan karna hai, doosri kisi bhi baat mein nahin jaana hai। padhaai aur yaad par poora attention dena hai। buddhi bhatkaani nahin hai।

2) ab baap direct aaye hain isliye apna sab-kuchh yukti se transfer kar dena hai। patit aatmaon se len-den nahin karna hai। with honour svarga mein chalne ke liye pavitra zaroor banna hai।

vardaan:- man aur buddhi ko vyartha se mukta rakh brahman sanskaar banaane vaale ruler bhav

koi bhi chhoti si vyartha baat, vyartha vaataavran va vyartha drishya ka prabhaav pahle man par padta hai phir buddhi usko sahayog deti hai। man aur buddhi agar usi prakaar chalti rehti hai to sanskaar ban jaata hai। phir bhinna-bhinna sanskaar dikhaai dete hain, jo brahman sanskaar nahin hain। kisi bhi vyartha sanskaar ke vash hona, apne se hi yuddha karna, ghadi-ghadi khushi gum ho jaana - yeh kshatriypan ke sanskaar hain। brahman arthaat ruler vyartha sanskaaron se mukta honge, parvash nahin।

slogan:- master sarvashaktivaan woh hai jo dridh pratigya se sarva samasyaaon ko sahaj hi paar kar le।