Murli du jour du jeudi 17 octobre 2024

17-10-2024 praatahmurli om shanti "baapdaada"' madhuban

“meethe bachche - yaad ki yaatra par poora attention do, isse hi tum satopradhaan banenge''

prashn:- baap apne bachchon par kaun-si mehar karte hain?

uttar:- baap bachchon ke kalyaan ke liye jo direction dete hain, yeh direction dena hi unki mehar (kripa) hai। baap ka pahla direction hai - meethe bachche, dehi-abhimaani bano। dehi-abhimaani bahut shant rehte hain unke khyaalaat kabhi ulte nahin chal sakte।

prashn:- bachchon ko aapas mein kaun-sa seminar karna chaahiye?

uttar:- jab bhi chakra lagaane jaate ho to yaad ki race karo aur phir baithkar aapas mein seminar karo ki kisne kitna samay baap ko yaad kiya। yahaan yaad ke liye ekaanta bhi bahut achha hai।

om shanti। roohaani baap roohaani bachchon se poochhte hain tum kya kar rahe ho? roohaani bachche kahenge - baba, ham jo satopradhaan the so tamopradhaan bane hain phir baba aapki shreemat anusaar hamko satopradhaan zaroor banna hai। abhi baba aapne raasta bataaya hai। yeh koi nai baat nahin। puraane te puraani baat hai। sabse puraani hai yaad ki yaatra, ismen show karne ki baat nahin। har ek apne andar se poochhe ham kahaan tak baap ko yaad karte hain? kahaan tak satopradhaan bane hain? kya purooshaartha kar rahe hain? satopradhaan tab banenge jab pichhaadi mein ant aayega। uska bhi saakshaatkaar hota rahega। koi jo kuchh karta hai so apne liye hi karta hai। baap bhi koi mehar nahin karte hain। baba mehar karte hain jo bachchon ko direction dete hain, unke hi kalyaan arth। baap to hai hi kalyaankaari। kai bachche ulte gyaan mein aa jaate hain। baba feel karte hain - deh-abhimaani magroor hote hain। dehi-abhimaani bade shant rahenge। unko kabhi ulte-sulte khyaal nahin aate hain। baap to har prakaar se purooshaartha karaate rehte hain। maaya bhi badi jabardasta hai achhe-achhe bachchon par bhi vaar kar leti hai, isliye braahmanon ki maala nahin ban sakti। aaj bahut achhi reeti yaad karte hain, kal deh ahankaar mein aise aa jaate hain jaise saande (girgit)। saande ko ahankaar bahut hota hai। ismen ek kahaavat bhi hai - surmandal ke saaz se deh-abhimaani saande kya jaane…। deh-abhimaan bahut khota hai। badi mehnat karni padti hai। shivbaaba to kehte hain aai em most obedient servant। aise nahin, apne ko kehna servant aur navaabi chalaate rahen। baap kehte hain - meethe-meethe bachchon, sato-pradhaan zaroor banna hai। yeh to bahut sahaj hai, ismen koi choon-chaan nahin। mukh se kuchh bolna nahin hai। kahaan bhi jaao, andar mein yaad karna hai। aise nahin, yahaan baithte hain to baba madad karte hain। baap to aaye hi hain madad karne। baap ko to yeh khyaal rehta hai - bachche, kahaan koi gaphlat na karen। maaya yahaan hi ghoosa maar deti hai। deh-abhimaan bahut-bahut kharaab hai। deh-abhimaan mein aane se bilkul hi pat mein aakar pade hain। baba kehte hain yahaan aakar baithte ho to bhi most beloved baap ko yaad karo। baap kehte hain main hi patit-paavan hoon, mere ko yaad karne se, is yog agni se tumhaare janma-janmaantar ke paap bhasma honge। bachchon ki abhi woh avastha aai nahin hai, jo koi ko bhi achhi reeti samjha saken। gyaan talvaar mein bhi yog ka jauhar chaahiye। nahin to talvaar koi kaam ki nahin rehti। mool baat hai hi yaad ki yaatra। bahut bachche ulte-sulte dhandhe mein lage rehte hain। yaad ki yaatra aur padhaai karte nahin isliye ismen time nahin milta। baap kehte hain aisi mehnat nahin karo jo dhandhe dhori ke pichhaadi apna pad ganva do। apna bhavishya to banaana hai na। parantu satopradhaan banna hai। ismen hi bahut mehnat hai। bahut bade-bade museum aadi sambhaalne vaale hain parantu yaad ki yaatra mein nahin rehte। baba ne samjhaaya hai yaad ki yaatra mein gareeb, baandheliyaan jyaada rehti hain। ghadi-ghadi shivbaaba ko yaad karte rehte hain। shivbaaba hamaare yeh bandhan khalaas karo। ablaaon par atyaachaar hote hain, yeh bhi gaayan hai।

tum bachchon ko bahut meetha banna hai। sachche-sachche student bano। achhe student jo hote hain woh ekaanta mein bageeche mein jaakar padhte hain। tumko bhi baap kehte hain bhal kahaan bhi chakra lagaane jaao apne ko aatma samajh baba ko yaad karo। yaad ki yaatra ka shauk rakho। us dhan kamaane ki bhent mein yeh avinaashi dhan to bahut-bahut ooncha hai। woh vinaashi dhan to phir bhi khaak ho jaana hai। baba jaante hain - bachche service poori nahin karte, yaad mein mushkil rehte hain। sachchi service jo karni chaahiye woh nahin karte। baaki sthool service mein dhyaan chala jaata hai। bhal drama anusaar hota hai parantu baap phir bhi purooshaartha to karaayenge na। baap kehte hain koi bhi kaam karo - kapde silte ho, baap ko yaad karo। yaad mein hi maaya vighna daalti hai। baba ne samjhaaya hai roostam se maaya bhi roostam hokar ladti hai। baba apna bhi batlaate hain। main roostam hoon, jaanta hoon main beggar tu prince banne vaala hoon to bhi maaya saamna karti hai। maaya kisko bhi chhodti nahin hai। pahalvaanon se to aur hi ladti hai। kai bachche apne deh ke ahankaar mein bahut rehte hain। baap kitna nirhankaari rehte hain। kehte hain main bhi tum bachchon ko namaste karne vaala servant hoon। woh to apne ko bahut oonch samajhte hain। yeh deh-ahankaar sab todna hai। bahuton mein ahankaar ka bhoot baitha hua hai। baap kehte hain apne ko aatma samajh baap ko yaad karte raho। yahaan to bahut achha chance hai। ghoomne-phirne ka bhi achha hai। phursat bhi hai, bhal chakra lagaao phir ek-do se poochho kitna samay yaad mein rahe, aur koi taraph buddhi to nahin gai? yeh aapas mein seminar karna chaahiye। bhal female alag, mel alag hon। female aage hon, mel pichhaadi mein ho kyonki maataaon ki sambhaal karni hai isliye maataaon ko aage rakhna hai। bahut achhi ekaanta hai। sannyaasi bhi ekaanta mein chale jaate hain। satopradhaan sannyaasi jo the woh bahut nidar rehte the। jaanvar aadi koi se darte nahin the। us nashe mein rehte the। abhi tamopradhaan ban pade hain। har ek dharma jo sthaapan hota hai, pahle satopradhaan hota hai phir rajo tamo mein aate hain। sannyaasi jo satopradhaan the woh brahm ki masti mein masta rehte the। unmein badi kashish hoti thi। jangal mein bhojan milta tha। din-pratidin tamopradhaan hone se taakat kam hoti jaati hai।

to baba raay dete hain - yahaan bachchon ko apni unnati ke chance bahut achhe hain। yahaan tum aate hi ho kamaai karne ke liye। baba se sirf milne se kamaai thode hi hogi। baap ko yaad karenge to kamaai hogi। aise mat samjho baba aasheervaad karenge, kuchh bhi nahin। woh saadhu log aadi aasheervaad karte hain, lekin tumko neeche girna hi hai। ab baap kehte hain - jinna bankar apna buddhiyog oopar lagaao। jinna ki kahaani hai na। bola hamko kaam do। baap bhi kehte hain - tumko direction deta hoon, yaad mein raho to beda paar ho jaayega। tumhein satopradhaan zaroor banna hai। maaya kitna bhi maatha maare ham to shreshtha baap ko zaroor yaad karenge। aise andar mein baap ki mahima karte baap ko yaad karte raho। koi bhi manushya ko yaad na karo। bhakti maarga ki jo rasma hai woh gyaan maarga mein ho nahin sakti। baap shiksha dete hain yaad ki yaatra mein teekha jaana hai। mool baat yeh hai। satopradhaan banna hai। baap ke direction milte hain - ghoomne phirne jaate ho to bhi yaad mein raho। to ghar bhi yaad rahega, raajaai bhi yaad rahegi। aise nahin, yaad mein baithe-baithe gir padna hai। woh to phir hathayog ho jaata hai। yeh to seedhi baat hai - apne ko aatma samajh baap ko yaad karna hai। kai bachche baithe-baithe gir padte hain isliye baba to kehte hain chalte-phirte, khaate-peete yaad mein raho। aise nahin, baithe-baithe behosh ho jaao। inse koi tumhaare paap nahin katenge। yeh bhi maaya ke bahut vighna padte hain। yeh bhog aadi ki bhi rasma-rivaaz hai, baaki inmen kuchh hai nahin। yeh na gyaan hai, na yog hai। saakshaatkaar ki koi darkaar nahin। bahuton ko saakshaatkaar hue, woh aaj hain nahin। maaya badi prabal hai। saakshaatkaar ki kabhi aash bhi nahin rakhni chaahiye। ismen to baap ko yaad karna hai - satopradhaan banne ke liye। drama ko bhi jaante ho, yeh anaadi drama bana hua hai jo repeat hota rehta hai, ise bhi samajhna hai aur baap jo direction dete hain us par bhi chalna hai। bachche jaante hain - ham phir se aaye hain raajayog seekhne। bhaarat ki hi baat hai। yahi tamopradhaan bana hai phir inko hi satopradhaan banna hai। baap bhi bhaarat mein hi aakar sabki sadgati karte hain। yeh bada wonderful khel hai। ab baap kehte hain - meethe-meethe roohaani bachche, apne ko aatma samjho। tumko 84 ka chakra lagaate poore 5 hazaar varsha hue hain। ab phir vaapis jaana hai। yeh baaten aur koi kah na sake। tum bachchon mein bhi nambarvaar purooshaartha anusaar nishchaybuddhi hote jaate hain। yeh behad ki paathshaala hai। bachche jaante hain - behad ka baap hamko padhaate hain, woh ustaad teacher hai, bahut bada ustaad hai। bahut prem se samjhaate hain। kitne achhe-achhe bachche bada aaraam se 6 baje tak soye hue rehte hain। maaya ekdam naak se pakad leti hai। hukm chalaate rehte hain। shuru mein tum jab bhatthi mein the to mama-baba bhi sab service karte the। jaise karma ham karenge hamko dekhkar aur karenge। baba to jaante hain mahaarthi, ghodesvaar, pyaade nambarvaar hain। kai bachche bada aaraam se rehte hain। andar soye rehte hain। baahar mein koi poochhe phalaana kahaan hai? to kahenge, hai nahin। parantu andar soye pade hain। kya-kya hota rehta hai, baba samjhaate hain। sampoorn to koi bhi bana nahin hai, kitni disservice kar lete hain। nahin to baap ke liye gaayan hai - maaro chaahe pyaar karo, ham tera darvaaja nahin chhodenge। yahaan to thodi baat par rooth padte hain। yog ki bahut kami hai। baba kitna bachchon ko samjhaate rehte hain, parantu koi mein taakat nahin jo likhe। yog hoga to likhne mein bhi taakat bharegi। baap kehte hain yeh achhi reeti siddha karo - geeta ka bhagwan shiv hai, na ki shreekrishna।

baap aakar tum bachchon ko sab baaton ka arth samjhaate hain। bachchon ko yahaan nasha chadhta hai phir baahar jaane se khatma। time vesta bahut karte hain। ham kamaai kar yagya ko deven, aise khyaal rakh apna time vesta nahin karna hai। baap kehte hain ham to tum bachchon ka kalyaan karne ke liye aaye hain, tum phir apna nuksaan kar rahe ho। yagya mein to jinhonne kalpa pahle madad ki hai woh karte rehte hain, karte rahenge। tum kyon maatha maarte ho - yeh karen, woh karen। drama mein noondh hai - jinhonne beej boya hai, woh abhi bhi boyenge। yagya ka tum chintan nahin karo। apna kalyaan karo। apne ko madad karo। bhagwan ko tum madad karte ho kya? bhagwan se to tum lete ho ya dete ho? yeh khyaal bhi nahin aana chaahiye। baba to kehte hain - laadle bachchon, apne ko aatma samajh baap ko yaad karo to vikarma vinaash hon। abhi tum sangamayug par khade ho। sangam par hi tum donon taraph dekh sakte ho। yahaan kitne dher manushya hain। satayug mein kitne thode manushya honge। saara din sangam par khade rehna chaahiye। baba hamko kya se kya banaate hain! baap ka part kitna wonderful hai। ghoomon phiro yaad ki yaatra mein raho। bahut bachche time vesta karte hain। yaad ki yaatra se hi beda paar hona hai। kalpa pahle bhi bachchon ko aise samjhaaya tha। drama repeat hota rehta hai। uthte-baithte saara kalpa vriksha buddhi mein yaad rahe, yeh hai padhaai। baaki dhandha aadi to bhal karo। padhaai ke liye time nikaalna chaahiye। sweet baap aur svarga ko yaad karo। jitna yaad karenge to ant mati so gati ho jaayegi। bas baba, ab aapke paas aaye ki aaye। baap ki yaad mein phir shvaans bhi sukhela ho jaayega। brahm gyaaniyon ke shvaans bhi sukhaale (sukh vaale) ho jaate hain। brahm ki hi yaad mein rehte hain, parantu brahm lok mein koi jaata nahin hai। aapehi shareer chhod den - yeh ho sakta hai। kai fast (upvaas) rakhkar shareer chhod dete hain, woh duhkhi hokar marte hain। baap to kehte hain khaao piyo baap ko yaad karo to ant mati so gati ho jaayegi। marna to hai na। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) sada yaad rahe - jo karma ham karenge hamko dekh aur karenge...... aisa aaraam-pasanda nahin banna hai jo disservice ho। bahut-bahut nirhankaari rehna hai। apne ko aapehi madad kar apna kalyaan karna hai।

2) dhandhe-dhori mein aisa busy nahin hona hai jo yaad ki yaatra va padhaai ke liye time hi na mile। deh-abhimaan bahut khota aur kharaab hai, ise chhod dehi-abhimaani rahne ki mehnat karni hai।

vardaan:- koi bhi baat kalyaan ki bhaavna se dekhne aur sunne vaale pardarshan mukta bhav

jitna sangathan bada hota jaata hai, baaten bhi utni badi hongi। lekin apni safety tab hai jab dekhte hue na dekhen, sunte hue na sunen। apne svachintan mein rahen। svachintan karne vaali aatma pardarshan se mukta ho jaati hai। agar kisi kaaran se sunna padta hai, apne aapko jimmevaar samajhte ho to pahle apni brake ko powerful banaao। dekha-suna, jahaan tak ho saka kalyaan kiya aur full stop।

slogan:- apne santushta, khushnumah jeevan se har kadam mein seva karne vaale hi sachche sevaadhaari hain।