Murli du jour du lundi 18 novembre 2024

18-11-2024 praatahmurli om shanti "baapdaada"' madhuban

“meethe bachche - baap hai avinaashi vaidya, jo ek hi mahaamantra se tumhaare sab duhkh door kar deta hai''

prashn:- maaya tumhaare beech mein vighna kyon daalti hai? koi kaaran bataao?

uttar:- 1. kyonki tum maaya ke bade te bade graahak ho। uski graahki khatma hoti hai isliye vighna daalti hai। 2. jab avinaashi vaidya tumhein dava deta hai to maaya ki beemaari uthalti hai isliye vighnon se darna nahin hai। manamnaabhav ke mantra se maaya bhaag jaayegi।

om shanti। baap baith bachchon ko samjhaate hain, manushya ‘man ki shanti, man ki shanti' kah hairaan hote hain। roz kehte bhi hain om shanti। parantu iska arth na samajhne ke kaaran shanti maangate hi rehte hain। kehte bhi hain aai em aatma arthaat aai em silence। hamaara svadharma hai silence। phir jab ki svadharma shanti hai to phir maangana kyon? arth na samajhne ke kaaran phir bhi maangate rehte hain। tum samajhte ho yeh raavan raajya hai। parantu yeh bhi nahin samajhte hain ki raavan saari duniya ka aam aur bhaarat ka khaas dushman hai isliye raavan ko jalaate rehte hain। aisa koi bhi manushya hai, jisko koi varsha-varsha jalaate hon? inko to janma-janmaantar, kalpa-kalpaantar jalaate aaye hain kyonki yeh tumhaara dushman bahut bada hai। 5 vikaaron mein sab phansate hain। janma hi bhrashtaachaar se hota hai to raavan ka raajya hua। is samay athaah duhkh hain। iska nimitta kaun? raavan। yeh koi ko pata nahin - duhkh kis kaaran hota hai। yeh to raajya hi raavan ka hai। sabse bada dushman yeh hai। har varsha uski effigy banaakar jalaate rehte hain। din-pratidin aur hi bada banaate jaate hain। duhkh bhi badh jaata hai। itne bade-bade saadhu, santa, mahaatmaayen, raajaayen aadi hain parantu ek ko bhi yeh pata nahin hai ki raavan hamaara dushman hai, jisko ham varsha-varsha jalaate hain। aur phir khushi manaate hain। samajhte hain raavan mara aur ham lanka ke maalik banen। parantu maalik bante nahin hain। kitna paisa kharcha karte hain। baap kehte hain tumko itne anginat paise diye, sab kahaan ganvaaye? dashahre par laakhon roopaye kharcha karte hain। raavan ko maarkar phir lanka ko lootte hain। kuchh bhi samajhte nahin, raavan ko kyon jalaate hain। is samay sab in vikaaron ki jel mein pade hain। aadhaakalpa raavan ko jalaate hain kyonki duhkhi hain। samajhte bhi hain raavan ke raajya mein ham bahut duhkhi hain। yeh nahin samajhte hain ki satayug mein yeh 5 vikaar hote nahin। yeh raavan ko jalaana aadi hota nahin। poochho yeh kab se manaate aaye ho! kahenge yeh to anaadi chala aata hai। rakshaabandhan kab se shuru hua? kahenge anaadi chala aata hai। to yeh sab samajh ki baaten hain na। manushyon ki buddhi kya ban padi hai। na jaanvar hain, na manushya hain। koi kaam ke nahin। svarga ko bilkul jaante nahin। samajhte hain - bas, yahi duniya bhagwan ne banaai hai। duhkh mein yaad to phir bhi bhagwan ko karte hain - he bhagwan is duhkh se chhudaao। parantu kaliyug mein to sukhi ho na saken। duhkh to zaroor bhogna hi hai। seedhi utarni hi hai। nai duniya se puraani duniya ke ant tak ke sab raaz baap samjhaate hain। bachchon paas aate hain to bolte hain ki sab duhkhon ki davaai ek hai। avinaashi vaidya hai na। 21 janmon ke liye sabko duhkhon se mukta kar dete hain। woh vaidya log to khud bhi beemaar ho jaate hain। yeh to hai avinaashi vaidya। yeh bhi samajhte ho - duhkh bhi athaah hai, sukh bhi athaah hai। baap athaah sukh dete hain। vahaan duhkh ka naam-nishaan nahin hota। sukhi banne ki hi davaai hai। sirf mujhe yaad karo to paavan satopradhaan ban jaayenge, sab duhkh door ho jaayenge। phir sukh hi sukh hoga। gaaya bhi jaata hai - baap duhkh harta, sukh karta hai। aadhaakalpa ke liye tumhaare sab duhkh door ho jaate hain। tum sirf apne ko aatma samajh baap ko yaad karo।

aatma aur jeev do ka khel hai। niraakaar aatma avinaashi hai aur saakaar shareer vinaashi hai inka khel hai। ab baap kehte hain deh sahit deh ke sab sambandhon ko bhool jaao। grihastha vyavhaar mein rehte apne ko aisa samjho ki hamko ab vaapis jaana hai। patit to ja na saken isliye maamekam yaad karo to satopradhaan ban jaayenge। baap ke paas davaai hai na। yeh bhi bataata hoon, maaya vighna zaroor daalegi। tum raavan ke graahak ho na। unki graahki chali jaayegi to zaroor phathkegi (pareshaan hogi)। to baap samjhaate hain yeh to padhaai hai। koi davaai nahin hai। davaai yeh hai yaad ki yaatra। ek hi davaai se tumhaare sab duhkh door ho jaayenge, agar mere ko nirantar yaad karne ka purooshaartha karenge to। bhakti maarga mein aise bahut hain jinka mukh chalta hi rehta hai। koi na koi mantra raam naam japte rehte hain, unko guru ka mantra mila hua hai। itna baar tumko roz japna hai। unko kehte hain raam ke naam ki maala japna। isko hi raam naam ka daan kehte hain। aisi bahut sansthaayen bani hui hain। raam-raam japte rahenge to jhagda aadi koi karenge nahin, busy rahenge। koi kuchh kahega bhi to bhi response nahin denge। bahut thode aisa karte hain। yahaan phir baap samjhaate hain raam-raam koi mukh se kehna nahin hai। yeh to ajpaajaap hai sirf baap ko yaad karte raho। baap kehte hain main koi raam nahin hoon। raam to treta ka tha, jiski raajaai thi, unko to japna nahin hai। ab baap samjhaate hain bhakti maarga mein yeh sab simran karte, pooja karte tum seedhi neeche hi utarte aaye ho kyonki woh sab hain unrighteous। righteous to ek hi baap hai। woh tum bachchon ko baith samjhaate hain। yeh kaise bhool-bhulaiya ka khel hai। jis baap se itna behad ka varsa milta hai unko yaad karen to chehra hi unka chamakta rahe। khushi mein chehra khil jaata hai। mukh par muskaraahat aa jaati hai। tum jaante ho baap ko yaad karne se ham yeh banenge। aadhaakalpa ke liye hamaare sab duhkh door ho jaayenge। aise nahin, baba kuchh kripa kar denge। nahin, yeh samajhna hai - ham baap ko jitna yaad karenge utna satopradhaan ban jaayenge। yeh lakshmi-naaraayan vishwa ke maalik kitne harshitmukh hain। aisa banna hai। behad ke baap ko yaad kar andar mein khushi hoti hai phir se ham vishwa ka maalik banenge। yeh aatma ki khushi ke sanskaar hi phir saath chalenge। phir thoda-thoda kam hota jaayega। is samay maaya tumko bahut hairaan karegi। maaya koshish karegi - tumhaari yaad ko bhulaane ki। sadaiv aise harshit mukh rah nahin sakenge। zaroor koi samay ghutka khaayenge। manushya jab beemaar padte hain to unko kehte bhi honge shivbaaba ko yaad karo parantu shivbaaba hai kaun, yeh kisko pata nahin to kya samajh yaad karen? kyon yaad karen? tum bachche to jaante ho baap ko yaad karne se ham tamopradhaan se satopradhaan banenge। devi-devta satopradhaan hain na, unko kaha hi jaata hai deity world। manushyon ki duniya nahin kaha jaata। manushya naam hota nahin। phalaana devta। woh hai hi deity world, yeh hai human world। yeh sab samajhne ki baaten hain। baap hi samjhaate hain baap ko kaha jaata hai gyaan ka saagar। baap anek prakaar ki samjhaani dete rehte hain। phir bhi pichhaadi mein mahaamantra dete hain - baap ko yaad karo to tum satopradhaan ban jaayenge aur tumhaare sab duhkh door ho jaayenge। kalpa pahle bhi tum devi-devta bane the। tumhaari seerat devtaaon jaisi thi। vahaan koi bhi ulta-sulta bolte nahin the। aisa koi kaam hi nahin hota। woh hai hi deity world। yeh hai human world। pharka hai na। yeh baap baith samjhaate hain। manushya to samajhte hain deity world ko laakhon varsha ho gaye। yahaan to koi ko devta kah nahin sakte। devtaayen to svachchha the। mahaan aatma devi-devta ko kaha jaata hai। manushya ko kabhi nahin kah sakte। yeh hai raavan ki duniya। raavan bada bhaari dushman hai। in jaisa dushman koi hota nahin। har varsha tum raavan ko jalaate ho। yeh hai kaun? kisko pata nahin hai। koi manushya to nahin hai, yeh hain 5 vikaar isliye inko raavan raajya kaha jaata hai। 5 vikaaron ka raajya hai na। sabmen 5 vikaar hain। yeh durgati aur sadgati ka khel bana hua hai। abhi tumko sadgati ke time aadi ka bhi baap ne samjhaaya hai। durgati ka bhi samjhaaya hai। tum hi oonch chadhte ho phir tum hi neeche girte ho। shivjayanti bhi bhaarat mein hi hoti hai। raavan jayanti bhi bhaarat mein hi hoti hai। aadhaakalpa hai daivi duniya, lakshmi-naaraayan, raam-seeta ka raajya hota hai। abhi tum bachche sabki biography ko jaante ho। mahima saari tumhaari hai। navraatri par pooja aadi sab tumhaari hoti hai। tum hi sthaapna karte ho। shreemat par chal tum vishwa ko change karte ho to shreemat par poora chalna chaahiye na। nambarvaar purooshaartha karte rehte hain। sthaapna hoti rehti hai, ismen ladaai aadi ki koi baat nahin। abhi tum samajhte ho yeh purooshottam sangamayug hai hi bilkul alag। puraani duniya ka ant, nai duniya ka aadi। baap aate hi hain puraani duniya ko change karne। tumko samjhaate to bahut hain parantu bahut hain jo bhool jaate hain। bhaashan ke baad smriti aati hai - yeh-yeh points samjhaani thi। hoobhu kalpa-kalpa jaise sthaapna hui hai vaise hoti rahegi, jinhonne jo pad paaya hai vahi paayenge। sab ek jaisa pad nahin pa sakte hain। oonch te oonch pad paane vaale bhi hain to kam se kam pad paane vaale bhi hain। jo ananya bachche hain woh aage chalkar bahut feel karenge - yeh saahookaaron ki daasi banengi, yeh raajaai gharaane ki daasi banengi। yeh bade saahookaar banenge, jinko kab-kab invite karte rahenge। sabko thode hi invite karenge, sab munh thode hi dekhenge।

baap bhi brahma mukh se samjhaate hain, sammukh sab thode hi dekh sakenge। tum abhi sammukh aaye ho, pavitra bane ho। aise bhi hota hai jo apvitra aakar yahaan baithte hain, kuchh sunenge to phir devta ban jaayenge phir bhi kuchh sunenge to asar padega। nahin sunen to phir aaven hi nahin। to mool baat baap kehte hain manamnaabhav। is ek hi mantra se tumhaare sab duhkh door ho jaate hain। manamnaabhav - yeh baap kehte hain phir teacher hokar kehte hain madhyaajeebhav। yeh baap bhi hai, teacher bhi hai, guru bhi hai। teenon hi yaad rahen to bhi bahut harshitmukh avastha rahe। baap padhaate hain phir baap hi saath le jaate hain। aise baap ko kitna yaad karna chaahiye। bhakti maarga mein to baap ko koi jaante hi nahin। sirf itna jaante hain bhagwan hai, ham sab brothers hain। baap se kya milna hai, woh kuchh bhi pata nahin hai। tum abhi samajhte ho ek baap hai, ham unke bachche sab brothers hain। yeh behad ki baat hai na। sab bachchon ko teacher ban padhaate hain। phir sabka hisaab-kitaab chuktu karaae vaapis le jaayenge। is chhi-chhi duniya se vaapis jaana hai, nai duniya mein aane ke liye tumko laayak banaate hain। jo-jo laayak bante hain, woh satayug mein aate hain। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) apni avastha ko sada ekras aur harshitmukh rakhne ke liye baap, teacher aur satguru teenon ko yaad karna hai। yahaan se hi khushi ke sanskaar bharne hain। varse ki smriti se chehra sada chamakta rahe।

2) shreemat par chalkar saare vishwa ko change karne ki seva karni hai। 5 vikaaron mein jo phanse hain, unhein nikaalna hai। apne svadharma ki pahchaan deni hai।

vardaan:- sarva ke prati apni drishti aur bhaavna pyaar ki rakhne vaale sarva ke pyaare pharishta bhav

svapna mein bhi kisi ke paas pharishta aata hai to kitna khush hote hain। pharishta arthaat sarva ke pyaare। had ke pyaare nahin, behad ke pyaare। jo pyaar kare uske pyaare nahin lekin sarva ke pyaare। koi kaisi bhi aatma ho lekin aapki drishti, aapki bhaavna pyaar ki ho - isko kaha jaata hai sarva ke pyaare। koi insult kare, ghrina kare to bhi uske prati pyaar va kalyaan ki bhaavna utpanna ho kyonki us samay woh parvash hai।

slogan:- jo sarva praaptiyon se sampanna hain vahi sada harshit, sada sukhi aur khushanseeb hain।