Murli du jour du mardi 26 novembre 2024

26-11-2024 praatahmurli om shanti "baapdaada"' madhuban

“meethe bachche - tum ho trimoorti baap ke bachche, tumhein apne teen kartavya yaad rahen - sthaapna, vinaash aur paalna''

prashn:- deh-abhimaan ki kadi beemaari lagne se kaun-kaun se nuksaan hote hain?

uttar:- 1. deh-abhimaan vaalon ke andar jealousy hoti hai, jealousy ke kaaran aapas mein loon-paani hote rehte, pyaar se seva nahin kar sakte hain। andar hi andar jalte rehte hain। 2. beparvaah rehte hain। maaya unhein bahut dhokha deti rehti hai। purooshaartha karte-karte phaan ho jaate hain, jis kaaran padhaai hi chhoot jaati hai। 3. deh-abhimaan ke kaaran dil saaph nahin, dil saaph na hone kaaran baap ki dil par nahin chadhte। 4. mood oph kar lete, unka chehra hi badal jaata hai।

om shanti। sirf baap ko hi yaad karte ho ya aur bhi kuchh yaad aata hai? bachchon ko sthaapna, vinaash aur paalna - teenon ki yaad honi chaahiye kyonki saath-saath ikattha chalta hai na। jaise koi bairistari padhte hain to unko maaloom hai main barrister banoonga, vakaalat karoonga। bairistari ki paalna bhi karenge na। jo bhi padhega unki em to aage rahegi। tum jaante ho ham abhi construction kar rahe hain। pavitra nai duniya sthaapan kar rahe hain, ismen yog bahut zaroori hai। yog se hi hamaari aatma jo patit ban gai hai, woh paavan banegi। to ham pavitra ban phir pavitra duniya mein jaakar raajya karenge, yeh buddhi mein aana chaahiye। sab imtahaanon mein sabse bada imtahaan va sabhi padhaaeeyon se oonch padhaai yeh hai। padhaaeeyaan to anek prakaar ki hain na। woh to sab manushya, manushya ko padhaate hain aur woh padhaaeeyaan is duniya ke liye hi hain। padhkar phir unka phal yahaan hi paayenge। tum bachche jaante ho is behad ki padhaai ka phal hamko nai duniya mein milna hai। woh nai duniya koi door nahin। abhi sangamayug hai। nai duniya mein hi hamko raajya karna hai। yahaan baithe ho to bhi buddhi mein yeh yaad karna hai। baap ki yaad se hi aatma pavitra banegi। phir yeh bhi yaad rakhna hai ki ham pavitra banenge phir is impure duniya ka vinaash bhi zaroor hoga। sabhi to pavitra nahin banenge। tum bahut thode ho jinmen taakat hai। tumhaare mein bhi nambarvaar taakat anusaar hi sooryavanshi-chandravanshi bante hain na। taakat to har baat mein chaahiye। yeh hai eeshvareey might, inko yogbal ki might kaha jaata hai। baaki sab hai jismaani might। yeh hai roohaani might। baap kalpa-kalpa kehte hain - he bachchon, maamekam yaad karo। sarvashaktimaan baap ko yaad karo। woh to ek hi baap hai, unko yaad karne se aatma pavitra banegi। yeh bahut achhi baaten hain - dhaaran karne ki, jinko yeh nishchay hi nahin hai ki hamne 84 janma liye hain, unki buddhi mein yeh baaten baithengi nahin। jo satopradhaan duniya mein aaye the, vahi ab tamopradhaan mein aaye hain। vahi aakar jaldi nishchaybuddhi banenge। agar kuchh bhi nahin samajhte hain to poochhna chaahiye। poori reeti samjhen to baap ko bhi yaad karen। samjhenge nahin to yaad bhi nahin kar sakenge। yeh to seedhi baat hai। ham aatmaayen jo satopradhaan thi vahi phir tamopradhaan bani hain, jinko yeh sanshay hoga ki kaise samjhen ham 84 janma lete hain va baap se kalpa pahle bhi varsa liya hai, woh to padhaai mein poora dhyaan hi nahin denge। samjha jaata hai inki takdeer mein nahin hai। kalpa pahle bhi nahin samjha tha isliye yaad kar nahin sakenge। yeh hai hi bhavishya ke liye padhaai। nahin padhte hain to samjha jaata hai kalpa-kalpa nahin padhte the athva thodi marks se paas hue the। school mein bahut fail bhi hote hain। paas bhi nambarvaar hi hote hain। yeh bhi padhaai hai, ismen nambarvaar paas honge। jo hoshiyaar hain woh to padhkar phir padhaate rahenge। baap kehte hain main tum bachchon ka servant hoon। bachche bhi kehte hain ki ham bhi servant hain। har ek bhaai-behen ka kalyaan karna hai। baap hamaara kalyaan karta hai, hamko phir auron ka kalyaan karna hai। sabko yeh bhi samjhaana hai, baap ko yaad karo to paap kat jaaen। jitna-jitna jo bahuton ko paigaam pahunchaate hain, unhein bada paigambar kahenge। unko hi mahaarthi athva ghodesvaar kaha jaata hai। pyaade phir praja mein chale jaate hain। ismen bhi bachche samajhte hain kaun-kaun saahookaar ban sakenge। yeh gyaan buddhi mein rehna chaahiye। tum bachche jo service ke liye nimitta bane hue ho, service ke liye hi jeevan di hui hai to pad bhi aise paayenge। unko kisi ki parvaah nahin rehti। manushya apne haath-paanv vaala hai na। baandha to nahin ja sakta। apne ko svatantra rakh sakte hain। aise kyon bandhan mein phasoon? kyon na baap se amrit lekar amrit ka hi daan karoon। main koi ridh-bakri thode hi hoon jo koi hamko baandhe। shuru mein tum bachchon ne kaise apne ko chhudaaya, radiya maari, haay-haay kar baith gaye। tum kahenge hamko kya parvaah hai, hamko to svarga ki sthaapna karni hai ya yeh kaam baith karne hain। woh masti chadh jaati hai, jisko maulaai masti kaha jaata hai। ham maula ke mastaane hain। tum jaante ho maula se hamko kya praapta ho raha hai। maula hamko padha rahe hain na। naam to unke bahut hain parantu koi-koi naam bahut meethe hain। abhi ham maulaai masta bane hain। baap direction to bahut simple dete hain। buddhi bhi samajhti hai - barobar ham baap ko yaad karte-karte satopradhaan ban jaayenge aur vishwa ke maalik bhi banenge। yahi taat lagi hui hai। baap ko hardam yaad karna chaahiye। saamne baithe ho na। yahaan se baahar nikle aur bhool jaayenge। yahaan jitna nasha chadhta hai utna baahar mein nahin rehta, bhool jaate hain। tumko bhoolna nahin chaahiye। parantu takdeer mein nahin hai to yahaan baithe bhi bhool jaate hain।

bachchon ke liye museum mein aur gaanv-gaanv mein service karne ke liye prabandha ho rahe hain। jitna bhi samay mila hai, baap to kehte hain jaldi-jaldi karo। parantu drama mein jaldi ho nahin sakti। baap to kehte aisi machinery ho jo haath daalen aur cheez taiyaar ho jaae। yeh bhi baap samjhaate rehte hain - achhe-achhe bachchon ko maaya naak aur kaan se achhi reeti pakadti hai। jo apne ko mahaaveer samajhte hain unhon ko hi maaya ke bahut toophaan aate hain phir woh kiski bhi parvaah nahin karte। chhipa lete hain। aantarik dil sachchi nahin hai। sachchi dil vaale hi scholarship paate hain। shaitaani dil chal na sake। shaitaani dil se apna hi beda garka karte hain। sabka shivbaaba se kaam hai। yeh to tum saakshaatkaar karte ho। brahma ko bhi banaane vaala shivbaaba hai। shivbaaba ko yaad karen tab aisa banen। baba samajhte hain maaya badi jabardasta hai। jaise chooha kaatta hai to maaloom bhi nahin padta hai, maaya bhi aisi masta choohi hai। mahaarthiyon ko hi khabardaar rehna hai। woh khud samajhte nahin hain ki hamko maaya ne gira diya hai। loonpaani bana diya hai। samajhna chaahiye loonpaani hone se ham baap ki service kar nahin sakenge। andar hi jalte rahenge। deh-abhimaan hai tab jalte hain। woh avastha to hai nahin। yaad ka jauhar bharta nahin hai, isliye bahut khabardaar rehna chaahiye। maaya badi teekhi hai, jabki tum yuddha ke maidaan par ho to maaya bhi chhodti nahin। aadha-pauna to khatma kar deti hai, kisko pata bhi nahin padta hai। kaise achhe-achhe, naye-naye bhi padhaai bandakar ghar mein baith jaate hain। achhe-achhe naameegraami par bhi maaya ka vaar hota hai। samajhte hue bhi beparvaah ho jaate hain। thodi baat mein jhat loon-paani ho padte hain। baap samjhaate hain deh-abhimaan ke kaaran hi loon-paani hote hain। svayan ko dhokha dete hain। baap kahenge yeh bhi drama। jo kuchh dekhte hain kalpa pahle misal drama chalta rehta hai। neeche-oopar avastha hoti rehti hai। kabhi grahchaari baithti hai, kabhi bahut achhi service kar khushkhabri likhte hain। neeche-oopar hota rehta hai। kabhi haar, kabhi jeet। paandavon ki maaya se kabhi haar, kabhi jeet hoti hai। achhe-achhe mahaarthi bhi hil jaate hain, kai mar bhi jaate hain isliye jahaan bhi raho baap ko yaad karte raho aur service karte raho। tum nimitta bane hue ho service ke liye। tum ladaai ke maidaan mein ho na। jo baahar vaale ghar grihastha vyavhaar mein rehte hain, yahaan vaalon se bhi bahut teekhe ja sakte hain। maaya ke saath poori yuddha chalti rehti hai। second by second tumhaara kalpa pahle misal part chalta aaya hai। tum kahenge itna samay paas ho gaya, kya-kya hua hai, woh bhi buddhi mein hai। saara gyaan buddhi mein hai। jaise baap mein gyaan hai, is daada mein bhi aana chaahiye। baba bolte hain to zaroor daada bhi bolte honge। tum bhi jaante ho kaun-kaun achhe dil saaph hain। dil saaph vaale hi dil par chadhte hain। unmein loonpaani ka svabhaav nahin rehta hai, sadaiv harshit rehte hain। unka mood kabhi phirega nahin। yahaan to bahuton ki mood phir jaati hai। baat mat poochho। is samay sabhi kehte bhi hain ham patit hain। abhi patit-paavan baap ko bulaaya hai ki aakar paavan banaao। baap kehte hain - bachchon, mujhe yaad karte raho to tumhaare kapde saaph hon। meri shreemat par chalo। shreemat par na chalne vaale ka kapda saaph nahin hota। aatma shuddh hoti hi nahin। baap to din-raat is par hi jor dete hain - apne ko aatma samjho। deh-abhimaan mein aane se hi tum ghutka khaate ho। jitna-jitna oopar chadhte jaate ho, khushnumah hote jaate ho aur harshitmukh rehta hai। baba jaante hain achhe-achhe first class bachche hain parantu andarooni haalat dekho to gal rahe hain। deh-abhimaan ki aag jaise gala rahi hai। samajhte nahin hain, yeh beemaari phir kahaan se aai। baap kehte hain deh-abhimaan se yeh beemaari aati hai। dehi-abhimaani ko kabhi beemaari nahin lagegi। bahut andar mein jalte rehte hain। baap to kehte hain - bachche, dehi-abhimaani bhav। poochhte hain yeh rog kyon laga hai? baap kehte hain yeh deh-abhimaan ki beemaari aisi hai, baat mat poochho। koi ko yeh beemaari lagti hai to ekdam chichad hokar lagti hai (chipak jaati hai), chhodti hi nahin hai। shreemat par na chal apne deh-abhimaan mein chalte hain to chot bade zor se lagti hai। baba ke paas to sab samaachaar aate hain। maaya kaise ekdam naak se pakad gira deti hai। buddhi bilkul maar daalti hai। sanshay buddhi ban padte hain। bhagwan ko bulaate hain ki aakar hamko pattharbuddhi se paarasbuddhi banaao aur phir unke bhi viruddha ho jaate, to kya gati hogi! ekdam girkar pattharbuddhi ban jaate hain। bachchon ko yahaan baithe yeh khushi rahni chaahiye, student life is di best yeh hai। baap kehte hain inse aur koi padhaai oonch hai kya? di best to yeh hai, 21 janmon ka phal deti hai, to aisi padhaai mein kitna attention dena chaahiye। koi to bilkul attention nahin dete hain। maaya naak-kaan ekdam kaat leti hai। baap khud kehte hain aadha-kalpa inka raajya chalta hai to aisa pakad leti hai jo baat mat poochho, isliye bahut khabardaar raho। ek-do ko saavdhaan karte raho। shivbaaba ko yaad karo nahin to maaya kaan naak kaat legi। phir koi kaam ke nahin rahenge। bahut samajhte bhi hain ki ham lakshmi-naaraayan ka pad paayen, impossible hai। thak kar phaan ho jaate hain। maaya se haar khaakar ekdam kichde mein jaakar padte hain। dekho, hamaari buddhi bigadti hai to samajhna chaahiye maaya ne naak se pakda hai। yaad ki yaatra mein bahut bal hai। bahut khushi bhari hui hai। kehte bhi hain khushi jaisi khuraak nahin। dukaan mein graahak aate rehte hain, kamaai hoti rehti hai to kabhi unko thakaavat nahin hogi। bhookh nahin marenge। badi khushi mein rehte hain। tumko to athaah (beshumaar) dhan milta hai। tumhein to bahut khushi rahni chaahiye। dekhna chaahiye - hamaari chalan daivi hai ya aasuri hai? samay bahut thoda hai। akaale mrityu ki bhi jaise race hai। accident aadi dekho kitne hote rehte hain। tamopradhaan buddhi hote jaate hain। barsaat jor se padegi, unko bhi kudarti accident kahenge। maut saamne aaya ki aaya। samajhte bhi hain atomic bombs ki ladaai chhid jaayegi। aise-aise khauphnaak kaam karte hain, tang kar denge to phir ladaai bhi chhid jaayegi। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) maulaai masti mein rahkar svayan ko svatantra banaana hai। kisi bhi bandhan mein nahin bandhana hai। maaya choohi se bahut-bahut sambhaal karni hai, khabardaar rehna hai। dil mein kabhi bhi shaitaani khyaal na aayen।

2) baap dvaara jo beshumaar dhan (gyaan ka) milta hai, uski khushi mein rehna hai। is kamaai mein kabhi bhi sanshaybuddhi ban thakna nahin hai। student life di best life hai isliye padhaai par poora-poora dhyaan dena hai।

vardaan:- sada alert rah sarva ki aashaaon ko poorn karne vaale master mukti-jeevanmukti daata bhav

ab sabhi bachchon mein yeh shubh sankalp emerge hona chaahiye ki sarva ki aashaaon ko poorn karen। sabki ichchha hai ki janma-maran se mukta ho jaaen, to uska anubhav karaao। iske liye apne shaktishaali satopradhaan vibration se prakriti aur manushyaatmaaon ki vrittiyon ko change karo। master daata ban har aatma ki aashaaon ko poorn karo। mukti, jeevanmukti ka daan do। yeh jimmevaari ki smriti aapko sada alert bana degi।

slogan:- murleedhar ki murli par deh ki bhi sudh-budh bhoolne vaale hi sachche gop gopiyaan hain।