Murli du jour du mercredi 27 novembre 2024

27-11-2024 praatahmurli om shanti "baapdaada"' madhuban

“meethe bachche - had ke sansaar ki vaahyaat baaton mein apna time vesta nahin karna hai, buddhi mein sada royal khyaalaat chalte rahen''

prashn:- kaun-se bachche baap ke har direction ko amal mein la sakte hain?

uttar:- jo antarmukhi hain, apna show nahin hai, roohaani nashe mein rehte hain, vahi baap ke har direction ko amal mein la sakte hain। tumhein mithya ahankaar kabhi nahin aana chaahiye। andar ki badi saphaai ho। aatma bahut achhi ho, ek baap se sachcha lav ho। kabhi loonpaani arthaat khaarepan ka sanskaar na ho, tab baap ka har direction amal mein aayega।

om shanti। bachche sirf yaad ki yaatra mein hi nahin baithe hain। bachchon ko yeh fakhur hai ki ham shreemat par apna paristaan sthaapan kar rahe hain। itna umang, khushi rahni chaahiye। kichadpatti aadi ki sab vaahyaat baaten nikal jaani chaahiye। behad ke baap ko dekhte hi hullaas mein aana chaahiye। jitna-jitna tum yaad ki yaatra mein rahenge utna improvement aati jaayegi। baap kehte hain bachchon ke liye roohaani university honi chaahiye। tumhaari hai hi world spiritual university। to woh university kahaan hai? university khaas sthaapan ki jaati hai। uske saath badi royal hostel chaahiye। tumhaare kitne royal khyaalaat hone chaahiye। baap ko to raat-din yahi khyaalaat rehte hain - kaise bachchon ko padhaakar oonch imtahaan mein paas karaayen? jisse phir yeh vishwa ke maalik banne vaale hain। asul mein tumhaari aatma shuddh satopradhaan thi to shareer bhi kitna satopradhaan sundar tha। raajaai bhi kitni oonch thi। tumhaara had ke sansaar ki kichadpatti ki baaton mein time bahut vesta hota hai। tum student ke andar kichadpatti ke khyaalaat nahin hone chaahiye। committee aadi to bahut achhi-achhi banaate hain। parantu yogbal hai nahin। gapoda bahut maarte hain - ham yeh karenge, yeh karenge। maaya bhi kehti hai ham inko naak-kaan se pakdenge। baap ke saath lav hi nahin hai। kaha jaata hai na - nar chaahat kuchh aur… to maaya bhi kuchh karne nahin deti hai। maaya bahut thagne vaali hai, kaan hi kaat leti hai। baap kitna bachchon ko oonch banaate hain, direction dete hain - yeh-yeh karo। baba badi royal-royal bachchiyaan bhej dete hain। koi-koi kehte hain baba ham training liye jaaven? to baba kehte hain bachche, pahle tum apni kamiyon ko to nikaalo। apne ko dekho hamaare mein kitne avgun hain? achhe-achhe mahaarthiyon ko bhi maaya ekdam loon-paani kar deti hai। aise khaare bachche hain jo baap ko kabhi yaad bhi nahin karte hain। gyaan ka “ga'' bhi nahin jaante। baahar ka show bahut hai। ismen to bada antarmukh rehna chaahiye, parantu kaiyon ki to aisi chalan hoti hai jaise anpadh jat log hote hain, thode-se paise hain to uska nasha chadh jaata hai। yeh nahin samajhte ki are, ham to kangaal hain। maaya samajhne nahin deti hai। maaya badi jabardasta hai। baba thodi mahima karte hain to usmein bada khush ho jaate hain।

baba ko raat-din yahi khyaalaat chalti hain ki university badi first class honi chaahiye, jahaan bachche achhi reeti padhen। tum jaante ho ham svarga mein jaate hain to khushi ka paara chadha rehna chaahiye na। yahaan baba kisma-kisma ka dose dete hain, nasha chadhaate hain। koi devaala nikaala hua ho, unko sharaab pila do to samjhenge ham baadshaah hain। phir nasha poora hone se vaise ka vaisa ban jaate hain। ab yeh to hai roohaani nasha। tum jaante ho behad ka baap teacher ban hamko padhaate hain aur direction dete hain - aise-aise karo। koi-koi samay mein kisko mithya ahankaar bhi aa jaata hai। maaya hai na। aisi-aisi baaten banaate hain jo baat mat poochho। baba samajhte hain yeh chal nahin sakenge। andar ki badi saphaai chaahiye। aatma bahut achhi chaahiye। tumhaari lav marriage hui hai na। lav marriage mein kitna pyaar hota hai, yeh to patiyon ka pati hai। so bhi kitnon ki lav marriage hoti hai। ek ki thode hi hoti hai। sab kehte hain hamaari to shivbaaba ke saath sagaai ho gai। ham to svarga mein jaakar baithenge। khushi ki baat hai na। andar mein aana chaahiye na baba hamko kitna shrringaar karte hain। shivbaaba shrringaar karte hain in dvaara। tumhaari buddhi mein hai ki ham baap ko yaad karte-karte satopradhaan ban jaayenge। is knowledge ko aur koi jaanta hi nahin। ismen bada nasha rehta hai। abhi ajun itna nasha chadhta nahin hai। hona hai zaroor। gaayan bhi hai ateendriy sukh gop-gopiyon se poochho। abhi tumhaari aatmaayen kitni chhi-chhi hain। jaise bahut chhi-chhi kichde mein baithi hain। unhon ko baap aakar change karte hain, rejuvenate karte hain। manushya glands change karaate hain to kitni khushi hoti hai। tumko to ab baap mila to beda hi paar hai। samajhte ho ham behad ke baap ke bane hain to apne ko kitna jaldi sudhaarna chaahiye। raat-din yahi khushi, yahi chintan rahe - tumko martial dekho kaun mila hua hai! raat-din isi khyaalaat mein rehna hota hai। jo-jo achhi reeti samajhte hain, pahchaante hain, woh to jaise udne lag padte hain।

tum bachche abhi sangam par ho। baaki woh sabhi to gand mein pade hain। jaise kichde ke kinaare jhopdiyaan lagaakar gand mein baithe rehte hain na। kitni jhuggiyaan bani hui rehti hain। yeh phir hai behad ki baat। abhi unse nikalne ki shivbaaba tumko bahut sahaj yukti batlaate hain। meethe-meethe bachchon tum jaante ho na is samay tumhaari aatma aur shareer donon hi patit hain। abhi tum nikal aaye ho। jo-jo nikalkar aaye hain unmein gyaan ki paraakaashtha hai na। tumko baap mila to phir kya! yeh nasha jab chadhe tab tum kisko samjha sako। baap aaya hua hai। baap hamaari aatma ko pavitra bana dete hain। aatma pavitra banne se phir shareer bhi first class milta hai। abhi tumhaari aatma kahaan baithi hai? is jhuggi (shareer) mein baithi hui hai। tamopradhaan duniya hai na। kichde ke kinaare par aakar baithe hain na। vichaar karo ham kahaan se nikle hain। baap ne gande naale se nikaala hai। ab hamaari aatma svachchha ban jaayegi। rahne vaale bhi first class mahal banaayenge। hamaari aatma ko baap shrringaar kar svarga mein le ja rahe hain। andar mein aise-aise khyaalaat bachchon ko aane chaahiye। baap kitna nasha chadhaate hain। tum itna oonch the phir girte-girte aakar neeche pade ho। shivaalay mein the to aatma kitni shuddh thi। to phir aapas mein milkar jaldi-jaldi shivaalay mein jaane ka upaay karna chaahiye।

baba ko to wonder lagta hai - bachchon ko woh dimaag nahin! baba hamko kahaan se nikaalte hain! paandav government sthaapan karne vaala baap hai। bhaarat jo heaven tha so ab hell hai। aatma ki baat hai। aatma par hi taras padta hai। ekdam tamopradhaan duniya mein aakar aatma baithi hai isliye baap ko yaad karti hai - baba, hamko vahaan le jaao। yahaan baithe bhi tumko yeh khyaalaat chalaane chaahiye isliye baba kehte hain bachchon ke liye first class university banaao। kalpa-kalpa banti hai। tumhaare khyaalaat bade aaleeshaan hone chaahiye। abhi woh nasha nahin chadha hua hai। nasha ho to pata nahin kya karke dikhaayen। bachche university ka arth nahin samajhte hain। us royalty ke nashe mein nahin rehte hain। maaya dabaakar baithi hai। baba samjhaate hain bachche apna ulta nasha mat chadhaao। harek apni-apni qualification dekho। ham kaise padhte hain, kya madad karte hain, sirf baaton ka pakauda nahin khaana hai। jo kehte ho woh karna hai। gapode nahin ki yeh karenge, yeh karenge। aaj kehte hain yeh karenge, kal maut aaya khatma ho jaayenge। satayug mein to aise nahin kahenge। vahaan kabhi akaale mrityu hota nahin। kaal aa nahin sakta। woh hai hi sukhdhaam। sukhdhaam mein kaal ke aane ka hukm nahin। raavan raajya aur raamraajya ke bhi arth ko samajhna hai। abhi tumhaari ladaai hai hi raavan se। deh-abhimaan bhi kamaal karta hai, jo bilkul patit bana deta hai। dehi-abhimaani hone se aatma shuddh ban jaati hai। tum samajhte ho na vahaan hamaare kaise mahal banenge। abhi tum to sangam par aa gaye ho। nambarvaar sudhar rahe ho, laayak ban rahe ho। tumhaari aatma patit hone ke kaaran shareer bhi patit mile hain। abhi main aaya hoon tumko svargavaasi banaane। yaad ke saath daiveegun bhi chaahiye। maasi ka ghar thode hi hai। samajhte hain ki baba aaya hai hamko nar se naaraayan banaane parantu maaya ka bada gupta mukaabla hai। tumhaari ladaai hai hi gupta isliye tumko unknown-warriors kaha gaya hai। unknown warrior aur koi hota hi nahin। tumhaara hi naam hai warriors। aur to sabke naam register mein hain hi। tum unknown warriors ki nishaani unhonne pakdi hai। tum kitne gupta ho, kisko pata nahin। tum vishwa par vijay pa rahe ho maaya ko vash karne ke liye। tum baap ko yaad karte ho phir bhi maaya bhula deti hai। kalpa-kalpa tum apna raajya sthaapan kar lete ho। to unknown warriors tum ho jo sirf baap ko yaad karte ho। ismen haath-paanv kuchh nahin chalaate ho। yaad ke liye yuktiyaan bhi baba bahut batlaate hain। chalte-phirte tum yaad ki yaatra karo, padhaai bhi karo। abhi tum samajhte ho ham kya the, kya ban gaye hain। ab phir baba hamko kya banaate hain। kitna sahaj yukti batlaate hain। kahaan bhi rehte yaad karo to junk utar jaaye। kalpa-kalpa yeh yukti dete rehte hain। apne ko aatma samajh baap ko yaad karo to satopradhaan banenge, aur koi bhi bandhan nahin। bathroom mein jaao to bhi apne ko aatma samajh baap ko yaad karo to aatma ka mail utar jaaye। aatma ko koi tilak nahin lagaana hota hai, yeh sab to bhakti maarga ki nishaani hain। is gyaan maarga mein koi darkaar nahin hai, paai ka kharcha nahin। ghar baithe yaad karte raho। kitna sahaj hai। woh baba hamaara baap bhi hai, teacher aur guru bhi hai।

pahle baap ki yaad phir teacher ki phir guru ki, kaayda aise kehta hai। teacher ko to zaroor yaad karenge, unse padhaai ka varsa milta hai phir vaanaprastha avastha mein guru milta hai। yeh baap to sab wholesale mein de dete hain। tumko 21 janma ke liye raajaai whole-sel mein de dete hain। shaadi mein kanya ko dahej gupta dete hain na। show karne ki darkaar nahin। kaha jaata hai gupta daan। shivbaaba bhi gupta hai na, ismen ahankaar ki koi baat nahin। koi-koi ko ahankaar rehta hai ki sab dekhen। yeh hai sab gupta। baap tumko vishwa ki baadshaahi dahej mein dete hain। kitna gupta tumhaara shrringaar ho raha hai। kitna bada dahej milta hai। baap kaise yukti se dete hain, kisko pata nahin padta। yahaan tum beggar ho, doosre janma mein golden spoon in mouth hoga। tum golden duniya mein jaate ho na। vahaan sab kuchh sone ka hoga। saahookaaron ke mahlon mein achhi jadit hogi। farka to zaroor rahega। yeh bhi abhi tum samajhte ho - maaya sabko ulta latka deti hai। ab baap aaya hai to bachchon mein kitna haunsala hona chaahiye। parantu maaya bhula deti hai - baap ka direction hai ya brahma ka? bhaai ka hai ya baap ka? isi mein bahut moonjhate hain। baap kehte hain achha va bura ho - tum baap ka direction hi samjho। un par chalna pade। inki koi bhool bhi ho jaayegi to abhul kara denge। unmein taakat to hai na। tum dekhte ho yeh kaise chalte hain, inke sir par kaun baithe hain। ekdam baaju mein baithe hain। guru log baaju mein bithaakar sikhlaate hain na। to bhi mehnat inko karni hoti hai। tamopradhaan se satopradhaan banne mein purooshaartha karna padta hai।

baap kehte hain mujhe yaad kar bhojan banaao। shivbaaba ki yaad ka bhojan aur kisko mil na sake। abhi ke bhojan ka hi gaayan hai। woh brahman log bhal stuti gaate hain parantu arth kuchh nahin samajhte। jo mahima karte hain, samajhte kuchh nahin। itna samjha jaata hai ki yeh religious minded hain kyonki pujaari hain। vahaan to religious minded ki baat hi nahin, vahaan bhakti hoti nahin। yeh bhi kisko pata nahin hai - bhakti kya cheez hoti hai। kehte the gyaan, bhakti, vairaagya। kitne first class akshar hain। gyaan din, bhakti raat। phir raat se vairaagya to din mein jaate hain। kitna clear hai। abhi tum samajh gaye ho to tumko dhakka nahin khaana padta hai।

baap kehte hain mujhe yaad karo, main tumko vishwa ka maalik banaata hoon। main tumhaara behad ka baap hoon, srishti ka chakra jaanna bhi kitna sahaj hai। beej aur jhaad ko yaad karo। abhi kaliyug ka ant hai phir satayug aana hai। abhi tum sangamayug par gul-gul bante ho। aatma satopradhaan ban jaayegi to phir rahne ka bhi satopradhaan mahal milega। duniya hi nai ban jaati hai। to bachchon ko kitni khushi rahni chaahiye। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) sada fakhur (nasha) rahe ki ham shreemat par apna paristaan sthaapan kar rahe hain। vaahyaat kichadpatti ki baaton ko chhod bade hullaas mein rehna hai।

2) apne khyaalaat bade aaleeshaan rakhne hain। bahut achhi royal university aur hostel kholne ka prabandha karna hai। baap ka gupta madadgaar banna hai, apna show nahin karna hai।

vardaan:- nimitta koi bhi seva karte behad ki vritti dvaara vibration phailaane vaale behad sevaadhaari bhav

ab behad parivartan ki seva mein teevra gati laao। aise nahin kar to rahe hain, itna busy rehte hain jo time hi nahin milta। lekin nimitta koi bhi seva karte behad ke sahayogi ban sakte ho, sirf vritti behad mein ho to vibration phailte rahenge। jitna behad mein busy rahenge to jo duty hai woh aur hi sahaj ho jaayegi। har sankalp, har second shreshtha vibration phailaane ki seva karna hi behad sevaadhaari banna hai।

slogan:- shiv baap ke saath combined rahne vaali shivshaktiyon ka shrangaar hai gyaan ke astra-shastra।