Murli du jour du lundi 2 décembre 2024

02-12-2024 praatahmurli om shanti "baapdaada"' madhuban

“meethe bachche - tumhein apne deepak ki sambhaal svayan hi karni hai, toofaanon se bachne ke liye gyaan-yog ka ghrit zaroor chaahiye''

prashn:- kaun-sa purushaartha gupta baap se gupta varsa dila deta hai?

uttar:- antarmukh arthaat chup rahkar baap ko yaad karo to gupta varsa mil jaayega। yaad mein rehte shareer chhoote to bahut achha, ismen koi takleeph nahin। yaad ke saath-saath gyaan-yog ki service bhi karni hai, agar nahin kar sakte to karmana seva karo। bahuton ko sukh denge to aasheervaad milegi। chalan aur bolchaal bhi bahut saatvik chaahiye।

geet:- nirbal se ladaai balvaan ki…

om shanti। baba ne samjha diya hai jab aise geet sunte ho to har ek ko apne oopar hi vichaar saagar manthan karna hota hai। yeh to bachche jaante hain - manushya marte hain to 12 roz deeva jagaate hain। tum phir marne ke liye taiyaari kar rahe ho aur apni jyot purushaartha kar aapehi jaga rahe ho। purushaartha bhi maala mein aane vaale hi karte hain। praja is maala mein nahin aati। purushaartha karna chaahiye ham vijay maala mein pahle jaayen। kahaan maaya billi toofaan lagaakar vikarma na bana de jo deeva bujh jaae। ab ismen gyaan aur yog donon bal chaahiye। yog ke saath gyaan bhi zaroori hai। har ek ko apne deepak ki sambhaal karni hai। ant tak purushaartha chalna hi hai। race chalti rehti hai to bahut sambhaal karni hai - kahaan jyot kam na ho jaae, bujh na jaae isliye yog aur gyaan ka ghrit roz daalna padta hai। yogbal ki taakat nahin hai to daud nahin sakte hain। pichhaadi mein rah jaate hain। school mein subject hoti hain, dekhte hain - ham is subject mein teekhe nahin hain to hisaab mein jor lagaate hain। yahaan bhi aise hain। sthool service ki subject bhi bahut achhi hai। bahuton ki aasheervaad milti hai। koi bachche gyaan ki service karte hain। din-pratidin service ki vriddhi hoti jaayegi। ek dhani ke 6-8 dukaan bhi hote hain। sabhi ek jaise nahin chalte। koi mein kam graahki, koi mein jaasti hoti hai। tumhaara bhi ek din woh samay aane vaala hai jo raat ko bhi phursat nahin milegi। sabko pata chalega ki gyaan saagar baba aaya hua hai - avinaashi gyaan ratnon se jholi bharte hain। phir bahut bachche aayenge। baat mat poochho। ek-do ko sunaate hain na। yahaan yeh vastu bahut achhi sasti milti hai। tum bachche bhi jaante ho yeh raajayog ki shiksha bahut sahaj hai। sabko is gyaan ratnon ka maaloom pad jaayega to aate rahenge। tum yeh gyaan aur yog ki service karte ho। jo yeh gyaan yog ki service nahin kar sakte to phir karmana service ki bhi marks hain। sabhi ki aasheervaad milengi। ek-do ko sukh dena hota hai। yeh to bahut-bahut sasti khaan hai। yeh avinaashi heere-javaahron ki khaan hai। 8 ratnon ki maala banaate hain na। poojte bhi hain parantu kisko pata nahin hai, yeh maala kiski bani hui hai।

tum bachche jaante ho kaise ham hi poojya so pujaari bante hain। yeh badi wonderful knowledge hai jo duniya mein koi nahin jaante। abhi tum lucky stars bachchon ko hi nishchay hai ki ham svarga ke maalik the, abhi narka ke maalik ban pade hain, svarga ke maalik honge to punarjanma bhi vahaan hi lenge। abhi phir ham svarga ke maalik ban rahe hain। tum braahmanon ko hi is sangamayug ka pata hai। doosri or saari duniya hai kaliyug mein। yug to alag-alag hain na। satayug mein honge to punarjanma satayug mein lenge। abhi tum sangamayug par ho। tumhaare se koi shareer chhodenge to sanskaaron anusaar phir yahaan hi aakar janma lenge। tum brahman ho sangamayug ke। woh shoodra hain kaliyug ke। yeh knowledge bhi tumko is sangam par milti hai। tum bi.ke. gyaan gangaayen practical mein ab sangamayug par ho। abhi tumko race karni hai। dukaan sambhaalni hai। gyaan-yog ki dhaarna nahin hogi to dukaan sambhaal nahin sakenge। service ka ujoora to baba dene vaala hai। yagya racha jaata hai to kisma-kisma ke brahman log aa jaate hain। phir kisko dakshina jaasti, kisko kam milti hai। ab yeh parampita paramatma ne roodra gyaan yagya racha hai। ham hain brahman। hamaara dhandha hi hai manushya ko devta banaana। aisa yagya aur koi hota nahin, jo koi kahe ki ham is yagya se manushya se devta ban rahe hain। ab isko roodra gyaan yagya athva paathshaala bhi kaha jaata hai। gyaan aur yog se har ek bachcha devi-devta pad pa sakta hai। baba raay bhi dete hain tum paramdham se baba ke saath aaye ho। tum kahenge ham paramdham nivaasi hain। is samay baba ki mat se ham svarga ki sthaapna kar rahe hain। jo sthaapna karenge vahi zaroor maalik banenge। tum jaante ho is duniya mein ham most luckiest, gyaan soorya, gyaan chandrama aur gyaan sitaare hain। banaane vaala hai gyaan saagar। woh soorya, chaand, sitaare to sthool mein hain na। unke saath hamaari bhent hain। to ham bhi phir gyaan soorya, gyaan chandrama, gyaan sitaare honge। hamko aisa banaane vaala hai gyaan ka saagar। naam to padega na। gyaan soorya athva gyaan saagar ke ham bachche hain। woh to yahaan ke rahvaasi nahin hain। baba kehte hain main aata hoon tumko aapasmaan banaata hoon। gyaan soorya, gyaan sitaare tumko yahaan banna hai। tum jaante ho barobar ham bhavishya mein phir yahaan hi svarga ke maalik banenge। saara madaar purushaartha par hai। ham maaya par jeet paane ke warriors hain। vo log phir man ko vash karne ke liye kitne hath aadi karte hain। tum to hathayog aadi kar na sako। baba kehte hain tumko koi takleeph aadi nahin karni hai, sirf kehta hoon tumko mere paas aana hai isliye mujhe yaad karo। main tum bachchon ko lene aaya hoon। aise aur koi manushya kah na sake। bhal apne ko eeshvar kahe parantu apne ko guide kah na sake। baba kehte hain main mukhya panda kaalon ka kaal hoon। ek satyavaan saavitri ki kahaani hai na! unka jismaani lav hone ke kaaran duhkhi hoti thi। tum to khush hote ho। main tumhaari aatma ko le jaaoonga, tum kabhi duhkhi nahin honge। jaante ho hamaara baba aaya hai sweet hom mein le jaane liye। jisko muktidhaam, nirvaandhaam kaha jaata hai। kehte hain main sabhi kaalon ka kaal hoon। woh to ek aatma ko le jaate hain, main to kitna bada kaal hoon। 5 hajaar varsha pahle bhi main guide ban sabhi ko le gaya tha। saajan sajniyon ko vaapis le jaate hain to unko yaad karna pade।

tum jaante ho abhi ham padh rahe hain phir yahaan aayenge। pahle sweet hom jaayenge phir neeche aayenge। tum bachche svarga ke sitaare thahre। aage narka ke the। sitaare bachchon ko kaha jaata hai। lucky sitaare nambarvaar purushaartha anusaar hain। tumko daade ki milkiyat milti hai। khaan badi jabardasta hai aur yeh khaan ek hi baar nikalti hai। woh khaaniyaan to bahut hain na। nikalti rehti hain। koi baith dhoondhe to bahut hain। yeh to ek hi baar ek hi khaan milti hai - avinaashi gyaan ratnon ki। woh kitaab to bahut hain। parantu unko ratna nahin kahenge। baba ko gyaan saagar kaha jaata hai। avinaashi gyaan ratnon ki niraakaari khaan hai। in ratnon se ham jholiyaan bharte rehte hain। tum bachchon ko khushi honi chaahiye। har ek ko fakhur bhi hota hai। dukaan par dhandha jaasti hota hai to naamaachaar bhi hota hai। yahaan praja bhi bana rahe hain to vaaris bhi bana rahe hain। yahaan se ratnon ki jholi bharkar phir jaae daan dena hai। parampita paramatma hi gyaan saagar hai jo gyaan ratnon se jholi bharte hain। baaki woh samudra nahin jo dikhaate hain ratnon ki thaali bharkar devtaaon ko dete hain। us saagar se ratna nahin milte। yeh gyaan ratnon ki baat hai। drama anusaar phir tumko ratnon ki khaaniyaan bhi milti hain। vahaan dher heere-javaahar honge, jisse phir bhakti maarga mein mandir aadi banaayenge। earthquake aadi hone se sab andar chale jaate hain। vahaan mahal aadi to bahut bante hain, ek nahin। yahaan bhi raajaaon ki competition hoti hai bahut। tum bachche jaante ho - hoobhu kalpa pahle jaisa makaan banaaya tha vaisa phir banaayenge। vahaan to bahut sahaj makaan aadi bante honge। science bahut kaam deti hai। parantu vahaan science akshar nahin hoga। science ko hindi mein vigyaan kehte hain। aajkal to vigyaan bhavan bhi naam rakh diya hai। vigyaan akshar gyaan ke saath bhi lagta hai। gyaan aur yog ko vigyaan kahenge। gyaan se ratna milte hain, yog se ham ever healthy bante hain। yeh gyaan aur yog ki knowledge hain jisse phir vaikuntha ke bade-bade bhavan banenge। ham abhi is saari knowledge ko jaante hain। tum jaante ho ham bhaarat ko svarga bana rahe hain। tumhaara is deh se koi mamatva nahin hai। ham aatma is shareer ko chhod svarga mein jaakar naya shareer lenge। vahaan bhi samajhte hain ek puraana shareer chhod jaae naya lenge। vahaan koi duhkh va shok nahin hota। naya shareer len to achha hi hai। hamko baba aisa bana rahe hain, jaise kalpa pahle bhi bane the। ham manushya se devta ban rahe hain। barobar kalpa pahle bhi anek dharma the। geeta mein koi yeh nahin hai। gaaya jaata hai aadi sanaatan devi-devta dharma ki sthaapna brahma dvaara। anek dharmon ka vinaash kaise hota hai, so tum samjha sakte ho। ab sthaapna ho rahi hai। baba aaye hi tab the jab devi-devta dharma lop ho gaya tha। phir parampara kaise chala hoga। yeh bahut sahaj baaten hain। vinaash kiska hua? anek dharmon ka। to abhi anek dharma hain na। is samay ant hai, saara gyaan buddhi mein rehna chaahiye। aise to nahin, shivbaaba hi samjhaate hain। kya yeh baba kuchh nahin batlaate। inka bhi part hai, shreemat brahma ki bhi gaai hui hai। shreekrishna ke liye to shreemat kehte nahin। vahaan to sab shri hain, unhon ko mat ki darkaar hi nahin। yahaan brahma ki bhi mat milti hai। vahaan to yatha raaja-raani tatha praja - sabhi ki shreshtha mat hai। zaroor kisne di hogi। devtaayen hain shreemat vaale। shreemat se hi svarga banta hai, aasuri mat se narka bana hai। shreemat hai shiv ki। yeh sab baaten sahaj samajhne ki hain। shivbaaba ki yeh sab dukaan hain। ham bachche chalaane vaale hain। jo achha dukaan chalaate hain, unka naam hota hai। hoobhu jaise dukaandaari mein hota hai। parantu yeh vyaapaar koi virla kare। vyaapaar to sabhi ko karna hai। chhote bachche bhi gyaan aur yog ka vyaapaar kar sakte hain। shantidham aur sukhdhaam - bas, buddhi mein unko yaad karna hai। vo log raam-raam kehte hain। yahaan chup hokar yaad karna hai, bolna kuchh nahin hai। shivpuri, vishnupuri bahut sahaj baat hai। sweet hom, sweet raajdhaani yaad hai। woh dete hain sthool mantra, yeh hai sookshm mantra। ati sookshm yaad hai। sirf is yaad karne se ham svarga ke maalik ban jaate hain। japna kuchh bhi nahin hai sirf yaad karna hai। aavaaz kuchh nahin karna padta। gupta baba se gupta varsa chup rahne se, antarmukh hone se ham paate hain। isi hi yaad mein rehte shareer chhoot jaae to bahut achha hai। koi takleeph nahin, jinko yaad nahin thaharti woh apna abhyaas karen। sabhi ko kaho baba ne kaha hai mujhe yaad karo to ant mati so gati। yaad se vikarma vinaash honge aur main svarga mein bhej doonga। buddhiyog shivbaaba se lagaana bahut sahaj hai। parhej bhi saari yahaan hi karni hai। satopradhaan bante hain to sabhi saatvik hone chaahiye - chalan saatvik, bolna saatvik। yeh hai apne saath baaten karna। saathi se pyaar se bolna hai। geet mein bhi hai na - piyu-piyu bol sada anmol.....।

tum ho roop-basanta। aatma roop banti hai। gyaan ka saagar baap hai to zaroor aakar gyaan hi sunaayenge। kehte hain main ek hi baar aakar shareer dhaaran karta hoon। yeh kam jaadoogri nahin hai! baba bhi roop-basanta hai। parantu niraakaar to bol nahin sakta isliye shareer liya hai। parantu woh punarjanma mein nahin aata hai। aatmaayen to punarjanma mein aati hain।

tum bachche baba ke oopar balihaar jaate ho to baba kehte hain phir mamatva nahin rakhna। apna kuchh nahin samajhna। mamatva mitaane ke liye hi baba yukti rachte hain। kadam-kadam par baap se poochhna padta hai। maaya aisi hai jo chamaat maarti hai। poori boxing hai, bahut to chot khaakar phir khade ho jaate hain। likhte bhi hain - baba, maaya ne thappad laga diya, kaala munh kar diya। jaise ki 4 manzil se gira। krodh kiya to third floor se gira। yeh bahut samajhne ki baaten hain। ab dekho, bachche tape ke liye bhi maang karte rehte hain। baba tape bhej do। ham accurate murli sunen। yeh bhi prabandha ho raha hai। bahut sunenge to bahuton ke kapaat khulenge। bahuton ka kalyaan hoga। manushya college kholte hain to unko doosre janma mein vidya jaasti milti hai। baba bhi kehte hain - tape masheen khareed karo to bahuton ka kalyaan ho jaayega। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) satopradhaan banne ke liye bahut-bahut parhej se chalna hai। apna khaan-paan, bol-chaal sab saatvik rakhna hai। baap samaan roop-basanta banna hai।

2) avinaashi gyaan ratnon ki niraakaari khaan se apni jholi bharkar apaar khushi mein rehna hai aur doosron ko bhi in ratnon ka daan dena hai।

vardaan:- nashtomoha ban duhkh ashaanti ke naam nishaan ko samaapta karne vaale smriti swaroop bhav

jo sada ek ki smriti mein rehte hain, unki sthiti ekras ho jaati hai। ekras sthiti ka arth hai ek dvaara sarva sambandh, sarva praaptiyon ke ras ka anubhav karna। jo baap ko sarva sambandh se apna banaakar smriti swaroop rehte hain woh sahaj hi nashtomoha ban jaate hain। jo nashtomoha hain unhein kabhi kamaane mein, dhan sambhaalne mein, kisi ke beemaar hone mein... duhkh ki lahar nahin aa sakti। nashtomoha arthaat dukh ashaanti ka naam nishaan na ho। sada bephikra।

slogan:- kshamaasheel woh hain jo merciful ban sarva ko duaayen dete rahen।