Murli du jour du jeudi 12 décembre 2024

12-12-2024 praatahmurli om shanti "baapdaada"' madhuban

“meethe bachche - yeh padhaai jo baap padhaate hain, ismen athaah kamaai hai, isliye padhaai achhi reeti padhte raho, link kabhi na toote''

prashn:- jo vinaashkaale vipreet buddhi hain, unhein tumhaari kis baat par hansi aati hai?

uttar:- tum jab kehte ho abhi vinaash kaal nazdeek hai, to unhein hansi aati hai। tum jaante ho baap yahaan baithe to nahin rahenge, baap ki duty hai paavan banaana। jab paavan ban jaayenge to yeh puraani duniya vinaash hogi, nai aayegi। yeh ladaai hai hi vinaash ke liye। tum devta bante ho to is kaliyugi chhi-chhi srishti par aa nahin sakte।

om shanti। roohaani baap baith roohaani bachchon ko samjhaate hain। bachche samajhte hain ham bahut besmajh ban gaye the। maaya raavan ne besmajh bana diya tha। yeh bhi bachche samajhte hain ki baap ko zaroor aana hi hai, jabki nai srishti sthaapan honi hai। trimoorti ka chitra bhi hai - brahma dvaara sthaapna, vishnu dvaara paalna, shankar dvaara vinaash kyonki karnakraavanhaar to baap hai na। ek hi hai jo karta hai aur karaata hai। pahle kiska naam aayega? jo karta hai phir jis dvaara karaate hain। karnakraavanhaar kaha jaata hai na। brahma dvaara nai duniya ki sthaapna karaate hain। yeh bhi bachche jaante hain hamaari jo nai duniya hai, jo ham sthaapan kar rahe hain, iska naam hi hai devi-devtaaon ki duniya। satayug mein hi devi-devta hote hain। kisi aur ko devi-devta nahin kaha jaata। vahaan manushya hote nahin। hai hi ek devi-devta dharma, doosra koi dharma hi nahin। abhi tum bachche smriti mein aaye ho ki barobar ham devi-devta the, nishaaniyaan bhi hain। islaami, bauddhi, Christian aadi sabki apni-apni nishaani hai। hamaara jab raajya tha to aur koi nahin tha। abhi phir aur sabhi dharma hain, hamaara devta dharma hai nahin। geeta mein akshar bade achhe-achhe hain parantu koi samajh nahin sakte। baap kehte hain vinaash kaale vipreet buddhi aur vinaash kaale preet buddhi। vinaash to is samay hi hona hai। baap aate bhi hain sangamayug par, jabki change hoti hai। baap tum bachchon ko badle mein sab kuchh naya dete hain। woh sonaar bhi hai, dhobi bhi hai, bada vyaapaari bhi hai। birla hi koi baap se vyaapaar kare। is vyaapaar mein to athaah phaayda hai। padhaai mein phaayda bahut hota hai। mahima bhi ki jaati hai ki padhaai kamaai hai, woh bhi janma-janmaantar ke liye kamaai hai। to aisi padhaai achhi reeti padhni chaahiye na aur padhaata bhi bahut sahaj hoon। sirf ek haphta samajhkar phir bhal kahaan bhi chale jaao, tumhaare paas padhaai aati rahegi arthaat murli milti rahegi to phir kabhi link nahin tootegi। yeh hai aatmaon ki paramatma ke saath link। geeta mein bhi yeh akshar hain vinaash kaale vipreet buddhi vinshanti, preet buddhi vijayanti। tum jaante ho is samay manushya ek-do ko kaatte-maarte rehte hain। in jaisa krodh va vikaar aur koi mein hota nahin। yeh bhi gaayan hai ki dropdi ne pukaara। baap ne samjhaaya hai tum sab dropdiyaan ho। bhagvaanuvaach, baap kehte hain - bachche, ab vikaar mein nahin jaao। main tumko svarga mein le chalta hoon, tum sirf mujh baap ko yaad karo। ab vinaash-kaal hai na, kiski bhi sunte nahin, ladte hi rehte hain। kitna unko kehte hain shant raho, parantu shant rehte nahin। apne bachchon aadi se bichhudkar ladaai ke maidaan mein jaate hain। kitne manushya marte hi rehte hain। manushya ki koi value nahin। agar value hai, mahima hai to in devi-devtaaon ki। abhi tum yeh banne ka purooshaartha kar rahe ho। tumhaari mahima vaastav mein in devtaaon se bhi jaasti hai। tumko abhi baap padha rahe hain। kitni oonch padhaai hai। padhne vaale bahut janmon ke ant mein bilkul hi tamopradhaan hain। main to sadaiv satopradhaan hi hoon।

baap kehte hain main tum bachchon ka obedient servant bankar aaya hoon। vichaar karo ham kitne chhi-chhi ban gaye hain। baap hi hamko vaah-vaah banaate hain। bhagwan baith manushyon ko padhaakar kitna oonch banaate hain। baap khud kehte hain main bahut janmon ke ant mein tum sabko tamopradhaan se satopradhaan banaane aaya hoon। abhi tumko padha raha hoon। baap kehte hain mainne tumko svargavaasi banaaya phir tum narkavaasi kaise bane, kisne banaaya? gaayan bhi hai vinaash kaale vipreet buddhi vinshanti। preet buddhi vijayanti। phir jitna-jitna preet buddhi rahenge arthaat bahut yaad karenge, utna tumhaara hi phaayda hai। ladaai ka maidaan hai na। koi bhi yeh nahin jaante hain ki geeta mein kaun-si yuddha bataai hai। unhonne to phir kaurvon aur paandavon ki yuddha dikhaai hai। kaurav sampradaay, paandav sampradaay bhi hain parantu yuddha to koi hai nahin। paandav unko kaha jaata hai jo baap ko jaante hain। baap se preet buddhi hain। kaurav unko kaha jaata jo baap se vipreet buddhi hain। akshar to bahut achhe-achhe samajhne laayak hain।

abhi hai sangamayug। tum bachche jaante ho nai duniya ki sthaapna ho rahi hai। buddhi se kaam lena hai। abhi duniya kitni badi hai। satayug mein kitne thode manushya honge। chhota jhaad hoga na। woh jhaad phir bada hota hai। manushya srishti roopi yeh ulta jhaad kaise hai, yeh bhi koi samajhte nahin hain। inko kalpa vriksha kaha jaata hai। vriksha ka knowledge bhi chaahiye na? aur vrikshon ka knowledge to bahut-bahut easy hai, jhat bata denge। is vriksha ka knowledge bhi aisa easy hai parantu yeh hai human vriksha। manushyon ko apne vriksha ka pata hi nahin padta hai। kehte bhi hain god is creator, to zaroor chaitanya hai na। baap sat hai, chaitanya hai, gyaan ka saagar hai। unmein kaun-sa gyaan hai, yeh bhi koi nahin samajhte hain। baap hi beej roop, chaitanya hai। unse hi saari rachna hoti hai। to baap baith samjhaate hain, manushyon ko apne jhaad ka pata nahin hai, aur jhaadon ko to achhi reeti jaante hain। jhaad ka beej agar chaitanya hota to batlaata na parantu woh to hai jad। to ab tum bachche hi rachta aur rachna ke raaz ko jaante ho। yeh sat hai, chaitanya hai, gyaan ka saagar hai। chaitanya mein to baatcheet kar sakte hain na। manushya ka tan sabse oonch amoolya gaaya gaya hai। inka moolya kathan nahin kar sakte। baap aakar aatmaon ko samjhaate hain।

tum roop bhi ho, basanta bhi ho। baap hai gyaan ka saagar। unse tumko ratna milte hain। yeh gyaan ratna hain, jin ratnon se woh ratna bhi tumko dher mil jaate hain। lakshmi-naaraayan ke paas dekho kitne ratna hain। heere-javaahron ke mahlon mein rehte hain। naam hi hai svarga, jiske tum maalik banne vaale ho। koi gareeb ko achaanak badi lottery milti hai to paagal ho jaate hain na। baap bhi kehte hain tumko vishwa ki baadshaahi milti hai to maaya kitna opposition karti hai। tumko aage chal pata padega ki maaya kitne achhe-achhe bachchon ko bhi hap kar leti hai। ekdam kha leti hai। tumne sarpa ko dekha hai - medhak ko kaise pakadta hai, jaise gaj ko graah hap karte hain। sarpa medhak ko ekdam saare ka saara hap kar leta hai। maaya bhi aisi hai, bachchon ko jeete ji pakadkar ekdam khatma kar deti hai jo phir kabhi baap ka naam bhi nahin lete hain। yogbal ki taakat tumhaare mein bahut kam hai। saara madaar yogbal par hai। jaise sarpa medhak ko hap karta hai, tum bachche bhi saari baadshaahi ko hap karte ho। saare vishwa ki baadshaahi tum second mein le lenge। baap kitna sahaj yukti bataate hain। koi hathiyaar aadi nahin। baap gyaan-yog ke astra-shastra dete hain। unhonne phir sthool hathiyaar aadi de diye hain।

tum bachche is samay kehte ho - ham kya se kya ban gaye the! jo chaahe so kaho, ham aise the zaroor। bhal the to manushya hi parantu gun aur avgun to hote hain na। devtaaon mein daiveegun hain isliye unhon ki mahima gaate hain - aap sarvagun sampanna… ham nirgun haare mein koi gun naahi। is samay saari duniya hi nirgun hai arthaat ek bhi devtaai gun nahin hai। baap jo gun sikhlaane vaala hai, unko hi nahin jaante isliye kaha jaata vinaash kaale vipreet buddhi। ab vinaash to hona hi hai sangamayug par। jabki puraani duniya vinaash hoti hai aur nai duniya sthaapan hoti hai। inko kaha jaata hai vinaash kaal। yeh hai antim vinaash phir aadhaakalpa koi ladaai aadi hoti hi nahin। manushyon ko kuchh bhi pata nahin hai। vinaash kaale vipreet buddhi hain to zaroor puraani duniya ka vinaash hoga na। is puraani duniya mein kitni aapdaayen hain। marte hi rehte hain। baap is samay ki haalat batlaate hain। farka to bahut hai na। aaj bhaarat ka yeh haal hai, kal bhaarat kya hoga? aaj yeh hai, kal tum kahaan honge? tum jaante ho pahle nai duniya kitni chhoti thi। vahaan to mahlon mein kitne heere-javaahar aadi hote hain। bhakti maarga mein bhi tumhaara mandir koi kam thode hi hota hai। sirf koi ek somnaath ka mandir thode hi hoga। ek koi banaayega to unko dekh aur bhi banaayenge। ek somnaath mandir se hi kitna loota hai। phir baith apna yaadgaar banaaya hai। to deevaaron mein patthar aadi lagaate hain। in pattharon ki kya value hogi? itne chhote-se heere ka bhi kitna daam hai। baba jauhri tha, ek ratti ka heera hota tha, 90 roopaya ratti। abhi to uski keemat hazaaron roopaya hai। milte bhi nahin। bahut value badh gai hai। is samay vilaayat aadi taraph dhan bahut hai, parantu satayug ke aage yeh kuchh bhi nahin hai।

ab baap kehte hain vinaash kaale vipreet buddhi hain। tum kehte ho vinaash sameep hai to manushya hansate hain। baap kehte hain main kitna samay baitha rahoonga, mujhe koi yahaan maja aata hai kya? main to na sukhi, na duhkhi hota hoon। mere oopar duty hai paavan banaane ki। tum yeh the, ab yeh ban gaye ho, phir tumko aisa oonch banaata hoon। tum jaante ho ham phir woh banne vaale hain। ab tumko yeh samajh aai hai, ham is daivi gharaane ke bhaati the। raajaai thi। phir aise apni raajaai ganvaai। phir aur-aur aane lage। ab yeh chakra poora hota hai। abhi tum samajhte ho laakhon varsha ki to baat hi nahin hai। yeh ladaai hai hi vinaash ki, us taraph to bahut aaraam se marenge। koi takleeph nahin hogi। hospitals aadi hi nahin honge। kaun baith seva karenge aur royenge। vahaan to yeh rasma hi nahin। unhon ki maut sahaj hoti hai। yahaan to duhkhi hokar marte hain kyonki tumne sukh bahut uthaaya hai to duhkh bhi tumko dekhna hai। khoon ki nadi yahaan hi bahegi। woh samajhte hain yeh ladaai phir shant ho jaayegi parantu shant to honi nahin hai। mirooa maut malooka shikaar। tum devta bante ho, phir kaliyugi chhi-chhi srishti par to tum aa nahin sakte। geeta mein bhi hai bhagvaanuvaach, vinaash bhi dekho, sthaapna dekho। saakshaatkaar hua na! yeh saakshaatkaar sab ant mein honge - phalaane-phalaane yeh bante hain phir us samay royenge, bahut pachhtaayenge, saja khaayenge, naseeb kootenge। lekin kar kya sakenge? yeh to 21 janmon ki lottery hai। smriti to aati hai na। saakshaatkaar bigar kisko saza nahin mil sakti hai। tribunal baithti hai na। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) svayan mein gyaan ratna dhaaran kar roop-basanta banna hai। gyaan ratnon se vishwa ke baadshaahi ki lottery leni hai।

2) is vinaash kaal mein baap se preet rakh ek ki hi yaad mein rehna hai। aisa koi karma nahin karna hai jo ant samay mein pachhtaana pade ya naseeb kootna pade।

vardaan:- sada snehi ban udti kala ka vardaan praapta karne vaale nishchit vijayi, nishchint bhav

snehi bachchon ko baapdaada dvaara udti kala ka vardaan mil jaata hai। udti kala dvaara second mein baapdaada ke paas pahunch jaao to kaise bhi swaroop mein aai hui maaya aapko chhu nahin sakegi। parmaatma chhatrachhaaya ke andar maaya ki chhaaya bhi nahin aa sakti। sneh, mehnat ko manoranjan mein parivartan kar deta hai। sneh har karma mein nishchit vijayi sthiti ka anubhav karaata hai, snehi bachche har samay nishchint rehte hain।

slogan:- nothing new ki smriti se sada achal raho to khushi mein naachte rahenge।