Murli du jour du vendredi 24 janvier 2025

24-01-2025 praatahmurli om shanti "baapdaada"' madhuban

“meethe bachche - tum ek baap ke direction par chalte chalo to baap tumhaara responsible hai, baap ka direction hai chalte-phirte mujhe yaad karo''

prashn:- jo achhe gunvaan bachche hain unki mukhya nishaaniyaan kya hongi?

uttar:- woh kaanton ko phool banaane ki achhi seva karenge। kisi ko bhi kaanta nahin lagaayenge, kabhi bhi aapas mein ladenge nahin। kisi ko bhi duhkh nahin denge। duhkh dena bhi kaanta lagaana hai।

geet:- yeh vakta ja raha hai…

om shanti। meethe-meethe sikeeldhe roohaani bachchon ne nambarvaar purooshaartha anusaar is geet ka arth samjha। nambarvaar isliye kehte hain kyonki koi to first grade mein samajhte hain, koi second grade mein, koi-koi third grade mein। samajh bhi har ek ki apni-apni hai। nishchaybuddhi bhi har ek ki apni hai। baap to samjhaate rehte hain, aisa hi hamesha samjho ki shivbaaba in dvaara direction dete hain। tum aadhaakalpa aasuri direction par chalte aaye ho, ab aise nishchay karo ki ham eeshvareey direction par chalte hain to beda paar ho sakta hai। agar eeshvareey direction na samajh manushya ka direction samjha to moonjh padenge। baap kehte hain - mere direction par chalne se phir main responsible hoon na। in dvaara jo kuchh hota hai, unki activity ka main hi responsible hoon, usko ham right karenge। tum sirf hamaare direction par chalo। jo achhi reeti yaad karenge vahi direction par chalenge। kadam-kadam eeshvareey direction samajh chalenge to kabhi ghaata nahin hoga। nishchay mein hi vijay hai। bahut bachche in baaton ko samajhte nahin hain। thoda gyaan aane se deh-abhimaan aa jaata hai। yog bahut hi kam hai। gyaan to hai history-geography ko jaanna, yeh to sahaj hai। yahaan bhi manushya kitni science aadi padhte hain। yeh padhaai to easy hai, baaki mehnat hai yog ki।

koi kahe baba ham yog mein bahut masta rehte hain, baba maanega nahin। baba har ek ki act ko dekhte hain। baap ko yaad karne vaala to most lovely hoga। yaad nahin karte isliye hi ulta-sulta kaam hota hai। bahut raat-din ka farka hai। abhi tum is seedhi ke chitra par bhi achhi reeti samjha sakte ho। is samay hai kaanton ka jangal। yeh bageecha nahin hai। yeh to clear samjhaana chaahiye ki bhaarat phoolon ka bageecha tha। bageeche mein kabhi jangali jaanvar rehte hain kya? vahaan to devi-devta rehte hain। baap to hai hi highest authority aur phir yeh prajaapita brahma bhi highest authority thahre। yeh daada hai sabse badi authority। shiv aur prajaapita brahma। aatmaayen hain shiv baba ke bachche aur phir saakaar mein ham bhaai-behen sab hain prajaapita brahma ke bachche। yeh hai sabka great-great grand father। aise highest authority ke liye hamko makaan chaahiye। aise tum likho phir dekho buddhi mein kuchh aata hai।

shivbaaba aur prajaapita brahma, aatmaon ka baap aur sab manushya maatra ka baap। yeh point bahut achhi hai samjhaane ki। parantu bachche poori reeti samjhaate nahin hain, bhool jaate hain, gyaan ki magroori chadh jaati hai। jaise ki baapdaada par bhi jeet pa lete hain। yeh daada kehte hain, meri bhal na suno। hamesha samjho shivbaaba samjhaate hain, unki mat par chalo। direct eeshvar mat dete hain ki yeh-yeh karo, responsible ham hain। eeshvareey mat par chalo। yeh eeshvar thode hi hai, tumko eeshvar se padhna hai na। hamesha samjho yeh direction eeshvar dete hain। yeh lakshmi-naaraayan bhi bhaarat ke hi manushya the। yeh bhi sab manushya hain। parantu yeh shivaalay ke rahne vaale hain isliye sab namaste karte hain। parantu bachche poora samjhaate nahin hain, apna nasha chadh jaata hai। defect to bahuton mein hai na। jab poora yog ho tab vikarma vinaash hon। vishwa ka maalik banna koi maasi ka ghar thode hi hai। baba dekhte hain, maaya ekdam naak se pakadkar gutter mein gira deti hai। baap ki yaad mein to badi khushi mein praphullit rehna chaahiye। saamne em object khadi hai, ham yeh lakshmi-naaraayan ban rahe hain। bhool jaane se khushi ka paara nahin chadhta hai। kehte hain hamko neshtha mein bithaao, baahar mein ham yaad nahin kar sakte hain। yaad mein nahin rehte hain isliye kabhi-kabhi baba bhi programme bhej dete hain parantu yaad mein baithte thode hi hain, buddhi idhar-udhar bhatakti rehti hai। baba apna misaal bataate hain - naaraayan ka kitna pakka bhakta tha, jahaan-tahaan saath mein naaraayan ka chitra rehta tha। phir bhi pooja ke samay buddhi idhar-udhar bhaagti thi। ismen bhi aisa hota hai। baap kehte hain chalte-phirte baap ko yaad karo parantu kai kehte hain - behen neshtha karaave। neshtha ka to koi arth hi nahin hai। baba hamesha kehte hain yaad mein raho, kai bachche neshtha mein baithe-baithe dhyaan mein chale jaate hain। na gyaan, na yaad rehti। ya to phir jhutke khaane lag padte hain, bahuton ko aadat pad gai hai। yeh to alpakaal ki shanti ho gai। goya baaki saara din ashaanti rehti hai। chalte-phirte baap ko yaad nahin karenge to paapon ka bojha kaise utrega? aadhaakalpa ka bojha hai। ismen hi badi mehnat hai। apne ko aatma samjho aur baap ko yaad karo। bhal baba ko bahut bachche likh bhejte hain - itna samay yaad mein raha parantu yaad rehti nahin hai। chart ko samajhte hi nahin hain। baba behad ka baap hai। patit-paavan hai to khushi mein rehna chaahiye। aise nahin, ham to shivbaaba ke hain na। aise bhi bahut hain, samajhte hain ham to baba ke hain lekin yaad bilkul karte nahin। agar yaad karte hote to phir pahle number mein jaana chaahiye। kisko samjhaane ki bhi badi achhi buddhi chaahiye। ham to bhaarat ki mahima karte hain। nai duniya mein aadi sanaatan devi-devtaaon ka raajya tha। abhi hai puraani duniya, iron ej। woh sukhdhaam, yeh duhkhadhaam। bhaarat golden ej tha to in devtaaon ka raajya tha। kehte hain ham kaise samjhen ki inka raajya tha? yeh knowledge badi wonderful hai। jiski takdeer mein jo hai, jo jitna purooshaartha karte hain woh dekhne mein to aata hai। tum activity se jaante ho, hain to kaliyugi bhi manushya, to satayugi bhi manushya। phir unhon ke aage maatha jaakar kyon tekte ho? inhon ko svarga ka maalik kehte hain na। koi marta hai to kehte hain phalaana svargavaasi hua, yeh bhi nahin samajhte। is samay to narkavaasi sab hain। zaroor punarjanma bhi yahaan hi lenge। baba har ek ki chalan se dekhte rehte hain। baba ko kitna saadhaaran reeti se kis-kis se baat karni padti hai। sambhaalna padta hai। baap kitna clear kar samjhaate hain। samajhte bhi hain to baat badi theek hai। phir bhi kyon bade-bade kaante ban jaate hain। ek-do ko duhkh dene se kaante ban jaate hain। aadat chhodte hi nahin। abhi baagvaan baap phoolon ka bageecha lagaate hain। kaanton ko phool banaate rehte hain। unka dhandha hi yeh hai। jo khud hi kaanta hoga to phool kaise banaayega? pradarshani mein bhi badi khabardaari se kisko bhejna hota hai।

achhe gunvaan bachche woh jo kaanton ko phool banaane ki achhi seva karte hain। kisi ko bhi kaanta nahin lagaate hain arthaat kisi ko duhkh nahin dete hain। kabhi bhi aapas mein ladte nahin hain। tum bachche bahut accurate samjhaate ho। ismen kisi ki insult ki to baat hi nahin। abhi shiv jayanti bhi aati hai। tum pradarshani jaasti karte raho। chhoti-chhoti pradarshani par bhi samjha sakte ho। ek second mein svargavaasi bano athva patit bhrashtaachaari se paavan shreshthaachaari bano। ek second mein jeevanmukti praapta karo। jeevanmukti ka bhi arth samajhte nahin hain। tum bhi abhi samajhte ho। baap dvaara sabko mukti jeevanmukti milti hai। parantu drama ko bhi jaanna hai। sab dharma svarga mein nahin aayenge। woh phir apne-apne section mein chale jaayenge। phir apne-apne samay par aakar sthaapna karenge। jhaad mein kitna clear hai। ek sadguru ke sivaae sadgati daata aur koi ho nahin sakta। baaki bhakti sikhlaane vaale to dher guru hain। sadgati ke liye manushya guru ho nahin sakta। parantu samjhaane ka bhi akla chaahiye, ismen buddhi se kaam lena hota hai। drama ka kaisa wonderful khel hai। tumhaare mein bhi bahut thode hain jo is nashe mein rehte hain। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

raatri class 18-3-68

tumko vaastav mein shaastron par vaad-vivaad karne ki koi darkaar nahin hai। mool baat hai hi yaad ki, aur srishti ke aadi madhya ant ko samajhna hai। chakravarti raaja banna hai। is chakra ko hi sirf samajhna hai, inka hi gaayan hai second mein jeevanmukti। tum bachchon ko wonder lagta hoga aadhaakalpa bhakti chalti hai। gyaan rinchak nahin। gyaan hai hi baap ke paas। baap dvaara hi jaanna hai। yeh baap kitna uncommon hai isliye koton mein koi nikalte hain। woh teachers aise thode hi kahenge। yeh to kehte hain main hi baap teacher guru hoon। to manushya sunkar wonder khaayenge। bhaarat ko mother country kehte hain kyonki amba ka naam bahut baala hai। amba ke mele bhi bahut lagte hain, amba meetha akshar hai। chhote bachche bhi maa ko pyaar karte hain na kyonki maa khilaati, pilaati sambhaalti hai। ab amba ka baba bhi chaahiye na। yeh to bachchi hai adopted। pati to hai nahin। yeh nai baat hai na। prajaapita brahma to zaroor adopt karte honge। yeh sabhi baaten baap hi aakar tum bachchon ko samjhaate hain। amba ka kitna mela lagta hai, pooja hoti hai, kyonki bachchi ne bahut service ki hai। mama ne jitne ko padhaaya hoga utna aur koi padha na sake। mama ka naamaachaar bahut hai, mela bhi bahut bada lagta hai। abhi tum bachche jaante ho baap ne hi aakar rachna ke aadi-madhya-ant ka saara raaz tum bachchon ko samjhaaya hai। tumko baap ke ghar ka bhi maaloom pada hai। baap se bhi lav hai to ghar se bhi lav hai। yeh gyaan tumko abhi milta hai। is padhaai se kitni kamaai hoti hai। to khushi honi chaahiye na। aur tum ho bilkul saadhaaran। duniya ko pata nahin hai, baap aakar yeh knowledge sunaate hain। baap hi aakar sabhi nai nai baaten bachchon ko sunaate hain। nai duniya banti hai behad ki padhaai se। puraani duniya se vairaagya aa jaata hai। tum bachchon ke andar mein gyaan ki khushi rehti hai। baap ko aur ghar ko yaad karna hai। ghar to sabhi ko jaana hi hai। baap to sabhi ko kahenge na bachchon, ham tumko mukti jeevanmukti ka varsa dene aaya hoon। phir bhool kyon jaate ho। main tumhaara behad ka baap hoon। raajayog sikhlaane aaya hoon। to kya tum shreemat par nahin chalenge! phir to bahut ghaata pad jaayega। yeh hai behad ka ghaata। baap ka haath chhoda to kamaai mein ghaata pad jaayega। achha goodnight। om shanti।

dhaarna ke liye mukhya saar:-

1) ek baap ki yaad se most lovely banna hai। chalte phirte karma karte yaad mein rahne ki practice karni hai। baap ki yaad aur khushi mein praphullit rehna hai।

2) kadam-kadam eeshvareey direction par chal har kaarya karna hai। apni magroori (deh-abhimaan ka nasha) nahin dikhaana hai। koi bhi ulta-sulta kaam nahin karna hai। moonjhana nahin hai।

vardaan:- saadhaaran karma karte bhi oonchi sthiti mein sthit rahne vaale sada double light bhav

jaise baap saadhaaran tan lete hain, jaise aap bolte ho vaise hi bolte hain, vaise hi chalte hain to karma bhal saadhaaran hai, lekin sthiti oonchi rehti hai। aise aap bachchon ki bhi sthiti sada oonchi ho। double light ban oonchi sthiti mein sthit ho koi bhi saadhaaran karma karo। sadaiv yahi smriti mein rahe ki avatrit hokar avtaar ban karke shreshtha karma karne ke liye aaye hain। to saadhaaran karma alaukik karma mein badal jaayenge।

slogan:- aatmik drishti-vritti ka abhyaas karne vaale pavitrata ko sahaj dhaaran kar sakte hain।

apni shaktishaali mansa dvaara sakaash dene ki seva karo

jitna svayan ko mansa seva mein busy rakhenge utna sahaj maayaajeet ban jaayenge। sirf svayan ke prati bhaavuk nahin bano lekin auron ko bhi shubh bhaavna aur shubh kaamna dvaara parivartit karne ki seva karo। bhaavna aur gyaan, sneh aur yog donon ka balance ho। kalyaankaari to bane ho ab behad vishwa kalyaankaari bano।