Murli du jour du jeudi 30 janvier 2025

30-01-2025 praatahmurli om shanti "baapdaada"' madhuban

“meethe bachche - is puraani duniya mein koi bhi saar nahin hai, isliye tumhein isse dil nahin lagaani hai, baap ki yaad tooti to saja khaani padegi''

prashn:- baap ka mukhya direction kya hai? uska ullanghan kyon hota hai?

uttar:- baap ka direction hai kisi se seva mat lo kyonki tum khud servant ho। parantu deh-abhimaan ke kaaran baap ke is direction ka ullanghan karte hain। baba kehte tum yahaan sukh lenge to vahaan ka sukh kam ho jaayega। kai bachche kehte hain ham to independent rahenge parantu tum sab baap par depend karte ho।

geet:- dil ka sahaara toot na jaae…

om shanti। shiv bhagvaanuvaach apne saaligraamon prati। shiv aur saaligraam ko to sab manushya jaante hain। donon niraakaar hain। ab shreekrishna bhagvaanuvaach kah nahin sakte। bhagwan ek hi hota hai। to shiv bhagvaanuvaach kiske prati? roohaani bachchon prati। baba ne samjhaaya hai bachchon ka ab connection hai hi baap se kyonki patit-paavan gyaan ka saagar, svarga ka varsa dene vaala to shivbaaba hi thahra। yaad bhi unko karna hai। brahma hai unka bhaagyashaali rath। rath dvaara hi baap varsa dete hain। brahma varsa dene vaala nahin hai, woh to lene vaala hai। to bachchon ko apne ko aatma samajh baap ko yaad karna hai। misla samjho rath ko koi takleeph hoti hai va kaarne-akaarne bachchon ko murli nahin milti hai to bachchon ka saara attention jaata hai shivbaaba taraph। woh to kabhi beemaar pad nahin sakte। bachchon ko itna gyaan mila hai woh bhi samjha sakte hain। pradarshani mein bachche kitna samjhaate hain। gyaan to bachchon mein hai na। har ek ki buddhi mein chitron ka gyaan bhara hua hai। bachchon ko koi atak nahin rah sakti। samjho post ka aana-jaana band ho jaata hai, strike ho jaati hai phir kya karenge? gyaan to bachchon mein hai। samjhaana hai satayug tha, ab kaliyug puraani duniya hai। geet mein bhi kehte hain puraani duniya mein koi saar nahin hai, inse dil nahin lagaani hai। nahin to saza mil jaayegi। baap ki yaad se sajaayen katti jaayengi। aisa na ho baap ki yaad toot jaaye phir saja khaani pade aur puraani duniya mein chale jaayen। aise to dher gaye hain, jinko baap yaad bhi nahin hai। puraani duniya se dil lag gai, jamaana bahut kharaab hai। koi se dil lagaai to saza bahut milegi। bachchon ko gyaan sunna hai। bhakti maarga ke geet bhi nahin sunne hain। abhi tum ho sangam par। gyaan saagar baap dvaara tumko sangam par hi gyaan milta hai। duniya mein yeh kisko pata nahin hai ki gyaan saagar ek hi hai। woh jab gyaan dete hain tab manushyon ki sadgati hoti hai। sadgati daata ek hi hai phir unki mat par chalna hai। maaya chhodti koi ko bhi nahin hai। deh-abhimaan ke baad hi koi na koi bhool hoti hai। koi semi kaam vash ho jaate hain, koi krodh vash। mansa mein toofaan bahut aate hain - pyaar karen, ye karen.. । koi ke shareer se dil nahin lagaani hai। baap kehte hain apne ko aatma samjho to shareer ka bhaan na rahe। nahin to baap ki aagya ka ullanghan ho jaata hai। deh-ahankaar se nuksaan bahut hota hai isliye deh sahit sab-kuchh bhool jaana hai। sirf baap ko aur ghar ko yaad karna hai। aatmaon ko baap samjhaate hain, shareer se kaam karte mujhe yaad karo to vikarma bhasma ho jaayenge। raasta to bahut sahaj hai। yeh bhi samajhte hain tumse bhoolen hoti rehti hain। parantu aisa na ho - bhoolon mein phansate hi jaao। ek baari bhool hui phir woh bhool nahin karni chaahiye। apna kaan pakadna chaahiye, phir yeh bhool nahin hogi। purushaartha karna chaahiye। agar ghadi-ghadi bhool hoti hai to samajhna chaahiye hamaara bahut nuksaan hoga। bhool karte-karte to durgati ko paaya hai na। kitni badi seedhi utarkar kya bane hain! aage to yeh gyaan nahin tha। abhi nambarvaar purushaartha anusaar gyaan mein sab praveen ho gaye hain। jitna ho sake anturmakhi bhi rehna hai, mukh se kuchh kehna nahin hai। jo gyaan mein praveen bachche hain, woh kabhi puraani duniya se dil nahin lagaayenge। unki buddhi me rahega ham to raavan raajya ka vinaash karna chaahte hain। yeh shareer bhi puraana raavan sampradaay ka hai to ham raavan sampradaay ko kyon yaad karen? ek raam ko yaad karen। sachche pitaavrata bane na।

baap kehte hain mujhe yaad karte raho to tumhaare vikarma vinaash ho jaayenge। pitaavrata athva bhagwan vrata banna chaahiye। bhakta bhagwan ko hi yaad karte hain ki he bhagwan aakar humein sukh-shanti ka varsa do। bhaktimaarga mein to kurbaan jaate hain, bali chadhte hain। yahaan bali chadhne ki baat to hai nahin। ham to jeete ji marte hain goya bali chadhte hain। yeh hai jeete ji baap ka banna kyonki unse varsa lena hai। unki mat par chalna hai। jeete ji bali chadhna, vaari jaana vaastav mein abhi ki baat hai। bhakti maarga mein woh phir kitna jeevghaat aadi karte hain। yahaan jeevghaat ki baat nahin। baap kehte hain apne ko aatma samjho, baap se yog lagaao, deh-abhimaan mein nahin aao। uthte-baithte baap ko yaad karne ka purushaartha karna hai। 100 percent paas to koi hua nahin hai। neeche-oopar hote rehte hain। bhoolen hoti hain, us par saavdhaani nahin milegi to bhoolen chhodenge kaise? maaya kisko bhi chhodti nahin hai। kehte hain baba ham maaya se haar jaate hain, purushaartha karte bhi hain phir pata nahin kya hota hai। hamse itni kadi bhoolen pata nahin kaise ho jaati hain। samajhte bhi hain brahman kul mein isse hamaara naam badnaam hota hai। phir bhi maaya ka aisa vaar hota hai jo samajh mein nahin aata। deh-abhimaan mein aane se jaise besmajh ban jaate hain। besamjhi ke kaam hote hain to glaani bhi hoti, varsa bhi kam ho jaata। aise bahut bhoolen karte hain। maaya aisa jor se thappad laga deti hai jo khud to haar khaate hain aur phir gusse mein aakar kisko thappad va joota aadi maarne lag padte hain phir pashchaataap bhi karte hain। baba kehte hain ki ab to bahut mehnat karni pade। apna bhi nuksaan kiya to doosre ka bhi nuksaan kiya, kitna ghaata ho gaya। raahu ka grahan baith gaya। ab baap kehte hain de daan to chhoote grahan। raahu ka grahan baithta hai to phir woh time leta hai। seedhi chadhkar phir utarna mushkil hota hai। manushya ko sharaab ki aadat padti hai to phir woh chhodne mein kitni mushkilaat hoti hai। sabse badi bhool hai - kaala munh karna। ghadi-ghadi shareer yaad aata hai। phir bachche aadi hote hain to unki hi yaad bani rehti hai। woh phir doosron ko gyaan kya denge। unka koi sunenge bhi nahin। ham to abhi sabko bhoolne ki koshish kar ek ko yaad karte hain। ismen sambhaal bahut karni padti hai। maaya badi teekhi hai। saara din shivbaaba ko yaad karne ka hi khyaal rehna chaahiye। ab naatak poora hota hai, hamko jaana hai। yeh shareer bhi khatma ho jaana hai। jitna baap ko yaad karenge to deh-abhimaan tootta jaayega aur koi ki bhi yaad nahin hogi। kitni badi manzil hai, sivaae ek baap ke aur koi ke saath dil nahin lagaani hai। nahin to zaroor woh saamne aayenge। vair zaroor lenge। bahut oonchi manzil hai। kehna to bada sahaj hai, laakhon mein koi ek daana nikalta hai। koi scholarship bhi lete hain na। jo achhi mehnat karenge, zaroor scholarship lenge। saakshi ho dekhna hai, kaise service karta hoon? bahut bachche chaahte hain jismaani service chhod ismen lag jaaven। parantu baba circumstance bhi dekhte hain। akela hai, koi sambandhi nahin hain to harja nahin। phir bhi kehte hain naukri bhi karo aur yeh seva bhi karo। naukri mein bhi bahuton ke saath mulaakaat hogi। tum bachchon ko gyaan to bahut mila hua hai। bachchon dvaara bhi baap bahut service karaate rehte hain। koi mein pravesh kar service karte hain। service to karni hi hai। jinke maathe maamla vo kaise neend karen! shivbaaba to hai hi jaagti jyot। baap kehte hain main to din-raat service karta hoon, thakta shareer hai। phir aatma bhi kya kare, shareer kaam nahin deta hai। baap to athak hai na। woh hai jaagti jyot, saari duniya ko jagaate hain। unka part hi wonderful hai, jisko tum bachchon mein bhi thode jaante hain। kaalon ka kaal hai baap। unki aagya nahin maanenge to dharmaraaj se danda khaayenge। baap ka mukhya direction hai kisi se seva mat lo। parantu deh-abhimaan mein aakar baap ki aagya ka ullanghan karte hain। baba kehte tum khud servant ho। yahaan sukh lenge to vahaan sukh kam ho jaayega। aadat pad jaati hai to servant bigar rah nahin sakte hain। kai kehte hain ham to independent rahenge parantu baap kehte hain depend rehna achha hai। tum sab baap par depend karte ho। independent banne se gir padte hain। tum sab depend karte ho shivbaaba par। saari duniya depend karti hai, tab to kehte hain he patit-paavan aao। unse hi sukh-shanti milti hai, parantu samajhte nahin hain। yeh bhakti maarga ka samay bhi paas karna hi hai, jab raat poori hoti hai tab baap aate hain। ek second ka bhi farka nahin pad sakta। baap kehte hain main is drama ko jaanne vaala hoon। drama ke aadi, madhya, ant ko aur koi bhi nahin jaante। satayug se lekar yeh gyaan praayahlop hai। abhi tum rachayita aur rachna ke aadi, madhya, ant ko jaante ho, isko hi gyaan kaha jaata hai, baaki sab hai bhakti। baap ko knowledgeful kehte hain। hamko woh knowledge mil rahi hai। bachchon ko nasha bhi achha hona chaahiye। parantu yeh bhi samajhte hain ki raajdhaani sthaapan hoti hai। koi to praja mein bhi saadhaaran naukar-chaakar bante hain। zara bhi gyaan samajh mein nahin aata। wonder hai na! gyaan to bada sahaj hai। 84 janmon ka chakra ab poora hua hai। ab jaana hai apne ghar। ham drama ke mukhya actors hain। saare drama ko jaan gaye hain। saare drama mein hero-heroine actor ham hain। kitna sahaj hai। parantu takdeer mein nahin hai to tadbeer bhi kya karen! padhaai mein aisa hota hai। koi naapaas ho jaate hain, kitna bada school hai। raajdhaani sthaapan honi hai। ab jitna jo padhenge, bachche jaan sakte hain ham kya pad paayenge? dher ke dher hain, sab vaaris to nahin banenge। pavitra banna bada mushkil hai। baap kitna sahaj samjhaate hain, ab naatak poora hota hai। baap ki yaad se satopradhaan ban, satopradhaan duniya ka maalik banna hai। jitna ho sake yaad mein rehna hai। parantu takdeer mein nahin hai to phir baap ke badle aur-aur ko yaad karte hain। dil lagaane se phir rona bhi bahut padta hai। baap kehte hain is puraani duniya se dil nahin lagaani hai। yeh to khatma honi hai। yeh aur koi ko pata nahin hai। woh to samajhte hain kaliyug abhi bahut samay chalna hai। ghor neend mein soye pade hain। tumhaari yeh pradarshani praja banaane ke liye vihang maarga ki service ka saadhan hai। raaja-raani bhi koi nikal padega। bahut hain jo service ka achha shauk rakhte hain। phir koi gareeb, koi saahookaar hain। auron ko aapasmaan banaate hain, unka bhi phaayda to milta hai na। andhon ki laathi banna hai, sirf yeh batlaana hai ki baap aur varse ko yaad karo, vinaash saamne khada hai। jab vinaash ka samay nazdeek dekhenge tab tumhaari baaton ko sunenge। tumhaari service bhi vriddhi ko paati jaayegi, samjhenge barobar theek hai। tum radiyaan to maarte rehte ho ki vinaash hona hai।

tumhaari pradarshani, mela service vriddhi ko paati rahegi। koshish karni hai koi achha haal mil jaae, kiraaya dene ke liye to ham taiyaar hain। bolo, tumhaara aur hi naam baala hoga। aise bahuton ke paas haal pade hote hain। purushaartha karne se 3 pair prithvi ke mil jaayenge। jab tak tum chhoti-chhoti pradarshani rakho। shiv jayanti bhi tum manaayenge to aavaaz hoga। tum likhte bhi ho shiv jayanti ki chhutti ka din mukrar karo। vaastav mein janma din to ek ka hi manaana chaahiye। vahi patit-paavan hai। stamp bhi vaastav mein asli yeh trimoorti ki hai। satya mev jayte...... yeh hai vijay paane ka samay। samjhaane vaala bhi achha chaahiye। sabhi centres ke jo mukhya hain unhon ko attention dena pade। apni stamp nikaal sakte hain। yeh hai trimoorti shiv jayanti। sirf shiv jayanti kahne se samajh nahin sakenge। ab kaam to bachchon ko hi karna hai। bahuton ka kalyaan hoga to kitni lift milegi, service ki lift bahut milti hai। pradarshani se bahut service ho sakti hai। praja to banegi na। baba dekhte hain service par kin bachchon ka attention rehta hai! dil par bhi vahi chadhenge। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) agar ek baar koi bhool hui to usi samay kaan pakadna hai, dubaara woh bhool na ho। kabhi bhi deh ahankaar mein nahin aana hai। gyaan mein praveen ban antarmukhi rehna hai।

2) sachcha pitaavrata banna hai, jeete ji bali chadhna hai। kisi se bhi dil nahin lagaani hai। besamjhi ka koi bhi kaam nahin karna hai।

vardaan:- judaai ko sadaakaal ke liye vidaai dene vaale snehi swaroop bhav

jo snehi ko pasanda hai vahi sneh karne vaale ko pasanda ho - yahi sneh ka swaroop hai। chalna-khaana-peena-rehna snehi ke dilapsanda ho isliye jo bhi sankalp va karma karo to pahle socho ki yeh snehi baap ke dilapsanda hai। aise sachche snehi bano to nirantar yogi, sahajyogi ban jaayenge। yadi snehi swaroop ko samaan swaroop mein parivartan kar do to amar bhav ka vardaan mil jaayega aur judaai ko sadaakaal ke liye vidaai mil jaayegi।

slogan:- svabhaav easy aur purooshaartha attention vaala banaao।

apni shaktishaali mansa dvaara sakaash dene ki seva karo

jaise beej mein saara vriksha samaaya rehta hai, aise sankalp roopi beej mein saare vriksha ka vistaar sama jaae tab sankalpon ki halchal samaapta hogi। jaise aajkal duniya mein raajneeti ki halchal, vastuon ke moolya ki halchal, currency ki halchal, karmabhog ki halchal, dharma ki halchal .. badhti ja rahi hai। us halchal se svayan ko va sarva ko bachaane ke liye man-buddhi ko ekaagra karne ka abhyaas karte sakaash dene ki seva karte raho।