Murli du jour du mardi 11 février 2025

11-02-2025 praatahmurli om shanti "baapdaada"' madhuban

“meethe bachche - tumhein bhagwan padhaate hain, tumhaare paas hain gyaan ratna, inheen ratnon ka dhandha tumhein karna hai, tum yahaan gyaan seekhte ho, bhakti nahi''

prashn:- manushya drama ki kis wonderful noondh ko bhagwan ki leela samajh uski badaai karte hain?

uttar:- jo jismen bhaavna rakhte, unhein uska saakshaatkaar ho jaata hai to samajhte hain yeh bhagwan ne saakshaatkaar karaaya lekin hota to sab drama anusaar hai। ek or bhagwan ki badaai karte, doosri or sarvavyaapi kah glaani kar dete hain।

om shanti। bhagvaanuvaach - bachchon ko yeh to samjhaaya hua hai ki manushya ko va devta ko bhagwan nahin kaha jaata। gaate bhi hain brahma devtaae namah, vishnu devtaae namah, shankar devtaae namah phir kaha jaata hai shiv parmaatmaae namah। yeh bhi tum jaante ho shiv ko apna shareer nahin hai। mool vatan mein shivbaaba aur saaligraam rehte hain। bachche jaante hain ki abhi ham aatmaon ko baap padha rahe hain aur jo bhi satsang hain vaastav mein woh koi sat ka sang hai nahin। baap kehte hain woh to maaya ka sang hai। vahaan aise koi nahin samjhenge ki hamko bhagwan padhaate hain। geeta bhi sunenge to shreekrishna bhagvaanuvaach samjhenge। din-pratidin geeta ka abhyaas kam hota jaata hai kyonki apne dharma ko hi nahin jaante। shreekrishna ke saath to sabhi ka pyaar hai, shreekrishna ko hi jhulaate hain। ab tum samajhte ho ham jhulaayen kisko? bachche ko jhulaaya jaata hai, baap ko to jhula na saken। tum shivbaaba ko jhulaayenge? woh baalak to bante nahin, punarjanma mein aate nahin। woh to bindu hai, unko kya jhulaayenge। shreekrishna ka bahuton ko saakshaatkaar hota hai। shreekrishna ke mukh mein to saari vishwa hai kyonki vishwa ka maalik bante hain। to vishwa roopi maakhan hai। vo jo aapas mein ladte hain woh bhi srishti roopi maakhan ke liye ladte hain। samajhte hain ham jeet pa len। shreekrishna ke mukh mein maakhan ka gola dikhaate hain, yeh bhi anek prakaar ke saakshaatkaar hote hain। parantu arth kuchh bhi nahin samajhte hain। yahaan tumko saakshaatkaar ka arth samjhaaya jaata hai। manushya samajhte hain hamko bhagwan saakshaatkaar karaate hain। yeh bhi baap samjhaate hain - jisko yaad karte hain, samjho koi shreekrishna ki naudha bhakti karte hain to alpakaal ke liye unki manokaamna poori hoti hai। yeh bhi drama mein noondh hai। aise nahin kahenge ki bhagwan ne saakshaatkaar karaaya। jo jis bhaavna se jiski pooja karte hain unko woh saakshaatkaar hota hai। yeh drama mein noondh hai। yeh to bhagwan ki badaai ki hai ki woh saakshaatkaar karaate hain। ek taraph itni badaai bhi karte, doosri taraph phir kah dete patthar thikkar mein bhagwan hai। kitni andhashraddha ki bhakti karte hain। samajhte hain - bas shreekrishna ka saakshaatkaar hua, shreekrishnapuri mein ham zaroor jaayenge। parantu shreekrishnapuri aaye kahaan se? yeh sab raaz baap tum bachchon ko ab samjhaate hain। shreekrishnapuri ki sthaapna ho rahi hai। yeh hai kans-puri। kans, akaasur, bakaasur, kumbhakran, raavan yeh sab asuron ke naam hain। shaastron mein kya-kya baith likha hai।

yeh bhi samjhaana hai ki guru do prakaar ke hain। ek hain bhakti maarga ke guru, woh bhakti hi sikhlaate hain। yeh baap to hai gyaan ka saagar, inko satguru kaha jaata hai। yeh kabhi bhakti nahin sikhlaate, gyaan hi sikhlaate hain। manushya to bhakti mein kitna khush hote hain, jhaanjh bajaate hain, banaaras mein tum dekhenge sab devtaaon ke mandir bana diye hain। yeh sab hai bhakti maarga ki dukaandaari, bhakti ka dhandha। tum bachchon ka dhandha hai gyaan ratnon ka, inko bhi vyaapaar kaha jaata hai। baap bhi ratnon ka vyaapaari hai। tum samajhte ho yeh ratna kaun se hain! in baaton ko samjhenge vahi jinhonne kalpa pahle samjha hai, doosre samjhenge hi nahin। jo bhi bade-bade hain woh pichhaadi mein aakar samjhenge। convert bhi hue hain na। ek raaja janak ki katha sunaate hain। janak phir anujnak bana। jaise koi ka naam shreekrishna hai to kahenge tum anu daivi shreekrishna banenge। kahaan woh sarvagun sampanna shreekrishna, kahaan yeh! koi ka lakshmi naam hai aur in lakshmi-naaraayan ke aage jaakar mahima gaati hai। yeh thode hi samajhti ki inmen aur hamaare mein pharka kyon hua hai? abhi tum bachchon ko knowledge mili hai, yeh srishti chakra kaise phirta hai? tum hi 84 janma lenge। yeh chakra anek baar phirta aaya hai। kabhi band nahin ho sakta। tum is naatak ke andar actors ho। manushya itna zaroor samajhte hain ki ham is naatak mein part bajaane aaye hain। baaki drama ke aadi-madhya-ant ko nahin jaante।

tum bachche jaante ho ham aatmaon ke rahne ka sthaan pare te pare hai। vahaan soorya-chaand ki bhi roshni nahin hai। yeh sab samajhne vaale bachche bhi aksar karke saadhaaran gareeb hi bante hain kyonki bhaarat hi sabse saahookaar tha, ab bhaarat hi sabse gareeb bana hai। saara khel bhaarat par hai। bhaarat jaisa paavan khanda aur koi hota nahin। paavan duniya mein paavan khanda hota hai, aur koi khanda vahaan hota hi nahin। baba ne samjhaaya hai yeh saari duniya ek behad ka island hai। jaise lanka taapu hai। dikhaate hain raavan lanka mein rehta tha। abhi tum samajhte ho raavan ka raajya to saari behad ki lanka par hai। yeh saari srishti samudra par khadi hai। yeh taapu hai। is par raavan ka raajya hai। yeh sab seetaayen raavan ki jel mein hain। unhonne to had ki kathaayen bana di hain। hai yeh saari behad ki baat। behad ka naatak hai, usmein hi phir chhote-chhote naatak baith banaaye hain। yeh bioscope aadi bhi abhi bane hain, to baap ko bhi samjhaane mein sahaj hota hai। behad ka saara drama tum bachchon ki buddhi mein hai। mool vatan, sookshm vatan aur kiski buddhi mein ho na sake। tum jaante ho ham aatmaayen mool vatan ki rahvaasi hain। devtaayen hain sookshm vatan vaasi, unko pharishta bhi kehte hain। vahaan haddi maans ka pinjada hota nahin। yeh sookshm vatan ka part bhi thode samay ke liye hai। abhi tum aate-jaate ho phir kabhi nahin jaayenge। tum aatmaayen jab mool vatan se aati ho to via sookshm vatan nahin aati ho, seedhi aati ho। abhi via sookshm vatan jaati ho। abhi sookshm vatan ka part hai। yeh sab raaz bachchon ko samjhaate hain। baap jaante hain ki ham aatmaon ko samjha rahe hain। saadhu-santa aadi koi bhi in baaton ko nahin jaante hain। woh kabhi aisi baaten kar na saken। baap hi bachchon se baat karte hain। organs bigar to baat kar na saken। kehte hain main is shareer ka aadhaar le tum bachchon ko padhaata hoon। tum aatmaon ki drishti bhi baap taraph chali jaati hai। yeh hain sab nai baaten। niraakaar baap, unka naam hai shivbaaba। tum aatmaon ka naam to aatma hi hai। tumhaare shareer ke naam badalte hain। manushya kehte hain paramatma naam-roop se nyaara hai, parantu naam to shiv kehte hain na। shiv ki pooja bhi karte hain। samajhte ek hain, karte doosra hain। abhi tum baap ke naam roop desh kaal ko bhi samajh gaye ho। tum jaante ho koi bhi cheez naam-roop ke bigar nahin ho sakti hai। yeh bhi badi sookshm samajhne ki baat hai। baap samjhaate hain - gaayan bhi hai second mein jeevanmukti arthaat manushya nar se naaraayan ban sakte hain। jabki baap heavenly god father hai, ham unke bachche bane hain to bhi svarga ke maalik thahre। parantu yeh bhi samajhte nahin hain। baap kehte hain - bachche, tumhaari em object hi yeh hai, nar se naaraayan banna। raajayog hai na। bahuton ko chaturbhuj ka saakshaatkaar hota hai, isse siddha hai vishnupuri ke ham maalik banne vaale hain। tumko maaloom hai - svarga mein bhi lakshmi-naaraayan ke takhta ke pichhaadi vishnu ka chitra rakhte hain arthaat vishnupuri mein inhon ka raajya hai। yeh lakshmi-naaraayan vishnupuri ke maalik hain। woh hai shreekrishnapuri, yeh hai kansapuri। draamaanusaar yeh bhi naam rakhe hue hain। baap samjhaate hain mera roop bahut sookshm hai। koi bhi jaan nahin sakte। kehte hain ki aatma ek star hai parantu phir ling bana dete। nahin to pooja kaise ho। roodra yagya rachte hain to angoothe misal saaligraam banaate hain। doosri taraph unko azab sitaara kehte hain। aatma ko dekhne ki bahut koshish karte hain parantu koi bhi dekh nahin sakte। raamkrishna, vivekaanand ka bhi dikhaate hain na, usne dekha aatma unse nikal mere mein sama gai। ab unko kiska saakshaatkaar hua hoga? aatma aur paramatma ka roop to ek hi hai। bindi dekha, samajhte kuchh nahin। aatma ka saakshaatkaar to koi chaahte nahin। chaahna rakhte hain ki paramatma ka saakshaatkaar karen। woh baitha tha ki guru se paramatma ka saakshaatkaar karen। bas, kah diya jyoti thi woh mere mein sama gai। ismen hi woh bahut khush ho gaya। samjha yahi paramatma ka roop hai। guru mein bhaavna rehti hai, bhagwan ke saakshaatkaar ki। samajhte kuchh nahin। bhala bhakti maarga mein samjhaaye kaun? ab baap baith samjhaate hain - jis-jis roop mein jaisi bhaavna rakhte hain, jo shakla dekhte hain, woh saakshaatkaar ho jaata hai। jaise ganesh ki bahut pooja karte hain to unka chaitanya roop mein saakshaatkaar ho jaata hai। nahin to unko nishchay kaise ho? tejomay roop dekh samajhte hain ki hamne bhagwan ka saakshaatkaar kiya। usmein hi khush ho jaate hain। yeh sab hai bhakti maarga, utarti kala। pahla janma achha hota hai phir kamti hote-hote ant aa jaata hai। bachche hi in baaton ko samajhte hain, jinko kalpa pahle gyaan samjhaaya hai unko hi ab samjha rahe hain। kalpa pahle vaale hi aayenge, baaki auron ka to dharma hi alag hai। baap samjhaate hain ek-ek chitra mein bhagvaanu-vaach likh do। bada yukti se samjhaana hota hai। bhagvaanuvaach hai na - yaadav, kaurav aur paandav kya karat bhaye, uska yeh chitra hai। poochho - tum bataao apne baap ko jaante ho? nahin jaante ho to goya baap se preet nahin hai na, to vipreet buddhi thahre। baap se preet nahin to vinaash ho jaayenge। preet buddhi vijayanti, satyamev jayte - inka arth bhi theek hai। baap ki yaad hi nahin to vijay pa nahin sakte।

abhi tum siddha kar batlaate ho - geeta shiv bhagwan ne sunaai hai। usne hi raajayog sikhaaya, brahma dvaara। yeh to shreekrishna bhagwan ki geeta samajhkar kasam uthaate hain। unse poochhna chaahiye - shreekrishna ko haajir-naazir jaanna chaahiye va bhagwan ko? kehte hain eeshvar ko haajir-naazir jaan sach bolo। rola ho gaya na। to kasam bhi jhootha ho jaata। service karne vaale bachchon ko gupta nasha rehna chaahiye। nashe se samjhaayenge to saphalta hogi। tumhaari yeh padhaai bhi gupta hai, padhaane vaala bhi gupta hai। tum jaante ho ham nai duniya mein jaakar yeh banenge। nai duniya sthaapan hoti hai mahaabhaarat ladaai ke baad। bachchon ko ab knowledge mili hai। woh bhi nambarvaar dhaaran karte hain। yog mein bhi nambarvaar rehte hain। yeh bhi jaanch rakhni chaahiye - ham kitna yaad mein rehte hain? baap kehte hain yeh abhi tumhaara purooshaartha bhavishya 21 janmon ke liye ho jaayega। abhi fail hue to kalpa-kalpaantar fail hote rahenge, oonch pad nahin pa sakenge। purooshaartha karna chaahiye oonch pad paane ka। aise bhi kai centres par aate hain jo vikaar mein jaate rehte hain aur phir centres par aate rehte hain। samajhte hain eeshvar to sab dekhta hai, jaanta hai। ab baap ko kya padi hai jo yeh baith dekhega। tum jhooth bolenge, vikarma karenge to apna hi nuksaan karenge। yeh to tum bhi samajhte ho, kaala munh karta hoon to oonch pad pa nahin sakoonga। so baap ne jaana to bhi baat to ek hi hui। unko kya darkaar padi hai। apni dil khaani chaahiye - main aisa karma karne se durgati ko paaoonga। baba kyon bataave? haan, drama mein hai to batlaate bhi hain। baba se chhipaana goya apni satyaanaash karna hai। paavan banne ke liye baap ko yaad karna hai, tumko yahi phurna rehna chaahiye ki ham achhi reeti padhkar oonch pad paaven। koi mara va jiya, unka phurna nahin। phurna (phikra) rakhna hai ki baap se varsa kaise leven? to kisko bhi thode mein samjhaana hai। achha।

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) gupta nashe mein rahkar service karni hai। aisa koi karma nahin karna hai jo dil khaati rahe। apni jaanch karni hai ki ham kitna yaad mein rehte hain?

2) sada yahi phikra rahe ki ham achhi reeti padhkar oonch pad paayen। koi bhi vikarma karke, jhooth bolkar apna nuksaan nahin karna hai।

vardaan:- manamnaabhav ke mahaamantra dvaara sarva duhkhon se paar rahne vaale sada sukh swaroop bhav

jab kisi bhi prakaar ka duhkh aaye to mantra le lo jisse duhkh bhaag jaayega। svapna mein bhi jara bhi duhkh ka anubhav na ho, tan beemaar ho jaae, dhan neeche oopar ho jaae, kuchh bhi ho lekin duhkh ki lahar andar nahin aani chaahiye। jaise saagar mein lahren aati hain aur chali jaati hain lekin jinhen un lahron mein lahraana aata hai woh usmein sukh ka anubhav karte hain, lahar ko jump dekar aise cross karte hain, jaise khel kar rahe hain। to saagar ke bachche sukh swaroop ho, duhkh ki lahar bhi na aaye।

slogan:- har sankalp mein dridhta ki visheshta ko practical mein laao to pratyakshata ho jaayegi।

avyakt ishaareh ekaantapriy bano ekta aur ekaagrata ko apnaao

sva unnati mein, seva ki unnati mein ek ne kaha, doosre ne haan ji kiya, aise sada ekta aur dridhta se badhte chalo। jaise daadiyon ki ekta aur dridhta ka sangathan pakka hai, aise aadi seva ke ratnon ka sangathan pakka ho, iski bahut-bahut aavashyakta hai।