Murli du jour du lundi 14 avril 2025

14-04-2025 praatahmurli om shanti "baapdaada"' madhuban

“meethe bachche - sukh aur duhkh ke khel ko tum hi jaante ho, aadhaakalpa hai sukh aur aadhaakalpa hai duhkh, baap duhkh harne sukh dene aate hain''

prashn:- kai bachche kis ek baat mein apni dil ko khush kar miya mitthu bante hain?

uttar:- kai samajhte hain ham sampoorn ban gaye, ham complete taiyaar ho gaye। aise samajh apne dil ko khush kar lete hain। yeh bhi miya mitthu banna hai। baba kehte - meethe bachche abhi bahut purooshaartha karna hai। tum paavan ban jaayenge to phir duniya bhi paavan chaahiye। raajdhaani sthaapan honi hai, ek to ja nahin sakta।

geet:- tumheen ho maata, tumheen pita ho…

om shanti। yeh bachchon ko apni pahchaan milti hai। baap bhi aise kehte hain, ham sabhi aatmaayen hain, sab manushya hi hain। bada ho ya chhota ho, president, raaja raani sab manushya hain। ab baap kehte hain sabhi aatmaayen hain, main phir sabhi aatmaon ka pita hoon isliye mujhe kehte hain parampita param aatma yaani supreme। bachche jaante hain ham aatmaon ka woh baap hai, ham sab brothers hain। phir brahma dvaara bhaai bahnon ka oonch neech kul hota hai। aatmaayen to sabhi aatma hain। yeh bhi tum samajhte ho। manushya to kuchh nahin samajhte। tumko baap baith samjhaate hain - baap ko to koi jaante nahin। manushya gaate hain - he bhagwan, he maat-pita kyonki oonch te oonch to ek hona chaahiye na। woh hai sabka baap, sabko sukh dene vaala। sukh aur duhkh ke khel ko bhi tum jaante ho। manushya to samajhte hain, abhi-abhi sukh hai, abhi-abhi duhkh hai। yeh nahin samajhte aadhaakalpa sukh, aadhaakalpa duhkh hai। satopradhaan sato rajo tamo hai na। shantidham mein ham aatmaayen hain, to vahaan sab sachcha sona hai। alloy usmein ho na sake। bhal apna-apna part bhara hua hai parantu aatmaayen sab pavitra rehti hain। apvitra aatma rah nahin sakti। is samay phir koi bhi pavitra aatma yahaan ho na sake। tum brahman kul bhooshan bhi pavitra ban rahe ho। tum abhi apne ko devta nahin kah sakte ho। ve hain sampoorn nirvikaari। tumko thode hi sampoorn nirvikaari kahenge। bhal koi bhi ho sivaae devtaaon ke aur kisko kah nahin sakte। yeh baaten bhi tum hi sunte ho - gyaan saagar ke mukh se। yeh bhi jaante ho gyaan saagar ek hi baar aate hain। manushya to punarjanma le phir aate hain। koi-koi gyaan sunkar gaye hain, sanskaar le gaye hain to phir aate hain, aakar sunte hain। samjho 6-8 varsha vaala hoga to koi-koi mein achhi samajh bhi aa jaati hai। aatma to vahi hai na। sunkar unko achha lagta hai। aatma samajhti hai hamko phir se baap ka vahi gyaan mil raha hai। andar mein khushi rehti hai, auron ko bhi sikhlaane lag padte hain। phurta ho jaate hain। jaise ladaai vaale woh sanskaar le jaate hain to chhotepan mein hi usi kaam mein khushi se lag jaate hain। ab tumko to purooshaartha kar nai duniya ka maalik banna hai। tum sabko samjha sakte ho ya to nai duniya ke maalik ban sakte ho ya to shantidham ke maalik ban sakte ho। shantidham tumhaara ghar hai - jahaan se tum yahaan aaye ho part bajaane। yeh bhi koi jaante nahin kyonki aatma ka hi pata nahin hai। tumko bhi pahle yeh thode hi pata tha ki ham niraakaari duniya se yahaan aaye hain। ham bindi hain। sannyaasi log bhal kehte hain bhrakuti ke beech aatma star rehti hai phir bhi buddhi mein bada roop aa jaata hai। saaligraam kahne se bada roop samajh lete hain। aatma saaligraam hai। yagya rachte hain to usmein bhi saaligraam bade-bade banaate hain। pooja ke samay saaligraam bada roop hi buddhi mein rehta hai। baap kehte hain yeh saara agyaan hai। gyaan to main hi sunaata hoon aur koi duniya bhar mein suna na sake। yeh koi samjhaate nahin hain ki aatma bhi bindi hai, paramatma bhi bindi hai। woh to akhanda jyoti swaroop brahm kah dete hain। brahm ko bhagwan samajh lete aur phir apne ko bhagwan kah dete। kehte hain ham part bajaane ke liye chhoti aatma ka roop dharte hain। phir badi jyoti mein leen ho jaate hain। leen ho jaae phir kya! part bhi leen ho jaae। kitna wrong ho jaata hai।

abhi baap aakar second mein jeevanmukti dete hain phir aadhaakalpa baad seedhi utarte jeevan-bandh mein aate hain। phir baap aakar jeevanmukta banaate hain, isliye unko sarva ka sadgati daata kaha jaata hai। to jo patit-paavan baap hai unko hi yaad karna hai, unki yaad se hi tum paavan banenge। nahin to ban nahin sakte। oonch te oonch ek hi baap hai। kai bachche samajhte hain ham sampoorn ban gaye। ham complete taiyaar ho gaye। aise samajh apni dil ko khush kar lete hain। yeh bhi miya mitthu banna hai। baba kehte meethe bachche, abhi bahut purooshaartha karna hai। paavan ban jaayenge to phir duniya bhi paavan chaahiye। ek to ja na sake। koi kitni bhi koshish kare ki ham jaldi karmaateet ban jaayen - parantu hoga nahin। raajdhaani sthaapan honi hai। bhal koi student padhaai mein bahut hoshiyaar ho jaata hai parantu imtahaan to time par hoga na। imtahaan to jaldi ho na sake। yeh bhi aise hai। jab samay hoga tab tumhaare padhaai ki result niklegi। kitna bhi achha purooshaartha ho, aise kah na sake - ham complete taiyaar hain। nahin, 16 kala sampoorn koi aatma abhi ban nahin sakti। bahut purooshaartha karna hai। apne dil ko sirf khush nahin karna hai ki ham sampoorn ban gaye। nahin, sampoorn banna hi hai ant mein। miya mitthu nahin banna hai। yeh to saari raajdhaani sthaapan honi hai। haan itna samajhte hain baaki thoda time hai। moosal bhi nikal gaye hain। inhen banaane mein bhi pahle time lagta hai phir practice ho jaati hai to phir jhat bana lete hain। yeh bhi sab drama mein noondh hai। vinaash ke liye bombs banaate rehte hain। geeta mein bhi moosal akshar hai। shaastron mein phir likh diya hai pet se loha nikla, phir yeh hua। yeh sab jhoothi baaten hain na। baap aakar samjhaate hain - unko hi missiles kaha jaata hai। ab is vinaash ke pahle hamko tamopradhaan se satopradhaan banna hai। bachche jaante hain ham aadi sanaatan devi devta dharma ke the। sachcha sona the। bhaarat ko sach khanda kehte hain। ab jhooth khanda ban gaya hai। sona bhi sachcha aur jhootha hota hai na। abhi tum bachche jaan gaye ho - baap ki mahima kya hai! woh manushya srishti ka beejroop hai, sat hai, chaitanya hai। aage to sirf gaayan karte the। abhi tum samajhte ho ki baap saare gun hamaare mein bhar rahe hain। baap kehte hain ki pahle-pahle yaad ki yaatra karo, mujhe yaad karo to tumhaare vikarma vinaash ho jaaen। mera naam hi hai patit-paavan। gaate bhi hain he patit-paavan aao parantu woh kya aakar karenge, yeh nahin jaante hain। ek seeta to nahin hogi। tum sabhi seetaayen ho।

baap tum bachchon ko behad mein le jaane ke liye behad ki baaten sunaate hain। tum behad ki buddhi se jaante ho ki mel aur female sab seetaayen hain। sab raavan ki kaid mein hain। baap (raam) aakar sabko raavan ki kaid se nikaalte hain। raavan koi manushya nahin hai। yeh samjhaaya jaata hai - har ek mein 5 vikaar hain, isliye raavan raajya kaha jaata hai। naam hi hai vicious world, woh hai viceless world, donon alag-alag naam hain। yeh veshyaalay aur woh hai shivaalay। nirvikaari duniya ke yeh lakshmi naaraayan maalik the। inhon ke aage vikaari manushya jaakar maatha tekte hain। vikaari raajaayen un nirvikaari raajaaon ke aage maatha tekte hain। yeh bhi tum jaante ho। manushyon ko kalpa ki aayu ka hi pata nahin to samajh kaise saken ki raavan raajya kab shuru hota hai। aadha-aadha hona chaahiye na। raamraajya, raavanraajya kab se shuru karen, munjhaara kar diya hai।

ab baap samjhaate hain yeh 5 hajaar varsha ka chakra phirta rehta hai। abhi tumko pata pada hai ki ham 84 ka part bajaate hain। phir ham jaate hain ghar। satayug treta mein bhi punarjanma lete hain। woh hai raamraajya phir raavanraajya mein aana hai। haar-jeet ka khel hai। tum jeet paate ho to svarga ke maalik bante ho। haar khaate ho to narka ke maalik bante ho। svarga alag hai, koi marte hain to kehte hain svarga padhaara। abhi tum thode hi kahenge kyonki tum jaante ho svarga kab hoga। woh to kah dete jyoti jyot samaaya va nirvaan gaya। tum kahenge jyoti jyot to koi sama nahin sakte। sarva ka sadgati daata ek hi gaaya jaata hai। svarga satayug ko kaha jaata hai। abhi hai narka। bhaarat ki hi baat hai। baaki oopar mein kuchh nahin hai। delvaada mandir mein oopar mein svarga dikhaaya hai to manushya samajhte hain barobar oopar hi svarga hai। are oopar chhat mein manushya kaise honge, buddhu thahre na। abhi tum clear kar samjhaate ho। tum jaante ho yahaan hi svargavaasi the, yahaan hi phir narkavaasi bante hain। ab phir svargavaasi banna hai। yeh knowledge hai hi nar se naaraayan banne ki। katha bhi satya naaraayan banne ki hi sunaate hain। raam seeta ki katha nahin kehte, yeh hai nar se naaraayan banne ki katha। oonch te oonch pad lakshmi-naaraayan ka hai। woh phir bhi do kala kam ho jaati hain। purooshaartha oonch pad paane ka kiya jaata hai phir agar nahin karte hain to jaakar chandravanshi bante hain। bhaaratvaasi patit bante hain to apne dharma ko bhool jaate hain। Christian bhal sato se tamopradhaan bane hain phir bhi Christian sampradaay ke to hain na। aadi sanaatan devi devta sampradaay vaale to apne ko hindu kah dete hain। yeh bhi nahin samajhte ki ham asul devi devta dharma ke hain। wonder hai na। tum poochhte ho hindu dharma kisne sthaapan kiya? to moonjh jaate hai। devtaaon ki pooja karte hain to devta dharma ke thahre na। parantu samajhte nahin। yeh bhi drama mein noondh hai। tumhaari buddhi mein saari knowledge hai। tum jaante ho ham pahle sooryavanshi the phir aur dharma aate hain। ham punarjanma lete aate hain। tumhaare mein bhi koi yathaartha reeti jaante hain। school mein bhi koi student ki buddhi mein achhi reeti baithta hai, koi ki buddhi mein kam baithta hai। yahaan bhi jo naapaas hote hain unko kshatriy kaha jaata hai। chandravanshi mein chale jaate hain। do kala kam ho gai na। sampoorn ban na sake। tumhaari buddhi mein abhi behad ki history-geography hai। woh school mein to had ki history-geography padhte hain। woh koi mool vatan, sookshm vatan ko thode hi jaante hain। saadhu santa aadi kiski bhi buddhi mein nahin hai। tumhaari buddhi mein hai - mool vatan mein aatmaayen rehti hain। yeh hai sthool vatan। tumhaari buddhi mein saari knowledge hai। yeh svadarshan chakradhaari sena baithi hai। yeh sena baap ko aur chakra ko yaad karti hai। tumhaari buddhi mein gyaan hai। baaki koi hathiyaar aadi nahin hain। gyaan se sva ka darshan hua hai। baap, rachayita ka aur rachna ke aadi madhya ant ka gyaan dete hain। ab baap ka pharmaan hai ki rachayita ko yaad karo to vikarma vinaash honge। jitna jo svadarshan chakradhaari bante hain, auron ko banaate hain, jo jaasti service karte hain unko jaasti pad milega। yeh to common baat hai। baap ko bhoole hi hain geeta mein shreekrishna ka naam daalne se। shreekrishna ko sabka baap nahin kahenge। varsa baap se milta hai। patit-paavan baap ko kaha jaata, woh jab aaye tab ham vaapis shantidham mein jaayen। manushya mukti ke liye kitna maatha maarte hain। tum kitna sahaj samjhaate ho। bolo - patit-paavan to paramatma hai phir ganga mein snaan karne kyon jaate ho! ganga ke kanthe par jaakar baithte hain ki vahaan hi ham maren। pahle bangaal mein jab koi marne par hote the to ganga mein jaakar hareebol karte the। samajhte the yeh mukta ho gaya। ab aatma to nikal gai। woh to pavitra bani nahin। aatma ko pavitra banaane vaala baap hi hai, unko hi pukaarte hain। ab baap kehte hain mujhe yaad karo to vikarma vinaash honge। baap aakar puraani duniya ko naya banaate hain। baaki nai rachte nahin hain। achha।

meethe-meethe sikeeldhe bachchon prati maat-pita baapdaada ka yaadapyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) baap mein jo gun hain, woh svayan mein bharne hain। imtahaan ke pahle purooshaartha kar svayan ko complete paavan banaana hai, ismen miya mitthu nahin banna hai।

2) svadarshan chakradhaari banna aur banaana hai। baap aur chakra ko yaad karna hai। behad baap dvaara behad ki baaten sunkar apni buddhi behad mein rakhni hai। had mein nahin aana hai।

vardaan:- sva sthiti dvaara paristhitiyon par vijay praapta karne vaale sangamayugi vijayi ratna bhav

paristhitiyon par vijay praapta karne ka saadhan hai sva-sthiti। yeh deh bhi par hai, sva nahin। sva sthiti va svadharma sada sukh ka anubhav karaata hai aur prakriti-dharma arthaat par dharma ya deh ki smriti kisi na kisi prakaar ke dukh ka anubhav karaati hai। to jo sada sva sthiti mein rehta hai woh sada sukh ka anubhav karta hai, uske paas dukh ki lahar aa nahin sakti। woh sangamayugi vijayi ratna ban jaate hain।

slogan:- parivartan shakti dvaara vyartha sankalpon ke bahaav ka force samaapta karo।

avyakt ishaare - “combined roop ki smriti se sada vijayi bano''

log kehte hain jidhar dekhte hain udhar tu hi tu hai aur ham kehte ki ham jo karte hain, jahaan jaate hain baap saath hi hai arthaat tu hi tu hai। jaise kartavya saath hai, aise har kartavya karaane vaala bhi sada saath hai। karanhaar aur karaavanhaar donon combined hai।