Murli du jour du lundi 16 juin 2025

16-06-2025 praatahmurli om shanti "baapdaada"' madhuban

“meethe bachche - sada khushi mein raho ki humein koi dehdhaari nahin padhaate, ashareeri baap shareer mein pravesh kar khaas humein padhaane aaye hain''

prashn:- tum bachchon ko gyaan ka teesra netra kyon mila hai?

uttar:- humein gyaan ka teesra netra mila hai apne shantidham aur sukhdhaam ko dekhne ke liye। in aankhon se jo puraani duniya, mitra-sambandhi aadi dikhaai dete hain unse buddhi nikaal deni hai। baap aaye hain kichde se nikaal phool (devta) banaane, to aise baap ka phir regard bhi rakhna hai।

om shanti। shiv bhagvaanuvaach, bachchon prati। shiv bhagwan ko sachcha baba to zaroor kahenge kyonki rachayita hai na। abhi tum bachche hi ho jinko bhagwan padhaate hain - bhagwan bhagavti banaane ke liye। yeh to har ek achhi reeti jaante hain, aisa koi student hota nahin jo apne teacher ko, padhaai ko aur unki result ko na jaanta ho। jinko bhagwan padhaate hain unko kitni khushi honi chaahiye! yeh khushi sthaai kyon nahin rehti? tum jaante ho hamko koi dehdhaari manushya nahin padhaate hain। ashareeri baap shareer mein pravesh kar khaas tum bachchon ko padhaane aaye hain, yeh kisko bhi maaloom nahin ki bhagwan aakar padhaate hain। tum jaante ho ham bhagwan ke bachche hain, woh hamko padhaate hain, vahi gyaan ke saagar hain। shivbaaba ke sammukh tum baithe ho। aatmaayen aur paramatma abhi hi milte hain, yeh bhoolo mat। parantu maaya aisi hai jo bhula deti hai। nahin to woh nasha rehna chaahiye na - bhagwan hamko padhaate hain! unko yaad karte rehna chaahiye। parantu yahaan to aise-aise hain jo bilkul hi bhool jaate hain। kuchh bhi nahin jaante। bhagwan khud kehte hain ki bahut bachche yeh bhool jaate hain, nahin to woh khushi rahni chaahiye na। ham bhagwan ke bachche hain, woh hamko padha rahe hain। maaya aisi prabal hai jo bilkul hi bhula deti hai। in aankhon se yeh jo puraani duniya, mitra-sambandhi aadi dekhte ho unmein buddhi chali jaati hai। abhi tum bachchon ko baap teesra netra dete hain। tum shantidham-sukhdhaam ko yaad karo। yeh hai duhkhadhaam, chhi-chhi duniya। tum jaante ho bhaarat svarga tha, abhi narka hai। baap aakar phir phool banaate hain। vahaan tumko 21 janmon ke liye sukh milta hai। iske liye hi tum padh rahe ho। parantu poora nahin padhne kaaran yahaan ke dhan-daulat aadi mein hi buddhi latak padti hai। unse buddhi nikalti nahin hai। baap kehte hain shanti-dhaam, sukhdhaam taraph buddhi rakho। parantu buddhi gandi duniya taraph ekdam jaise chatki hui hai। nikalti nahin hai। bhal yahaan baithe hain to bhi puraani duniya se buddhi tootti nahin hai। abhi baba aaya hua hai - gul-gul pavitra banaane ke liye। tum mukhya pavitrata ke liye hi kehte ho - baba hamko pavitra banaakar pavitra duniya mein le jaate hain to aise baap ka kitna regard rakhna chaahiye। aise baba par to kurbaan jaayen। jo paramdham se aakar ham bachchon ko padha rahe hain। bachchon par kitni mehnat karte hain। ekdam kichde se nikaalte hain। abhi tum phool ban rahe ho। jaante ho kalpa-kalpa ham aise phool (devta) bante hain। manushya se devta kiye karat na laagi vaar। abhi hamko baap padha rahe hain। ham yahaan manushya se devta banne aaye hain। yeh abhi tumko maaloom pada hai, pahle yeh pata nahin tha ki ham svargavaasi the। abhi baap ne bataaya hai tum raajya karte the phir raavan ne raajya liya hai। tumne hi bahut sukh dekhe phir 84 janma lete-lete seedhi neeche utarte ho। yeh hai hi chhi-chhi duniya। kitne manushya duhkhi hain। kitne to bhookh marte rehte hain, kuchh bhi sukh nahin hai। bhal kitna bhi dhanvaan hai, to bhi yeh alpakaal ka sukh kaag vishta samaan hai। inko kaha jaata hai vishay vaitarni nadi। svarga mein to ham bahut sukhi honge। abhi tum saanvare se gore ban rahe ho।

abhi tum samajhte ho ham hi devta the phir punarjanma lete-lete veshyaalay mein aakar pade hain। abhi phir tumko shiva-lay mein le jaate hain। shivbaaba svarga ki sthaapna kar rahe hain। tumko padhaai padha rahe hain to achhi reeti padhna chaahiye na। padhkar, chakra buddhi mein rakhkar daiveegun dhaaran karne chaahiye। tum bachche ho roop-basanta, tumhaare mukh se sada gyaan ratna hi niklen, kichda nahin। baap bhi kehte hain main roop-basanta hoon… main param aatma gyaan ka saagar hoon, padhaai source aaph income hoti hai। padhkar jab barrister doctor aadi bante hain, laakhon kamaate hain। ek-ek doctor maas mein laakh rupaya kamaate hain। khaane ki bhi phursat nahin rehti। tum bhi abhi padh rahe ho। tum kya bante ho? vishwa ka maalik। to is padhaai ka nasha hona chaahiye na। tum bachchon mein baatcheet karne ki kitni royalty honi chaahiye। tum royal bante ho na। raajaaon ki chalan dekho kaisi hoti hai। baba to anubhvi hai na। raajaaon ko nazraana dete hain, kabhi aise haath mein lenge nahin। agar lena hoga to ishaara karenge - secretary ko jaakar do। bahut royal hote hain। buddhi mein yeh khyaal rehta hai, inse lete hain to inko vaapas bhi dena hai, nahin to lenge nahin। koi raajaayen praja se bilkul lete nahin hain। koi to bahut lootte hain। raajaaon mein bhi farka hota hai। abhi tum satayugi double sirtaaj raajaaen bante ho। double taaj ke liye pavitrata zaroor chaahiye। is vikaari duniya ko chhodna hai। tum bachchon ne vikaaron ko chhoda hai, vikaari koi aakar baith na sake। agar bigar bataaye aakar baith jaate hain to apna hi nuksaan karte hain। koi chaalaaki karte hain, kisko pata thode hi padega। baap bhal dekhe, na dekhe, khud hi paap aatma ban padte hain। tum bhi paap aatma the। ab purushaartha se punya aatma banna hai। tum bachchon ko kitni knowledge mili hai। is knowledge se tum shreekrishnapuri ke maalik bante ho। baap kitna shrringaarte hain। oonch te oonch bhagwan padhaate hain to kitna khushi se padhna chaahiye। aisi padhaai to koi saubhaagyashaali padhte hain aur phir certificate bhi lena hai। baba kahenge tum padhte kahaan ho। buddhi bhatakti rehti hai। to kya banenge! laukik baap bhi kehte hain is haalat mein to tum naapaas ho jaayenge। koi to padhkar laakh kamaate hain। koi dekho to dhakke khaate rahenge। tumko follow karna hai, mother father ko। aur jo brothers achhi reeti padhte padhaate hain, yahi dhandha karte hain। pradarshani mein bahuton ko padhaate hain na। aage chal jitna duhkh badhta jaayega utna manushyon ko vairaagya aayega phir padhne lag padenge। duhkh mein bhagwan ko bahut yaad karenge। duhkh mein marne samay he raam, haay bhagwan karte rehte hain na। tumko to kuchh bhi karna nahin hai। tum to khushi se taiyaari karte ho। kahaan yeh puraana shareer chhoote to ham apne ghar jaayen। phir vahaan shareer bhi sundar milega। purushaartha kar padhaane vaale se bhi oonch jaana chaahiye। aise bhi hain padhaane vaale se padhne vaale ki avastha bahut achhi rehti hai। baap to har ek ko jaante hain na। tum bachche bhi jaan sakte ho apne andar ko dekhna chaahiye - hamaare mein kaun-si kami hai? maaya ke vighnon se paar jaana hai, usmein phansana nahin hai।

jo kehte hain maaya to badi jabardasta hai, ham kaise chal sakenge, agar aisa socha to maaya ekdam kachcha kha legi। gaj ko graah ne khaaya। yeh abhi ki baat hai na। achhe-achhe bachchon ko bhi maaya roopi graah ekdam hap kar leta hai। apne ko chhuda nahin sakte hain। khud bhi samajhte hain - ham maaya ke thappad se chhootne chaahte hain। parantu maaya chhootne nahin deti hai। kehte hain baba maaya ko bolo - aise pakde nahin। are, yeh to yuddha ka maidaan hai na। maidaan mein aise thode hi kahenge inko kaho hamko angooli na lagaave। match mein kahenge kya hamko ball nahin dena। jhat kah denge yuddha ke maidaan mein aaye ho to lado, to maaya khoob pachhaadegi। tum bahut oonch pad pa sakte ho। bhagwan padhaate hain, kam baat hai kya! abhi tumhaari chadhti kala hoti hai - nambarvaar purushaartha anusaar। har ek bachche ko shauk rakhna hai ki ham bhavishya jeevan heere jaisa banaayen। vighnon ko mitaate jaana hai। kaise bhi karke baap se varsa zaroor lena hai। nahin to ham kalpa-kalpaantar fail ho jaayenge। samjho koi saahookaar ka bachcha hai, baap unko padhaai mein atak (rookaavat) daalte hain to kahega ham yeh laakh bhi kya karenge, hamko to behad ke baap se vishwa ki baadshaahi leni hai। yeh laakh-karod to sab bhasmeebhoot ho jaane vaale hain। kinki dabi rahegi dhool mein, kinki jalaaye aag, saare srishti roopi bhambhor ko aag lagni hai। yeh saari raavan ki lanka hai। tum sab seetaayen ho। raam aaya hua hai। saari dharti ek taapu hai, is samay hai hi raavan raajya। baap aakar raavan raajya ko khalaas karaaye tumko raamraajya ka maalik banaate hain। tumko to andar mein athaah khushi honi chaahiye - gaaya hua hai ateendriy sukh poochhna ho to bachchon se poochho। tum pradarshani mein apna sukh bataate ho na। ham bhaarat ko svarga bana rahe hain। shreemat par bhaarat ki seva kar rahe hain। jitna-jitna shreemat par chalenge utna tum shreshtha banenge। tumko mat dene vaale dher niklenge isliye woh bhi parakhna hai, sambhaalna hai। kahaan-kahaan maaya bhi gupta pravesh ho jaati hai। tum vishwa ke maalik bante ho, andar mein bahut khushi rahni chaahiye। tum kehte ho baba ham aapse svarga ka varsa lene aaye hain। satya naaraayan ki katha sunkar ham nar se naaraayan, naari se lakshmi banenge। tum sab haath uthaate ho baba ham aapse poora varsa lekar hi chhodenge, nahin to ham kalpa-kalpa ganva denge। koi bhi vighna ko ham uda denge, itni bahaaduri chaahiye। tumne itni bahaaduri ki hai na। jisse varsa milta hai unko thode hi chhodenge। koi to achhi reeti thahar gaye, koi phir bhaaganti ho gaye। achhe-achhe ko maaya kha gai। ajgar ne khaakar saara hap kar liya।

ab baap kehte hain he aatmaayen, bahut pyaar se samjhaate hain। main patit duniya ko aakar paavan duniya banaata hoon। ab patit duniya ka maut saamne khada hai। ab main tumko raajaaon ka raaja banaata hoon। patit raajaaon ka bhi raaja। single taaj vaale raaja double taaj vaale raajaaon ko maatha kyon jhukaate hain, aadhaakalpa baad jab inhon ki woh pavitrata ud jaati hai, to raavan raajya mein sab vikaari aur pujaari ban jaate hain। to ab baap bachchon ko samjhaate hain - koi gaphlat nahin karo। bhool na jaao। achhi reeti padho। roz class atenda nahin kar sakte ho to bhi baba sab prabandha de sakte hain। 7 roz ka course lo, jo murli ko sahaj samajh sako। kahaan bhi jaao sirf do akshar yaad karo। yeh hai mahaamantra। apne ko aatma samajh baap ko yaad karo। koi bhi vikarma va paap karma deh-abhimaan mein aane se hi hota hai। vikarmon se bachne ke liye buddhi ki preeti ek baap se hi lagaani hai। koi dehdhaari se nahin। ek se buddhi ka yog lagaana hai। ant tak yaad karna hai to phir koi vikarma nahin hoga। yeh to sadi hui deh hai। inka abhimaan chhod do। naatak poora hota hai, abhi hamaare 84 janma poore hue। yeh puraani aatma puraana shareer hai। ab tamopradhaan se satopradhaan banna hai phir shareer bhi satopradhaan mil jaayega। aatma ko satopradhaan banaana hai - yahi taat lagi rahe। baap sirf kehte hain maamekam yaad karo। bas yahi ona rakho। tum bhi kehte ho na - baba ham paas hokar dikhaayenge। class mein jaante hain sabko scholarship to nahin milegi। phir bhi purushaartha to bahut karte hain na। tum bhi samajhte ho hamko nar se naaraayan banne ka poora purushaartha karna hai। kam kyon karen। koi bhi baat ki parvaah nahin। warriors kabhi parvaah nahin karte hain। koi kehte hain baba bahut toofaan, svapna aadi aate hain। yeh to sab hoga। tum ek baap ko yaad karte raho। in dushman par jeet paani hai। koi samay aise-aise svapna aayenge na man, na chit, aise-aise ghutke aayenge। yeh sab maaya hai। ham maaya ko jeette hain। aadhaakalpa ke liye dushman se raajya lete hain, hamko koi parvaah nahin। bahaadur kabhi choon-chaan nahin karte। ladaai mein khushi se jaate hain। tum to yahaan bade aaraam se baap se varsa lete ho। yeh chhi-chhi shareer chhodna hai। ab jaate hain sweet silence hom। baap kehte hain main aaya hoon, tumko le chalne। mujhe yaad karo to paavan banenge। impure aatma ja na sake। yeh hain nai baaten। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) vikarmon se bachne ke liye buddhi ki preet ek baap se lagaani hai, is sadi hui deh ka abhimaan chhod dena hai।

2) ham warriors hain, is smriti se maaya roopi dushman par vijay praapta karni hai, uski parvaah nahin karni hai। maaya gupta roop mein bahut pravesh karti hai isliye use parakhna aur sambhalna hai।

vardaan:- mansa-vaacha aur karmana ki pavitrata mein sampoorn marks lene vaale number one aagyaakaari bhav

mansa pavitrata arthaat sankalp mein bhi apvitrata ke sanskaar emerge na hon। sada aatmik swaroop arthaat bhaai-bhaai ki shreshtha smriti rahe। vaacha mein sada satyata aur madhurta ho, karmana mein sada namrata, santushtata aur harshitmukhta ho। isi aadhaar par number milte hain aur aise sampoorn pavitra aagyaakaari bachchon ka baap bhi gungaan karte hain। vahi apne har karma se baap ke kartavya ko siddha karne vaale sameep ratna hain।

slogan:- sambandh-samparka aur sthiti mein light bano, dincharya mein nahin।

avyakt ishaare-aatmik sthiti mein rahne ka abhyaas karo, antarmukhi bano

antarmukhi aatmaayen kaisi bhi paristhiti ho, chaahe achhi ho, chaahe hilaane vaali ho lekin har samay, har circumstance ke andar apne ko edjasta kar leti hain। akele ho ya sangathan mein ho, donon mein edjasta hona - ye hai brahman jeevan।