Murli du jour du dimanche 3 août 2025

03-08-25 praatahmurli om shanti' 'avyakt-baapdaada'' revise 28-03-06 madhuban

vishwa ki aatmaon ko duhkhon se chhudaane ke liye mansa seva ko badhaao, sampanna aur sampoorn bano

aaj sarva khajaanon ke maalik baapdaada apne chaaron or ke sarva khajaane sampanna bachchon ko dekh rahe hain। baapdaada ne har ek bachche ko sarva khajaane ka maalik banaaya hai। ek hi dene vaala aur sarva ko ek jaise sarva khajaane diye hain। kisko kam, kisko jyaada nahin diye hain। kyon? baap akhut khajaane ke maalik hain। behad ka khajaana hai isliye har ek bachcha akhut khajaane ka maalik hai। baapdaada ne sarva bachchon ko ek jitna ek jaisa diya hai। lekin dhaaran karne vaalon mein koi sarva khajaane dhaaran karne vaale hain aur koi yatha shakti dhaaran karne vaale hain। koi number one hain aur koi nambarvaar hain। jinhonne jitna bhi dhaaran kiya hai unhon ke chehre se, naynon se khajaanon ka nasha spashta dikhaai deta hai। khajaane se bharpoor aatma chehre se, naynon se bharpoor dikhaai deti hai। jaise sthool khajaana praapta karne vaali aatma ke chalan se, chehre se maaloom pad jaata hai, to yeh avinaashi khajaanon ka nasha, khushi spashta dikhaai deti hai। sampannata ka fakhur bephikar baadshaah bana deta hai। jahaan eeshvareey fakhur hai vahaan phikar ho nahin sakta, bephikar baadshaah, begampur ke baadshaah ban jaate hain। to aap sabhi eeshvareey sampannata ke khajaane vaale bephikar baadshaah ho na! begampur ke baadshaah ho। koi phikar hai kya? koi gam hai? kya hoga, kaisa hoga iska bhi phikar nahin। trikaaldarshi sthiti mein sthit rahne vaale jaante ho jo ho raha hai woh sab achha, jo hone vaala hai woh aur achha। kyon? sarvashaktivaan baap ke saathi ho, saath rahne vaale ho। har ek ko nasha hai, fakhur hai ki baapdaada sada hamaare dil mein rehte hain aur ham sada baap ke diltakhta par rehte hain। to aisa nasha hai na! jo diltakhta nasheen hain uske sankalp to kya svapna mein bhi duhkh ki lahar, lais bhi nahin aa sakti usmein। kyon? sarva khajaanon se bharpoor hai, jo bharpoor cheez hoti hai usmein halchal nahin hogi।

to chaaron or ke bachchon ki sampannata dekh rahe the, har ek ka baapdaada ne jama ka khaata check kiya। khajaana to akhut mila hai lekin jo mila hai us khajaane ko kaarya mein lagaate khatma kiya hai va mile hue khajaane ko kaarya mein bhi lagaaya hai aur badhaaya bhi hai? kitni percent mein har ek ke khaate mein jama hai? kyonki yeh khajaana sirf ab is samay ke liye nahin hai, yeh khajaana bhavishya mein bhi saath mein chalna hai। jama hua hi saath jaayega। to percentage dekh rahe the। kya dekha? seva to sabhi bachche yatha yog va yatha shakti kar rahe hain lekin seva ka phal jama hona, usmein antar ho jaata hai। kai bachchon ka jama khaata dekha, seva bahut karte lekin seva karne ka phal jama hua ya nahin, uski nishaaniyaan kya hongi? seva koi bhi ho chaahe mansa, chaahe vaacha, chaahe karmana teenon mein 100 percent mark hoti hain। teenon mein 100 hain। seva to ki lekin agar seva karne ke samay va seva ke baad svayan apne man mein, apne se santushta hain aur saath mein jinki seva ki, jo seva mein saathi bante hain va seva karne vaale ko dekhte hain, sunte hain woh bhi santushta hain to samjho jama hua। sva ki santushtata, sarva ki santushtata nahin hai to percentage jama ka kam ho jaata hai।

yathaartha seva ki vidhi pahle bhi bataai hai - teen baaten vidhi poorvak hain to jama hai, woh sunaaya hai - ek nimitta bhaav, doosra nirmaan bhaavna, teesra nirmal svabhaav, nirmal vaani। bhaav, bhaavna aur svabhaav, bol agar yeh teen baaton se ek baat bhi kam hai, ek hai do nahin hai, do hain ek nahin hai to woh kamjori jama ki percentage kam kar deti hai। to chaar hi subject mein apne aapko check karo - kya chaar hi subject mein hamaara khaata jama hua hai? kyon? baapdaada ne dekha ki kaeeyon ki chaar baaten jo sunaai, bhaav, bhaavna… us pramaan kai bachchon ka seva samaachaar bahut hai lekin jama ka khaata kam hai।

har khajaane ko check karo - gyaan ka khajaana arthaat jo bhi sankalp, karma kiya woh knowledgeful ho karke kiya? saadhaaran to nahin hua? yog arthaat sarva shakti ka khajaana bharpoor ho। to check karo har din ki dincharya mein samay pramaan jis shakti ki aavashyakta hai, usi samay woh shakti order mein rahi? master sarvashaktivaan ka arth hi hai maalik। aise to nahin samay beetne ke baad shakti ka sochte hi rah jaaen। agar samay par order karne par shakti emerge nahin hoti, ek shakti ko bhi agar order mein nahin chala sakte to nirvighna raajya ke adhikaari kaise banenge? to shaktiyon ka khajaana kitna jama hai? jo samay par kaarya mein lagaate hain, woh jama hota hai। check karte ja rahe ho ki mera khaata kya hai? kyonki baapdaada ko sabhi bachchon se ati pyaar hai, baapdaada yahi chaahte hain ki sabhi bachchon ka jama ka khaata bharpoor ho। dhaarna mein bhi bharpoor, dhaarna ki nishaani hai - har karma gun sampanna hoga। jis samay jis gun ki aavashyakta hai woh gun chehre, chalan mein emerge dikhaai de। agar koi bhi gun ki kami hai, maanon saralta ke gun ki karma ke samay aavashyakta hai, madhurta ki aavashyakta hai, chaahe bol mein, chaahe karma mein agar saralta, madhurta ke bajaae thoda bhi aaveshta ya thakaavat ke kaaran bol madhur nahin hai, chehra madhur nahin hai, serious hai to gun sampanna to nahin kahenge na! kaise bhi circumstance ho lekin mera jo gun hai, woh mera gun emerge hona chaahiye। abhi short mein suna rahe hain।

aise hi seva - seva mein sevaadhaari ki sabse achhi nishaani hai - svayan bhi sada halka, light aur khushnumah dikhaai de। seva ka phal hai khushi। agar seva karte khushi gaayab ho jaati hai to seva ka khaata jama nahin hota। seva ki, samay lagaaya, mehnat ki to thodi percentage mein woh jama hoga, phaaltu nahin jaayega। lekin jitni percentage mein jama hona chaahiye utna nahin hota। aise hi sambandh-samparka ki nishaani - duaaon ki praapti ho। jiske bhi sambandh-samparka mein aaye unke man se aapke prati duaayen niklen - bahut achha, baahar se nahin, dil se nikle। dil se duaayen niklen aur duaayen agar praapta hain, to duaayen milna yeh bahut sahaj purushaartha ka saadhan hai। bhaashan nahin karo, chalo mansa seva bhi itni powerful nahin hai। koi naye-naye plan nahin banaane aate hain, koi harja nahin। sabse sahaj purushaartha ka saadhan hai duaayen lo, duaayen do। aise baapdaada kai bachchon ke man ke sankalp read karte hain। kai bachche samay anusaar, circumstance anusaar kehte hain ki agar koi kharaab kaam karta hai to usko duaayen kaise den? us par to krodh aata hai na, duaayen kaise denge! phir krodh ke baal-bachche bhi to bahut hain। lekin usne kharaab kaam kiya, woh kharaab hai aapne theek samjha ki yeh kharaab hai। yeh nirnay to achha kiya, samjha achha lekin ek hota hai samajhna, doosra hota hai unke kharaab kaam, kharaab baaton ko apne dil mein samaana। samajhna aur samaana farka hai। agar aap samajhdaar ho, kya samajhdaar koi kharaab cheez apne paas rakhega! lekin woh kharaab hai, aapne dil mein samaaya arthaat aapne kharaab cheez apne paas rakhi, sambhaali। samajhna alag cheez hai, samaana alag cheez hai। samajhdaar banna to theek hai, bano lekin samaao nahin। yeh to hai hi aisa, yeh sama liya। aise samajh karke vyavhaar mein aana, yeh samajhdaari nahin hai। to baapdaada ne check kiya, abhi samay aise sameep nahin aana hai, aapko laana hai। kai poochhte hain thoda sa ishaara to de do na - 10 saal lagenge, 20 saal lagenge, kitna samay lagega!

to baap bachchon se prashn karta hai, baap se to prashn bahut karte hain na, to aaj baap bachchon se prashn karta hai - samay ko sameep laane vaale kaun? drama hai lekin nimitta kaun? aapka ek geet bhi hai, kiske roke rooka hai savera। hai na geet? to savera laane vaala kaun? vinaashkaari to tadap rahe hain ki vinaash karen, vinaash karen... lekin nav nirmaan karne vaale itna ready hain? agar puraana khatma ho jaae, naya nirmaan ho nahin to kya hoga? isliye baapdaada ne abhi baap ke bajaae teacher ka roop dhaaran kiya hai। homework diya hai na? kaun homework deta hai? teacher। last mein hai satguru ka part। to apne aapse poochho sampanna aur sampoorn stage kahaan tak bani hai? kya aavaaj se pare va aavaaj mein aana, donon hi samaan hain? jaise aavaaj mein aana jab chaaho sahaj hai, aise hi aavaaj se pare ho jaana jab chaahe, jaise chaahe vaise hai? second mein aavaaj mein aa sakte hain, second mein aavaaj se pare ho jaaen - itni practice hai? jaise shareer dvaara jab chaaho, jahaan chaaho vahaan aa-ja sakte ho na। aise man buddhi dvaara jab chaaho, jahaan chaaho vahaan aa-ja sakte ho? kyonki ant mein paas marks usko milegi jo second mein jo chaahe jaisa chaahe, jo order karna chaahe usmein saphal ho jaae। science vaale bhi yahi prayatna kar rahe hain, sahaj bhi ho aur kam samay mein bhi ho। to aisi sthiti hai? kya minute tak aaye hain, second tak aaye hain, kahaan tak pahunche hain? jaise light house might house second mein on karte hi apni light phailaate hain, aise aap second mein light house ban chaaron or light phaila sakte ho? yeh sthool aankh ek sthaan par baithe door tak dekh sakti hai na! phaila sakti hai na apni drishti! aise aap teesre netra dvaara ek sthaan par baithe chaaron or vardaata, vidhaata ban nazar se nihaal kar sakte ho? apne ko sab baaton mein check kar rahe ho? itna teesra netra clean aur clear hai? sabhi baaton mein agar thodi bhi kamjori hai, to uska kaaran pahle bhi sunaaya hai ki yeh had ka lagaav “main aur mera'' hai। jaise main ke liye spashta kiya tha - homework bhi diya tha। do main ko samaapta kar ek main rakhni hai। sabhi ne yeh homework kiya? jo is homework mein saphal hue woh haath uthaao। baapdaada ne sabko dekha hai। himmat rakho, daro nahin haath uthaao। achha hai mubaarak milegi। bahut thode hain। in sabke haath T.vi. mein dikhaao। bahut thodon ne haath uthaaya hai। abhi kya karen? sabhi ko apne oopar hansi bhi aa rahi hai।

achha - doosra homework tha - krodh ko chhodna hai, yeh to sahaj hai na! to krodh ko kisne chhoda? itne dinon mein krodh nahin kiya? (ismen bahuton ne haath uthaaya) ismen thode jyaada hain, jinhonne krodh nahin kiya, aapke aas paas rahne vaalon se bhi poochhenge। jinhonne haath uthaaya woh khade ho jaao। achha bahut hain। krodh nahin kiya hai? sankalp mein, man mein krodh aaya? chalo, phir bhi mubaarak ho, agar man mein aaya mukh se nahin kiya to bhi mubaarak hai। bahut achha।

to aap hi result ke hisaab se dekho - kya sthaapna ka kaarya, sva ko sampanna banaana aur sarva aatmaon ko mukti ka varsa dilaana, yeh sampanna hua hai? svayan ko jeevanmukti swaroop banaana aur sarva aatmaon ko mukti ka varsa dilaana - yeh hai sthaapna karta aatmaon ka shreshtha karma। to baapdaada iseelie poochhta hai ki sarva bandhanon se mukta, jeevanmukta ki stage par sangam par hi pahunchna hai va satayug mein pahunchna hai? sangamayug mein sampanna hona hai ya vahaan bhi raajayog karke seekhna hai? sampanna to yahaan banna hai na? sampoorn bhi yahaan hi banna hai। sangamayug ke samay ka bhi sabse bade te bada khajaana hai। to kiske roke rooka hai savera, bataao।

to baapdaada kya chaahte hain? kyonki baap ki aashaaon ka deepak bachche hi hain। to apna khaata achhi tarah se check karo। kai bachchon ko to dekha kai bachche to maujeeraam hain, mauz mein chal rahe hain। jo hua so achha। abhi to mauz mana lo, satayug mein kaun dekhta, kaun jaanta। to jama ke khaate mein aise maujeelaal kaho, maujeeraam kaho, aise bhi bachche dekhe। mauz kar lo। doosron ko bhi kehte are kya karna hai, mauz karo। khaao, pio mauz karo। kar lo mauz, baap bhi kehte kar lo। agar thode mein raazi rahne vaale ho to thode mein raazi ho jaao। vinaashi saadhnon ki mauz alpakaal ki hoti hai। sadaakaal ki mauz ko chhod agar alpakaal ke saadhan ki mauz mein rehna chaahte hain to baapdaada kya kahega? ishaara dega aur kya karega? koi heeron ki khaan par jaaye aur do heere lekar khush ho jaae usko kya kahenge? to aise nahin banna। ateendriy sukh ke mauz ke jhoole mein jhoolo। avinaashi praaptiyon ke jhoole ki mauz mein jhoolo। drama mein dekho, maaya ka part bhi vichitra hai। isi samay aise-aise saadhan nikle hain, jo pahle the hi nahin। lekin bina saadhan ke bhi jinhonne saadhna ki, seva ki woh bhi to example saamne hain na! kya yeh saadhan the? lekin seva kitni hui? quality to nikli na! aadi ratna to taiyaar ho gaye na! yeh saadhnon ki aakarshan hai। saadhnon ko use karna wrong nahin kehte hain lekin saadhna ko bhool saadhan mein lag jaana, isko baapdaada wrong kehte hain। saadhan jeevan ke udti kala ka saadhan nahin hai, aadhaar nahin hai। saadhna aadhaar hai। agar saadhna ke bajaae saadhnon ko aadhaar banaaya to result kya hogi? saadhan vinaashi hain, result kya? saadhna avinaashi hai, uski result kya hogi? achha।

chaaron or ke bachchon ke purushaartha aur pyaar ke samaachaar patra baapdaada ko mile hain, baapdaada bachchon ka umang-utsaah dekh yeh karenge, yeh karenge... yeh samaachaar sun khush hote hain। abhi sirf jo himmat rakhi hai, umang-utsaah rakha hai, isko baar-baar attention de practical mein laana। yahi sabhi bachchon ke prati baapdaada ke dil ki duaayen hain aur sabhi chaaron or ke sankalp, bol aur karma mein, sambandh-samparka mein sampanna banne vaale shreshtha aatmaon ko sada svadarshan karne vaale, svadarshan chakradhaari bachchon ko, sada dridh sankalp dvaara maayaajeet ban baap ke aage svayan ko pratyaksha karne vaale aur vishwa ke aage baap ko pratyaksha karne vaale serviceable, knowledgeful, successful bachchon ko baapdaada ka yaadapyaar aur dil se padam-padamguna duaayen ho, namaste ho। namaste।

vardaan:- sachche saaph dil ke aadhaar se number one lene vaale dilaaraam pasanda bhav

dilaaraam baap ko sachchi dil vaale bachche hi pasanda hai। duniya ka dimaag na bhi ho lekin sachchi saaph dil ho to number one le lenge kyonki dimaag to baap itna bada de deta hai jisse rachayita ko jaanne se rachna ke aadi, madhya, ant ki knowledge ko jaan lete ho। to sachchi saaph dil ke aadhaar se hi number bante hain, seva ke aadhaar se nahin। sachche dil ki seva ka prabhaav dil tak pahunchta hai। dimaag vaale naam kamaate hain aur dil vaale duaayen kamaate hain।

slogan:- sarva ke prati shubh chintan aur shubh kaamna rakhna hi sachcha paropkaar hai।

avyakt ishaare - sahajyogi banna hai to parmaatma pyaar ke anubhvi bano

jo bachche parmaatma pyaar mein sada lavleen, khoye hue rehte hain unki jhalak aur falak, anubhooti ki kirnen itni shaktishaali hoti hain jo koi bhi samasya sameep aana to door lekin aankh uthaakar bhi nahin dekh sakti। unhein kabhi bhi kisi bhi prakaar ki mehnat ho nahin sakti।