Murli du jour du samedi 31 janvier 2026

31-01-2026 praatahmurli om shanti "baapdaada"' madhuban

“meethe bachche - tum yahaan aaye ho sarvashaktimaan baap se shakti lene arthaat deepak mein gyaan ka ghrit daalne''

prashn:- shiv ki baraat ka gaayan kyon hai?

uttar:- kyonki shivbaaba jab vaapis jaate hain to sabhi aatmaon ka jhunda unke peechhe-peechhe bhaagkar jaata hai। mool vatan mein bhi aatmaon ka manaara (chhatta) lag jaata hai। tum pavitra banne vaale bachche baap ke saath-saath jaate ho। saath ke kaaran hi baraat ka gaayan hai।

om shanti। bachchon ko pahle-pahle ek hi pvoint samajhne ki hai ki ham sab bhaai-bhaai hain aur woh sabka baap hai। unko sarvashaktimaan kaha jaata hai। tumhaare mein sarvashaktiyaan thi। tum vishwa par raajya karte the। bhaarat mein hi in devi-devtaaon ka raajya tha। goya tum bachchon ka raajya tha। tum pavitra devi-devtaayen the, tumhaara kul va dynasty hai, woh sab nirvikaari the। kaun nirvikaari the? aatmaayen। ab phir tum nirvikaari ban rahe ho। jaise ki sarvashaktimaan baap ko yaad kar unse shakti le rahe ho। baap ne samjhaaya hai aatma hi 84 ka part bajaati hai। unmein jo satopradhaan taakat thi woh phir din-pratidin kam hoti jaati hai। satopradhaan se tamopradhaan banna hai। jaise battery ki taakat kam hoti jaati hai to motor khadi ho jaati hai। battery discharge ho jaati hai। aatma ki battery full discharge nahin hoti hai, kuchh na kuchh taakat rehti hai। jaise koi marta hai to deepak jalaate hain, usmein ghrit daalte rehte hain ki jyoti bujh na jaae। battery ki taakat kam hoti hai to phir charge karne rakhte hain। abhi tum bachche samajhte ho - tumhaari aatma sarvashaktimaan thi, ab phir tum sarvashaktimaan baap se apna buddhiyog lagaate ho। to baba ki shakti hamaare mein aa jaae kyonki shakti kam ho gai hai। thodi zaroor rehti hai। ekdam khatma ho jaae to phir shareer na rahe। aatma baap ko yaad karte-karte bilkul pure ho jaati hai। satayug mein tumhaari battery full charge hoti hai phir thodi-thodi kam hoti jaati hai। treta tak meter kam hota hai, jisko kala kaha jaata hai। phir kahenge aatma jo satopradhaan thi woh sato bani, taakat kam ho jaati hai। tum samajhte ho ham manushya se devta ban jaate hain satayug mein। ab baap kehte hain - mujhe yaad karo to tum tamopradhaan se satopradhaan ban jaayenge। abhi tum tamopradhaan ban gaye ho to taakat ka devaala nikal gaya hai। phir baap ko yaad karne se poori taakat aayegi, kyonki tum jaante ho deh sahit deh ke jo bhi sab sambandh hain, woh sab khatma ho jaane hain phir tumko behad ka raajya milta hai। baap bhi behad ka hai to varsa bhi behad ka dete hain। abhi tum patit ho, tumhaari taakat bilkul kam hoti gai hai। he bachchon - ab tum mujhe yaad karo, main almighty hoon, mere dvaara almighty raajya milta hai। satayug mein devi-devta saare vishwa ke maalik the, pavitra the, daivi gunvaan the। abhi woh daiveegun nahin hain। sabki battery poori discharge hone lagi hai। phir ab battery bharti hai। sivaae parampita paramatma ke saath yog lagaane ke battery charge nahin ho sakti। woh baap hi ever pure hai। yahaan sab hain impure। jab pure rehte hain to battery charge rehti hai। to ab baap samjhaate hain ek ko hi yaad karna hai। oonch te oonch hai bhagwan। baaki sab hain rachna। rachna se rachna ko kabhi varsa nahin milta hai। creator to ek hi hai। woh hai behad ka baap। baaki to sab hain had ke। behad ke baap ko yaad karne se behad ki baadshaahi milti hai। to bachchon ko dil andar samajhna chaahiye - hamaare liye baba nai duniya svarga ki sthaapna kar rahe hain। drama plan anusaar svarga ki sthaapna ho rahi hai। tum jaante ho - satayug aane vaala hai। satayug mein hota hi hai sada sukh। woh kaise milta hai? baap baith samjhaate hain maamekam yaad karo। main ever pure hoon। main kabhi manushya tan nahin leta hoon। na daivi tan, na manushya tan leta hoon arthaat main janma-maran mein nahin aata hoon। sirf tum bachchon ko svarga ki baadshaahi dene liye, jab yeh 60 varsha ki vaanaprastha avastha mein hota hai tab inke tan mein aata hoon। yahi poora satopradhaan se tamopradhaan bana hai। number one oonch te oonch bhagwan phir hain sookshmavtanvaasi brahma-vishnu-shankar, jiska saakshaatkaar hota hai। sookshm vatan beech ka hai na। jahaan shareer nahin ho sakte। sookshm shareer sirf divya drishti se dekha jaata hai। manushya srishti to yahaan hai। baaki woh to sirf saakshaatkaar ke liye pharishte hain। tum bachche bhi ant mein jab bilkul pavitra ho jaate ho to tumhaara bhi saakshaatkaar hota hai। aise pharishte ban phir satayug mein yahaan hi aakar svarga ke maalik banenge। yeh brahma koi vishnu ko yaad nahin karte hain। yeh bhi shivbaaba ko yaad karte hain aur yeh vishnu bante hain। to yeh samajhna chaahiye na। inhonne raajya kaise paaya! ladaai aadi to kuchh bhi hoti nahin। devtaayen hinsa kaise karenge!

abhi tum bachche baap ko yaad karke raajaai lete ho, koi maane na maane। geeta mein bhi hai - he bachchon, deh sahit deh ke sab dharma chhod maamekam yaad karo। unko to deh hai nahin jo mamatva rakhen। kehte hain main thode samay ke liye inke shareer ka loan leta hoon। nahin to main knowledge kaise doon! main beejroop hoon na। is saare jhaad ki knowledge mere paas hai। aur kisko pata nahin, srishti ki aayu kitni hai? kaise inki sthaapna, paalna, vinaash hota hai? manushyon ko to pata hona chaahiye। manushya hi padhte hain। jaanvar to nahin padhenge na। woh padhte hain had ki padhaai। baap tumko behad ki padhaai padhaate hain, jisse tumko behad ka maalik banaate hain। to yeh samjhaana chaahiye ki bhagwan kisi manushya ko athva dehdhaari ko nahin kaha jaata। brahma, vishnu, shankar ko bhi sookshm deh hai na। inhon ka naam hi alag hai, inko bhagwan nahin kaha jaata। yeh shareer to is daada ki aatma ka takhta tha। akaal takhta hai na। abhi yeh akaalmoorta baap ka takhta hai। amritsar mein bhi ek akaal takhta hai na। bade-bade jo hote hain vahaan akaal takhta par jaakar baithte hain। abhi baap samjhaate hain yeh sab akaal aatmaon ke takhta hain। aatma akaal hai jisko kaal kha na sake। baaki takhta to badalte rehte hain। akaalmoorta aatma is takhta par baithti hai। pahle chhota takhta hota hai phir bada ho jaata hai। aatma ek shareer chhod doosra leti hai। aatma akaal hai। baaki unmein achhe va bure sanskaar hote hain tab to kaha jaata hai na - karmon ka yeh phal hai। aatma kabhi vinaash nahin hoti hai। aatma ka baap hai ek। yeh to samajhna chaahiye na। yeh baba koi shaastron ki baat sunaate hain kya! shaastra aadi padhne se vaapis to koi ja nahin sakte। pichhaadi mein sab jaayenge। jaise tiddiyon ka athva madhumakkhi ka jhunda jaata hai na। madhumakkhiyon ki bhi queen hoti hai। unke pichhaadi sab jaate hain। baap bhi jaayenge to unke pichhaadi sab aatmaayen jaayengi। vahaan mool vatan mein jaise sab aatmaon ka manaara (chhatta) hai। yahaan phir hai manushyon ka jhunda। to yeh jhunda bhi ek din bhaagna hai। baap aakar sab aatmaon ko le jaate hain। shiv ki baraat kaha jaata hai। bachche kaho athva sajniyaan kaho। baap aakar bachchon ko padhaakar yaad ki yaatra sikhlaate hain। pavitra banne bigar to aatma ja nahin sakti। jab pavitra ban jaayegi tab pahle-pahle shantidham jaayegi। vahaan jaakar sab nivaas karte hain। vahaan se phir dheere-dheere aate rehte hain, vriddhi hoti rehti hai। tum hi pahle-pahle bhaagenge baap ke pichhaadi। tumhaara baap ke saath athva sajniyon ka saajan ke saath yog hai। raajdhaani banni hai na। sab ikatthe nahin aate hain। vahaan sab aatmaon ki duniya hai। vahaan se phir nambarvaar aate hain। jhaad dheere-dheere vriddhi ko paata hai। pahle-pahle to hai aadi sanaatan devi-devta dharma, jo baap sthaapan karte hain। pahle-pahle hamko brahman banaate hain। prajaapita brahma hai na। praja mein bhaai-behen ho jaate hain। brahmaakumaar aur kumaariyaan dher hain। zaroor nishchaybuddhi honge tab to itne dher hue hain। brahman kitne honge? kachche va pakke? koi to 99 marks lete hain, koi 10 marks lete hain to goya kachche thahre na। tumhaare mein bhi jo pakke hain woh zaroor pahle aayenge। kachche vaale pichhaadi mein aayenge। yeh paartadhaariyon ki duniya hai jo phirti rehti hai। satayug, treta… yeh purushottam sangamayug hai। yeh abhi baap ne bataaya hai। pahle to ham ulta hi samajhte aaye ki kalpa ki aayu laakhon varsha hai। abhi baap ne bataaya hai yeh to poora 5 hazaar varsha ka chakra hai। aadhaakalpa hai raam ka raajya, aadhaakalpa hai raavan ka raajya। laakhon varsha ka kalpa hota to aadha-aadha bhi ho na sake। duhkh aur sukh ki yeh duniya bani hui hai। yeh behad ki knowledge behad ke baap se milti hai। shivbaaba ke shareer ka koi naam nahin hai। yeh shareer to is daada ka hai। baba kahaan hai? baba ne thode samay ke liye loan liya hai। baba kehte hain hamko mukh to chaahiye na। yahaan bhi gaoomukh banaaya hua hai। pahaadi se paani to jahaan-tahaan aata hai। yahaan phir gau ka mukh bana diya hai, usse paani aata hai, unko gangaajal samajh lete hain। ab ganga phir kahaan se aai? yeh hai sab jhooth। jhoothi kaaya, jhoothi maaya, jhootha sab sansaar। bhaarat jab svarga tha to sachkhanda kaha jaata hai phir bhaarat hi puraana banta to jhoothkhanda kaha jaata hai। is jhoothkhanda mein jab sabhi patit ban jaate hain tab bulaate hain - baba hamko paavan banaae is puraani duniya se le chalo। baap kehte hain mere sab bachche kaam chita par chadh kaale ban gaye hain। baap bachchon ko baith kehte hain tum to svarga ke maalik the na! smriti aai hai na। bachchon ko samjhaate hain, saari duniya ko nahin samjhaate। tumko hi samjhaate hain to maaloom pade ki hamaara baap kaun hai!

is duniya ko kaha jaata hai forest oph thornas। (kaanton ka jangal) sabse bada kaam ka kaanta lagaate hain। bhal yahaan bhagat bhi bahut hain, vegetarian hain, parantu aise nahin ki vikaar mein nahin jaate hain। aise to bahut baal brahmachaari bhi rehte hain। chhotepan se hi kab chhi-chhi khaana aadi nahin khaate hain। sannyaasi bhi kehte hain - nirvikaari bano। woh had ka sannyaas manushya karaate hain। doosre janma mein phir grihasthi paas janma le phir gharbaar chhod chale jaate hain। satayug mein yeh shreekrishna aadi devtaayen kabhi gharbaar chhodte hain kya? nahin। to unhon ka hai had ka sannyaas। abhi tumhaara hai behad ka sannyaas। saari duniya ka, sambandhiyon aadi ka buddhi se sannyaas karte ho। tumhaare liye ab svarga ki sthaapna ho rahi hai। tumhaari buddhi svarga taraph hi jaayegi। to shivbaaba ko hi yaad karna hai। behad ka baap kehte hain mujhe yaad karo। manamnaabhav, madhyaaji bhav, to tum devta ban jaayenge। yeh vahi geeta ka episode hai। sangamayug bhi hai। main sangam par hi sunaata hoon। raajayog zaroor aage janma mein sangam par seekhe honge। yeh srishti badalti hai na, tum patit se paavan ban jaate ho। ab yeh hai purushottam sangamayug, jabki ham aise tamopradhaan se satopradhaan bante hain। har ek baat achhi reeti samajhkar nishchay karni chaahiye। yeh koi manushya thode hi kehte hain। yeh hai shreemat arthaat shreshtha te shreshtha mat, bhagwan ki। baaki sab hain manushya mat। manushya mat se girte aate ho। ab shreemat se tum chadhte ho। baap manushya se devta bana dete hain। daivi mat svargavaasi ki hai aur woh hai narkavaasi manushya mat, jisko raavan mat kaha jaata hai। raavan raajya bhi koi kam nahin hai। saari duniya par raavan ka raajya hai। yeh behad ki lanka hai jis par raavan ka raajya hai phir devtaaon ka pavitra raajya hoga। vahaan bahut sukh hota hai। svarga ki kitni mahima hai। kehte bhi hain svarga padhaara। to zaroor narka mein tha na। hell se gaya to zaroor phir hell mein hi aayega na! svarga abhi hai kahaan? yeh baaten koi shaastron mein nahin hain। abhi baap tumhein saari knowledge dete hain। battery bharti hai। maaya phir link tod deti hai। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) man-vachan-karma se pavitra ban aatma roopi battery ko charge karna hai। pakka brahman banna hai।

2) manmat va manushya mat chhod ek baap ki shreemat par chalkar svayan ko shreshtha banaana hai। satopradhaan ban baap ke saath udkar jaana hai।

vardaan:- satyata ki shakti dvaara prakriti va vishwa ko satopradhaan banaane vaale master vidhi-vidhaata bhav

jab aap bachche satyata ki shakti ko dhaaran kar master vidhi vidhaata bante ho to prakriti satopradhaan ban jaati hai, yug satayug ban jaata hai। sarva aatmaayen sadgati ki takdeer bana leti hai। aapki satyata paaras ke samaan hai। jaise paaras lohe ko paaras bana deta hai, aise satyata ki shakti aatma ko, prakriti ko, samay ko, sarva saamagri ko, sarva sambandh ko, sanskaaron ko, aahaar-vyavhaar ko satopradhaan bana deti hai।

slogan:- yogi aatmaayen woh hain jinhen prakriti ki halchal bhi aakarshit na kare।

avyakt ishaare - is avyakti maas mein bandhanmukta rah jeevanmukta sthiti ka anubhav karo

svadarshan chakradhaari so chhatradhaari bano to deh ki smriti ke anek vyartha sankalpon ke chakra se, laukik aur alaukik sambandhon ke chakra se, apne anek janmon ke svabhaav aur sanskaaron ke chakra se aur prakriti ke anek prakaar ki aakarshan ke chakra se jab mukta ho jaayenge tab anya aatmaon ko bhi baap se praapta hui shaktiyon dvaara anek chakkaron se sahaj hi chhudaakar jeevan-mukta bana sakenge।