Murli du jour du jeudi 5 février 2026

05-02-2026 praatahmurli om shanti "baapdaada"' madhuban

“meethe bachche - baap aaye hain tumhein raavan raajya se liberate kar sadgati dene, narkavaasiyon ko svargavaasi banaane''

prashn:- baap ne tum bhaaratvaasi bachchon ko kaunsi-kaunsi smriti dilaai hai?

uttar:- he bhaaratvaasi bachche! tum svargavaasi the। aaj se 5 hazaar varsha pahle bhaarat svarga tha, heere sone ke mahal the। tum saare vishwa ke maalik the। dharti aasmaan sab tumhaare the। bhaarat shivbaaba ka sthaapan kiya hua shivaalay tha। vahaan pavitrata thi। ab phir se aisa bhaarat banne vaala hai।

geet:- nayan heen ko raah dikhaao prabhu…

om shanti। meethe-meethe roohaani bachchon (aatmaon) ne yeh geet suna। kisne kaha? aatmaon ke roohaani baap ne। to roohaani baap ko roohaani bachchon ne kaha ki he baba। unko eeshvar bhi kaha jaata hai, pita bhi kaha jaata hai। kaun sa pita? parampita kyonki baap do hain - ek laukik, doosra paarlaukik। laukik baap ke bachche paarlaukik baap ko pukaarte hain - he baba। achha baba ka naam? shiv। woh to niraakaar pooja jaata hai। unko kaha jaata hai supreme father। laukik baap ko supreme nahin kaha jaata। oonch te oonch sabhi aatmaon ka baap ek hi hai। sabhi jeev aatmaayen us baap ko yaad karti hain। aatmaayen yeh bhool gayi hain ki hamaara baap kaun hai? pukaarte hain O god father ham nayanheen ko nayan do to ham apne baap ko pahchaanen। bhaktimaarga ki thokron se chhudaao। sadgati ke liye teesra netra lene liye, baap se milne liye pukaarte hain kyonki baap hi kalpa-kalpa bhaarat mein aakar bhaarat ko svarga banaate hain। abhi kaliyug hai, kaliyug ke baad satayug aana hai। yeh hai purushottam sangamayug। behad ka baap aakar jo patit bhrashtaachaari ban gaye hain unhon ko purushottam banaate hain। yeh (lakshmi-naaraayan) purushottam bhaarat mein the। lakshmi-naaraayan ki dynasty ka raajya tha। aaj se 5 hazaar varsha pahle satayug mein shri lakshmi-naaraayan ka raajya tha। yeh bachchon ko smriti dilaate hain। tum bhaaratvaasi aaj se 5 hazaar varsha pahle svargavaasi the। ab to sab narkavaasi hain। aaj se 5 hazaar varsha pahle bhaarat heaven tha। bhaarat ki bahut mahima thi, heere-sone ke mahal the। abhi to kuchh bhi nahin hai। us samay aur koi dharma nahin tha, sirf sooryavanshi hi the। chandravanshi bhi peechhe aate hain। baap samjhaate hain tum sooryavanshi dynasty ke the। abhi tak bhi in lakshmi-naaraayan ke mandir banaate rehte hain। parantu lakshmi-naaraayan ka raajya kab tha, kaise paaya, yeh kisko pata nahin hai। pooja karte hain, jaante nahin। to blind faith hua na। shiv ki, lakshmi-naaraayan ki pooja karte hain, biography ko bhi nahin jaante। abhi bhaaratvaasi khud kehte hain - ham patit hain। ham patiton ko paavan banaane vaala baba aao। aakar hamko duhkhon se, raavan raajya se liberate karo। baap hi aakar sabko liberate karte hain। bachche jaante hain satayug mein barobar ek raajya tha। baapu ji bhi kehte the ki hamko phir se raamraajya chaahiye, grihastha dharma jo patit ban gaya hai so paavan chaahiye। ham svargavaasi banne chaahte hain। abhi narkavaasiyon ka kya haal hai, dekh rahe ho na। isko kaha jaata hai hell, devil world। yahi bhaarat deity world tha। baap baith samjhaate hain tumne 84 janma liye hain, na ki 84 laakh। baap samjhaate hain tum asul shantidham ke rahne vaale ho। tum yahaan part bajaane aaye ho। 84 janmon ka part bajaaya hai। punarjanma to zaroor lena pade na। punarjanma 84 hote hain।

ab behad ka baap aaye hain tum bachchon ko behad ka varsa dene। baap tum bachchon (aatmaon) se baat kar rahe hain। aur satsangon mein manushya, manushyon ko bhaktimaarga ki baaten sunaate hain। aadhaakalpa bhaarat jab svarga tha to ek bhi patit nahin tha। is samay ek bhi paavan nahin। yeh hai hi patit duniya। geeta mein shreekrishna bhagvaanuvaach likh diya hai। usne to geeta sunaai nahin। ye log apne dharmashaastra ko bhi nahin jaante। apne dharma ko hi bhool gaye hain। hindu koi dharma nahin hai। dharma mukhya hain chaar। pahle hain aadi sanaatan devi-devta dharma। sooryavanshi aur chandravanshi donon ko milaakar kaha jaata hai devi-devta dharma, deityism। vahaan duhkh ka naam nahin tha। 21 janma to tum sukhdhaam mein the phir raavan raajya, bhakti maarga shuru hota hai। bhaktimaarga hai hi neeche utarne ka। bhakti hai raat, gyaan hai din। abhi hai ghor andhiyaari raat। shiv jayanti aur shivraatri, donon akshar aate hain। shivbaaba kab aate hain? jab raatri hoti hai। bhaaratvaasi ghor andhiyaare mein aa jaate hain tab baap aate hain। gudiyon ki pooja karte rehte hain, ek ki bhi biography nahin jaante। yeh bhaktimaarga ke shaastra bhi banne hi hain। yeh drama, srishti chakra ko bhi samajhna hai। shaastron mein yeh knowledge nahin hai। woh hai bhakti ka gyaan, philosophy। woh koi sadgati maarga ka gyaan nahin hai। baap kehte hain - main aakar tumko brahma dvaara yathaartha gyaan sunaata hoon। pukaarte bhi hain, hamko sukhdhaam, shantidham ka raasta bataao। baap kehte hain aaj se 5 hazaar varsha pahle sukhdhaam tha, jismen tum saare vishwa par raajya karte the। sooryavanshi dynasty ka raajya tha। baaki sab aatmaayen shantidham mein theen। vahaan 9 laakh gaaye jaate hain। tum bachchon ko aaj se 5 hazaar varsha pahle bahut saahookaar banaaya tha। itna dhan diya phir tumne woh kahaan ganvaaya? tum kitne saahookaar the। bhaarat kaun sadaave (kahlaaye)। bhaarat hi sabse oonch te oonch khanda hai। sabhi ka vaastav mein yeh teertha hai, kyonki patit-paavan baap ka janma sthaan hai। jo bhi dharma vaale hain, sabhi ki baap aakar sadgati karte hain। abhi raavan ka raajya saari srishti mein hai, sirf lanka mein nahin tha। sabhi mein 5 vikaar pravesh hain। jab sooryavanshi raajya tha to yeh vikaar hi nahin the। bhaarat viceless tha। abhi vicious hai। satayug mein daivi sampradaay thi। woh phir 84 janma bhog abhi aasuri sampradaay bane hain phir daivi sampradaay bante hain। bhaarat bahut saahookaar tha। ab gareeb bana hai isliye bheekh maang rahe hain।

baap kehte hain tum kitne saahookaar the। tumhaare jaisa sukh kisko bhi mil nahin sakta। tum saare vishwa ke maalik the, dharti aasmaan sab tumhaare the। baap smriti dilaate hain, bhaarat shivbaaba ka sthaapan kiya hua shivaalay tha। vahaan pavitrata thi, us nai duniya mein devi-devtaayen raajya karte the। bhaaratvaasi to yeh bhi nahin jaante ki raadhe-krishna ka aapas mein kya sambandh hai? donon alag-alag raajdhaani ke the phir svayanvar ke baad lakshmi-naaraayan bane hain। yeh gyaan koi manushya mein nahin hai। parampita paramatma hi gyaan ka saagar hai, vahi tumhein yeh roohaani gyaan dete hain, yeh spiritual knowledge sirf ek baap hi de sakte hain। ab baap kehte hain - aatma-abhimaani bano। mujh apne parampita paramatma shiv ko yaad karo। yaad se hi satopradhaan banenge। tum yahaan aate hi ho manushya se devta athva patit se paavan banne। abhi yeh hai raavan raajya। bhakti maarga mein raavan raajya shuru hota hai। raavan ne koi ek seeta ko nahin churaaya hai। tum sab bhakti karne vaale, raavan ke chambe mein ho। saari srishti 5 vikaaron roopi raavan ki kaid mein hai। sabhi shok vaatika mein duhkhi hain। baap aakar sabko liberate karte hain। ab baap phir se svarga bana rahe hain। aise nahin ki abhi jinko dhan bahut hai, woh svarga mein hain। nahin, abhi hai hi narka। sabhi patit hain isliye ganga mein jaakar snaan karte hain, samajhte hain ganga patit-paavni hai। parantu paavan to koi bante nahin hain। patit-paavan to baap ko hi kaha jaata hai, na ki nadiyon ko। yeh sab hai bhakti maarga। baap hi yeh baaten aakar samjhaate hain। ab tum yeh to jaante ho ek hai laukik baap, doosra phir prajaapita brahma hai alaukik baap aur woh paarlaukik baap। teen baap hain। shivbaaba, prajaapita brahma dvaara brahman dharma sthaapan karte hain। braahmanon ko devta banaane ke liye raajayog sikhlaate hain। ek hi baar baap aakar aatmaon ko raajayog sikhlaate hain। aatmaayen punarjanma leti hain। aatma hi kehti hai - main ek shareer chhod doosra leti hoon। baap kehte hain apne ko aatma samajh mujh baap ko yaad karo to tum paavan banenge। koi bhi dehdhaari ko yaad nahin karo। abhi yeh hai mrityulok ka ant। amarlok ki sthaapna ho rahi hai। baaki sab anek dharma khalaas ho jaayenge। satayug mein ek hi devta dharma tha। phir treta mein chandravanshi raam-seeta। tum bachchon ko saare chakra ki yaad dilaate hain। shantidham, sukhdhaam ki sthaapna karte hi hain baap। manushya, manushya ko sadgati de nahin sakte। woh sab hain bhakti maarga ke guru। bhakti maarga mein manushya anek prakaar ke chitra banaae pooja kar phir jaakar kehte hain doob ja, doob ja। bahut pooja karte, khilaate pilaate, ab khaate to brahman log hain। isko kaha jaata hai gudiyon ki pooja। kitni andhashraddha hai। ab unhon ko kaun samjhaaye।

baap kehte hain abhi tum ho eeshvareey santaan। tum abhi baap se raajayog seekh rahe ho। yeh raajdhaani sthaapan ho rahi hai। praja to bahut banni hai। koton mein koi raaja bante hain। satayug ko kaha jaata hai phoolon ka bageecha। abhi hai kaanton ka jangal। abhi raavan raajya badal raha hai। yeh vinaash hona hi hai। yeh knowledge abhi sirf tum braahmanon ko milti hai। lakshmi-naaraayan ko bhi yeh gyaan nahin rehta। yeh gyaan praayahlop ho jaata hai। bhakti maarga mein koi bhi baap ko jaante hi nahin। baap hi rachta hai। brahma-vishnu-shankar bhi rachna hain। paramatma sarvavyaapi kahne se sab baap ho jaate। varse ka hak nahin rehta। baap to aakar sabhi bachchon ko varsa dete hain। sarva ka sadgati daata ek hi baap hai। yeh bhi samjhaaya hai 84 janma woh lete hain jo pahle-pahle satayug mein aate hain। Christian log ke janma kitne honge? karke 40 janma honge। yeh hisaab nikaala jaata hai। ek bhagwan ko dhoondhane ke liye kitne dhakke khaate hain। abhi tum dhakke nahin khaayenge। tumko sirf ek baap ko yaad karna hai। yeh hai yaad ki yaatra। yeh hai patit-paavan god fatherly university। tumhaari aatma padhti hai। saadhu santa phir kah dete hain aatma nirlep hai। are aatma ko hi karmon anusaar doosra janma lena padta hai। aatma hi achha va bura kaam karti hai। is samay tumhaara karma vikarma hota hai। satayug mein karma akarma hote hain। vahaan vikarma hota nahin। woh hai punya aatmaon ki duniya। yeh sab samajhne aur samjhaane ki baaten hain। achha!

meethe-meethe sikeeldhe nambarvaar purushaartha anusaar kaante se phool banne vaale bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) kaante se phool ban phoolon ka bageecha (satayug) sthaapan karne ki seva karni hai। koi bhi bura karma nahin karna hai।

2) roohaani gyaan jo baap se suna hai vahi sabko sunaana hai। aatma-abhimaani banne ki mehnat karni hai। ek baap ko hi yaad karna hai, kisi dehdhaari ko nahin।

vardaan:- ninda-stuti, jay-paraajay mein samaan sthiti rakhne vaale baap samaan sampanna va sampoorn bhav

jab aatma ki sampoorn va sampanna sthiti ban jaati hai to ninda-stuti, jay-paraajay, sukh-duhkh sabhi mein samaanta rehti hai। duhkh mein bhi soorat va mastak par duhkh ki lahar ke bajaae sukh va harsha ki lahar dikhaai de, ninda sunte bhi anubhav ho ki yeh ninda nahin, sampoorn sthiti ko paripakva karne ke liye yeh mahima yogya shabd hain - aisi samaanta rahe tab kahenge baap samaan। jara bhi vritti mein yeh na aaye ki yeh dushman hai, gaali dene vaala hai aur yeh mahima karne vaala hai।

slogan:- nirantar yog abhyaas par attention do to first division mein number mil jaayega।

ye avyakt ishaare - ekta aur vishvaas ki visheshta dvaara saphalta sampanna bano

brahman parivaar ki visheshta hai - anek hote bhi ek। aapke sabhi sevaakendrasn ka vibration aisa ho jo sabko mahsoos ho ki ye anek nahin lekin ek hain। aapki ekta ka vibration saare vishwa mein ek dharma, ek raajya sthaapan karega। to vishesh attention dekar bhinnata ko mitaakar ekta kaayam karo।