Murli du jour du mardi 24 février 2026

24-02-2026 praatahmurli om shanti "baapdaada"' madhuban

“meethe bachche - tumne apni jeevan dor ek baap se baandhi hai, tumhaara connection ek se hai, ek se hi tod nibhaana hai''

prashn:- sangamayug par aatma apni dor paramatma ke saath jodti hai, iski rasma agyaan mein kis reeti se chalti aa rahi hai?

uttar:- shaadi ke samay stri ka pallav pati ke saath baandhate hain। stri samajhti hai jeevan bhar unka hi saathi hokar rehna hai। tumne to ab apna pallav baap ke saath joda hai। tum jaante ho hamaari paravrish aadhaakalpa ke liye baap dvaara hogi।

geet:- jeevan dor tumheen sang baandhi…

om shanti। dekho, geet mein kehte hain jeevan dor tum se baandhi। jaise koi kanya hai, woh apni jeevan ki dor pati ke saath baandhati hai। samajhti hai ki jeevan bhar unka hi saathi hokar rehna hai। unko hi paravrish karni hai। aise nahin ki kanya ko unki paravrish karni hai। nahin, jeevan tak unko paravrish karni hai। tum bachchon ne bhi jeevan dor baandhi hai। behad ka baap kaho, teacher kaho, guru kaho jo kaho..... yeh aatmaon ki jeevan ki dor paramatma ke saath baandhane ki hai। woh hai had ki sthool baat, yeh hai sookshm baat। kanya ke jeevan ki dor pati ke saath baandhi jaati hai। woh unke ghar jaati hai। dekho, har ek baat samajhne ki buddhi chaahiye। kaliyug mein hain sab aasuri mat ki baaten। tum jaante ho hamne jeevan ki dor ek se baandhi hai। tumhaara connection ek se hai। ek se hi tod nibhaana hai kyonki unse hamko bahut achha sukh milta hai। woh to hamko svarga ka maalik banaata hai। to aise baap ki shreemat par chalna chaahiye। yeh hai roohaani dor। rooh hi shreemat leti hai। aasuri mat lene se to neeche gire hain। ab roohaani baap ki shreemat par chalna chaahiye।

tum jaante ho ham apni aatma ki dor paramatma ke saath baandhate hain, to humein unse 21 janma sada sukh ka varsa milta hai। us alpakaal ki jeevan dor se to neeche girte aaye hain। yeh 21 janmon ke liye guarantee hai। tumhaari kamaai kitni jabardasta hai, ismen gaphlat nahin karni chaahiye। maaya gaphlat bahut karaati hai। in lakshmi-naaraayan ne zaroor koi se jeevan dor baandhi jisse 21 janma ka varsa mila। tum aatmaon ki paramatma se jeevan dor baandhi jaati hai, kalpa-kalpa। unki to ginti nahin। buddhi mein baithta hai - ham shivbaaba ke bane hain, unse jeevan dor baandhi hai। har ek baat baap baith samjhaate hain। tum jaante ho kalpa pahle bhi baandhi thi। ab shiv jayanti manaate hain parantu kiski manaate hain, pata nahin hai। shivbaaba jo patit-paavan hai woh zaroor sangam par hi aayega। yeh tum jaante ho, duniya nahin jaanti hai isliye gaaya hua hai koton mein kou। aadi sanaatan devi-devta dharma praayahlop ho gaya hai aur sab shaastra kahaaniyaan aadi hain। yeh dharma hai hi nahin to jaane kaise। abhi tum jeevan ki dor baandh rahe ho। aatmaon ki paramatma ke saath dor juti hui hai, ismen shareer ki koi baat nahin hai। bhal ghar mein baithe raho, buddhi se yaad karna hai। tum aatmaon ki jeevan dor baandhi hui hai। pallav baandhate hain na। woh sthool pallav, yeh hai aatmaon ka paramatma ke saath yog। bhaarat mein shiv jayanti bhi manaate hain parantu woh kab aaye the, yeh kisko bhi pata nahin hai। shreekrishna ki jayanti kab, raam ki jayanti kab hai, yeh nahin jaante। bachche tum trimoorti shiv jayanti akshar likhte ho parantu is samay teen moortiyaan to hain nahin। tum kahenge shivbaaba brahma dvaara srishti rachte hain to brahma saakaar mein zaroor chaahiye na। baaki vishnu aur shankar is samay kahaan hain, jo tum trimoorti kehte ho। yeh bahut samajhne ki baaten hain। trimoorti ka arth hi brahma-vishnu-shankar hai। brahma dvaara sthaapna woh to is samay hoti hai। vishnu dvaara satayug mein paalna hogi। vinaash ka kaarya ant mein hona hai। yeh aadi sanaatan devi-devta dharma bhaarat ka ek hi hai। woh to sab aate hain dharma sthaapan karne। har ek jaanta hai yeh dharma sthaapan kiya aur unka sanvat yeh hai। phalaane time, phalaana dharma sthaapan kiya। bhaarat ka kisko pata nahin hai। geeta jayanti, shiv jayanti kab hui, kisko pata nahin hai। shreekrishna aur raadhe ki aayu mein 2-3 varsha ka farka hoga। satayug mein zaroor pahle shreekrishna ne janma liya hoga phir raadhe ne। parantu satayug kab tha, yeh kisko pata nahin hai। tumko bhi samajhne mein bahut varsha lage hain, to do din mein koi kahaan tak samjhenge। baap to bahut sahaj bataate hain, woh hai behad ka baap, zaroor unse sabko varsa milna chaahiye na। O god father kah yaad karte hain। lakshmi-naaraayan ka mandir hai। yeh svarga mein raajya karte the parantu unko yeh varsa kisne diya? zaroor svarga ke rachayita ne diya hoga। parantu kab kaise diya, woh koi nahin jaante hain। tum bachche jaante ho jab satayug tha aur koi dharma nahin tha। satayug mein ham pavitra the, kaliyug mein ham patit hain। to sangam par gyaan diya hoga, satayug mein nahin। vahaan to praalabdha hai। zaroor agle janma mein gyaan liya hoga। tum bhi ab le rahe ho। tum jaante ho aadi sanaatan devi-devta dharma ki sthaapna baap hi karega। shreekrishna to satayug mein tha, usko yeh praalabdha kahaan se mili? lakshmi-naaraayan hi raadhe-krishna the, yeh koi nahin jaante hain। baap kehte hain jinhonne kalpa pahle samjha tha vahi samjhenge। yeh sapling lagta hai। most sweetest jhaad ka kalam lagta hai। tum jaante ho aaj se 5 hazaar varsha pahle bhi baap ne aakar manushya se devta banaaya tha। abhi tum transfer ho rahe ho। pahle brahman banna hai। baajoli khelte hain to choti zaroor aayegi। barobar ham abhi brahman bane hain। yagya mein to zaroor brahman chaahiye। yeh shiv va roodra ka yagya hai। roodra gyaan yagya hi kaha jaata hai। shreekrishna ne yagya nahin racha। is roodra gyaan yagya se vinaash jvaala prajjavlit hoti hai। yeh shivbaaba ka yagya patiton ko paavan banaane ke liye hai। roodra shivbaaba niraakaar hai, woh yagya kaise rache। jab tak manushya tan mein na aaye। manushya hi yagya rachte hain। sookshm va mool vatan mein yeh baaten nahin hoti। baap samjhaate hain yeh sangamayug hai। jab lakshmi-naaraayan ka raajya tha to satayug tha। ab phir tum yeh ban rahe ho। yeh jeevan ki dor aatmaon ki paramatma ke saath hai। yeh dor kyon baandhi hai? sada sukh ka varsa paane ke liye। tum jaante ho behad ke baap dvaara ham yeh lakshmi-naaraayan bante hain। baap ne samjhaaya hai tum so devi-devta dharma ke the। tumhaara raajya tha। peechhe tum punarjanma lete-lete kshatriy dharma mein aaye। sooryavanshi raajaai chali gai phir chandravanshi aaye। tumko maaloom hai ham yeh chakra kaise lagaate hain। itne-itne janma liye। bhagvaanuvaach - he bachche, tum apne janmon ko nahin jaante ho, main jaanta hoon। ab is samay is tan mein do moorti hain। brahma ki aatma aur shiv param aatma। is samay do moorti ikatthi hain - brahma aur shiv। shankar to kabhi part mein aata nahin। baaki vishnu satayug mein hai। abhi tum brahman so devta banenge। ham so ka arth vaastav mein yeh hai। unhonne kah diya hai - aatma so paramatma। paramatma so aatma। kitna farka hai। raavan ke aane se hi raavan ki mat shuru ho gai। satayug mein to yeh gyaan hi praayahlop ho jaayega। yeh sab hona drama mein noondh hai na tab to baap aakar sthaapna kare। abhi hai sangam। baap kehte hain main kalpa-kalpa, kalpa ke sangamayug par aakar tumko manushya se devta banaata hoon। gyaan yagya rachta hoon। baaki jo hain woh is yagya mein svaaha ho jaane hain। yeh vinaash jvaala is yagya se prajjavlit honi hai। patit duniya ka to vinaash hona hai। nahin to paavan duniya kaise ho। tum kehte bhi ho he patit-paavan aao to patit duniya paavan duniya ikatthi rahegi kya? patit duniya ka vinaash hoga, ismen to khush hona chaahiye। mahaabhaarat ki ladaai lagi thi, jisse svarga ke get khule। kehte hain yeh vahi mahaabhaarat ladaai hai। yeh to achha hai, patit duniya khatma ho jaayegi। pees ke liye maatha maarne ki darkaar kya hai। tumko jo ab teesra netra mila hai woh koi ko nahin hai। tum bachchon ko khush hona chaahiye - ham behad ke baap se phir se varsa le rahe hain। baba hamne anek baar aapse varsa liya hai। raavan ne phir shraap diya। yeh baaten yaad karna sahaj hai। baaki sab danta kathaayen hain। tumko itna saahookaar banaaya phir gareeb kyon banen? yeh sab drama mein noondh hai। gaaya bhi jaata hai gyaan, bhakti, vairaagya। bhakti se vairaagya tab ho jab gyaan mile। tumko gyaan mila tab bhakti se vairaagya hua। saari puraani duniya se vairaagya। yeh to kabristaan hai। 84 janma ka chakra lagaaya hai। abhi ghar chalna hai। mujhe yaad karo to mere paas chale aayenge। vikarma vinaash ho jaayenge aur koi upaay nahin। yog agni se paap bhasma honge। ganga snaan se nahin honge।

baba kehte hain maaya ne tumko phool (moorkha) bana diya hai, April phool kehte hain na। abhi main tumko lakshmi-naaraayan jaisa banaane aaya hoon। chitra to bahut achhe hain - aaj ham kya hain, kal ham kya honge? parantu maaya kam nahin। maaya dor baandhane nahin deti। kheenchaataan hoti hai। ham baba ko yaad karte hain phir pata nahin kya hota hai? bhool jaate hain। ismen mehnat hai isliye bhaarat ka praacheen yog mashhoor hai। unhon ko varsa kisne diya, yeh koi samajhte nahin hain। baap kehte hain bachchon, main tumko phir se varsa dene aaya hoon। yeh to baap ka kaam hai। is samay sab narkavaasi hain। tum khush ho rahe ho। yahaan koi aate hain samajhte hain to khushi hoti hai, barobar theek hai। 84 janmon ka hisaab hai। baap se varsa lena hai। baap jaante hain aadha-kalpa bhakti karke tum thak gaye ho। meethe bachche - baap tumhaari sab thak door karenge। ab bhakti andhiyaara maarga poora hota hai। kahaan yeh duhkhadhaam, kahaan woh sukhdhaam। main duhkhadhaam ko sukhdhaam banaane kalpa ke sangam par aata hoon। baap ka parichay dena hai। baap behad ka varsa dene vaala hai। ek ki hi mahima hai। shivbaaba nahin hota to tumko paavan kaun banaata। drama mein saari noondh hai। kalpa-kalpa tum mujhe pukaarte ho ki he patit-paavan aao। shiv ki jayanti hai। kehte hain brahma ne svarga ki sthaapna ki, phir shiv ne kya kiya jo shiv jayanti manaate hain। kuchh bhi samajhte nahin hain। tumhaari buddhi mein gyaan ekdam baith jaana chaahiye। dor ek ke saath baandhi hai to phir aur koi ke saath nahin baandho। nahin to gir padenge। paarlaukik baap most simple hain। koi thaath-baath nahin। woh baap to motor mein, aeroplane mein ghoomte hain। yeh behad ka baap kehte hain main patit duniya, patit shareer mein bachchon ki seva ke liye aaya hoon। tumne bulaaya hai he avinaashi surgeon aao, aakar humein injection lagaao। injection lag raha hai। baap kehte hain yog lagaao to tumhaare paap bhasma honge। baap hai hi 63 janmon ka duhkh harta। 21 janmon ka sukh karta। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) apne buddhi ki roohaani dor ek baap ke saath baandhani hai। ek ki hi shreemat par chalna hai।

2) ham most sweetest jhaad ka kalam laga rahe hain isliye pahle svayan ko bahut-bahut sweet banaana hai। yaad ki yaatra mein tatpar rah vikarma vinaash karne hain।

vardaan:- manan shakti dvaara har point ke anubhvi banne vaale sada shaktishaali maayaaprooph, vighnaprooph bhav

jaise shareer ki shakti ke liye paachan shakti va hajam karne ki shakti aavashyak hai aise aatma ko shaktishaali banaane ke liye manan shakti chaahiye। manan shakti dvaara anubhav swaroop ho jaana - yahi sabse bade se badi shakti hai। aise anubhvi kabhi dhokha nahin kha sakte, suni sunaai baaton mein vichlit nahin ho sakte। anubhvi sada sampanna rehte hain। woh sada shaktishaali, maayaaprooph, vighna proof ban jaate hain।

slogan:- khushi ka khajaana sada saath rahe to baaki sab khajaane svatah aa jaayenge।

ye avyakt ishaare - ekta aur vishvaas ki visheshta dvaara saphalta sampanna bano

saphalta sampanna banne ke liye - saadhaaran kaarya mein rehte hue bhi pharishte ki chaal aur haal ho। aise nahin kaho ki kya karen baat hi aisi thi, kaam hi aisa tha, circumstance aise the, samasya aisi thi isliye saadhaaranta aa gai। kisi samay bhi, kisi haalat mein bhi aapka alaukik swaroop har ek ko anubhav ho। jaisi baat vaisa apna swaroop nahin banaao। baaten aapko badal na den tab sabke sameep aayenge aur ekta ka sangathan majboot hoga।