Murli du jour du lundi 9 mars 2026

09-03-2026 praatahmurli om shanti "baapdaada"' madhuban

“meethe bachche - jaise baap ka part hai sarva ka kalyaan karna, aise baap samaan kalyaankaari bano, apna aur sarva ka kalyaan karo''

prashn:- bachchon ki kis ek visheshta ko dekh baapdaada bahut khush hote hain?

uttar:- gareeb bachche baba ke yagya mein 8 aana, ek roopaya bhej dete hain। kehte hain baba iske badle hamko mahal dena। baba kehte bachche, yeh ek roopaya bhi shivbaaba ke khajaane mein jama ho gaya। tumko 21 janmon ke liye mahal mil jaayenge। sudaama ka misaal hai na। bigar kaudi kharcha tum bachchon ko vishwa ki baadshaahi mil jaati hai। baba gareeb bachchon ki is visheshta par bahut khush hote hain।

geet:- tumhein paake hamne…

om shanti। meethe-meethe bachche samajhte hain ki baba se abhi behad ka varsa le rahe hain। bachche kehte hain ki baba aapki shreemat anusaar ham aapse phir se behad ka varsa pa rahe hain। nai baat nahin hai। bachchon ko knowledge mili hai। jaante hain sukhdhaam ka varsa ham kalpa-kalpa paate rehte hain। kalpa-kalpa 84 janma to lene padte hain। barobar ham behad ke baap dvaara 21 janmon ka varsa paate hain phir dheere-dheere ganvaate hain। baap ne samjhaaya hai yeh anaadi bana-banaaya khel hai। tum bachchon ko khaatiri hoti jaati hai। yeh bhi jaante ho drama mein sukh bahut hai। pichhaadi mein aakar raavan dvaara duhkh paate hain। abhi tum ajun thode ho, aage chalkar bahut vriddhi hoti jaayegi। manushya se devta bante hain। zaroor dil mein samjhenge ham kalpa-kalpa baap se varsa paate hain। jo jo aakar knowledge lenge woh samjhenge ab gyaan saagar baap dvaara srishti ke aadi-madhya-ant ki knowledge paai hai। baap hi gyaan ka saagar, patiton ko paavan banaane vaala hai arthaat mukti-jeevanmukti mein le jaane vaala hai। yeh bhi tum abhi jaante ho। guru to bahuton ne kiye hain na। aakhreen gurooon ko bhi chhod aakar knowledge lenge। tumko bhi abhi yeh knowledge mili hai। jaante ho isse pahle agyaani the। srishti ka chakra kaise phirta hai। shivbaaba, brahma, vishnu, shankar kaun hain, yeh kuchh bhi nahin jaante the। ab maaloom pada hai ham vishwa ke maalik the to tumhaari buddhi mein bada achha nasha chadha rehna chaahiye। baap ko aur srishti chakra ko yaad karte rehna chaahiye। alpha aur be। baap samjhaate hain inse pahle tum kuchh nahin jaante the na। na baap ko, na unki rachna ko jaante the। saari srishti ke manushya maatra na baap ko, na rachna ke aadi-madhya-ant ko jaante hain। abhi tum shoodra se brahman bane ho। baap sab bachchon se baat kar rahe hain। kitne dher bachche hain। centres kitne hain। abhi to centres khulenge। to baap samjhaate hain aage tum kuchh nahin jaante the। ab nambarvaar purushaartha anusaar jaan chuke ho। yeh bhi jaante ho abhi ham baap dvaara patit se paavan ban rahe hain। aur to pukaarte rehte hain, tum ho gupta। brahmaakumaar-kumaari kehte hain parantu samajhte nahin ki inhon ko padhaane vaala kaun hai? shaastron mein kahaan likha hua nahin hai। vahi geeta ke bhagwan shiv ne aakar bachchon ko raajayog sikhaaya hai। yeh tumhaari buddhi mein aata hai na। geeta bhi tumne padhi hogi। yeh bhi abhi samajhte ho - gyaan maarga bilkul alag hai। vidut mandali se jo shaastra aadi padhkar title lete hain woh sab bhakti maarga ke shaastra hain। yeh knowledge unhon mein hai nahin। yeh to baap hi aakar rachna ke aadi-madhya-ant ki knowledge dete hain। yeh to baap ne aakar tumhaari buddhi ka taala khola hai।

tum jaante ho aage ham kya the, ab kya bane hain! buddhi mein saara chakra aa gaya hai। shuru mein thode hi samajhte the। din-pratidin gyaan ka teesra netra achhi tarah khulta jaata hai। yeh bhi kisko pata nahin hai ki bhagwan kab aaya, vo kaun tha - jisne aakar geeta ka gyaan sunaaya। tum bachche abhi jaan gaye ho। buddhi mein saare chakra ka gyaan hai। kab se ham haar khaate hain aur kaise vaam maarga mein jaate hain, kaise seedhi utarte hain। yeh chitra mein kitna sahaj samjhaaya hua hai। 84 janmon ki seedhi hai। kaise utarte hain phir chadhte hain। patit-paavan kaun hai? patit kisne banaaya? yeh tum abhi jaante ho woh to sirf gaate rehte hain - patit-paavan। yeh thode hi samajhte hain ki raavan raajya kab se shuru hota hai? patit kab se bane? yeh knowledge hai hi aadi sanaatan devi-devta dharma vaalon ke liye। baap kehte hain mainne hi aadi sanaatan devi-devta dharma ki sthaapna ki thi। yeh world ki history-geography baap ke sivaae koi samjha na sake। tumhaare liye jaise ki kahaani hai। kaise raajya paate, kaise ganvaate hain। woh ham history-geography padhte hain। yeh hai behad ki baat। ham 84 ka chakra kaise lagaate hain, ham vishwa ke maalik the phir raavan ne raajya chheena, yeh knowledge baap ne di hai। manushya dashahra aadi tyohaar manaate hain parantu kuchh bhi knowledge nahin hai। jaise tumko yeh knowledge nahin thi, ab knowledge mil rahi hai to tum khushi mein rehte ho। knowledge khushi deti hai। behad ki knowledge buddhi mein hai। baap tumhaari jholi bhar rahe hain। kehte hain na - jholi bhar de। kisko kehte hain? saadhu-santa aadi ko nahin kehte। bholaanaath shiv ko kehte hain, usse hi bheekh maangate hain। tumhaara to ab khushi ka paaraavaar nahin। tumko bahut khushi honi chaahiye। buddhi mein kitni knowledge aa gai hai। behad baap se behad ka varsa milta hai। to ab apna aur doosron ka bhi kalyaan karna hai। sabka kalyaan karna hai। aage to ek-do ka akalyaan hi karte the kyonki aasuri mat thi। abhi tum shreemat par ho to apna bhi kalyaan karna hai।

tumhaari dil hoti hai yeh behad ki padhaai sab padhen, centres khulte jaaen। kehte hain baba pradarshani do, projector do ham centre kholen। hamko jo knowledge mili hai, jisse behad ki khushi ka paara chadha hai woh auron ko bhi anubhav karaayen। drama anusaar yeh bhi purushaartha chalta rehta hai। baap aaya hai bhaarat ko phir se svarga banaane। tum jaante ho ham aage narkavaasi the, ab svargavaasi ban rahe hain। yeh chakra tumhaari buddhi mein sadaiv phirta rehna chaahiye, jisse sadaiv tum khushi mein raho। auron ko samjhaane ka bhi nasha rahe। ham baap se knowledge le rahe hain। tumhaare aur behen-bhaai jo nahin jaante hain unhon ko bhi raasta bataana tumhaara dharma hai। jaise baap ka part hai sabka kalyaan karna vaise hamaara bhi part hai sabka kalyaankaari banen। baba ne kalyaankaari banaaya hai to apna bhi kalyaan karna hai auron ka bhi karna hai। baap kehte hain tum phalaane centre par jaao, jaakar service karo। ek jagah baith service nahin karni hai। jitna jo hoshiyaar hai utna unko shauk hota hai, jaakar ham service karen। phalaana naya centre khula hai, yeh to jaante hain kaun-kaun serviceable hain, kaun-kaun aagyaakaari, vaphaadaar, pharmaanbardaar hain। agyaankaal mein bhi kapoot bachchon par baap naaraaj hote hain। yeh to behad ka baap kehte hain main bilkul saadhaaran reeti samjhaata hoon, ismen darne ki koi baat nahin hai। yeh to jo karega so paayega। shraap ya naaraaj hone ki baat nahin hai। baap samjhaate hain kyon nahin achhi service kar apna bhi aur doosron ka bhi kalyaan karte। jitna jo bahuton ka kalyaan karte hain utna baba bhi khush hote hain। bageeche mein baba dekhenge yeh phool kitna achha hai। yeh saara bageecha hai। bageeche ko dekhne ke liye kehte hain - baba ham centre ka chakra lagaayen। kaise-kaise phool hain! kaise service kar rahe hain! jaane se maaloom padta hai। kaise khushi mein naachte rehte hain। baba ko bhi aakar kehte the baba phalaane ko hamne aise samjhaaya। aaj apne pati ko, bhaai ko le aai hoon। samjhaaya hai baba aaya hua hai, woh kaise heere jaisa jeevan banaate hain। sunte hain to chaahte hain ham bhi dekhen। to bachchon mein umang aata hai, le aate hain। world ki history-geography ko jaanna chaahiye। tum judge kar sakte ho bhaarat saare vishwa ka maalik tha। ab to kya haalat hai। satayug-treta mein kitna sukh tha। ab phir baba vishwa ka maalik bana rahe hain। yeh bhi jaante ho duniya mein pichhaadi mein bahut hangaama hona hai। ladaai koi band thode hi hoti hai। kahaan na kahaan lagti rehti hai। jahaan dekho vahaan jhagda hi hai। kitna ghamsaan laga hua hai। vilaayat mein kya-kya ho raha hai। samajhte nahin ki ham kya kar rahe hain। kitne toofaan lagte rehte hain। manushya bhi marte rehte hain। kitni duhkh ki duniya hai। tum bachche jaante ho - is duhkh ki duniya se bas ab gaye ki gaye। baba to dheeraj de rahe hain। yeh chhi-chhi duniya hai। thode roz mein ham vishwa par shanti se raajya karenge। ismen to khushi honi chaahiye na। centres khulte rehte hain। ab dekho centre khulte hain, baba likhte hain ab achhe-achhe bachche jaao। naam bhi likh deta hoon, jo dil par chadhe rehte hain। bahuton ka kalyaan hota hai। aise bahut likhte hain - baba ham to baandheli hain। achha centre khul jaae to bahut aakar varsa paayen। yeh bhi jaante ho ki yeh sab vinaash ho jaana hai to kyon nahin bahuton ke kalyaan arth kaam mein laga do। drama mein unhon ka aise part hai। har ek apna-apna part baja rahe hain। taras padta hai। doosron ko bhi bandhanmukta karne kuchh to madad karen। woh bhi varsa le leven। baap ko kitni phikraat rehti hai। sab kaam chita par jal mare hain। saara kabristaan ho pada hai। kehte bhi hai - allaah aakar kabristaan se jagaae sabko le jaate hain।

tum abhi samajhte ho raavan ne kaise haraaya hai। aage thode hi samajhte the। ham jauhri lakhapti hain, itne bachche hain, nasha to rehta hai na। abhi samajhte hain ham poore patit the। bhal puraani duniya mein kitne bhi lakhapti, karodapti hain parantu yeh sab hain kaudi misal। ab gaye ki gaye। maaya bhi kitni prabal hai। baap kehte hain bachche centre kholo, bahuton ka kalyaan ho jaayega। gareeb jaldi jaagte hain, dhanvaan jara mushkil jaagte hain। apni khushi mein hi masta rehte hain। maaya ne ekdam apne vash mein kar liya hai। samjhaane se samajhte bhi hain parantu chhode kaise? dar lagta hai ki inhon muaaphik sab chhodna padega। takdeer mein nahin hai to chal nahin sakte। jaise ki chhutkaara paana hi mushkil hai। us samay vairaagya aata hai - barobar chhi-chhi duniya hai। phir vahaan ki vahaan rahi। koton mein koi nikalte hain। baambe mein saikdon aate hain, koi-koi ko rang lagta hai। samajhte hain bhavishya ke liye kuchh bana leven। kaudi badle hamko heera mil jaayega। baap samjhaate hain na - bag baggage saara transfer karo svarga mein। vahaan 21 janma ke liye tumko raajya-bhaagya milega। koi-koi ek roopaya 8 aana bhi bhej dete hain। baap kehte hain ek roopaya bhi tumhaara shivbaaba ke khajaane mein jama hua। tumko 21 janmon ke liye mahal mil jaayenge। sudaama ka misaal hai na। aise-aise ko dekh baba ko bahut khushi hoti hai। bigar koi kharcha tum bachchon ko vishwa ki baadshaahi milti hai। ladaai aadi kuchh bhi nahin। woh to thode tukde ke liye bhi kitna ladte hain। tumko sirf kehte hain manamnaabhav। bas yahaan baithne ki darkaar nahin hai, chalte phirte baap ko aur varse ko yaad karo। khushi mein raho। khaan-paan bhi shuddh rakhna hai। tum jaante ho hamaari aatma kahaan tak pavitra bani hai, jo phir jaakar prince ka janma lenge। aage chal duniya ki haalat bilkul kharaab honi hai। khaane liye anaaj nahin milega to ghaas khaane lagenge। phir aise thode hi kahenge maakhan bigar ham rah nahin sakte hain। kuchh bhi nahin milega। abhi bhi kitni jagah par manushya ghaas khaakar guzar kar rahe hain। tum to bahut mauj mein baba ke ghar mein baithe ho। ghar mein baap pahle bachchon ko khilaate hain na। jamaana bahut kharaab hai। yahaan tum bahut sukhi baithe ho। sirf baap ko aur varse ko yaad karte raho। apna aur auron ka bhi kalyaan karna hai। aage chal aapehi aayenge, takdeer jaagegi। jagni to hai na। behad ki raajdhaani sthaapan honi hai। har ek kalpa pahle misal purushaartha karte hain। bachchon ko to bahut khushi mein rehna chaahiye। baapdaada ka chitra dekhte hi khushi mein romaanch khade ho jaane chaahiye। woh khushi ka paara sthaai rehna chaahiye। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) sada apaar khushi mein rahne ke liye behad ki knowledge buddhi mein rakhna hai। gyaan ratnon se apni jholi bharkar apna aur sarva ka kalyaan karna hai। knowledge mein bahut-bahut hoshiyaar banna hai।

2) bhavishya 21 janmon ke raajya bhaagya ka adhikaar lene ke liye apna bag baggage sab transfer kar dena hai। is chhi-chhi duniya se chhutkaara paane ki yukti rachni hai।

vardaan:- ek baap ke lav mein lavleen rah sada chadhti kala ka anubhav karne vaale saphaltaamoorta bhav

seva mein va svayan ki chadhti kala mein saphalta ka mukhya aadhaar hai - ek baap se atoot pyaar। baap ke sivaae aur kuchh dikhaai na de। sankalp mein bhi baba, bol mein bhi baba, karma mein bhi baap ka saath। aisi lavleen aatma ek shabd bhi bolti hai to uske sneh ke bol doosri aatma ko bhi sneh mein baandh dete hain। aisi lavleen aatma ka ek baba shabd hi jaadu ka kaam karta hai। woh roohaani jaadoogar ban jaati hai।

slogan:- yogi tu aatma woh hai jo antarmukhi ban light might roop mein sthit rehta hai।

ye avyakt ishaare - “nishchay ke foundation ko majboot kar sada nirbhay aur nishchint raho"

aapko jo bhi duty mili hui hai, usmein sada accurate raho, jo duty par accurate rehta hai usko sabhi eemaandaar va faithful ki nazar se dekhte hain। yahaan bhi jo accurate seva par rehte hain vahi baap ke faithful hain। ek hota hai baap mein poora faith, doosra hai baap ke saath seva mein bhi faithful। aise faithful nishchaybuddhi bachche sada vijayi aur nishchint rehte hain।