Murli du jour du jeudi 28 mai 2026

28-05-2026 praatahmurli om shanti "baapdaada"' madhuban

“meethe bachche - tum baap ke paas aaye ho apni oonch takdeer banaane, jitna shreemat par chalenge utna oonch takdeer banegi''

prashn:- bhakti ki kaun si aadat abhi tum bachchon mein nahin honi chaahiye?

uttar:- bhakti mein thoda duhkh hoga, beemaari hogi to kahenge he raam, he bhagwan, haay-haay karne ki aadat bhakti mein hoti। abhi tumhein kabhi bhi mukh se aise bol nahin nikaalne hain। tumhein to andar hi andar meethe baba ko pyaar se yaad karna hai।

geet:- takdeer jagaakar aai hoon…

om shanti। har ek manushya purushaartha karte hain - sukh aur shanti ki takdeer banaane। saadhu-santa, sannyaasi aadi kehte hain, hamko shanti chaahiye। duhkh haro, sukh do। samajhte hain - bhagwan hi manushya maatra ka duhkh-harta, sukh-karta hai। ab bhagwan ko manushya jaante to hain nahin। tum to kehte ho shivbaaba। brahma, vishnu, shankar ko baba nahin kahenge। woh to devta hai। bhagwan ko hi baba kahenge, woh hai niraakaar, jiski pooja karte hain। jaante hain shivbaaba sabhi ka hai। parantu yeh khyaal nahin aata ki ham baba kyon kehte hain। baba to ek laukik bhi hai - yeh phir kaun sa baap hai! yeh aatma kehti hai woh niraakaar baap hai। woh bhi niraakaar hai, ham aatma bhi niraakaar hain। saakaar baba hote hue bhi aatma us baap ko bhoolti nahin hai। god father hai, ham unke bachche hain। yahaan kehte hain parampita। angreji mein kehte hain - god father, supreme soul, sabse ooncha। laukik baap to shareer ka rachayita hai aur woh hai paarlaukik baap। baap hi baith bachchon ko samjhaate hain। baap ko yaad karte hain kyonki baap se varsa milta hai। tum baap ke paas aaye hi ho varsa lene। duhkh-harta, sukh-karta baap hi aakar sukh ka raasta bataate hain। phir vahaan duhkh ka naamnishaan nahin rehta। yahaan to bahut duhkh hai na, sab pukaarte hain। abhi to duniya mein bahut duhkh aane vaala hai। koi marte hain to kitna duhkhi hote hain। ‘haay bhagwan' kah rote hain। vahi kalyaankaari baap hai। gaate ho to zaroor duhkh hara hai, sukh diya hai na। baap aakar samjhaate hain - bachche tum kalpa-kalpa jab bahut duhkhi patit ho jaate ho tab pukaarte ho, he baba aao। main kalpa-kalpa aata hi hoon, sangam par। paavan duniya ke aadi aur patit duniya ke ant ko sangam kaha jaata hai। yeh ek hi sangamayug gaaya jaata hai। baap aate hain sabki jyot jagaane, duhkh harkar sukh dene। tum jaante ho ham paarlaukik baap ke paas aaye hain, jo baba inmen pravesh kar aaye hain। khud kehte hain main inmen pravesh kar inka naam brahma rakhta hoon। tum sab ho brahmaakumaar aur kumaari। tumko yeh nishchay hai ki ham brahma ki santaan bane hain - baap se sukh ka varsa lene। tum bachchon ko hi sukh tha, jab ki in lakshmi-naaraayan ka raajya tha। ab hai kaliyug, duhkhadhaam। uske baad phir satayug aayega। world ki history-geography repeat hoti hai na। satayug mein phir in lakshmi-naaraayan ka hi raajya chaahiye। yeh chakra phirta hi rehta hai। baba ne samjhaaya hai tum narkavaasi bane ho ab phir svargavaasi banna hai। tum devi-devtaaon ka bahut chhota jhaad tha। ab tumko smriti aai hai, hamne hi 84 janma liye hain। ham saare vishwa ke maalik the, phir punarjanma lete aaye hain। ab tumhaare 84 janmon ke ant ka bhi ant hai। duniya nai se puraani zaroor hogi। nai duniya paavan thi, ab puraani patit duniya hai। kitne duhkhi kangaal hain। bhaarat bahut saahookaar tha। pavitra grihastha aashram tha। pavitra pravritti maarga tha, sampoorn nirvikaari the, sarvagun sampanna, 16 kala sampoorn the। yeh baaten shaastron mein hain nahin। shaastra hain bhakti maarga ke liye। bhakti ki hi rasam-rivaaj unmein hai। baap se milne ka raasta shaastron se nahin mil sakta। samajhte bhi hain - bhagwan ko yahaan aana hai phir vahaan pahunchne ki to baat hi nahin। yagya, tap aadi karna - woh koi raasta nahin hai। bhagwan ko pukaarte hi hain aao, aakar raasta bataao। hamaari aatma tamopradhaan ban gai hai, jis kaaran ud nahin sakti arthaat baap ke paas ja nahin sakti। yoon to aatma ek shareer chhod doosra leti hai। kahaan ki kahaan chali jaati hai। America bhi ja sakti hai। koi ka kiske saath sambandh hoga to aatma jhat vahaan udegi, ek second mein। baaki udkar apne ghar vaapis jaaye, ye nahin ho sakta। patit vahaan ja nahi sakte, isliye pukaarte hain, he patit-paavan aao। baap jab aate hain to aakar samjhaate hain - main aata hi tab hoon, jab saari duniya patit hai। patit duniya mein ek bhi paavan nahin hai। samajhte hain ganga patit-paavni hai isliye jaate hain snaan karne। parantu paani se to koi paavan ho nahin sakta। puraani duniya hai hi patit, nai duniya hai paavan। abhi tum behad ke baap se varsa lene aaye ho। tumko punya aatma banna hai। tumhaari aatma satopradhaan thi so ab tamopradhaan hai। phir satopradhaan koi ganga snaan se nahin banegi। patiton ko paavan banaana - yeh to baap ka hi kaam hai। baaki woh paani ki nadi to sab jagah hai। baadlon se paani barasta hai, sabko milta hai। agar paani ki nadi paavan banaaye, phir to sabko paavan kar de। paavan banne ki yukti baap hi aakar bataate hain in dvaara। inki apni aatma hai। baap kehte hain - mujhe apna shareer nahin hai। kalpa-kalpa ismen hi aata hoon tumko samjhaane। tum apne janmon ko nahin jaante ho। kalpa ki aayu laakhon varsha kah dete hain।

baap kehte hain - yeh 84 janmon ka chakra hai। 5 hajaar varsha mein 84 laakh janma koi le na sake। to baap samjhaate hain - svarga mein tum 16 kala sampoorn the phir 2 kala kam hui phir dheere-dheere kala kam hoti jaati hai। nai duniya so phir puraani hoti hai। dvaapar kaliyug ko patit duniya kaha jaata hai। yeh baaten koi shaastron mein nahin hain। mujhe hi gyaan ka saagar kehte hain। main koi shaastra padhta hoon kya? main is srishti ke aadi-madhya-ant ko jaanta hoon। bhakti maarga vaalon ko yeh gyaan ho nahin sakta। woh sab hai bhakti ka gyaan। gaate bhi hain, ham paapi, neech hain। hamaare mein koi gun naaheen। aapehi taras paroi... inke oopar taras kiya gaya hai tab manushya se devta bane hain, inko kaha jaata hai oonch te oonch takdeer। school mein takdeer banaane jaate hain। koi judge, koi engineer bante hain। woh hai vikaari takdeer, yeh tumhaari banti hai eeshvar dvaara takdeer, isliye bulaate hain duhkh-harta sukh-karta, devta banaane ke liye sivaae baap ke koi padha na sake। baap aatmaon se baith baat kar rahe hain। aatma kehti hai - yeh mera shareer hai। shareer to nahin kahega, meri aatma। shareer ke andar aatma hai, woh kehti hai - yeh mera shareer hai। manushya kehte hain meri aatma ko na duhkhaao। aatma shareer mein na ho to bole bhi nahin। aatma kehti hai, main ek shareer chhod doosra leta hoon। hamne zaroor 84 janma bhoge hain, narkavaasi banen। ab phir tum svargavaasi banne ka purushaartha kar rahe ho। svargavaasi to baap hi banaayenge। svarga kaha hi jaata hai satayug ko। yeh jo kehte hain phalaana svargavaasi hua, yeh jhooth bolte hain। yeh to narka hai। koi mara to kehte svarga mein gaya phir narka mein kyon bulaate hain ki aakar khaana khaao। svarga mein to unko bahut vaibhav milte hain phir tum narka mein kyon bulaate ho? manushyon mein itni bhi samajh nahin hai। baap baith samjhaate hain - abhi yeh kaliyug khatma hona hai, inko aag lagegi। yeh sab khatma ho jaayenge। tum bachche jo baap se varsa lete ho, woh satayug mein aakar raajya karenge। in lakshmi-naaraayan ko yeh varsa kisne diya? baap ne। tum abhi baap dvaara laayak ban rahe ho। tum kahenge ham narkavaasi se svarga-vaasi ban rahe hain। baap kehte hain - main svargavaasi nahin banta hoon। main to paramdham mein rehta hoon। narkavaasi-svargavaasi tum bante ho। aatma ka nivaas sthaan shantidham hai phir tum sukhdhaam mein aate ho। yeh hai hi duhkhadhaam, inka ab vinaash hona hai। yeh kisko bhi pata nahin hai ki bhagwan brahma tan mein aakar raajayog sikhaate hain। woh samajhte hain ki shreekrishna aaya, shreekrishna ke tan mein bhi nahin kehte। krishna ko bhagwan kah na saken। woh to vishwa ka maalik hai। liberator sabka ek hai, woh hai supreme aatma, param-aatma। duniya mein koi bhi satsang nahin hota, jahaan aisa samjhen ki ham baap se svarga ka varsa lete hain। patit se paavan banaane vaala to ek hi baap hai। baap kehte hain - main tumhaara sachcha guru hoon, tumko paavan banaata hoon। baaki ganga ka paani paavan bana nahin sakta। yeh hai hi paapaatmaaon ki duniya। kuchh bhi karen seedhi neeche utarni hi hai। satopradhaan se tamopradhaan banna hi hai। tum bhakti nahin karte ho। haay-raam bhi nahin kahenge। woh to tumhaara baap hai, tumko padha rahe hain। he bhagwan aao, he raam bhi nahin kehna chaahiye। parantu bahuton mein yeh aadat padi hui hai to akshar nikal padte hain। tumko baap kehte hain - mujhe yaad karo to vikarma vinaash honge aur tum mere paas aa jaayenge। yaad ek ko hi karna hai।

baap kehte hain - yeh tumhaara antim janma hai। abhi varsa liya so liya, phir kabhi nahin pa sakenge। baap ne samjhaaya hai, yeh jo apne ko hindu kahlaate hain, woh asul devi-devta dharma vaale hain। Christian dharma vaale kabhi naam nahin badalte hain। bhal tamopradhaan hain to bhi Christian dharma mein hi hain। tum devi-devtaaye ho parantu patit hone ke kaaran apne ko hindu kah dete ho, apne ko devta nahin kah sakte। yeh bhool gaye hain ki ham asul devi-devta the। apne ko devta dharma vaala koi nahin kahlaate hain kyonki vikaari hain। yeh hai deh-abhimaan। bachchon ko bahut achhi tarah samjhaaya jaata hai। yahaan koi saadhu-santa aadi nahin hain। ham vyaapaari hain, phalaana hain - yeh sab hai deh-abhimaan। abhi tumko dehi-abhimaani banna hai। dehi-abhimaani banne mein hi mehnat hai। tumko baba se varsa lena hai to baap ko yaad karna hai। kam kaar de, dil yaar de...। tum aashik ho, ek maashook ke। sabka sadgati daata ek maashook hai। woh aate hi tab hain, jab sabko sadgati milti hai, svarga ki sthaapna hoti hai, duhkh ka naam nishaan gum ho jaata hai। abhi tum bachche yahaan aaye ho - behad ke baap se svarga ka, 21 janmon ke liye sada sukh ka varsa paane। aur koi bhi manushya-maatra kisi ko svarga ka maalik bana nahin sakte। shivbaaba bhaarat mein hi aakar bhaarat ko svarga banaate hain। shiv jayanti bhi manaate hain parantu bhool gaye hain ki baba se hamko svarga ka varsa milta hai। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) padhaai ke aadhaar par apni takdeer oonch banaani hai, manushya se devta banna hai। paavan bankar vaapis ghar jaana hai phir nai duniya mein aana hai।

2) haathon se kaam karte - ek baap ki yaad mein rehna hai। koi bhi ulti baat na sunni hai, na sunaani hai।

vardaan:- sada apne pavitra swaroop mein sthit rah gun roopi moti chugne vaale holeehans bhav

aap holi hason ka swaroop hai pavitra aur kartavya hai sadaiv gunon roopi moti chugna। avgun roopi kankad kabhi bhi buddhi mein sveekaar na ho। lekin is kartavya ko paalan karne ke liye sadaiv ek aagya yaad rahe ki na bura sochna hai, na bura sunna hai, na bura dekhna hai, na bura bolna hai.... jo is aagya ko sada smriti mein rakhte hain woh sada saagar ke kinaare par rehte hain। hanson ka thikaana hai hi saagar।

slogan:- chalte-phirte pharishta swaroop mein rehna - yahi brahma baap ki dil-pasanda gift hai।

ye avyakt ishaare - sada achal, adol, ekras sthiti ka anubhav karo

sada achal-adol rahne ke liye sva-unnati aur seva ki unnati mein sada busy raho, sarva ke prati shubh bhaavna rakho। sambandh ke aadhaar par part nahin, seva ke sambandh se part bajaao। doosra - vinaashi saadhnon ko sahaara va aadhaar nahin banaao। yeh sab nimitta maatra hain, seva ke prati hain। seva arth kaarya mein lagaaya aur nyaare। saadhnon ki aakarshan mein man aakarshit nahin hona chaahiye।