Murli du jour du lundi 5 octobre 2026

05-10-2026 praatahmurli om shanti "baapdaada"' madhuban

“meethe bachche - tum jiski aaj tak mahima gaate the, vahi ab tumhaare saamne haazir hai, isliye sadaiv khushi mein naachte raho, kisi baat ka gam na ho''

prashn:- purushaarthi bachche apne dil ke andar kaun si jaanch avashya karenge?

uttar:- abhi tak mujh aatma mein koi chhota-mota kaanta to nahin hai? kaam ka kaanta sabse teekha hai। krodh ka kaanta bhi bahut kharaab hai। devtaayen krodhi nahin hote isliye meethe bachche koi kaanta ho to nikaal do। apne aapko ghaate mein mat daalo।

geet:- tum maat pita…

om shanti। meethe-meethe roohaani bachchon ne apne baap ki mahima suni। woh gaate rehte hain, yahaan tum practical mein us baba ka varsa le rahe ho। tum jaante ho baba hamaare dvaara bhaarat ko svarga bana rahe hain। jinke dvaara bana rahe hain, zaroor vahi sukhdhaam ka maalik banenge। bachchon ko to bahut khushi rahni chaahiye। baba ki mahima aparmaapaar hai, usse ham varsa pa rahe hain। abhi tum bachchon par balki saari duniya par brahaspati ki dasha hai। abhi yeh tum brahman hi jaante ho। bhaarat khaas aur duniya aam, sab par brahaspati ki dasha baithi hai kyonki ab 16 kala sampoorn bante ho। is samay to koi kala nahin hai। bachchon ko bahut khushi rahni chaahiye। aise nahin yahaan khushi hai, baahar jaane se gum ho jaae। jiski mahima gaate rehte ho woh ab tumhaare paas haazir hai। baba samjhaate hain ki 5 hajaar varsha pahle bhi raajaai dekar gaya tha। abhi tum dekhenge aahiste-aahiste sab pukaarte rahenge। tumhaare bhi slogan nikalte rahenge। jaise koi kehte hain ek dharma ho, ek raajaai ho, ek bhaasha ho। ve bhi aatmaayen kehti hain na। aatma jaanti hai barobar bhaarat mein ek raajdhaani devi-devtaaon ki thi। yeh khushbu phailti jaayegi। tum khushbu daalte jaate ho। drama plan anusaar ladaai ke bhi aasaar saamne khade hain। yeh koi nai baat nahin hai। bhaarat ko 16 kala sampoorn zaroor banna hai। tum jaante ho ham is yogbal se 16 kala sampoorn ban rahe hain। kehte hain na - de daan to chhoote grahan। baap bhi kehte hain vikaaron ka, avgunon ka daan do। yeh raavan raajya hai na। baap aakar inse chhudaate hain, ismen bhi kaam vikaar bada bhaari avgun hai। tum deh-abhimaani ban pade ho। ab dehi-abhimaani banna pade। shareer ka bhi bhaan chhodna pade। in baaton ko tum bachche hi samajhte ho, duniya nahin jaanti। bhaarat jo 16 kala sampoorn tha, sampoorn devtaaon ka raajya tha। in lakshmi-naaraayan ki raajdhaani thi। bhaarat svarga tha। ab 5 vikaaron ka grahan laga hua hai, isliye baap kehte hain de daan to chhoote grahan। yeh kaam vikaar hi giraane vaala hai isliye baap kehte hain yeh daan do to 16 kala sampanna ban jaayenge। nahin denge to nahin banenge। aatmaon ko apna-apna part mila hua hai na। yeh bhi tumhaari buddhi mein hai। tumhaari aatma mein kitna part hai। tum vishwa ka raajya bhaagya lete ho। yeh behad ka drama hai, athaah actors hain। ismen first class actors hain yeh lakshmi-naaraayan, unhon ka number one part hai। vishnu so brahma sarasvati phir brahma sarasvati so vishnu bante hain। yeh 84 janmon ka chakra kaise lagaate hain, woh saara buddhi mein aa jaata hai। vyaapaari log chaupda rakhte hain to us par svaastika nikaalte hain। ganesh ki pooja karte hain। yeh hai behad ka chaupda। svaastika mein 4 bhaag hote hain। jaise puri mein chaaval ka haanda rakhte hain। woh pak jaata hai to 4 bhaag ho jaate hain। vahaan chaaval ka hi bhog lagta hai। abhi tum bachchon ko kaun padha rahe hain? most beloved baap aakar tumhaara servant bana hai, tumhaari seva karte hain। manushya to kah dete aatma nirlep hai। abhi tum jaante ho - aatma mein 84 janmon ka part hai hi। unko phir nirlep kehna kitna raat-din ka pharka ho jaata hai। jab yeh koi achhi reeti maas dedh baith samjhenge tab points buddhi mein baithengi। din-pratidin points bahut nikalti rehti hain। yeh hai jaise kastoori। shaastron mein to kuchh bhi saar nahin hai। baba kehte hain - woh ab buddhi se nikaal do। gyaan saagar ek main hi hoon। jab poora nishchay baithta hai to samajhte hain - barobar yeh sab bhaktimaarga ke liye hai। parampita paramatma hi aakar durgati se sadgati karte hain। seedhi par bhi clear dikhaana hai। bhakti maarga shuru hota hai to raavan raajya shuru hota hai। abhi geeta episode repeat ho raha hai। baap kehte hain - main kalpa-kalpa, kalpa ke sangamayuge aata hoon। unhonne phir kachchha machchha avtaar kah diya hai। 24 avtaar kah dete hain। baba kehte hain - ab tum par brahaspati ki dasha hai। mainne tumko svarga ka maalik banaaya। ab raavan ne raahu ki dasha bitha di hai। ab phir baap aaye hain svarga ka maalik banaane। to apne ko ghaata nahin daalna chaahiye। vyaapaari log apna khaata hamesha theek rakhte hain। ghaata daalne vaale ko anaadi kaha jaata hai। ab to yeh sabse bada vyaapaari hai। koi virla vyaapaari vyaapaar kare। yahi avinaashi vyaapaar hai aur vyaapaar to sab mitti mein mil jaane vaale hain। abhi tumhaara sachcha vyaapaar ho raha hai। baap hai behad ka saudaagar, ratnaagar... aur gyaan ka saagar kaha jaata hai। pradarshani mein dekho kitne aate hain। centre mein koi mushkil aayenge। bhaarat to bahut lamba chauda hai na। sab jagah tumko jaana hai। paani ki gangaayen to saare bhaarat mein nahin hain। yeh bhi tumko samjhaana pade ki paani ki ganga koi patit-paavni nahin hai। tum gyaan gangaaon ko jaana padega। chaaron taraph pradarshani mele karte rahenge। din-pratidin chitra bhi achhe-achhe bante rahenge। shobhnik chitra aise hon jo dekhne se hi khushi aa jaae ki yeh to theek samjhaate hain। ab lakshmi-naaraayan ki raajdhaani sthaapan ho rahi hai। abhi brahman dharma ki sthaapna ho rahi hai। yeh brahman hi devi-devta bante hain।

tum abhi purushaartha kar rahe ho to dil mein apne se poochhte raho ki hamaare mein koi chhota-mota kaanta to nahin hai! kaam ka kaanta to nahin hai! krodh ka chhota sa kaanta woh bhi bahut kharaab hai। devtaayen krodhi nahin hote hain। dikhaate hain shankar ki aankh khulne se vinaash ho jaata hai। yeh bhi ek kalank lagaaya hai। vinaash to hona hi hai। sookshm vatan mein shankar ko koi sarpa aadi thode hi ho sakte hain। vahaan dharti hi kahaan jo sarpa aadi niklen। aasmaan mein thode hi sarpa ghoomenge। sookshm vatan aur mool vatan mein baag bageeche sarpa aadi kuchh bhi nahin hote। yeh sab yahaan hote hain। svarga bhi yahaan hi hota hai। is samay manushya kaante misal hain, isliye inko kaanton ka jangal kaha jaata hai। satayug hai phoolon ka bageecha। tum dekhte ho - baba kaise bageecha banaate hain। most beautiful banaate hain। sabko haseen banaate hain। khud to ever haseen hai। sab sajniyon ko arthaat bachchon ko haseen banaate hain। raavan ne bilkul kaala bana diya hai। ab tum bachchon ko khushi honi chaahiye - hamaare oopar brahaspati ki dasha baithi hai। aadha samay duhkh, aadha samay sukh ho, isse phaayda hi kya? nahin, 3 hissa sukh hai। yeh drama bana hua hai। bahut log poochhte hain ki drama aisa kyon banaaya hai? are yeh to anaadi hai na। kyon bana, yeh prashn uth nahin sakta। yeh anaadi avinaashi bana banaaya drama hai। bani banaai ban rahi... kisko moksha nahin mil sakta। yeh to anaadi srishti chali aati hai, chalti rahegi। pralay hoti nahin। baba nai duniya banaate hain, parantu ismen gunjaais kitni hai। jab manushya patit duhkhi hote hain tab hi bulaate hain। baba aakar sabki kaaya kalpavriksha samaan banaate hain। tumhaari aatma pavitra ban jaati hai to shareer bhi pavitra milega। to baap tumhaari kaaya kalpatru banaate hain। aadhaakalpa kab tumhaari akaale mrityu nahin hogi। tum kaal par jeet paate ho। tum bachchon ko bahut purushaartha karna chaahiye। jitna oonch pad paayen utna achha hai। purushaartha to har ek jaasti kamaai ke liye karte hain। lakdi vaale bhi kahenge ham jaasti lakdi le jaayen to jaasti kamaai hogi। koi to thagi se bhi kamaai karte hain। vahaan aise koi duhkh ki baat nahin hoti। ab tum baap se kitna varsa lete ho। apni jaanch karni chaahiye ki ham svarga mein jaane laayak hain? (naarad ka misaal) shaastron mein to bahut baaten likh di hain। yeh teertha yaatra aadi sab chhodo। geet bhi hai na - chaaron taraph lagaaye phere phir bhi.... ab baap tumko kitni achhi yaatra sikhlaate hain, ismen koi takleeph nahin। sirf baap kehte hain maamekam yaad karo to vikarma vinaash honge। bahut achhi yukti tumko sunaata hoon। bachche sunte ho! yeh mera loan liya hua rath hai। is baap ko kitni khushi hoti hai। hamne baap ko apna shareer loan mein diya hai। baap hamko vishwa ka maalik banaate hain। naam bhi hai bhaageerath। tum jaante ho bombs aadi taiyaar ho rahe hain। aag lagni hai। raavan ka but bhi banaate hain, maarne liye। yahaan maarne aadi ki to baat nahin। kahaan maarne aadi ki baat, kahaan yeh raavanpuri khatma ho rahi hai। tum bachche raampuri mein chalne ke liye purushaartha kar rahe ho। to poora purushaartha karna hai, kaanta nahin banna hai।

tum brahman braahmaniyaan ho। sabka aadhaar murli par hai। murli tumko nahin milegi to tum kya karenge। aise nahin ki sirf ek braahmani ko hi murli sunaani hai। koi bhi murli padhkar suna sakte hain। bolna chaahiye - aaj tum sunaao। ab to samjhaane ke liye chitra bhi achhe bane hain। yeh mukhya chitra to apni dukaan mein rakh bahuton ka kalyaan karo। us saude ke saath-saath yeh sauda bhi karo। yeh baba ke avinaashi gyaan ratnon ka dukaan hai। baba koi mana nahin karte hain ki makaan aadi nahin banaao। bhal banaao। paisa to mitti mein mil jaayega। isse kyon nahin makaan banaakar aaraam se raho। paise kaam mein lagaane chaahiye। makaan bhi banaao, khaane ke liye bhi rakho, daan-punya bhi karo। kashmeer ka raaja mara to apni private property jo thi woh sab aarya samaajiyon ko daan mein de gaya। apne dharma ke liye karte hain na। yahaan to woh koi baat nahin। sab bachche hain, daan aadi ki baat nahin। woh hai had ka daan। main to tumko vishwa ki baadshaahi deta hoon। drama anusaar bhaaratvaasi hi raajya bhaagya lenge। bhakti maarga mein vyaapaari log kuchh na kuchh dharmaau zaroor nikaalte hain। uska bhi doosre janma mein alpakaal ke liye milta hai। ab to main direct aaya hoon to tum is kaarya mein lagaao। mujhe to kuchh nahin chaahiye। shivbaaba ko apne liye makaan banaana hai kya! yeh sab braahmanon ka hai। gareeb, saahookaar sab ikatthe rehte hain। to yeh sab bachchon ka hi hai। dekha jaata hai ghar mein yeh kaise aaraam se rehte hain, to woh prabandha dena pade isliye kehte hain sabki khaatiri karo। koi cheez na ho to mil sakti hai। baap ko to bachchon par lav rehta hai। itna lav aur koi ka rah nahin sakta। bachchon ko kitna samjhaate hain - purushaartha karo auron ke liye bhi yukti racho। ismen chaahiye sirf 3 pair prithvi, jismen bachchiyaan samjhaati rahen। koi bade aadmi ka hall ho, bolo ham zaroori chitra rakh dete hain। ek do ghanta subah shaam class karke chale jaayenge। kharcha sab hamaara, naam tumhaara hoga। bahut aakar kaudi se heere jaisa banenge। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) avinaashi baap se sachcha-sachcha avinaashi vyaapaar karna hai। us saude ke saath is saude mein bhi samay dena hai। gyaan ganga ban sabko paavan banaana hai।

2) brahman jeevan ka aadhaar murli hai jo pyaar se sunni aur sunaani hai। andar koi bhi kaanta ho to use nikaal dena hai। avgunon ka daan karna hai।

vardaan:- merciful ki bhaavna dvaara apkaari par bhi upkaar karne vaale shubhchintak bhav

kaisi bhi koi aatma, chaahe satoguni, chaahe tamoguni samparka mein aaye lekin sabhi ke prati shubhchintak arthaat apkaari par bhi upkaar karne vaale। kabhi kisi aatma ke prati ghrina drishti na ho kyonki jaante ho yeh agyaan ke vasheebhoot hai, besmajh hai। unke oopar raham va sneh aaye, ghrina nahin। shubhchintak aatma aisa nahin sochegi ki isne aisa kyon kiya lekin is aatma ka kalyaan kaise ho - yahi hai shubhchintak stage।

slogan:- tapasya ke bal se asambhav ko sambhav kar saphalta moorta bano।

ye avyakt ishaare - paropkaar ki bhaavna se sampanna ban apkaari par bhi upkaar karo

woh trikaaldarshi hone ke kaaran aatma ke sampoorn sahayog ko saamne rakhte hue, har aatma ki kamzori ko parakhte hue uski kamzori ko svayan mein dhaaran nahin karega, varnan nahin karega lekin anya aatmaon ki kamzori ka kaanta kalyaankaari swaroop se samaapta kar dega। kaante ke bajaae - kaante ko bhi phool bana dega।