Murli de Mamma - 201

> >

mama murli madhuban

001.Raju Bhai - Mama Ka Veshashta - 24-06-05

aaj 24 joon hamaari meethi jagdamba maa ka smriti divas hai । ham sabne kal mama ka sandesh bhi suna, yog bhi kiya lekin saare bhaarat mein sabhi seva kendron par aaj ka vishesh din mama ki smriti mein yog ki bhattiyaan aur kuchh maataaon ke liye kaaryakram chal rahe hain। kuchh sthaanon se meri baat hui phone par to kahin programme mein maataaon ke group bulaae hue the, kahin yog ki bhattiyaan chal rahi thi। meethi mama ki visheshtaaen ham daadiyon ke dvaara sunte rehte hain। jinhonne saakaar mein paalna li hai unke saamne to mama ki moorti, woh chehra, woh paalna ke sab drishya aa hi jaate hain lekin ham sabne unki visheshtaaon ko unke mahaavaakyon ko suna hai, jaante hain। yahi chhota hall jismen donon hi maat-pita jab saamne baithkar murli chalaate the। us samay ki murliya bhi jo abhi kabhi-kabhi revise hoti hain, kya mama ki visheshtaaen thi to kal sab chaaron taraph se phone karne lage ki mama ki visheshtaaen is baar madhuban se nahin aai hai jo har saal bheji jaati hain । mama ki murli to sab jagah pahunch hi gai hai lekin visheshtaaen nahin bheji thi। kal mama ki ikattees visheshtaaen sabke paas bheji hain। aap sunna chaahenge? achha। to ham sabhi ko advance party ke samaachaaron ka vishesh dhyaan rehta hai kya samaachaar hai unke paas kyonki sabhi braahmanon ki buddhi mein hai ki ab woh advance mein gai hui aatmaaen jo shreekrishna ko janma dengi, jo devi devtaaon ko is dharti par utaarengi। kaun utaarenge? jo advance mein brahman aatmaaen, yogi aatmaaen gai hain । baba ne ham sab ko bahut hi spashta baaten bataai hain kuchh chhipaaya nahin hai। kaise yeh yogi aatmaon ke gharon mein first aatmaaen satayug ki avatrit hongi, janma lengi aur phir yeh vaapas jaaengi, janma de karke vaapas ghar jaaengi। to har ek brahman ke andar ye rehta hai ki advance party ka kya part chal raha hai to is baar ye gupta reeti se ishaara mil gaya। vo sabhi ever ready hain apne aap ko pratyaksha karne ke liye, tum sirf ever ready ho jaao। apne aap ko sampanna aur sampoorn bana lo to advance party abhi stage par pratyaksha ho jaaegi aur jay jaykaar ka jo drishya hai, ek aur haahaakaar hoga duniya ke andar aur doosri aur jay-jaykaar hoga। ham dekh rahe hain, sun rahe hain sabhi samaachaar, kaise abhi chaaron or baba ki behad ki sevaaen ho rahi hain aur baba kehte hain abhi kitna bhi brake lagaao lekin ek baar to is madhuban dharni par har ek aaega hi । ye teertha sthaan hai, yeh prasiddha hona hi hai to chaaron taraph se log bhi bhaag bhaag karke aa rahe hain,aate rahenge । advance party ki aatmaaen bhi abhi apni full ej mein aa rahi hain । deedi ko bhi kitne saal ho gae? 83 se aaj kitna hua hai 2005, satrah paanch kitna ho gaya, baais saal ki ho gai deedi। julaai mein avyakt hui thi । to yeh advance party ki aatmaaen jo yogi aatmaaen jo gai hai vo nai duniya ki pavitra aatmaon ko avatrit karengi, bulaaengi, aavaahan karengi। mama ki jo saakaar mein visheshtaaen thi jo daadiyon ne apne mukhaarbindu se varnan ki hain samay prati samay, kal bhi hamaare paas inglish mein landan se email aaya hai jismen daadi jaanki ne poora hi class mama ki visheshtaaon par karaaya hai। mama hi sarasvati thi vidya ki devi, itna spashta gyaan mama ki murliyon se ham sabko milta hai । baba ki ek ek baat ko mama ne bahut spashta kiya hai to sarasvati ka part, durga ka part, kaali ka part aur sheetla ka part yeh chaaron part kaise mama ne bajaae us par daadi jaanki ne kal landan mein class karaaya। inglish mein aaya hai abhi uski translation ho rahi hai । is prakaar se daadiyaan samay prati samay ham sabko in aatmaon ki visheshtaaen suna karke jaise unhonne kiya ham bhi vaise karen aur vaise banen to kya kya mama ne kiya। sunte to ham sabhi hain ki mama ki teen mukhya visheshtaaen, ek to kumaari hote bhi maa ke roop mein paalna dene ke liye full roohaaniyat mein rahi, kabhi bhi saadhaaranta nahin । main kumaari hoon ye smriti nahin lekin main jagat maa hoon aur baba ne mujhe maa ki seat di hai isliye maa ke roop mein bachchon ko dekha aur usi drishti se, usi svamaan mein, usi roohaaniyat mein rahi isliye koi bhi aatma mama ke saamne aai to aate hi, drishti padte hi vo parivartan ho gai, uski vichaardhaaraaen change ho gai । kisi bhi ej ka ho, naya ho, puraana ho, virodhi ho, bahut si aatmaaen us samay virodh karti theen, bahut hangaamen karti theen lekin mama ki drishti padte hi vo shant sheetal ho jaate the। kai misaal, kai udaahran apne bhaai bahnon ne mama ke sunaaen hain । to ek to tha nirantar roohaaniyat ki sthiti mein rehna । aaj bhi ek maata suna rahi thi jo mama se pali hui hai ki kabhi bhi sangathan mein mama ne kabhi hansi mein jor se baat nahin ki । chaar-paanch saheliyaan milkar ke aapas mein baithe, hansi majaak karen lekin kabhi bhi aavaaj mein vo nahin aai to sabse badi visheshta ki mama sabse adhik gambheer thi, chup rahne ka ek bahut achha abhyaas tha। kuchh bhi baat ho to andar hi andar chup ho karke sama lena to ek visheshta yeh thi। kyon sunte hain ham sabhi? hamko baba aur mama ka direction mila hua hai si father si mother, keval maat pita ko dekhna aur unhein hi follow karna hai, brother aur sister ko nahin isliye unki jo visheshtaaen hain woh hamaare jeevan mein aaj hain aur woh visheshtaaen kaise unhonne practical mein karke dikhaai hai, unke jeevan mein rahi hain to ek to main suna raha tha ki bahut achhi andar ki dhaarna roohaaniyat ki aur roohaaniyat ke aadhaar se gambheerta aur doosra sada ooncha svamaan, bahut ooncha svamaan rakha । shiv ki shakti hoon, abhi raadhe aur shri lakshmi banne vaali hoon। baba ne kaha ki tum hi raadha so lakshmi banne vaali ho bas usi svamaan mein sthit ho gai, us daataapan ke swaroop mein sthit ho gai। vidya ki devi sarasvati ban karke part bajaaya aur bhavishya swaroop lakshmi pad sada yaad rakha main hi shreelakshmi hoon aur woh lakshan apne aap apne jeevan mein aate gae itna ooncha svamaan rakha aur saath-saath ek baba doosra na koi andar se bilkul paath pakka, baba ne kaha, jo baba kahe, bas haan ji । kaisi bhi baat to chaahe jaisi paristhiti ho kabhi bhi prashn nahin hua aisa kyon, aisa kaise ya aisa nahin ho sakta hai। kaun kah raha hai bahut oonchi nashe se smriti se ki kahne vaala kaun hai, iske tan mein kaun baitha hua hai, kiske ye mahaavaakya hain isliye kabhi prashn nahin uthaaya aisa kyon, aise nahin ho sakta hai, kaise ho sakta hai । baba ne kaha aur mama ne haan ji kiya isliye number one chali gai, aage chali gaeen to main aap ko padhkar iktees visheshtaaain suna deta hoon kyonki aap sochenge ye to class karaane lage isliye kaun si visheshtaaen mama ki sab centres par bheji gai hain aap sabhi bhi suno। mama ka laukik naam raadhe tha parantu jaisa naam tha vaise raadhe। raadhe ki kya visheshta bhakti maarga mein gaai hui hai ? murli ki mastaani, murli ke peechhe deevaani vaise raadhe murli ki mastaani thi। baba ka ek-ek shabd bade pyaar se sunti samaati aur unhein bahut achhi tarah se spashta karke sabko sunaati isliye sarasvati ke haath mein gyaan ki sitaar dikhaai gai hai, gyaan veena, gyaan ke sitaar bajaate hue photo mein sarasvati ko dikhaaya hua hai । doosra, kabhi kuchh bhi ho jaae, drama ka paath mama ko bahut pakka tha। saakshi ho karke dekhne ki itni achhi aadat thi jo koi bhi drishya ko dekhkar kabhi halchal mein nahin aai, sada ekras muskuraata hua chehra rehta tha। drama ki dhaal agar majboot hai, pakka hai to kaisi bhi halchal ki paristhitiyaan aa jaae chaahe kitna saamna karna pada, kitna virodh hua baba to maataaon ko aage kar deta tha। bahnon ko sab saamna karna padta tha। court mein jaana hai, vahaan par sab prakaar ki baaten sunni hai, uttar dene hain to mama ka hi sabse aage part raha na । suna hoga itihaas mein kaise mama gai court ke andar, kaise vakeelon se bahas ki judge ke saamne aur vijayi ban ke aai। to har baat mein, kaisi bhi paristhiti aai, beggary part mein bhi mama sab bachchon ki paalna karne ke liye, itne logon ki sambhaal karne ke liye aage thi। paristhitiyon mein achla adol rehna aur sada chehra muskuraata rahe, koi bhi prakaar ka tension na ho to ye mama ki doosri visheshta hai। nothing new ka paath padhkar achal adol rahi। nothing new, nai baat nahin hai aur ham sab ko bhi yahi paath padhaaya । teesri mama ke chehre par kabhi bhi koi phikraat ke chinha nahin dikhaai die। koi shareer bhi chhod de ya apne hi shareer mein kuchh hua bahut saari beemaariya aa gai lekin koi bhi prakaar ka soch nahin, sankalp nahin। saadhaaranta mein mama kabhi nahin rahi, mama ko sada oonche roohaaniyat ke nashe mein dekha। chautha, baba ne mama ko kaha tum hi shri lakshmi banogi bas, ek baar kahne se mama ki soorat aur seerat badal gai। gunvaan banna hai, gun dekhna hai aur gundaan karna hai yahi teen baaten mama ko pakki thi । gunvaan banna hai sab ke gun dekhna hai aur gunon ka daan karna hai isliye umra bhal kam thi lekin dhaarna mein badi hone ke kaaran unko sabhi chhote bade mama kehte the। mama ki maa bhi, laukik maa bhi, kya kehti thi mama ko ? unko mama hi kah karke pukaarti thi। sabhi chhote bade dil se mama kahne lage । us samay mama ki personality ke mukaable mein bhal aur bhi kuchh personality theen phir bhi mama sabse aage number one chali gai। mama mama tabhi bani paanchavi visheshta hai, jab ek baar ki hui koi aisi baat dobaara repeat nahin ki, koi galti maan lo chhoti moti ho bhi jaae lekin dobaara vo na ho ye purushaartha ka ek pahla paath padhaaya, kabhi bhi repeat nahin ki galti। mama ka sabse bada gun tha haan ji, haan baba, ji baba । iske sivaae mama ke mukh se kabhi doosra shabd suna hi nahin jo baba ne kaha haan ji baba, ho jaaega, kar lenge। kabhi shreemat mein manmat aid hi nahin ki, kabhi nahin aid ki। ham log to sochne lagte hain baba to kah deta hai, kaun karega, kaise hoga, ho sakega nahin ho sake, prashn uth jaate hain na lekin mama ne kabhi bhi usmein apne man ki mat aid nahin ki। class mein sada haajir rehna ye bhi baba ka pharmaanvardaar bachcha banna hai lekin na keval regular balki pankchual, jara bhi aage peechhe nahin । teacher ke pahle class mein haajir hona, jara bhi oopar neeche na ho ye humein mama ne sikhaaya। murli aur savere ka yog kabhi bhi miss nahin kiya jisko baba ne kaha gaphlat na karo, jise udna hota hai woh kabhi gaphlat nahin karte । baba kehte tum oopar ki sthiti mein raho neeche ki baaten kyon karte ho, mama ke mukh se kabhi bhi aisi neeche ki baaten nahin suni। mama bilkul chup rehti thi, jitna zaroori hai utna bola aur phir chup, koi doosra bol niklega hi nahin, shabd niklenge hi nahin to galat kaise honge। jo adhik bolta hai to kuchh na kuchh galat bol hi dega isliye chup rehna sabse bada gun hai। mama ne maryaadaaon mein accurate rehna sikhaaya। aisi dehi abhimaani sthiti mein rahi jo mama se baba ke gun aur karma dikhaai dete the, aisi dehi abhimaani sthiti mein mama khud rahi jo baba ke gun unke chehre se dikhaai dete the। to baba jo humein sikha raha hai vahi hamaare se dikhaai de aur puraane sanskaar sab khatma ho jaae। mama mein teen visheshtaaen bahut spashta dikhaai deti thi jo abhi sunaai aapko, ek roohaaniyat, doosra svamaan aur teesra baap se sarva sambandh ka sneh । humein bhi in teenon gunon ko svayan mein dhaaran karne hain isse deh abhimaan sahaj khatma ho jaaega । mama ke sir par amrit ka kalash shiv baba ne rakha, gyaan amrit ka kalash baba ne rakha । mama use dhaaran kar sunaane ke nimitta bani lekin mama hamesha kehti thi, kya kehti thi mama ke shabd the, mama ki koi mahima karen mama aaj aapne bahut achhi murli sunaai, aaj bahut achha bhaashan kiya, bahut achha class karaaya to mama kya kehti theen, nahin pita prasaade, pita prasaade hai। baba ne diya hai, bhagwan ka diya hua aapko de diya। mera nahin hai, meri visheshta yeh nahin hai, pita prasaad hai , bhagwan ka prasaad aapko baant diya, usne mujhe diya mainne aapko diya। to mama hamesha kehti thi pita prasaadi, baap se mila hua suna rahi hoon, svayan ki dhaarna mein jo hai woh suna rahi hoon, tabhi vaani mein madhurta aur sachchaai jhalakti thi । madhurta aur sachchaai mama ki vaani mein jhalakti hai । aise hamaare mein jitni pavitrata aur satyata hogi utna mithaas aaegi। jara bhi apvitrata hai, man mein kisi ke liye bhi glaani hai to vaani mein kadvaapan aa jaaega। kisi ke liye bhi man mein agar glaani hai to vaani mein kadvaapan aa jaaega। to mama ki vaani se madhurta aur sachchaai jhalakti thi kyonki kisi ke prati bhi katu vachan nahin the, koi ke avgun note hi nahin the jo galat shabd nikal jaae। meethi maa ne ham sabko bade prem se ishaaron se paala । mama ka chitra bahut sheetal aur saaph tha। har ek bachche ki baat dil mein aise sama leti thi jaise koi baat hui hi nahin। shikshaaain deen, aise nahin shikshaaen bhi nahin di shikshaaen dete hue bhi andar sama liya। samaane ki shakti aur pyaar se usko change karne ki shakti, samaaya aur phir pyaar de karke usko change kar diya yeh bahut badi visheshta ham sabne mama mein dekhi। mama ne kabhi bhi doosron ke avgunon ko chitta pay nahin rakha । mama sada apne svamaan mein rehti thi। unhein beej roop sthiti banaane ka , sab sankalp samet lene ka, vistaar mein na jaane ka ek natural art tha। bahut badi visheshta hai, sab kuchh dekho, sab kuchh suno, lekin vistaar mein na jaakar ke samet lo। beej roop sthiti agar banaani hai to sametne ki shakti to mama sada apne svamaan mein rehti aur beej roop sthiti banaane ka, sab sankalp samet lene ka, vistaar mein na jaane ka natural aart, sametna aur sama lena, kabhi koi baat vistaar mein aaya hua nahin dekha । kabhi bhi koi baat mein vistaar mein aaya hua nahin dekha jis kaaran mama ki murli bahut prabhaavshaali rahi। woh mama ki divyata aur satyata ki aakarshan chehre se chamakti thi । mama ne ashareeri banne ki bahut mehnat ki। hamne aankhon se dekha , daadi suna rahe hain, hamne aankhon se dekha hai bigar mehnat phal nahin milta to mehnat se darna nahin aur thakna nahin। jab athak rehte hain to khushi se purushaartha karte hain aur thakaavat khushi gum kar deti hai, udaasi le aati hai phir majboori se purushaartha chalta hai isliye khushi-khushi se yaad karna jisse mehnat aur thakaavat ka anubhav na ho। mama ke chehre se dikhaai deta tha kitna athak ban karke ashareeri banne ka abhyaas do baje uthkar karte the।meethi gyaan chandra maa ki sheetalta ko dekhkar krodh karne vaali kaisi bhi krodhi aatma saamne aae apne aap use sheetalta ka anubhav hota tha uska krodh shant ho jaata hai। bolne ki jaroorat nahin thi lekin itni sheetal thi koi bhi krodhi saamne aa jaae woh apne aap sheetal ban jaae। mama sada athak rahe kitni bhi service karte unke chehre par kabhi thakaavat ki chinha nahin dikhaai di, feeling hi nahin mahsoos karne di। itni aatmaon ke sang mein rehte hue bhi sabhi ki baaton ko sunte hue khud har baat se nyaari aur pyaari rahi, kabhi mama ki drishti mein kisi bhi aatma ke prati change nahin aai, ki ye hai aisi, woh hai vaisi। suna sabko dekha sabko, jaanti sab kuchh hai lekin drishti mein kabhi change nahin aai। vahi meethi drishti har kisi ke prati rahi saath-saath uski kamiyon par saavdhaani bhi zaroor deti thi। bhal kaise bhi avgun vaali aatma ho lekin mama ke mukh par kabhi kisi bhi aatma ke prati koi ashubh bol nahin nikle jiska koi phaayda le le, kamjor bol nahin hai ashubh bol nahin nikle lekin uski visheshtaaon ka hi varnan kiya। sada sheetal svabhaav aur meethe bol uchchaaran karne vaali maa ka sada yahi lakshya raha ki sabke duhkh door karoon। kisi bhi haalat mein kisi bhi baat mein mama ko kabhi krodh to kya aavesh tak bhi nahin aaya, mama ka tej aavaaj kabhi suna hi nahin। mama shanti ki avtaar aur prem ki moorti thi। gambheerta ka gun jo sarva gunon ki khaan hai, gambheerta kaanoon jo sab gunon ki khaan hai uska pratyaksha swaroop mama mein dekha। mamta vaali maa nahin achhi maa, teacher guru jaisi maa, khud ke saboot se sikhaane vaali maa। gambheerta ke kaaran mama mein samaane aur sametne ki donon shaktiyaan theen। sama bhi li, bachchon ki baaton ko samaaya bhi aur vistaar ko samet liya, adhik phailaai nahin baat, samaane aur sametne ke kaaran mama sahansheelta ki thi, sahansheelta ke gun se sada sheetal aur shant ban gai। sada sheetal aur shant vahi rah sakta hai jiske andar sahansheelta ka gun ho। mama jab bhi milti thi to mama ka haath pakdo to aisa lagta tha ki mama ke haath se sakaash aa rahi hai, khushi mil rahi hai itni taakat thi mama ke haath mein woh chamatkaari haath tha। baba jo bhi sunaata mama use itna dhyaan se sunti ki jaise usi samay ek ek baat ka swaroop ban gai isliye mama sada achal adol aur ekras sthiti mein rahi mama ki sthiti kabhi oopar neeche nahin dekhi । purushaartha bhi koi aisa mehnat vaala hard nahin, mummy ke chehre par sada purity ki royalty najar aati thi। is purity ki personality ke kaaran jagdamba ke roop mein mama ka itna gaayan aur poojan aaj tak hai । koi bhi kaisi bhi aatma ho mama ki purity ke aage jhuk gaya ekdam usko saakshaatkaar ho gaya kitni pavitra maa hai। atal nishchay kisko kaha jaata hai, atal nishchay kisko kaha jaata hai vo mama ki soorat se dikhaai deta tha । kabhi bhi maama ne shreemat mein apni mat mix nahin ki mera vichaar yeh hai, main yeh samajhti hoon ye mama ne kabhi nahin kaha parantu baba ne kaha hai, baba ne samjhaaya hai , vo bhi bataane mein aisa ras jo har ek ko samajh mein aa jaae ki baba ne kis rahasya se kaha hai। mama ki chalan kabhi saadhaaran nahin dekhi sada royal isliye mama shiv baba ki pautri aur brahma baba ki beti banne se sarva ki manokaamnaaen poorn karne vaali sarasvati maa ban gai। mama ne apne liye koi kaamna nahin rakhi, baap ke die hue khajaane se sada apne ko sampanna banaaya। mama kabhi apna show nahin kiya, gupta paalna di। achhi dharna karaane mein madad madad di, aaj din tak bhi desh aur videsh mein baba ke kai bachche hain jinka anubhav hai ki ham jaise saakaar maat pita ki paalna mein pal rahe hain। anubhav karte hain ko abhi bhi humein vatan se maat pita ki gupta paalna mil rahi hai। yahi badi mama brahma hai, brahma hamaari badi maa hai, adopta karne vaali maa hai aur paalna karne vaali maa sarasvati maa hai। mama ke chehre se kabhi aise nahin laga ki mama ko koi bandhan hai । ham sabko bhi sekand mein free karke sheetla bana diya । mama ne ham bachchon ki paalna karne mein itna sarvottam aur shreshtha part bajaaya is kaaran godej aaph knowledge kahlaai ye title mama ka hi hai aur kisi ko nahin mil sakta। kaun sa godej oph knowledge। shiv baba ki knowledge ko aisa dhaaran kiya jo vidya ki devi ban gai। aaj tak bhi vidya ke liye sarasvati ki pooja karte hain iseelie vidya dhaaran karne ke liye sarasvati ko yaad karte hain। mama ko svamaan svadharma mein rahne ka sada nasha raha। svadharma hamaara shant hai usmein mama shakti avtaar rahi। baba ne jo kaha mama ki buddhi ne maana। kabhi kisi ka apmaan nahin kiya, na apmaan ki feeling mein aai। koi apmaan kar de feeling aa jaae mama ko kabhi kisi ke apmaan ki feeling nahin aai aur kisi ka bhi apmaan nahin kiya, sada gyaan ke sumiran mein rahne ke kaaran harshit aur gambheerta ki moorti ban kar rahi। mama hai brahma ki beti lekin sambandh mein itni svachchhata, pavitrata ki shakti thi jo jagdamba ban gai aur saath-saath mama ko bhavishya ka ham so ka aisa nasha tha jo unke nain, chain se, chehre se vo nasha dikhaai deta tha jaise sach much shri lakshmi hai। jaise vo sanskaaron mein bhar gaya main kiski hoon, bhavishya mera kya hai। mama ekaant mein rehti thi। roj do baje savere uthkar baba ki ekaant yaadon mein chali jaati thi। isi purushaartha se mama ka sampoorn swaroop kai baar saakshaatkaar hota tha। ekaant mein savere savere do baje uth karke tapasya karna jisse anek aatmaon ko door baithe bhi mama ka saakshaatkaar hota tha। mama number one aagyaakaari rahi iseelie mama ka yahi slogan tha hukumi hukum chala raha hai । aagyaakaari, vaphaadaar dekhna ho to mama dekho । mama ne baba ke ishaaron ko samjha aur ham bachchon ko bada sahaj aur saral karke samjhaaya। mama ke mahaavaakyon mein ek-ek baat ka spashteekran hai, baba ke saath lagna kaise ho mama ki soorat se dekha । mama ne kabhi nahin kaha hoga mainne yeh kiya hamesha baba ki taraph ishaara kiya। main beti hoon maat pita woh hai mama itni nirhankaari thi। kabhi mama ne haath mein law nahin uthaaya, kabhi othoriti nahin chalaai parantu dhaarna ki moorat ban karke rahi। kiske liye bhi mama ne kabhi yeh nahin kaha hoga ki tu sudharne vaali nahin hai। yeh tone kabhi nahin raha ki tu sudhaarne vaala nahin hai, sudharne vaali nahin hai। ek bahut shubhchintak bhaavna jisse woh aatma sudhar jaae apne aap, authority nahin uthaai । mama hamesha kehti thi yeh bahut achhi baat hai last, note karna, mama hamesha kehti thi ki shakti jama karne mein aap log kitni mehnat karte ho aur phaaltu kharcha kitna jaldi kar lete ho। jama karne ke liye itni mehnat karte hain, roj yog karenge, roj padhaai karenge, roj class karenge aur jab kharcha karne ka samay aaega to ek sekand mein gussa karke saari shakti khatma kar denge। ek sekand lagega kharcha karne mein, jama karne mein saara din lag gaya aur kharcha ek sekand mein kar diya। to mama hamesha kehti thi ki shakti jama karne mein aap log kitni mehnat karte ho aur phaaltu kharcha kitni jaldi kar lete ho। phaaltu baaton mein shakti kharcha karke phir udaas aur kamjor ho jaate ho । kamaai karne mein itna time nahin dete lekin saara din kharcha hi kharcha to kya hoga, devaala ho jaaega aur jab koi baat saamne aati hai to kehte hain bahut mushkil hai, kya karoon shakti nahin hai, taakat nahin hai। taakat gai kahaan? jisko itna achha sang, itni achhi padhaai, itna achha vaayumandal itna achha sab ho praapta ho raha ho, praaptiyaan itni akhut ho rahi hon vo bhi agar kamjor ka kamjor ho to kya kahenge, kahaan gai tumhaari shakti? shakti kahin vyartha zaroor gai, devaala maar diya। to ye mama ki visheshtaaen ham sabko aaj ke din mama ke samaan banne ki kya, bahut achhi prernaaain deti hain ki ham bhi baba ke yaad se, gyaan se, padhaai se, achhe sang se, bhojan se, apne andar aisi shaktiyaan jama karen , jo man aur buddhi hamaare control mein aa jaae, kabhi bhi hamaari shakti vyartha na jaae to ham sab shaktimaan ban jaaenge kamjoriyaan samaapta ho jaaengi , om shanti।