Murli de Mamma - gyan-sitar-06

२०.१२.५८

andhiyaare se roshni mein aane ke baad vichaaron ka parivartan

aaj ki duniya kitne andhiyaare mein hai woh bhi ab ham jaante hain, jabki hamaare paas roshni hai। manushyon ko pata hi nahin hai ki isi duniya mein hi manushyon ke liye svarga tha, sada sukhmay jeevan thi। ranchak bhi us sukh ko nahin jaante hain। taras padta hai ki bechaare kitna andhiyaare mein hain ! samajhte hain- “bas, yahi duniya hai, ismen hi bahishta, dojak hai। hamaare paas dhan-daulat hai, ghar mein koi khitpit nahin hai। phir ham khyaal hi kyon karen ki koi bahishta tha jo hamne dekha nahin hai। ham jis duniya ko dekhte hain vahi duniya hai। is samay to ham bahishta mein hain। kal ka bhi ham soch nahin karte hain। kal dhan chala jaaega, duhkh hoga – yeh khyaal hi kyon karen ?" bilkul vivek maara hua hai। achha, bhal hamko anubhav nahin hai ki shaadi ke baad kya duhkh hota hai parantu buddhi se samajh to sakte hain। badon ko athva chhoton ke jeevan ko dekhte hain ki hamaare hote hamaare chhote kaise duhkhi ho rahe hain। to bhi samajhte - ham to sukhi hain na। manushya ka vivek itne tak bhi nahin chalta। aise thode hi hamaare paas duhkh nahin hai to samjhen duhkh hai hi nahin। aaj ka sansaar itna to gira hua hai, jo itna bhi vivek nahin chalaate। manushya jo kuchh kaam athva purushaartha karte hain, khyaal to rehta hai na ki is dhandhe se itna phaayda hoga, inse nuksaan hoga, १२ maas ke baad phir nuksaan na pad jaae। pichhaadi mein bachchon ke liye itna dhan ikattha karke jaaen jo woh sukhi rahen। aaj ek bachcha hai, kal do teen honge, unke liye bhi dhan ikattha karen – yeh sab khyaal karte to hain na। manushyon ki buddhi chalti hai parantu samajhte nahin hain। yeh sab vichaar peechhe ke hi hain na। aaj kya hai, kal kya hoga ? yeh nahin samajhte ki hamaari jeevan ulti bhi ho sakti hai। yeh jo karma bante aaye hain unko sudhaarna kaise hai ? yeh buddhi mein hi nahin aata hai। itne to andhiyaare mein pade hain -- dekhte hue bhi soch nahin karte hain ki kyon na pahle se hi ham aise karma banaaven jo peechhe sukh bhogen। peechhe ke soch ke sivaae manushya ka kadam bhi nahin chal sakta hai। samajhte hain - mehnat karenge, inse itne din pet ka gujaara hoga, is dhandhe se २४ ghante sukh se beetenge । in vichaaron ke sivaae to manushya ki chaal chalti nahin hai। yeh maaloom hi nahin ki world ki history kahaan se shuru hui ? koi samay duniya aisi oonch stage par thi। samajhte hain - bas, is duniya mein hi sab kuchh hai, duniya ki yahi chaal hai। agar aisi hi chaal hai to phir duhkh bhi nahin hona chaahiye। manushya marta hai, yeh to hoga hi phir -- rote kyon hain ? aajkal buddhi ekdam maari gai hai।

yeh ab ham jaante hain ki kuchh to apni jeevan banaani chaahiye। kai manushya aise bhi samajhte hain ki yeh koi jeevan nahin hai। parantu kaise aur kis dvaara woh jeevan bane – so jaante nahin। saari duniya giri hui hai। jab duhkh aata hai, thokar lagti hai, to aavaaz nikalta hai inse chhooten । parantu roshni dene vaala bhi chaahiye। woh hai hi ek । us dvaara humein sadaakaal ke liye ab roshni mil gai hai। andhiyaare aur roshni ka ham ab saakshaatkaar karte jaate hain। dekhte hue bhi manushyon ki aankhen banda hain। duhkh dekhte bhi hain parantu samajhte hain hamaare liye nahin hai। aise bhi manushya hain jo samajhte hain – “bhagwan, jisko ham dekhte hi nahin to vichaar hi kyon karen ? sukh ki duniya dekhi hi nahin hai to maanen kaise ?” achha, daade-pardaade ko dekhte nahin hain, to the hi nahin kya ? samajhte to hain na – hamaare pita ne unse janma liya hoga। samajh ki baat hai na। is andhiyaare ka bhi saakshaatkaar tab hota hai jab roshni mein hain। ab hamaari sukh ki duniya ban rahi hai। aatma poorn santushta to paramatma dvaara hi ho sakti hai। ab ham anubhav karte jaate hain। achha ।