Avyakt murli for Thursday 5 March 1970

>

05-03-70om shanti avyakt baapdaada madhuban

jal chadhaana arthaat pratigya karna

aaj shiv jayanti manaane ke liye bulaaya hai। kaise manaane chaahte ho? milan hi manaana hai। log milne ke liye manaate hain aur bachche milne ko hi manaana samajhte hain। to milna arthaat man liya ab baaki kya raha। aap bachchon ka manaana ek to hai milna aur doosra hai apne samaan banaana। to milna aur banaana, yahi hai manaana। aaj ke divas par yeh do baaten karni hai। milan to mana hi rahe ho baaki aap samaan banaana। yeh donon baaten ki goya shiv jayanti manaayi। jab bhakta log jal chadhaane ke liye jaate hain to bhi beech mein brahman hote hain,jo unse karaate hain। to aap bhi brahman ho। jaise bhakta log jal chadhaate hain vaise tum bachche baap ke oopar aatmaon se jal chadhvaate ho। yeh jal athva doodh chadhaane ki rasma kyon chali hai? jis samay jal chadhaate hain us samay man mein kya sochte hain, maaloom hain? jal va doodh jo chadhaate hain unka bhaavaartha yeh hai। jab koi bhi pratigya karni hoti hai to haath mein jal uthaate hain,soorya ko bhi jal chadhaate hain to andar mein pratigya karte hain। tumhaare paas bhi jab koi aate hain to pahle-pahle unhon se pratigya ka jal lo। ek pratigya karaate ho na ki ham aaj se ek shivbaaba ke hi bankar rahenge। to pahle unse pratigya karaate ho। woh log bhi andar mein pratigya kar phir svayan sammukh aakar devtaaon par arpan hote hain। jo pure bhakta hote hain woh saara hi apne ko unke aage jhukaate hain arthaat apne ko arpan kar dete hain। to tum bhi pahle unhon se pratigya karaate ho। jab pakke ho jaate hain, to sampoorn svaaha karaate ho। aisi service karni hai। bilkul nyauchhaavar karaana। aap ne kitne ko nyauchhaavar karaaya hai? jo jitna svayan nyauchhaavar bane hain utna hi auron ko banaate hain। agar svayan hi sampoorn nyauchhaavar nahin bane hain to auron ko bhi itna hi aap samaan banaate hain। abhi nyauchhaavar hone mein mhanat aur samay donon hi lagta hai। lekin thode hi samay mein nyauchhaavar honevaalon ki queue lag jaaegi। jaise vahaan yaadgaar hai kaashi kalvat khaane ka। svayan apni ichchha se katne ko taiyaar ho jaate hain। vaise yahaan bhi taiyaar ho jaayenge। aap logon ko ichchha paida karne ki mhanat bhi nahin karni padegi। svayan apni ichchha se jump dene ke liye taiyaar ho jaayenge। yeh queue lagni hai। abhi nahin lag rahi hai। iska bhi kaaran hai। bachchon ke paas abhi kaun si queue lagi hui hai? jab woh queue khatma ho jaaegi, tab yeh queue lagegi। maaloom hai abhi kaun si queue lagi hui hai?(sankalpon ki) sankalpon mein bhi mukhya kya hain, jo hi purushaartha mein dheelaapan laati hai। vyartha sankalpon ka mool kaaran kya hota hai? puraane sanskaar kis roop mein aate hain? ek shabd bataao jisme vyartha sankalpon ka beej aa jaae। vyartha sankalp va vikalpa jo chalte hain to ek hi shabd buddhi mein aata hai ki yeh kyon hua,kyon se vyartha sankalpon ki queue shuru ho jaati hai। angreji mein bhi aap dekhenge queue shabd ki nishaani sabhi se tedhi hoti hai। to kyon ki queue badi lambi hai। is queue ke samaapti baad hi sampoornata aaegi। phir woh queue lagegi। jab kyon shabd niklega,phir drama ki bhaavi par ekras stheriyam rahenge। to abhi kyon ke queue ko khatma karna hai। samjha। ek kyon shabd se sekand mein kitne sankalp paida ho jaate hain? kyon se phir kalpana karna shuru ho jaata hain। to baap bhi bachchon se yeh jal ki loti chadhvaane ke liye aaye hain। koi bhi pratigya karte hain to jal ko saakshi rakhkar karte hain। to ab yeh loti chadhaani hai।

madhuban mein vishesh responsibility paandav-dal ki hai। to us dal mein ab bal hona chaahiye। paandav -dal mein bal hoga to phir is paandav bhavan ke andar aasuri sampradaay to kya lekin aasuri sankalp bhi nahin aa sakte। itna pahra dena hai। woh pahra dena to bahut sahaj hai। jaise is get ki rakhvaali karte ho vaise maaya ka jo get hai, uski bhi rakhvaali karni hai। aise paandav sena taiyaar hai jo aasuri sanskaaron ko, aasuri sankalpon ko bhi is paandav ke andar aane na do? ab pahle apne andar yeh pahra mazboot hoga tab paandav bhavan mein yeh majbooti la sakte hain। aisa pahra dete ho? kaun-kaun aisi himmat rakhte hain ki ham paandav sena apne paandav bhavan ki aisi rakhvaali karenge। aisi rakhvaali agar paandav karte rahen to phir yeh paandav bhavan ek jaadu ka ghar ho jaayega। jo kaisi bhi aatma aaye, aate hi aasuri sanskaaron aur vyartha sankalpon se mukta ho jaaen। aise nirvikalp banaane ka jaadu ka ghar ho jaayega। aisi service jab karenge tab pratyakshata hogi। ek do se sunte hi log daudenge। jaise-jaise samay aage badhega vaise duhkh ashaanti bhi badhne ke kaaran harek aatma sukh chain ki pyaasi hogi। aur usi pyaas mein tarasti hui aatmayeen is paandav bhavan ke andar aane se hi ek sekand mein sukh chain ka anubhav karengi tab prabhaav niklega। ek-ek chaitanya moorti ke saamaan darshan moorta ho jaayenge। ek ek ratna ka darshan karne ke liye door door se pyaasi aatmayeen aaengi। lekin jab aisa pahra shuru karne tab। jaise sangathan ka bal hai,sneh ka bal bhi hai, ek do ko sahayog dene ka bal bhi hai। abhi sirf ek bal chaahiye, jiski kami hone kaaran hi maaya ki praveshta ho jaati hai। woh hai sahansheelta ka bal। agar sahansheelta ka bal ho to maaya kabhi vaar kar nahin sakti। to yeh chaaron bal chaahiye।

aaj baapdaada ki jayanti ke saath sabhi bachchon ki bhi to jayanti hai। to is jayanti par chon bal apne mein dhaaran karenge to phir yeh paandav bhavan saadi duniya mein dekhne aur anubhav karne ka vishesh sthaan gina jaayega। is paandav bhavan ka mahatva sare vishwa mein hoga। mahatva badhaane vaale kaun? paandav sena aur shakti sena। madhuban nivaasi hi madhuban ke mahatva ko baadha sakte hain। paandavon ke liye to prasidda hai ki woh kabhi bhi pratigya se hilte nahin the। ek parsentej ki bhi kami hui to isko kami hi kaha jaayega। paandav sena ko example banna hai। jo aap logon ko dekh auron ko bhi prerna mile। koi bhi madhuban mein aaye to yeh visheshta dekhe ki yeh sabhi itne anek hote hue bhi ek aur ek ki hi lagan mein magna hain। aur ek ras sthati mein sthit hain। jab aisa drishya dekhenge tab pratyakshata ki nishaani dekhne mein aaegi। aap sab ki pratigya hi pratyakshata ko laaegi। to aaj pahle pratigya ka jal chadhaana hai phir saugaat bhi milegi। pratigya ki teen lakeer dikhaate hain। bel paatra bhi jo chadhaate hain woh bhi teen patton ka hota hai। to aaj ke din teen pratigya karaai hain। sahansheelta ka bal apne mein dhaaran karenge,kyon ki queue ko khatma karenge aur aasuri sanskaaron par pahra dena hai। to teen pratigya ka yeh belpatra chadhaana hai। bhakta log to khel karte hain lekin gyaan sahit khel karna woh to bachche hi jaante hain। isliye aaj ke shivraatri ka yaadgaar phir bhakti mein rasma maaphik chalta hai। pahle aarambha bachche hi karte hain gyaan sahit। aur phir bhakta copy karte hain andhashraddha se। zaroor kabhi kiya hai tab yaadgaar bana hai।

bhagwan bachchon ko kehte hain vande maatram kitna pharka ho gaya। itna nasha rehta hai? jis baap ki anek bhakta vandana karte hain,woh svayan aakar kehte hain vande maatram is khumaari ki nishaani kya hogi?unke nayan,unke mukhde, unki chalan, bol aadi se khushi jhalakti rahegi। jis khushi ko dekh kahiyon ke duhkh mit jaayenge। aisi maataayeen jinko baapdaada svayan vandana karte hain,unki nishaani hai khushi। chehra hi anek aatmaon ko harshaayega। agyaani log savere uth koi aisi shakla dekhte hain to kehte hain savere unki shakla dekhi tab yeh prabhaav pada to shakla ka prabhaav padta hai। to aap bachchon ka harshit chehra dekh sabhi ke andar harsha aa jaayega। aisa hone vaala hai। achha- jitna apne oopar checking karenge utni change aati jaaegi। sankalp, karma,samay,sanskaar in charon ke oopar checking karni hai kadam-kadam par har roz koi – na – koi slogan saamne rakh usko practical mein laao।