Avyakt murli for Wednesday 26 June 1974

>

26-06-74 om shanti avyakt baapdaadaamdhuban

sarva-siddhiyon ki praapti ke roohaani nashe mein sada sthit raho

sarva aatmaon ki janmapatri ko jaanne vaale, sarva-siddhiyon ke daata, world almighty authority shiv baba bole:-

aaj gyaan-soorya baap har sitaare ke mastak par takdeer ki lakeer dekh rahe hain। laukik reeti mein bhi, bhakton dvaara haston se jo janmapatri dekhi jaati hai,unmein mukhyatah chaar baaten dekhte hain। yahaan haston dvaara to nahin, lekin mastak dvaara mukhya chaar baaten dekh rahe hain-(1)ek baat yeh ki buddhi ki line kitni clear hai aur vishaal hai (2) doosri baat, har samay gyaan-dhan ko dhaaran karne mein, tan ke karmabhog se nirvighna aur man se ekras lagan lagaane mein marjeeva janma se lekar abhi tak kahaan tak nirvighna chalte aa rahe hain? (3) teesri baat, is shreshtha brahman janma ki smriti ki aayu lambi hai ya chhoti hai? baar-baar smriti arthaat jeena, vismriti arthaat marne ki haalat mein pahunch jaana,isi hisaab se aayu chhoti athva badi gini jaati hai। (4) marjeeva janma lete hi,sneh,sambandh samparka aur sarvashaktiyon mein kahaan tak takdeervaan rahe hain? kya takdeer ki rekha pratishat ke hisaab se atoot rahi hai aur saath-saath padhaai mein va kamaai jama karne mein sada saphaltaamoorta,regular aur pankchual kahaan tak rahe hain?kitni aatmaon ke prati mahaadaani, vardaani,kalyaankaari bane hain arthaat daan-punya ki rekha lambi hai ya chhoti? in sab baaton se harek sitaare ke vartamaan aur bhavishya ko dekh rahe hain।

aap sab apne mastak ki rekhaaon ko jaan aur dekh sakte ho, parantu kaise? baap-daada ke dil-takhtansheen ban kar, smriti ke tilakdhaari bankar knowledgeful aur powerful stage par sthit ho dekhenge to spashta jaan sakenge। apni position ko chhodkar, maaya ki opposition ki sthiti mein va stage par sthit hokar apne ko va anya aatmaon ko jab dekhte ho, tab spashta dikhaai nahin deta। position kaun-si hai? aapki apni paazeeshan kaun-si hai, jismen sab baaten aa jaati hain? master almighty authority। sada isi paazeeshan mein sthit rehte hue, har karma ko karo to yeh position maaya ke har vighna se pare,nirvighna banaane vaali hai। jaise koi laukik reeti mein bhi jab koi authority vaala hota hai, to unke aage koi bhi saamna karne ki himmat nahin rakhte hain aur agar koi apni authority ko use karne ke bajaay har samay loose rehta hai, to saadhaaran aadmi bhi saamna karne ke liye athva disturb karne ke liye,vighna daalne ke liye loose rehte hain। to yahaan bhi apni authorities ko,praapta hui sarva-shaktiyon ko, vardaanon ko use karne ke bajaay loose rehte ho। isliye har samay,maaya ko saamna karne ki himmat rehti hai। mansa mein,vaacha mein,karmana mein,sambandh mein aur sampatti mein sab mein interfere karne ki himmat rakhti hai। kisi bhi baat mein chhodti nahin, kyonki apni paazeeshan se neeche aakar saadhaaran ban jaate ho।

rivaazi reeti se yadi koi saadhaaran aatmaayen bhi alpakaal ki siddhi praapta kar leti hain, to kitni authority mein rehti hain। yahaan sarva-siddhiyaan praapta hote hue (1) chaahe sada nirogi banne ki siddhi (2) chaahe koi bhi prakriti ke tatva ko vash mein karne ki siddhi (3) chaahe koi duhkhi, nirdhan va ashaanta aatma ko avinaashi dhanvaan banaane va sada sukhi banaane ki siddhi (4) nirbal ko maha balvaan banaane ki siddhi (5) sankalpon ko ek second mein jahaan aur jaise thahraana chaaho va sankalp ko apne vash mein karne ki siddhi (6) paanch vikaaron roopi mahaabhooton ko vash mein karne ki siddhi (7) nainheen ko trinetri banaane ki siddhi (8) anek paristhitiyon ki pareshaani mein moorchhit hui aatma ko sva-sthiti dvaara surjeet karne va ji-daan dene ki siddhi (9) bhatki hui aatma ko sadaakaal ke liye thikaana dene ki siddhi (10) janmajanmaantar ke liye aayu lambi karne ki siddhi (11) akaale mrityu se bachaane ki siddhi (12) raajyabhaag va taaj-takhta praapta karne ki siddhi। aisi sarva-siddhiyon ko vidhi dvaara praapta karne vaali aatmaayen kitne nashe mein rahni chaahiye?

apne aap ko kyon bhool jaate ho? lena hai baap ka sahaara aur kar dete ho sarvashaktimaan se kinaara। khivaiya se kinaara kar aur kinaare ko arthaat manzal jab dhoondhate ho, to milegi ya samay vyartha jaayega? baap-daada ko aise bhole va bhoole hue bachchon par raham aata hai। lekin kab tak? jab tak baap dvaara raham lene ki aavashyakta va ichchha hai,tab tak anya aatmaon ke prati merciful nahin ban sakenge?jo svayan hi lene vaala hai,woh dene vaala daata nahin ban sakta jaise bhikhaari,bhikhaari ko sampanna nahin bana sakta। haan alpakaal ke liye ve kuchh shaktiyon ke aadhaar se,unhon par thode samay ke liye prabhaav daal sakte hain। lekin sada kaal ke liye aur sarva mein sampanna nahin bana sakte। achha-achha kahne tak anubhav kara sakte hain,lekin ‘ichchha maatram avidya’ ki stage tak nahin la sakte। achha-achha kahne ke saath,sarva-praapti ki ichchha samaapta nahin hoti। kyonki svayan bhi baap dvaara va sarva sahayogi aatmaon dvaara sahayog,sneh,himmat,ullaas,umang ki ichchha rakhne vaale aur koi bhi prakaar ka aadhaar lene vaale sarva-aatmaon ke nimitta aadhaar-moorta nahin ban sakte। prakriti ke va paristhiti ke aur vyakti ke va vaibhav ke adheen rahne vaali aatma anya aatmaon ko bhi sarva adhikaari nahin bana sakti। isliye apni sarva-siddhiyon ko jaankar unhein use karo। lekin nimitta-maatra ban kar use karo। main-pan bhool, shreemat ke aadhaar se har siddhi ko use karo। agar main-pan mein aakar, koi bhi siddhi ko use kiya, to kya kahaavat hai? ‘‘karaamat khair khudaai।’’arthaat shreshtha-pad ke bajaay, saza ke bhaagi ban jaavenge। saaksheepan nahin, to phir saza hai। isliye sada smriti-swaroop aur siddhi-swaroop bano। samjha?

murli ka saar

(1) sada master almighty authority ki position mein sthit rehte hue, yadi har karma karo to yeh position maaya ki opaazeeshan arthaat har vighna se pare nirvighna banaane vaali ban jaayegi।

(2) prakriti va paristhiti ke aur vyakti ke vaibhav ke aadheen rahne vaali aatma kabhi bhi anya aatmaon ko sva-adhikaari nahin bana sakti।

(3) apni sarva-siddhiyon ko jaankar, main-pan ko bhool nimitta-maatra ban kar, shreemat ke aadhaar se yuz karo।

(4) yadi saaksheepan nahin, to phir saza hai।