Avyakt murli for Friday 4 January 1980

>

04.01.1980om shanti avyakt baapdaada madhuban

vartamaan raajya adhikaari hi bhavishya raajya adhikaari

videshi bhaai-bahnon ke saath avyakt baap-daada ki mulaakaat

sabhi apne ko double raajya-adhikaari samajhte ho? vartamaan bhi raajya- adhikaari aur bhavishya mein bhi raajya-adhikaari। vartamaan, bhavishya ka darpan hai। vartamaan ki stage arthaat darpan dvaara apna bhavishya spashta dekh sakte ho। vartamaan va bhavishya ke raajya-adhikaari banne ke liye sada yeh check karo ki mere mein ruling power kahaan tak hai, pahle sookshm shaktiyaan, jo vishesh kaaryakartta hai, unke oopar kahaan tak apna adhikaar hai। sankalp shakti ke oopar,buddhi ke oopar aur sanskaaron ke oopar। yeh vishesh teen shaktiyaan raajya-adhikaari banaane mein sada sahayogi arthaat raajya ki kaarobaar chalaane vaale mukhya sahayogi kaaryakartta hain। agar yeh teenon kaaryakartta aap aatma arthaat raajya-adhikaari raaja ke ishaare par chalte hain to sada woh raajya yathaartha reeti se chalta hai। jaise baap ko bhi teen moortiyon dvaara kaarya karaana padta hai। isliye `trimoorti'ka vishesh gaayan aur poojan hai। trimoorti shiv kehte ho। ek baap ke teen vishesh kaaryakartta hain jin dvaara vishwa ka kaarya karaate hain। aise aap aatma rachayita ho aur yeh teen vishesh shaktiyaan arthaat trimoorti shaktiyaan aapke vishesh kaaryakartta hain। aap bhi in teen rachna ke rachayita ho। to check karo ki trimoorti rachna aapke control mein hain?

man hai utpatti karne vaala arthaat sankalp rachne vaala। buddhi hai nirnay karna arthaat paalna ke samaan kaarya karna। sanskaar hai achha va bura parivartan karaane vaala। jaise brahma aadi dev hai vaise pahle aadi shakti hai - `man'arthaat sankalp shakti'। aadi shakti yathaartha hai to aur bhi kaaryakartta unke saathi yathaartha kaarya karne vaale hain। pahle yeh check karo mujh raaja ka pahla aadi kaaryakartta sada sameep ke saathi ke samaan ishaare par chalta hai। kyonki maaya dushman bhi pahle isi aadi shakti ko baagi arthaat traitor banaati hai। aur raajya-adhikaar lene ki koshish karti hai। isliye aadi shakti ko sada apne adhikaar ki shakti ke aadhaar par sahayogi, vishesh kaaryakartta karke chalaao। jaise raaja svayan koi kaarya nahin karta, karaata hai। karne vaale raajya kaarobaari alag hote hain। agar raajya kaarobaari theek nahin hote to raajya dagmag ho jaata hai। aise aatma bhi karaavanhaar hai,karanhaar ye vishesh trimoorti shaktiyaan hain। pahle inke oopar ruling power hai to yeh saakaar karmendriyaan un ke aadhaar par svatahhi sahi raaste par chalengi। karmendriyon ko chalaane vaali bhi vishesh yeh teen shaktiyaan hain। ab ruling power kahaan tak aai hai - yeh check karo।

jaise double videshi ho vaise double roolarsa ho? harek ka raajya-kaarobaar arthaat svaraajya theek chal raha hai? jaise satayugi srishti ke liye kehte hain - ek raajya ek dharma hai। aise hi ab svaraajya mein bhi ek raajya arthaat sva ke eeshaare par sarva chalne vaale hain। ek dharma arthaat ek hi dhaarna sab ki hai ki sada shreshthaachaari chadhti kala mein chalna hai। man apni manmat par chalaave, buddhi apni nirnay shakti ki halchal kare, milaavat kare, sanskaar aatma ko bhi naach nachaane vaale ho jaaen to isko ek dharma nahin kahenge,ek raajya nahin kahenge। to aapke raajya ka kya haal hai? trimoorti shaktiyaan theek hain? kabhi sanskaar bandar ka naach to nahin nachaate hain? bandar kya karta hai neeche oopar chhalaang maarta hai na। sanskaar ki bhi abhi-abhi chadhti kala abhi-abhi girti kala। yeh bandar ka naach hai na। to ye sanskaar naach to nahin nachaate hain na? control mein hai na sab?kabhi buddhi milaavat to nahin karti hai? jaise aajkal milaavat karte hain to nirnay shakti bhi milaavat kar deti hai, kabhi buddhi milaavat to nahin kar deti hai। abhi-abhi yathaartha abhi-abhi vyartha to milaavat hui na।

kaaran ko nivaaran ke roop mein kar lo to maaya samaapta ho jaaegi

videsh mein maaya aati hai? videshiyon ke paas maaya nahin aani chaahiye kyonki videsh mein vartamaan samay thode hi samay mein oonche bhi chadhte aur neeche bhi girte hain। to thode samay mein sab prakaar ke anubhav karke ab poore kar liye hain। jaise koi cheez bahut khaai jaati hai to dil bhar jaata hai। vaise videsh mein bhi sab prakaar ka full force hone ke kaaran videsh ki aatmaayen ab inse thak gai hain। to jo thake hue hote hain unko agar aaraam mil jaata hai to bilkul lette hi gum ho jaate hain। deep sleep ka anubhav karte hain। to videshiyon ko maaya ne thode hi samay mein bahut anubhav kara diya hai। ab kya karna hai?ab to nai cheez ki talaash thi woh mil gai phir maaya kyon aave? nahin aani chaahiye na,phir aati kyon hai? (maaya ke puraane graahak hain) maaya ko bhi agar naye graahak achhe mil jaayenge to puraanon ko aape hi chhod degi। ruling power vaale ke paas maaya aa nahin sakti। maaya jahaan dekhti hai kaaryakartta sab hoshiyaar hain, attention mein hai to vahaan himmat nahin rakh sakti। ruling power kahaan tak hai - uski checking karo aur agar power nahin hai to uska kaaran kya hai?kaaran ko nivaaran ke roop mein parivartit karo। kaaran khatma ho jaana arthaat maaya khatma ho gai। maaya ka mukhya swaroop kaaran ke roop mein aata hai। kaaran ko nivaaran ke roop mein kar lo to maaya sada ke liye samaapta ho jaayegi।

aaj to milne aaye hain। murliyaan to bahut suneen ab aise murleedhar bano jo maaya murli ke aage nyochhaavar (surrender) ho jaae। aise murleedhar ho na ki woh sthool saaz ki murli chalaane vaale ho? woh to bahut achhi chalaate ho। ismen bhi murleedhar bano। maaya ko surrender karaane ki murli। yeh saaz bhi baja sakte ho na? saaz bajaane ka majority ko shauk hai। jis samay bhi koi saaz bajaao us samay yeh socho ki maayaajeet banne ke raaj ka saaz bhi aata hai? yeh raaj ka saaz agar sadaiv bajaate raho to maaya sada ke liye surrender ho jaayegi। aise saaz bajaana aata hai? videshi bhi padmaguna bhaagyashaali hain। door se aate hain lekin chance bhi padmaguna milta hai। jitna desh vaale varsha mein lete hain usse jyaada videshiyon ko thode samay mein praapta hota hai। vishesh paalna mil rahi hai।

viceless banna hi wireless hai

sabki nazar aap videshiyon ke oopar vishesh rehti hai। to vishesh paalna ka roop, pratyakshaphal ke roop mein vishesh dikhaana pade। jaise sthaapna mein vishesh paalna chali vaise abhi bhi aap logon ki vishesh paalna chal rahi hai। to pahle paalna vaalon ne us paalna ka return seva ki sthaapna ki। ab aap log kya karenge?seva ki samaapti karenge, aur sampoornata ka va pratyakshata ka naam baala karenge। videshiyon ko hi samaapti ki date fix karni padegi। pahle vaalon ne sthaapna ki date fix ki aur ab aap logon ko samaapti ki date fix karni padegi। abhi sabka intazaar aapke oopar hoga। baap daada se poochhenge ki vinaash kab hoga to kahenge videshiyon se poochho। desh vaalon ne sthaapna ki zimmevaari li। videshi bhi koi to zimmevaari lenge na। hai bhi videsh vinaashi aur bhaarat avinaashi to bhaaratvaasiyon ne sthaapna ka kiya aur videshi vinaash ke kaarya mein vishesh nimitta banenge। bhaaratvaasi bachchon ne yagya ki sthaapna mein apni aahutiyaan daal kar sthaapna ki,yagya racha। aur aap log phir antim aahuti daalkar samaapta karo। phir jay-jaykaar ho jaayega। ab jaldi-jaldi antim aahuti daalo। sab mil karke ek sankalp ka svaaha karo to samaapti ho jaaegi। iski date kab bataaainge? 80mein karenge ya81 mein karenge। yeh date bataana। (ek baar madhuban mein phir se aayen) vinaash shuru hoga to sada ke liye aa jaayenge । isliye to yahaan bada haal bana rahe hain। sirf wireless ka set apna theek rakhna। yahaan ki wireless hai - viceless ki wireless। to wireless dvaara aavaaj aapko pahunch jaaegi ki aap aa jaao। agar wireless set nahin hoga to aavaaj bhi pahunch nahin sakega। direction nahin mil sakega। sthool saadhan dvaara aavaaj nahin aaega। viceless buddhi hi yeh antim direction catch kar sakegi। isliye jaldi-jaldi karenge to jaldi samay aa jaaega। pahle to powerful mike taiyaar karo। jis mike dvaara aavaaj bhaarat mein pahunche aur phir jaise un ka election hota hai to ek din pahle edvartaaijmenta saadhan sab banda kar dete hain। peechhe voting hoti hai। to pahle to mike dvaara aavaaj phailaao to vo bhi silence ho jaaegi phir result out hogi। abhi edvartaaijmenta mike kahaan tak taiyaar kie hain?pahle aavaaj phailega phir aisi dead silence hogi jo yeh aavaaj phailaane ka part bhi samaapta ho jaaega aur phir parivartan hoga। abhi to pahli stage chal rahi hai na। pahli stage mein time lagega, doosri mein time nahin lagega।

Australia party :- Australia ke sarva bachchon mein sabse badi visheshta kya hai? jaante ho? Australia vaalon ka jo doosre dharma mein part bajaane ka nimitta maatra samay tha woh samay abhi samaapta ho gaya, iseelie apne dharma ki pahchaan milne se sahaj aur jaldi aa gae aur phir auron ko bhi nikaalne ki bahut umang hai। to isse siddha hota hai ki temporary time jo doosre dharma mein gae hain, woh samaapta ho gaya। isliye yeh bhi visheshta hai ki jo bhi aate hain majority woh apne lagte hai। doosre dharma ke nahin lagte hain। aastreliyan athva videshi hote hue bhi chaatrak aatmaayen lagti hain to aatma ka chaatrakpan siddha karta hai ki apne dharma vaale hain। aap logon ko bhi aise hi mahsoos hota hai na ki galti se doosri daali par chale gae hain। seva ke liye yeh bhi ek thode samay ka part mila hua hai। nahin to videsh ki seva kaise hoti? vahaan vaalon ko nimitta bana ke videsh ki seva kara rahe hain। jaise kalpa pahle ka gaayan bhi hai ki paandav gupta vesh mein yahaan-vahaan seva ke liye gae the। to aap bhi roop-dharma mein parivartan karke paandavsena seva ke liye gae ho। lekin ho `paandavsena'। ab to dharma,desh, gun aur karttavya sab badal gaya na?Australia nivaasi ke bajaae apne ko vahaan rehte bhi madhuban nivaasi samajhkar rehte ho na। janma ka ghar madhuban hai। saakaar ghar madhuban aur niraakaari ghar paramdham। Australia aapka daphtar hai। jaise office mein kaarya ke liye jaate hain aise aap bhi seva ke liye ja rahe ho। daphtar mein jaate hain to ghar to nahin bhoolta hain na। to ghar ki address agar aapse koi poochhe to kya denge? (paandav bhavan) isi smriti mein rahne se sada upraam avastha mein rahenge। daphtar ki vastu mein kabhi lagaav nahin hota kyonki samajhte hain ki yeh seva ke liye cheejen hain। hamaari nahin। to aise hi upraam rehte ho? kitni bhi pyaari cheez ho ya aakarshit karne vaale seva ke saathi ho lekin daphtar mein kaam karne vaalon ke liye niyam hota hai, kaam ke liye saathi bane phir nyaare। agar galti se aapas mein pyaar ho jaata hai to achha nahin maana jaata। ghar vaalon se sneh hota hai। daphtar vaalon se kaam chalaana hota hai, to aise chalo।

Australia vaalon ne seva to badhaai hai na। abhi kitne sthaan hain vahaan (5) harek ko raajya karne ke liye apni-apni praja to zaroor banaani hi hai। (vinaash mein ham logon ka kya hoga?) vinaash mein Australia saara ek hi taapu ban jaaega। kuchh paani mein aa jaaega kuchh oopar rah jaaega। aap log safe rahenge। vinaash ke pahle hi aap logon ko aavaaj pahunchega। jab tum sabhi safe sthaan par pahunch jaayenge phir vinaash hoga। jaise gaayan hai bhatthi mein billi ke poongare safe rahe…to jo bachche baap ki yaad mein rahne vaale hain,woh vinaash mein vinaash nahin honge lekin svechchha se shareer chhodenge,na ki vinaash ke sarakmastaansej ke beech mein chhodenge। iske liye ek buddhi ki line clear ho aur doosra ashareeri banne ka abhyaas bahut ho। koi bhi baat ho to aap ashareeri ho jaao। apne aap shareer chhodne ka jab sankalp hoga to sankalp kiya aur chale jaayenge। iske liye bahut samay se practice chaahiye। jo bahut samay ke snehi aur sahayogi rehte hain unko ant mein madad zaroor milti hai। aise anubhav karenge jaise sthool vastra utaar rahe hain। aise hi shareer chhod denge। saara din mein chalte-chalte beech-beech mein ashareeri banne ka abhyaas zaroor karo। jaise traffic control ka record bajta hai to vaise vahaan kaarya mein rehte bhi beech-beech mein apna programme aape hi set karo to link juta rahega। isse abhyaas hota jaaega।

aap logon mein yeh bhi ek visheshta hai ki jab chaaho naukri chhod sakte ho jab chaaho kar sakte ho। nirbandhan ho। sirf man aur sanskaaron ka bandhan na ho। vaise deh aur deh ke dharmon se free ho। aadhe bandhanon se pahle hi free ho, baaki thode bandhanon ko yaad aur seva se khatma kar do। sabhi high jump lagaane vaale ho।