Avyakt murli for Monday 23 May 1983

>

23-05-83 om shanti avyakt baapdaada madhuban

chhode to chhooto!

naye vishwa ke parivartak, sarva aatmaon ke parmapriy shiv baba apne aadi ratna bachchon prati bole:-

aaj baapdaada apne aadi sthaapna ke kaarya mein nimitta bane hue sahayogi bachchon ko dekh rahe hain। sabhi sahayogi bachchon ke bhaagya ko dekh harshit ho rahe hain। sthaapna ke nakshe ko dekh rahe the। aadi kaal is shreshtha braahmaanon ke sansaar ki history aur jaagraaphi ko dekh rahe the। kaun-kaun shreshtha aatmaayen kis samay kis sthaan par aur kis vidhi poorvak sahayogi bane hain। kya dekha? teen prakaar ke sahayogi bachche dekhe। ek baapdaada ke alaukik karttavya ko dekh baapdaada ki mohni moorta, roohaani seerat ko dekh bina kuchh sochne ki mehnat ke dekha aur dekhne se kalpa pahle ki smriti ke sanskaar pratyaksha ho gaye। second mein dil se nikla yeh vo hi mera baba hai। aur baap ne bhi second mein sveekaar kiya ki yeh vo hi mera bachcha hai। aise bina mehnat ke sahaj baap ke sneh mein samaaye hue sahayogi ban gaye। saptaah course ki bhi mehnat nahin। lekin eeshvareey sneh ke force se baap aur bachchon ka milan ho gaya। ek hi shabd mein jeevan ke saathi ban gaye। bachchon ne kaha tum hi mere, baap ne kaha tum hi mere। mehnat ka savaal nahin। aise second ke saude vaale bina mehnat,muhabbat mein samaaye hue hain। doosre nimitta bane hue shreshtha aatmaon ke tyaag, tapasya aur seva ke sample ko dekh sauda karne vaale hain। pahle group ne baap ko dekha। doosre group ne gyaan gangaaon ke sample ko dekha। buddhibal dvaara sahaj baap ko jaana aur sahayogi bane। phir bhi doosra group bhi bachchon dvaara baap ke saakaar sambandh mein aaye। niraakaar ko bhi saakaar mein sarva sambandhon mein paaya। isliye saakaar roop mein saakaar dvaara sarva anubhav karne ke kaaran saakaari paalna ke lift ki gift li। yeh bhaagya koton mein koi, koi mein bhi koi ko praapta hua। aise lift ki gift lene vaale sthaapna ke kaarya mein seva ke kshetra mein nimitta bani hui aadi aatmaayen, aise group ko nimantran de bulaaya hai। aise to aur bhi nimitta bane hue bachche hain। lekin vishesh thodon ko bulaaya hai। jaante ho kislie bulaaya hai? beech-beech mein foundation ko check kiya jaata hai। agar foundation jara bhi kamzor hota hai to foundation ka prabhaav sab par padta hai। seva ke kshetra mein seva ke nimitta foundation aap jaise ratna hain। pahla group yagya ki sthaapna ke foundation bane। seva ke nimitta bane। lekin seva ka pratyaksha pahla phal aap jaisa group hai। to seva ke pratyaksha phal ke roop mein va showcase ke pahle show pees aap shreshtha aatmaayen nimitta baneen। itna apna mahatva jaante ho? naye patton ki chamak,damak, raunak,umang-ullaas ke vistaar me aadi shreshtha aatmaayen chhip to nahin gaye ho! peechhe vaalo ko aage karte,svayan aage se peechhe to nahin ho gaye ho! yoon to baapdaada bhi bachchon ko apne se aage karte,lekin aage karke svayan peechhe nahin hote। kai bachche hoshiyaari se javaab dete hain ki peechhe vaalon ko ham chaans de rahe hain। chance bhale do lekin chancellor to raho na। itni jimmevaari samajhte ho? jo purooshaartha ke kadam ham uthaayenge humein dekh aur bhi aise umang utsaah ke kadam uthaayenge। yeh smriti sada rehti hai? naye,naye hain,lekin puraanon ki value apni hai। puraane patton se kitni davaaeeyaan banti hain। jaante ho na। puraani cheejon ka kitna moolya hota hai। puraani vastuen vishesh yaadgaar ban jaati hain। puraani cheejon ke vishesh myoojayam bante hain। puraanon ki value jaante hue usi value pramaan kadam utha rahe ho?apne aapko itna amoolya ratna samajhte ho?baap samaan udte panchhi ho?brahma baap ki paalna ka return de rahe ho? yeh saakaar paalna koi saadhaaran paalna nahin। is amoolya paalna ka return - amoolya banna aur banaana hai। vishesh paalna ka return, jeevan ke har kadam mein visheshta bhari hui ho। aise return de rahe ho? saare kalpa ke andar ek baar yeh paalna milti hai। aur uske adhikaari aap vishesh aatmaayen ho। aise apne adhikaar ke bhaagya ko jaante ho? to aaj aise bhaagyavaan bachchon se milne aaye hain। to samjha kyon bulaaya hai? result to dekhenge na!

yeh saara group to brahma baap ke har kadam par follow karne vaale hain na। kyonki in saakaar aankhon se dekha। sirf divya netra se nahin dekha। aankhon dekhi hui baat follow karna sahaj hoti hai na। aise sahaj purooshaartha ke bhaagya adhikaari aatmaayen ho। samjha kaun ho? jaana,main kaun?main kaun ki paheli pakki yaad hai na! bhool to nahin jaate ho na! baapdaada vatan mein is group ko dekh rooh-roohaan kar rahe the। kya rooh-roohaan ki hogi, jaante ho? dekh rahe the apne bhaagya ke moolya ko kitna jaana hai aur kitne is bhaagya ke smriti swaroop rehte hain! smriti swaroop so samartha swaroop। to kitne samartha swaroop bane hain? yeh dekh rahe the। vismriti aur smriti ki seedhi par utarte aur chadhte hain va sada smriti swaroop dvaara udti kala mein ja rahe hain! aise to nahin, puraane,puraani vidhipoorvak chalne vaale hain। jo udti kala ke bajaae ab tak bhi seedhi utarte chadhte rehte। yeh sab bachchon ki vidhi dekh rahe the। brahma baap bachchon ke sneh mein bole,sada har kadam mein sahaj aur shreshtha praapti ka aadhaar mujh baap samaan ek baat sada jeevan mein brahma baap ki taaveej ke roop mein yaad rakhen - ‘‘chhodo to chhooto’’। chaahe apne tan ki smriti ko bhulaae dehi abhimaani banne mein,chaahe sambandh ke lagaav se nashtomoha banne mein, chaahe alaukik seva ki saphalta ke kshetra mein,chaahe svabhaav sanskaaron ke samparka mein - sabhi baaton mein - ‘chhodo to chhooto’। yeh ‘mere-pan’ ke haath in daaliyon ko pakad daaliyon ke panchhi bana dete hain। is mere-pan ke haathon ko chhodo to kya ban jaayenge - ‘udte panchhi’। chhodna to hai nahin, banna to yahi hai - yeh nahin। lekin he aadhaar moorta shreshtha aatmaayen ‘‘ban gaye’’ yeh ceremony manaao। soch rahe hain, plan banaayenge, nahin। soch liya, kaun si ceremony manaayenge? har group function manaate hain na। aap log kaun sa samaaroh manaayenge?

aap to brahma baap ko follow karne vaale, brahma ke saathi bachche ho na। eeshvareey parivaar ki bujurga aatmaayen ho। aap sabke oopar baapdaada aur parivaar ki sada najar hai ki yahi hamaare aadi sample swaroop hain। saare parivaar ke liye, baap ki sarva aashaaon ke deepak ho। to kaun sa samaaroh karenge! baap samaan ban gaye,jeevanmukta aatmaayen ban gaye! nashtomoha smriti swaroop so samartha swaroop ban gaye! sankalp kiya aur bane। aisa samartha samaaroh manaao। taiyaar ho na! va abhi bhi sochte ho - karna to chaahiye,chaahiye nahin lekin baap ki sarva chaah poorn karne vaale ham aadi sample hain - aise nishchaybuddhi vijayi ratna,vijay ka samaaroh manaao। samjha kislie bulaaya hai! spashta ho gaya na। in sabhi ko taaj pahnaana। jimmevaari ke taajposhi manvaana, inhon se। isliye aaye ho na! bolte nahin ho। bujurga ho gaye ho। brahma baap ko kya dekha। abhi abhi bujurga aur abhi abhi michnu kishor। dekha na। follow father,haan ji karne mein michnu ban jaao aur seva mein bujurga। chhote bachchon ki raunak dekhi na - kitna maje se kehte the - haan ji, ji haan!

vishesh nimantran par vishesh aatmaayen aai hain, ab vishesh seva ki jimmevaari ka phir se samaaroh manaana। beech beech mein taaj utaar dete ho। abhi aisa tight kar jaana jo utaaro nahin। achha phir sunenge ki samaaroh ki result kya hui। achha।

sada sarva aatmaon ke nimitta, umang utsaah dilaane vaale,sada har purooshaartha ke kadam dvaara auron ko teevra purushaarthi banaane vaale,vyartha ko second mein chhodo aur chhooto karne vaale, sada brahma baap ko follow karne vaale, aise seva ke aadi ratnon ko,paalna ki bhaagyavaan vishesh aatmaon ko baapdaada ka yaad-pyaar aur namaste।’’

aamantrit bhaai bahnon ke group se:- sabhi apne ko visheshagya aatmaayen to samajhte ho na! vishesh aatmaayen ho ya banna hai? karenge,dekhenge,sochenge, aisi gen gen ki bhaasha vaale to nahin ho na। apne mahatva ko jaano ki ham sabka mahatva kitna hai। jitna baap bachchon ke mahatva ko jaante hain utna bachche apne mahatva ko sada yaad nahin rakhte। jaante hain lekin yaad nahin rakhte। agar yaad rehta - to sada hi samartha ban auron ko bhi samartha banaane ke, umang utsaah badhaane ke nimitta bante। to nimitta ho na?beeti so beeti kar liya hai। beeti ko bhula diya aur vartamaan,bhavishya sada umang utsaah vaala bana liya। chalte-chalte saadhaaran jeevan mein chalne vaale apne ko anubhav karte ho, lekin saadhaaran nahin ho। sada shreshtha ho। vyavhaar kiya, padhaai ki, pravritti sambhaali, yeh koi visheshta nahin hai। yeh bhi saadhaaranta hai। yeh to last number vaale bhi karte hain। to jo last number vaale bhi karte woh aadi ratna bhi karen to kya visheshta hui! aadi ratna arthaat har sankalp aur karma mein auron se vishesh ho। duniya vaalon ki bhent mein to sab nyaare ho gaye, lekin alaukik parivaar mein bhi jo saadhaaran purushaarthi hain unse vishesh ho। duniya ke hisaab se last number bhi vishesh hai lekin eeshvareey parivaar mein aadi ratna ho,vishesh ho। usi hisaab se apne ko dekho। bujurga sada chhoton ko achhe te achhi sahaj raay dene vaale, raasta dikhaane vaale hote hain। aise aap mukh se bolne vaale nahin lekin karke dikhaane vaale ho। to har kadam, har karma aisa hai jo eeshvareey parivaar ki aatmaon ko vishesh dikhaai de।

yahi vishesh aatmaon ka karttavya hai na। jo aap vishesh aatmaon ko dekhe use baap ki smriti aa jaae। jaise dekho yahaan madhuban mein abhi bhi saakaar roop mein deedi, daadi ko dekhte hain to unhon ke karma mein vishesh kya samaaya hua dikhaai deta hai? baap dikhaai deta hai na! yeh bhi saakaar aatmaayen hain na। yeh brahma jaisi vishesh paartadhaari to nahin, niraakaar shiv baap jaisi bhi nahin, brahma jaisi bhi nahin। brahman hain। to woh bhi brahman, aap bhi brahman to jaise woh vishesh nimitta aatmaayen hain, kaise nimitta baneen? jimmevaari samajhti hain na। jimmevaari ne hi vishesh bana diya। aise hi svayan ko bhi anubhav karte ho na। aap bhi jimmevaar ho na। ya deedi-daadi hi jimmevaar hain। seva ke kshetra mein to aap hi nimitta ho na। chaaron or baapdaada ne sabhi vishesh aatmaon ko nimitta banaaya hai। koi kahaan, koi kahaan। itni jimmevaari sada smriti mein rahe। jaise deedi-daadi ko nimitta dekh rahe ho। aise hi aap logon se sabko anubhav ho। woh samjhen ki yeh aadi ratna hain, inhon se humein vishesh umang utsaah ki prerna milti hai। yeh kehti to nahin hain na ki ham deedi-daadi hain,hamko maano,lekin karma svatah hi aakarshit karte hain। aise hi aap sabke vishesh karma sabko aakarshit karen। itni jimmevaari hai। dheele to nahin ho na! kya karen, kaise karen,double jimmevaari hai। aise kahne vaale nahin। chhoda aur chhoota। itni behad ki jimmavaari hote bhi baap ko dekho na। sthool jimmevaari bhi dekhi na। shivbaaba ki baat kinaare kar do,lekin brahma baap ko to saakaar mein dekha na। brahma baap jitni jimmevaari sthool mein bhi kisi ko nahin hai। aap sochenge kya karen vaayumandal mein rehte hain। vibration kharaab rehte hain। bagule thoongen lagaate rehte hain। chaaron or aasuri sampradaay hai। lekin brahma baap ne aasuri sampradaay ke beech nyaara pyaara bankar dikhaaya na। to follow father।

abhi kya karenge? yahaan se jaao to sab anubhav karen ki hamaara umang utsaah badhaane vaale stambha aa gaye hain। samjha। aise baap ki ummeedon ke sitaare ho। chhote chhoton ki koi bhi baaten dil par nahin rakho। bujurgon ki dil pharaakhdil,badi dil hoti hai। chhoti dil nahin hoti। jaise brahma baap ne sabhi ki kamzoriyon ko samaakar shreshtha bana diya aise aap nimitta ho। kabhi bhi yeh nahin sochna - ki yeh aise karte hain,yeh to sunte hi nahin hain। na sunne vaale ko bhi sunne vaala banaana aapka kaam hai। woh chhote hain bade aap ho। badon ko badalna hai। chhote to hote hi natkhat hain। to unki kamzoriyon ko nahin dekho - bujurga ban kamzoriyon ko samaane vaale,baap samaan banaane vaale bano। itni jimmevaari hai aap logon ki। yeh jimmevaari phir se smriti dilaane ke liye bulaaya hai। samjha। saagar ke bachche ho na। saagar kya karta hai? samaata hai। sabka samaakar refresh kar dete hain। to aap bhi sabki baaton ko samaakar sabko refresh karne vaale। jo aaye woh anubhav kare ki is vishesh aatma ke sang se vishesh rang chadh gaya। sahayog mil gaya। aap hi - sahayog do, sahayog do, aisa kahne vaale to nahin ho na। sahayog dene vaale ho। jab aadi se sahayogi bane ho to ant tak sahayog dene vaale saathi banenge na। itne sahayog denge to chhote to ud jaayenge। jis bhi sthaan par aap log jaayenge woh sthaan udne vaala sthaan ban jaayega na। aap udnakhtole bankar jaao, jo bhi baithe, samparka mein aaye woh ud jaae। baapdaada ko khushi hai,kaun si? kitne saathi hain! jab samaan ko dekha jaata hai to samaan bachchon ko dekh baap ko khushi hoti hai। abhi yahaan thode aaye hain,aur bhi hain,jitne bhi aaye hain, utnon ko bhi dekh baap khush hote hain। ab to udnakhtola ban sabko udaao। hamaare bhaai itni mehnat kar rahe hain, taras aata hai na। sahayog do aur udaao।

yahi seva hai vishesh aatmaon ki। jigyaasu samjhaaya, course karaaya, mela karaaya, kiya। yeh sab karte rehte hain। melen mein bhi aap vishesh aatmaon ki visheshta ko dekhen। bas aapka khada hona aur sabhi ko umang aana। kaam karne vaalon ko vishesh umang utsaah ka hi sahayog chaahiye hota hai। kaam karne vaale aapke chhote bhaai behen bahut aa gaye hain। aap bujurgon ka kaam hai un saathiyon ko sneh ki drishti dena,umang utsaah ka haath badhaana। aapko dekhkar baap yaad aa jaae। sabke mukh se nikle -‘yeh to baap ke swaroop hain’। jaise in donon ke liye (deedi-daadi ke liye) nikalta hai ki yeh baap swaroop hai। kyonki seva mein practical karma kar rahi hain। to aise hi dridh sankalp ka samaaroh zaroor manaana। kya samjha? aap log to toofaanon mein nahin aate ho na। tuphaanon se paar hone vaale। toofaanon mein aane vaale nahin। aap example ho na। aapko dekhkar sab samajhte hain aise hi chalna hai, aise hi hota hai। to itna attention rahe। achha।

sevaadhaariyon ko to sada hi udte rehna chaahiye -kyonki yagya seva ka bal bahut hai। to sevaadhaari balvaan ban gaye na। yagya seva ka kitna gaayan hai। agar yagya seva sachchi dil se karte hain to ek second ka bhi bahut phal hai। aap log to kitne din seva mein rahe ho। to phalon ke bhandaar ikatthe ho gaye। itne phal jama ho gaye jo 21 peedhi tak woh phal khaate hi rahenge। sevaadhaari vahaan jaakar maaya ke vash nahin ho jaana। sada seva mein busy rehna। mansa se shuddh sankalp ki seva aur samparka sambandh va vaani dvaara parichay dene ki seva। sada hi seva mein busy rehna। seva ka part avinaashi hai। chaahe yahaan raho chaahe kahin bhi jaao, sevaadhaari ke saath sada hi seva hai। sada ke sevaadhaari ho। seva mein busy rahenge to maaya nahin aayegi। jab khaali sthaan hota hai to doosre aate hain। machchhar bhi aayenge, khatmal bhi aayenge। isliye sada busy raho to maaya aayegi hi nahin। mehnat nahin karni padegi। maaya namaskaar karke chali jaayegi। aise bahaadur bankar ja rahe ho! aise to nahin vahaan jaakar kahenge, aaj krodh aa gaya,aaj lobh, moh aa gaya…maaya paper legi, woh bhi sun rahi hai ki yeh vaayda kar rahe hain। jahaan baap hai vahaan maaya kya karegi। sada baap saath hai ya alag hai। kumaar akele to nahin samajhte ho। aise to nahin koi sunne vaala nahin,koi bolne vaala nahin… beemaar padenge to kya karenge?doosra saathi yaad to nahin aayega! doosra saathi laayenge to uska sunna bhi padega, khilaana bhi padega। sambhaalna bhi padega। aisa bojh uthaane ki jaroorat hi kya hai। sada halke rahon। sada yugal roop ho, doosri yugal kya karenge? kabhi sankalp aata hai beemaar padte ho tab aata hai? jis sambandh ki yaad aaye usi sambandh se baap ko yaad karo, to beemaari mein soye soye bhi aisa achha khaana bana lenge jaise doosra bana gaya। to sada saath rehna, akela hoon nahin, combined hoon। aap aur baap donon combined ho,alag koi kar nahin sakta, yeh challenge karo। challenge karne vaale ho na ki ghabraane vaale। achha –

personal mulaakaat

prashn:- sangamayugi brahman jeevan ka lakshya kya hai? us lakshya ko praapta karne ki vidhi kya hai?

uttar:-sangamayugi brahman jeevan ka lakshya hai sada santushta rehna aur doosron ko santushta karna। brahman arthaat samajhdaar, svayan bhi santushta rahenge aur doosron ko bhi rakhenge। agar doosre ke asantushta karne se asantushta hote to sangamayugi brahman jeevan ka sukh nahin le sakte। shakti swaroop ban doosron ke vaayumandal se svayan ko kinaare kar lena arthaat apne ko safe kar lena yahi saadhan hai is lakshya ko praapta karne ka। doosre ki asantushtata se svayan ko asantushta nahin hona hai। doosra kisi bhi prakaar se asantushta karne ke nimitta bane to svayan ko kinaara karke aage badhte jaana hai,rookna nahin hai।

prashn:- kaun se sanskaar apne niji sanskaar bana lo to sada udti kala mein udte rahenge?

uttar:-apna niji sanskaar banaao ki har baat mein mujhe aage badhna hai। doosra badhe ya na badhe। doosre ke peechhe svayan ko neeche nahin aana hai। sahaanubhooti ke kaaran sahayog dena doosri baat hai lekin doosre ke kaaran svayan neeche aa jaana yeh theek nahin। na vyartha suno, na dekho। seva ke bhaav se nyaara hokar dekho। doosre ke kaaran apna samay aur khushi na ganvaao to sada udti kala mein jaate rahenge।