Daily Murli for Tuesday 1 November 2022

01-11-2022 praatahmurli om shanti "baapdaada"' madhuban

meethe bachche - apni buddhi kisi bhi dehdhaari mein nahin latkaani hai, ek videhi baap ko yaad karna hai aur doosron ko bhi baap ki hi yaad dilaana hai

prashn:- apna jeevan heere jaisa shreshtha banaane ke liye mukhya kin baaton ka attention chaahiye?

uttar:- 1- bhojan bahut yogayukta hokar banaana aur khaana hai। 2- ek do ko baap ki yaad dilaakar jeeydaan dena hai। 3- koi bhi vikarma nahin karna hai। 4- phaaltu baat karne vaalon ke sang se apni sambhaal karni hai, jharmui-jhagmui nahin karna hai। 5- kisi bhi dehdhaari mein apni buddhi ki aasakti nahin rakhni hai, deh-dhaari mein latakna nahin hai। 6- kadam-kadam par avinaashi surgeon se raay lete rehna hai। apni beemaari surgeon se nahin chhipaani hai।

om shanti। bachche kiski yaad mein baithe hain? (shivbaaba ki) shivbaaba ko hi yaad karna hai aur koi bhi dehdhaari ko yaad nahin karna hai। tumhaare saamne yeh dehdhaari baitha hua hai, inko bhi yaad nahin karna hai। tumko yaad sirf ek videhi ko karna hai, jisko apni deh nahin hai। yeh mama baba athva ananya serviceable jo bachche hain, woh sab seekhte hain shivbaaba dvaara। to yaad bhi shivbaaba ko hi karna hai। bhal koi bachche jaakar kisko samjhaate hain to bhi buddhi mein samajhna hai ki shivbaaba ne inko padhaaya hai। buddhi mein shivbaaba ki yaad rahni chaahiye na ki dehdhaari ki। agar is dehdhaari ko tum yaad karte ho, to yeh common ho jaata hai। baap kehte hain kabhi bhi dehdhaari mein latakna nahin hai। tumko yaad ek ko karna hai - jo sabhi ko sadgati dene vaala hai। agar is saakaar ko yaad kiya to woh yaad nishphal hai। jaise laukik baap ko bachche yaad karte hain, unse koi faayda nahin hota। koi braahmani ko yaad kiya ki hamko phalaani braahmani padhaave, to nishphal hua। koi ki bhi yaad nahin rahni chaahiye। hamko shivbaaba padha rahe hain, kalyaankaari shivbaaba hai। dehdhaari par kabhi balihaar nahin jaana hota hai। yeh baba bhi tumko kehte hain manamnaabhav। dehdhaari ko yaad kiya to durgati ko paayenge। baap jaante hain koi-koi ki braahmani ke saath buddhi jut jaati hai, yeh wrong hai। dehdhaari mein aasakti nahin honi chaahiye। baba ka pharmaan hai maamekam yaad karo। subah ko uthkar mujhe yaad karo। dehdhaari ko laukik kaha jaayega। unko yaad nahin karna hai। ek mujh niraakaar ko hi yaad karo। gaayan bhi ek ka hi hai। shivaae namah, shiv hai videhi। varsa tumko baap se lena hai। yeh deh bhi unki nahin hai।

baap kehte hain is shareer dvaara main sirf tumko padhaata hoon, kyonki mujhe apna shareer nahin hai isliye inka aadhaar leta hoon। kalpa pahle in dvaara mainne tum bachchon ko sahaj raajayog sikhaaya tha, jisse tum paavan bane the। meri seva hi yeh hai - patiton ko paavan banaana। baaki kripa ya aasheervaad maangana phaaltu hai। yeh baaten bhaktimaarga mein chalti hain, yahaan nahin hain। aise bhi nahin koi beemaar ho jaae, main theek kar doon, yeh mera dhandha nahin hai। pukaarte hain ham patiton ko aakar paavan banaae durgati se sadgati mein le chalo। gaate hain parantu arth nahin jaante। bhagat to saari duniya mein hain, woh sab kisko yaad karte hain? ek patit-paavan baap ko। saari duniya ke manushyamaatra ka woh liberator hai, guide bhi hai। duhkh se liberate kar paramdham mein le jaane vaala baap hi hai। to baap ki shreemat par chalna chaahiye। kadam-kadam par raay leni chaahiye ki is haalat mein kya karen? surgeon to ek hi hai। yeh (brahma) surgeon ke rahne aur bolne ki jagah hai। is surgeon jaisi mat koi aur de na sake। bachchon ko time vesta nahin karna chaahiye। din pratidin aayu kamti hoti jaati hai। vinaash saamne khada hai - gaphlat ki to bahut pachhtaana padega। jharmui-jhagmui karne mein time ganvaane se tumhaara bahut nuksaan hota hai। tumko auron ko bachaana hai। manushya to ek do ko baap se milaate nahin aur hi door karte hain। is samay sabki utarti kala hai to zaroor ulti mat denge। bachchon ko ab gyaan mila hai to koi bhi vikarma nahin karna chaahiye। chhipaana nahin chaahiye। yeh to tum jaante ho ham janma-janmaantar paap karte hi aaye hain। baap ka bankar agar paap karte honge to aur kya kahenge। yeh kehte hain hamko paramatma padhaate hain aur khud paap karte rehte hain! paap karke phir na bataane se woh bojha utarta nahin। aadat pakki ho jaati hai। samajhte hain hamko koi dekhta nahin hai। bhagwan to dekhta hai na। nahin to saza kaise milti hai - garbha mein। dil andar khaata hai ki hamse yeh paap hua। samjho koi vikaar mein jaakar phir yahaan aakar baithte hain। baap ko to maaloom padta hai - bahut hi tuchchha buddhi hain jo samajhte nahin, paap karte rehte hain, sunaate nahin। kai baaten saakaar baap bhi jaan lete hain, parantu bachche sunaate nahin hain। baap kehte hain paap karte rahenge to vriddhi hoti rahegi phir sauguna danda bhogna padega। chor chori karta rehta hai, unko chori bigar kuchh soojhta hi nahin hai। unko jel bird kaha jaata hai। baap bachchon ko samjhaate hain ki sivaae baap ki yaad dilaane ke aur koi jharmui-jhagmui ki phaaltu baat kare to samjho yeh dushman hai। phaaltu baaten na karni hai, na sunni hai। ek do ko saavdhaani dete raho ki shivbaaba ko yaad karo। koi ko phir gussa bhi lagta hai ki phalaana mujhe kyon kehta hai? parantu tumhaara farja hai yaad dilaana। yaad se vikarma vinaash honge। jab tak karmaateet avastha nahin aai hai to mansa-vaacha-karmana kuchh na kuchh bhoolen to hoti rehti hain। karmaateet avastha pichhaadi mein aayegi। so bhi thode paas with honour honge। jo service nahin karte unki yeh avastha aayegi nahin। service par jo rehte hain woh ek do ko yaad karaate rehte hain - parampita paramatma ke saath tumhaara kya sambandh hai? baba apna misaal bataate hain ki main bhi bhojan par baithta hoon, snaan karta hoon, to mujhe bhi yaad dilaao ki shivbaaba ko yaad karo। bhal khud yaad na bhi kare, parantu baba ka direction amal mein laana chaahiye। agar apna kalyaan karna chaahte ho to yaad dilaao ek do ko। brahma bhojan ki bahut mahima hai। bhojan banaane vaale braahmanon ka yog theek chaahiye tab to bhojan mein taakat aayegi। yaad se hi tumko jeeydaan milta hai। apna heere jaisa jeevan banaana hai। sahaj te sahaj baat hai mujhe yaad karo, pavitra bano। patit banen to sauguna danda pad jaayega। mujh baap ko yaad karte rahenge to vikarma bhi vinaash honge aur ham varsa bhi denge। thoda yaad karenge to varsa bhi thoda milega। geeta mein bhi aadi aur ant mein aata hai manamnaabhav। koi bhi dehdhaari ki yaad nahin aani chaahiye। shivbaaba ko yaad karenge to tumhaara kalyaan hoga। paap dagdha honge। ganga mein snaan karne se koi paap vinaash nahin hote hain। bhal kehte hain bhaavna hai parantu bhaavna hi wrong hai। ganga patit-paavni nahin hai। patit-paavan ek baap hai। koi bhi sthool cheez ko tumhein yaad nahin karna hai। ek shivbaaba ko hi yaad karna hai।

aatma kehti hai - he god father, he parampita paramatma। baap kehte hain main aaya hoon tumko bilkul sahaj upaay bataata hoon ki mujhe yaad karo। ant mein meri yaad rahegi to tum mere paas chale aayenge। jeev aur aatma hai na। manushya aatma ko paap aatma, punya aatma kaha jaata hai। punya paramatma nahin kaha jaata hai। aatma hi patit banti hai to phir shareer bhi patit milta hai। baap aatmaon se baat karte hain। aatma avinaashi hai। baap bachche donon avinaashi hain। baap kehte hain laadle, sikeeldhe bachchon, main ek hi baar aakar tumko paavan banaata hoon। tumko aatma-abhimaani banaae kehta hoon ashareeri bhav, mujh baap ko yaad karo। bas yeh hai aatma ki yaatra। woh hoti hai shaareerik yaatra। yahaan to tum jaante ho ki aatmaon ko ab vaapis jaana hai। yog agni se hi tumhaare janma-janmaantar ke paap katenge। tumhein brahman banna hai। nahin banenge to praja mein halka pad paayenge। kuchh na kuchh sunte hain to uska vinaash nahin hoga। jo achhi tarah padhenge, padhaayenge vahi oonch pad paayenge। sahaj te sahaj baat hai yaad ki। parampita paramatma ko yaad karna hai। oonch te oonch ek hi bhagwan hai - isliye geet bhi shivbaaba ka hi gaane se theek hai। tumhaari buddhi vahaan rahni chaahiye ki shivbaaba hamko sunaate hain। abhi naatak poora hota hai। ham sab actors ko ab shareer ka bhaan chhod vaapis ghar jaana hai। baap ko yaad karne se vikarma vinaash honge phir jitna yaad karenge utna oonch pad paayenge। jaise ek pillar banaate hain na, jahaan daudi lagaae haath lagaate hain phir jo pahle pahunchen। tumhaara pillar shivbaaba hai। yaad ke yaatra ki daudi hai। jitna yaad karenge utna jaldi pillar tak pahunchenge phir aana hai svarga mein। is yaatra mein thakna nahin hai। ab to duhkhadhaam khatma hua। hamko to sukhdhaam, shantidham mein jaana hai। aaj duhkhadhaam hai, kal sukhdhaam hoga। ab yahi baap ki yaad sabko dilaao। baap ne hatheli par bahishta laaya hai। kehte hain maamekam yaad karo to beda paar ho jaayega। time vesta mat karo। bhakti mein bhi bahut jharmui-jhagmui ki। bhakti mein kitni radiyaan maarte hain ki bhagwan hamaari sadgati karne aao। ab baap aaye hain, samjhaate hain bachche pavitra bano। bhal yugal ikatthe raho, dekho aag to nahin lagti hai? aag lagi to pad bhrashta ho padega। ek baar aag lagi to phir lagti hi rahegi, isliye apne ko sambhaalna bhi hai। yog mein rahne ki badi practice chaahiye। yog mein bhal kitna bhi aavaaj ho, earthquake ho, bomb giren, dekhen kya hota hai। in baaton se darna nahin hai। yeh to jaante hi hain ki rakta ki nadiyaan bhaarat mein hi bahni hai। partition mein rakta ki nadiyaan bahi na। ajun to bahut aaphten aani hain, tumko dekhna hai, mirooa maut malooka shikaar। tum pharishte ban rahe ho। jo achhe serviceable honge vahi us samay thahar sakenge, ismen bahut mazbooti chaahiye। shivbaaba ko yaad karna hai। shivbaaba jaisa meetha baap phir kabhi nahin mil sakta। unki hi mat par chalna hai। mukhya baat hi hai pavitra banne ki। patit unko kaha jaata, jo vikaar mein jaate hain। devtaayen hain hi sampoorn nirvikaari। yahaan to sab hain vikaari। woh hai - shivaalay। yeh hai vaishyaalay। ab vikaari se nirvikaari ban svarga ka raajya bhaagya lena hai। baap kehte hain main paavan duniya sthaapan karne aaya hoon। tumko main paavan duniya ka maalik banaaoonga। sirf pavitra banne ki madad karo, sabko baap ka nimantran do। paanch hajaar varsha pahle bhi jab mainne geeta sunaai thi to kaha tha maamekam yaad karo to paavan banenge। chakra ko phiraayenge to chakravarti raaja raani banenge। health wealth aur happiness milegi। satayug mein sab kuchh tha na। baap kehte hain mere ko yaad karo to kabhi 21 janma rogi nahin banenge। svadarshan chakra phiraate rahenge to tum chakravarti raaja banenge। main pratigya karta hoon - bhagvaanuvaach, baba sirf alpha aur be padhaate hain। manamnaabhav aur madhyaaji bhav, bas। padhaai bhi kitni sahaj hai। bas dil par yeh likh do। koi virle vyaapaari is dhandhe ki yukti ustaad se lete hain। woh dhandhe aadi bhal karo, mana thode hi hai। achha!

meethe-meethe sikeeldhe bachche jo khud bhi alpha aur be ko yaad karte aur doosron ko bhi yaad dilaate hain vahi pyaare lagte hain। aise bachchon ko maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) yaad ki yaatra mein thakna nahin hai, ek do ko saavdhaan karte baap ki yaad dilaani hai। apna time vesta nahin karna hai। jharmui-jhagmui (parchintan) na karna hai, na sunna hai।

2) paas with honour hone ke liye mansa-vaacha-karmana koi bhi bhool nahin karni hai।

vardaan:- dridh sankalp dvaara asambhav ko sambhav kar saphalta ka anubhav karne vaale nishchit vijayi bhav

sangamayug ko vishesh vardaan hai - asambhav ko sambhav karna isliye kabhi yeh nahin socho ki yeh kaise hoga। ‘kaise' ke bajaae socho ki ‘aise' hoga। nishchay rakhkar chalo ki yeh hua hi pada hai sirf practical mein laana hai, repeat karna hai। dridh sankalp ko use karo। sankalp mein bhi kya-kyon ki halchal na ho to vijay nishchit hai hi। dridh sankalp use karna arthaat sahaj saphalta praapta kar lena।

slogan:- sada karnakraavanhaar baap ki smriti rahe to bhaan aur abhimaan samaapta ho jaayega।