Daily Murli for Saturday 13 April 2024

13-04-2024 praatahmurli om shanti "baapdaada"' madhuban

“meethe bachche - baba 21 janma ke liye tumhaari dil aisi bahla dete hain jo tumhein dil bahlaane ke liye mele-malaakhde aadi mein jaane ki darkaar nahin''

prashn:- jo bachche abhi baap ke madadgaar bante hain unke liye kaun-si guarantee hai?

uttar:- shreemat par raajdhaani sthaapan karne mein madadgaar banne vaale bachchon ke liye guarantee hai ki unhein kabhi kaal nahin kha sakta। satayugi raajdhaani mein kabhi akaale mrityu nahin ho sakti hai। madadgaar bachchon ko baap dvaara aisi prize mil jaati hai jo 21 peedhi tak amar ban jaate hain।

om shanti। bane banaaye srishti chakra anusaar kalpa pahle muaaphik shiv bhagvaanuvaach। ab apna parichay to bachchon ko mil gaya। baap ka bhi parichay mil gaya। behad ke baap ko to jaan liya aur behad ke srishti ke aadi-madhya-ant ko bhi jaan liya। nambarvaar purooshaartha anusaar koi achhi reeti jaan jaate hain jo phir samjha bhi sakte hain। koi adhoora, koi kam। jaise ladaai mein bhi koi commander chief, koi captain, koi kya bante hain। raajaai ki maala mein bhi koi saahookaar praja, koi gareeb praja, nambarvaar hain। bachche jaante hain barobar ham khud shreemat par srishti par shreshtha raajdhaani sthaapan kar rahe hain। jitni-jitni jo mehnat karte hain utni-utni baap se prize milti hai। aajkal shanti ke liye raay dene vaale ko bhi prize milti hai। tum bachchon ko bhi prize milti hai। woh unko nahin mil sakti। unko har cheez alpakaal ke liye milti hai। tum baap ki shreemat par apni raajdhaani sthaapan kar rahe ho। so bhi 21 janma, 21 peedhi ke liye guarantee hai। vahaan bachpan va javaani mein kaal khaata nahin। yeh bhi jaante ho na man, na chitta tha, ham aise sthaan par aakar baithe hain, jahaan tumhaara yaadgaar bhi khada hai। jahaan 5 hazaar varsha pahle bhi service ki thi। delvaada mandir, achalghar, guru shikhar hain। satguru bhi oonche te oonch tumko mila hai, jiska yaadgaar banaaya hua hai। achalghar ka bhi raaz tum samajh gaye ho। woh hui ghar ki mahima। tum oonch te oonch pad paate ho apne purooshaartha se। yeh hai wonderful tumhaara jad yaadgaar। vahaan hi tum chaitanya mein aakar baithe ho। yeh sab hai roohaani kaarobaar, jo kalpa pahle chali thi। unka poora yaadgaar yahaan hai। number one yaadgaar hai। jaise koi bada imtahaan paas karte hain to unke andar khushi, raunak aa jaati hai। furniture, paharvaais kitni achhi rakhte hain। tum to vishwa ke maalik bante ho। tumhaare se koi bhent kar nahin sakta। yeh bhi school hai। padhaane vaale ko bhi tum jaan gaye ho। bhagvaanuvaach, bhakti maarga mein jisko yaad karte ho, pooja karte ho, kuchh bhi pata nahin padta। baap hi sammukh aakar sab raaz samjhaate hain kyonki yeh yaadgaar sab tumhaare pichhaadi ki avastha ke hain। abhi result nahin nikli hai। jab tumhaari avastha sampoorn ban jaati hai, unka phir bhakti maarga mein yaadgaar banta hai। jaise rakshaabandhan ka yaadgaar hota hai। jab poori pakki raakhi baandh ham apna raajya bhaagya le lete hain, tab phir yaadgaar nahin manaate hain। is samay tumko sabhi matron ka arth samjhaaya hai। om ka arth samjhaaya hai। om ka arth koi lamba nahin hai। om ka arth hai aham aatma, mam shareer। agyaan kaal mein bhi tum deh-abhimaan mein rehte ho to apne ko shareer samajhte ho। din-pratidin bhakti maarga neeche girta jaata hai। tamopradhaan banta jaata hai। har cheez pahle satopradhaan hoti hai। bhakti bhi pahle satopradhaan thi। jab ek sat shivbaaba ko yaad karte the। the bhi bahut thode। din-pratidin vriddhi bahut honi hai। vilaayat mein jaasti bachche paida karte hain to unko inaam milta hai। baap kehte hain kaam mahaashatru hai। srishti ki bahut vriddhi ho chuki hai, ab pavitra bano।

tum bachche srishti ke aadi-madhya-ant ko ab baap dvaara jaan chuke ho। satayug mein bhakti ka naam nishaan nahin hai। abhi to kitni dhoomdhaam hai, mele malaakhde bahut lagte hain, jo manushya jaakar dil ko bahlaayen। tumhaara dil to baap aakar bahlaate hain 21 janmon ke liye। jo tum sadaiv bahalte rehte ho। tumko kabhi mele aadi mein jaane ka khyaal bhi nahin aayega। kahaan bhi manushya jaate hain sukh ke liye। tumko kahaan pahaadon par jaane ki darkaar nahin। yahaan dekho kaise manushya marte hain। manushya to satayug-kaliyug, svarga-narka ko bhi nahin jaante। tum bachchon ko to poora gyaan mila hai। baap nahin kehte hain ki mere saath tumko rehna hai। tumko gharbaar bhi sambhaalna hai। bachche juda tab hote hain jab koi khitkhit hoti hai। phir bhi tum baap ke sang rah nahin sakte ho। sab satopradhaan ban nahin sakte। koi sato, koi rajo, koi tamo avastha mein bhi hain। sab ikatthe rah nahin sakenge। yeh raajdhaani ban rahi hai। jo jitna-jitna baap ko yaad karenge, us anusaar raajdhaani mein pad paayenge। mukhya baat hai hi baap ko yaad karne ki। baap svayan baith drill sikhlaate hain। yeh hai dead silence। tum yahaan jo kuchh dekhte ho, unko dekhna nahin hai। deh sahit sabka tyaag karna hai। tum kya dekhte ho? ek to apne ghar ko aur padhaai anusaar jo pad paate ho, us satayugi raajaai ko bhi tum hi jaante ho, jab satayug hai to treta nahin, treta hai to dvaapar nahin, dvaapar hai to kaliyug nahin। ab kaliyug bhi hai, sangamayug bhi hai। bhal tum baithe puraani duniya mein ho parantu buddhi se samajhte ho ham sangamayugi hain। sangamayug kisko kaha jaata hai - yeh bhi tum jaante ho। purooshottam varsha, purooshottam maas, purooshottam din bhi is purooshottam sangam par hi hota hai। purooshottam banne ki ghadi bhi is purooshottam yug mein hi hai। yeh bahut chhota leap yug hai। tum log baajoli khelte ho, jisse tum svarga mein jaate ho। baba ne dekha hai kaise saadhu log athva koi-koi baajoli khelte-khelte yaatra par jaate hain। badi kathinaai uthaate hain। ab ismen kathinaai ki baat nahin। yeh hai yogbal ki baaten। kya yaad ki yaatra tum bachchon ko kathin lagti hai? naam to bahut sahaj rakha hai। kahaan sunkar dar na jaayen। kehte hain baba ham yog mein rah nahin sakte। baba phir halka kar dete hain। yeh hai baap ki yaad। yaad to sab cheezon ko kiya jaata hai। baap kehte hain apne ko aatma samjho। tum bachche ho na। yeh tumhaara baap bhi hai, maashook bhi hai। sab aashik unko yaad karte hain, ek baap akshar bhi kaaphi hai। bhakti maarga mein tum mitra-sambandhiyon ko yaad karte, phir bhi he prabhu, he eeshvar zaroor kehte ho। sirf pata nahin ki woh kya cheez hai। aatmaon ka baap to paramatma hai। is shareer ka baap to dehdhaari hai। aatmaon ka baap ashareeri hai। woh kabhi punarjanma mein nahin aate। aur sabhi punarjanma mein aate hain, isliye baap ko hi yaad karte hain। zaroor kabhi sukh diya hai। unko kaha jaata hai duhkh harta, sukh karta, parantu unke naam, roop, desh, kaal ko nahin jaante hain। jitne manushya utni baaten। anek mat ho gai hain।

baap kitna prem se padhaate hain। woh hai eeshvar, shanti dene vaala। kitna unse sukh milta hai। ek hi geeta sunaakar patiton ko paavan bana dete hain। pravritti maarga bhi chaahiye na। manushyon ne kalpa ki aayu laakhon varsha kah di hai, phir to anginat manushya ho jaate। kitni bhool ki hai। yeh knowledge tumko abhi milti hai phir praayah lop ho jaati hai। chitra to hain, jinki pooja hoti hai। parantu apne ko devta dharma ka samajhte nahin hain। jo jinki pooja karte hain, woh us dharma ke hain na। yeh samajh nahin sakte ki ham aadi sanaatan devi-devta dharma ke hain। unki hi vanshaavli hain। yeh baap hi samjhaate hain। baap kehte hain tum paavan the, phir tamopradhaan ban pade ho, ab paavan satopradhaan banna hai। kya ganga snaan se banenge? patit-paavan to baap hai। woh jab aakar raasta bataaye tab to paavan banen। pukaarte rehte hain parantu jaante kuchh bhi nahin। aatma pukaarti hai organs dvaara ki he patit-paavan baba hamko aakar paavan banaao। sab patit hain, kaam chita par jalte rehte hain। yeh khel hi aisa bana hua hai। phir baap aakar sabko paavan bana dete hain। yeh baap sangam par hi samjhaate hain। satayug mein hota hai ek dharma, baaki sab vaapis chale jaate hain। tum drama ko samajh gaye ho, jo aur koi nahin jaante hain। is rachna ka aadi, madhya, ant kya hai, duration kitna hai, yeh tum hi jaante ho। woh sab hain shoodra, tum ho brahman। tum bhi jaante ho number-vaar purooshaartha anusaar। koi gaphlat karte hain to unke register se dikhaai padta hai ki padhaai kam ki hai। characters ka register hota hai। yahaan bhi register hona chaahiye। yeh hai yaad ki yaatra, jiska koi ko bhi pata nahin hai। sabse mukhya subject hai yaad ki yaatra। apne ko aatma samajh baap ko yaad karna hai। aatma mukh se kehti hai ham ek shareer chhod doosra lete hain। yeh sab baaten yeh brahma baba nahin samjhaate hain। parantu gyaan saagar parampita paramatma is rath mein baithkar sunaate hain। kaha jaata hai gau mukh। mandir bhi yahaan bana hua hai, jahaan tum baithe ho। jaise tumhaari seedhi hai, vaise vahaan bhi seedhi hai। tumko chadhne mein thakaavat nahin hoti hai।

tum yahaan aaye ho baap se padhkar refresh hone ke liye। vahaan gorakhdhandha bahut rehta hai। shanti se sun bhi nahin sakenge। sankalp chalta rahega - koi dekh na le, jaldi ghar jaaoon। kitna ona (chinta) rehta hai। yahaan koi bhi ona nahin, jaise hostel mein rehte hain। yahaan eeshvareey parivaar hai। shantidham mein bhaai-bhaai rehte hain। yahaan hain bhaai-behen kyonki yahaan part bajaana hai to bhaai-behen chaahiye। satayug mein bhi tum hi aapas mein bhaai-behen the। unko kaha jaata hai advet raajdhaani। vahaan ladaai-jhagda kuchh bhi nahin hota। tum bachchon ko poori knowledge mili hai ki ham 84 janma lete hain। jisne jaasti bhakti ki hai, unka hisaab bhi baap ne bataaya hai। tum hi shiv ki avyabhichaari bhakti karna shuru karte ho। phir vriddhi hoti jaati hai। woh hai sab bhakti। gyaan to ek hi hota hai। tum jaante ho hamko shivbaaba padhaate hain। yeh brahma to kuchh bhi nahin jaante the। jo great-great grand father tha woh is samay yeh bane hain phir maalik bante hain, tat tvam। ek to maalik nahin banenge na। tum bhi purooshaartha karte ho। yeh hai behad ka school। iski branches dher hongi। gali-gali ghar-ghar mein ho jaayengi। kehte hain hamne apne ghar mein chitra rakhe hain, mitra-sambandhi aadi aate hain to unko samjhaate hain। jo is jhaad ke patte honge woh aa jaayenge। unhon ke kalyaan ke liye tum karte ho। chitron par samjhaana sahaj hoga। shaastra to dher padhe hain, ab sab bhoolne hain। baap hai padhaane vaala, vahi sachcha gyaan sunaate hain। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) dead silence ki drill karne ke liye yahaan jo kuchh in aankhon se dikhaai deta hai, use nahin dekhna hai। deh sahit buddhi se sabka tyaag kar apne ghar aur raajya ki smriti mein rehna hai।

2) apne characters ka register rakhna hai। padhaai mein koi gaphlat nahin karni hai। is purooshottam sangamayug par purooshottam banna aur banaana hai।

vardaan:- sada sarva praaptiyon se bharpoor rahne vaale harshitmukh, harshitchit bhav

jab bhi koi devi ya devta ki moorti banaate hain to usmein chehra sada harshit dikhaate hain। to aapke is samay ke harshitmukh rahne ka yaadgaar chitron mein bhi dikhaate hain। harshitmukh arthaat sada sarva praaptiyon se bharpoor। jo bharpoor hota hai vahi harshit rah sakta hai। agar koi bhi apraapti hogi to harshit nahin rahenge। koi kitna bhi harshit rahne ki koshish kare, baahar se hansenge lekin dil se nahin। aap to dil se muskaraate ho kyonki sarva praaptiyon se bharpoor harshitchit hai।

slogan:- paas with honour banna hai to har khajaane ka jama khaata bharpoor ho।