Daily Murli for Friday 12 April 2024

12-04-2024 praatahmurli om shanti "baapdaada"' madhuban

“meethe bachche - baap ka pyaar to sabhi bachchon se hai lekin jo baap ki raay ko phauran maan lete hain, unki kashish hoti hai। gunvaan bachche pyaar kheenchate hain''

prashn:- baap ne kaun-sa contract uthaaya hai?

uttar:- sabhi ko gulgul (phool) banaakar vaapas le jaane ka contract (theka) ek baap ka hai। baap jaisa contractor duniya mein aur koi nahin। vahi sarva ki sadgati karne aate hain। baap service ke bigar rah nahin sakte। to bachchon ko bhi service ka saboot dena hai। suna-ansuna nahin karna hai।

om shanti। roohaani baap roohaani bachchon ko samjhaate hain - bachche, apne ko aatma samajhkar baitho। yeh ek baap hi samjhaate hain aur koi manushya kisko samjha nahin sakte। apne ko aatma samjho - yeh 5 hazaar varsha ke baad baap hi aakar sikhlaate hain। yeh bhi tum bachche hi jaante ho। kisko bhi pata nahin hai ki yeh purushottam sangamayug hai। tum bachchon ko yeh yaad rahe ki ham purushottam sangamayug par hain, yeh bhi manmanaabhav hi hai। baap kehte hain - mujhe yaad karo kyonki ab vaapis jaana hai। 84 janma ab poore hue hain, ab satopradhaan ban vaapis jaana hai। koi to bilkul yaad hi nahin karte। baap to har ek ke purushaartha ko achhi reeti jaante hain। usmein bhi khaas yahaan hain athva baahar mein hain। baba jaante hain bhal yahaan baith dekhta hoon parantu meethe-meethe jo serviceable bachche hain, yaad unko karta hoon। dekhta bhi unko hoon, yeh kis prakaar ka phool hai, inmen kya-kya gun hain? koi to aise bhi hain jinmen koi gun nahin hai। ab aise ko baba dekh kya karenge। baap to chumbak pure aatma hai, to zaroor kashish karenge। parantu baba andar mein jaante hain, baap apna saara potaamel bataate hain to bachche bhi bataayen। baap batlaate hain ham tumko vishwa ka maalik banaane aaye hain। phir jo jaisa purushaartha kare। purushaartha jo bhi karte hain, woh bhi pata hona chaahiye। baba likhte hain - sabhi ka occupation likhkar bhejo athva unse likhvaakar bhejo। jo chusta samajhdaar braahmaniyaan hoti hain, woh sab likhva bhejti hain - kya dhandha karte hain, kitni aamadni hai? baap apna sab kuchh batlaate hain aur srishti ke aadi-madhya-ant ka gyaan sunaate hain। sabki avastha ko jaante hain। kisma-kisma ke variety phool hain na। (ek-ek phool dikhaakar) dekho, kaisa royal phool hai। abhi aisi khushbu hai, phir jab saara khil jaayega to first class shobha ho jaayegi। tum bhi in lakshmi-naaraayan jaise laayak ban jaayenge। to baap dekhte rehte hain, aise nahin ki sabko searchlight dete hain। jo jaisa hai vaisi kashish karte hain, jinmen koi gun nahin woh kya kashish karenge। aise vahaan chal-kar paai-paise ka pad paayenge। baba har ek ke gunon ko dekhte hain aur pyaar bhi karte hain। pyaar mein, nain geele ho jaate hain। yeh serviceable kitni service karte hain! inko service bigar aaraam nahin aata। koi to service karna jaante hi nahin। yog mein baithte nahin। gyaan ki dhaarna nahin। baba samajhte hain - yeh kya pad paayenge। koi bhi chhip nahin sakte। bachche jo saalim (achhe) buddhivaan hain, centre sambhaalte hain, unko ek-ek ka potaamel bhejna chaahiye। to baba samjhen ki kahaan tak purushaarthi hain। baba to gyaan ka saagar hai। bachchon ko gyaan dete hain। koi kitna gyaan uthaate hain, gunvaan bante hain - woh jhat maaloom pad jaata hai। baba ka pyaar sab par hai। is par ek geet hai - tere kaanton se bhi pyaar, tere phoolon se bhi pyaar। nambarvaar to hain hi। to baap ke saath love kitna achha chaahiye। baba jo kahe woh phauran kar dikhaayen to baba bhi samjhe ki baba ke saath love hai। unko kashish hogi। baap mein kashish aisi hai jo ekdam chatak jaayen। parantu jab tak kat (junk) nikli nahin hai to kashish bhi nahin hogi। ek-ek ko dekhta hoon।

baba ko serviceable bachche chaahiye। baap to service ke liye hi aate hain। patiton ko paavan banaate hain। yeh tum jaante ho, duniya vaale nahin jaante hain kyonki abhi tum bahut thode ho। jab tak yog nahin hoga tab tak kashish nahin hogi। woh mehnat bahut thode karte hain। koi na koi baat mein latak padte hain। yeh woh satsang nahin hai, jo suna woh sat sat karte hain। sarva shaastramai shiromni hai ek geeta। geeta mein hi raajayog hai। vishwa ka maalik to baap hi hai। bachchon ko kehta rehta hoon geeta se hi prabhaav niklega। parantu itni taakat bhi ho na। yogbal ka jauhar achha chaahiye, jismen bahut kamjor hain। abhi thoda time hai। kehte hain mithra ghur ta ghuraay… mujhe pyaar karo to main bhi karoon। yeh hai aatma ka love। ek baba ki yaad mein rahe, is yaad se hi vikarma vinaash honge। koi to bilkul yaad nahin karte hain। baap samjhaate hain - yahaan bhakti ki baat nahin। yeh baba ka rath hai, inke dvaara shivbaaba padhaate hain। shivbaaba nahin kehte hain ki mere paanv dhokar piyo। baba to haath lagaane bhi nahin dete। yeh to padhaai hai। haath lagaane se kya hoga। baap to hai sabki sadgati karne vaala। koton mein koi hi yeh baat samajhte hain। jo kalpa pahle vaale honge, vahi samjhenge। bholaanaath baap aakar bholi-bholi maataaon ko gyaan de uthaate hain। baba bilkul chadha dete hain - mukti aur jeevanmukti mein। baap sirf kehte hain - vikaaron ko chhodo। is par hi hangaama hota hai। baap samjhaate hain - apne ko dekho hamaare mein kya-kya avgun hain? vyaapaari log roz apna pota-mel phaayde-ghaate ka nikaalte hain। tum bhi potaamel rakho ki kitna samay ati pyaara baba, jo hamko vishwa ka maalik banaate hain, unko yaad kiya? dekhenge, kam yaad kiya to aapehi lajja aayegi ki yeh kya aise baba ko hamne yaad nahin kiya। hamaara baba sabse wonderful hai। svarga bhi hai saari srishti mein sabse wonderful। ve to svarga ko laakhon varsha kah dete hain aur tum kahenge 5 hajaar varsha। kitna raat aur din ka farka hai। jo bahut puraane bhakta hain un par baba kurbaan jaate hain। ati bhakti ki hai na। baba is janma mein bhi geeta uthaata tha aur naaraayan ka chitra bhi rakhta tha। lakshmi ko daaseepne se mukta kar diya to kitni khushi rehti hai। jaise ham yeh shareer chhod jaakar satayug mein doosra lenge। baba ko bhi khushi rehti hai ki ham jaakar prince gora banenge। purushaartha bhi karaate rehte hain। muphta mein kaise banenge। tum bhi achhi reeti baba ko yaad karenge to svarga ka varsa paayenge। koi to padhte nahin, na daiveegun dhaaran karte hain। potaamel hi nahin rakhte। potaamel sadaiv vahi rakhenge jo oonch banne vaale honge। nahin to sirf show karenge। 15-20 roz ke baad likhna chhod dete hain। yahaan to pareekshaayen aadi hain sab gupta। har ek ki qualification ko baap jaante hain। baba ka kehna phat se maan liya to kahenge aagyaakaari, farmaanbardaar hain। baba kehte hain abhi bachchon ko bahut kaam karna hai। kitne achhe-achhe bachche bhi faarakti dekar chale jaate hain। yeh kabhi kisko faarakti va divorce nahin denge। yeh to drama anusaar aaya hi hai bada contract uthaane। main sabse bada contractor hoon। sabko gul-gul banaakar vaapis le jaaoonga। tum bachche jaante ho patiton ko paavan banaane vaala contractor ek hi hai। woh tumhaare saamne baithe hain। koi ko kitna nishchay hai, koi ko bilkul nahin hai। aaj yahaan hain, kal chale jaayenge, chalan aisi hai। andar zaroor khaayega - ham baba ke paas rahkar, baba ka banke kya karte hain। service kuchh nahin karte to milega kya। roti pakaana, sabji banaana yeh to pahle bhi karte the। nai baat kya ki hai? service ka saboot dena hai। itne ko raasta bataaya।

yeh drama bada wonderful bana hua hai। jo kuchh hota hai tum practical dekh rahe ho। shaastron mein to shreekrishna ke charitra likh diye hain, lekin charitra hain ek baap ke। vahi sabki sadgati karte hain। in jaisa charitra koi ka ho na sake। charitra to koi achha hona chaahiye। baaki bhagaana, karna - yeh koi charitra nahin hai। sarva ki sadgati karne vaala ek baap hi hai। woh kalpa-kalpa aakar svarga ki sthaapna karte hain। laakhon varsha ki koi baat hi nahin।

to bachchon ko chhi-chhi aadten chhodna chaahiye। nahin to kya pad milega? maashook bhi gun dekh aashik honge na। aashik un par hoga jo unki service karte honge। jo service nahin karte woh kya kaam ke। yeh baaten bahut samajhne ki hain। baap samjhaate hain tum mahaan bhaagyashaali ho, tumhaare jaisa bhaagyashaali koi nahin। bhal svarga mein tum jaayenge, parantu praalabdha oonchi banaani chaahiye। kalpa kalpaantar ki baat hai। position kam ho jaata hai। khush nahin hona chaahiye ki jo mila woh achha। purushaartha bahut achha karna hai। service ka saboot chaahiye - kitnon ko aap samaan banaaya hai? tumhaari praja kahaan hai? baap-teacher sabko tadveer (purushaartha) karaate hain। parantu kiski takdeer mein bhi ho na। sabse bada aasheervaad to yeh hai jo baap apna shantidham chhodkar patit duniya aur patit shareer mein aate hain। nahin to tumko rachta aur rachna ki knowledge sunaaye kaun? yeh bhi kiski buddhi mein nahin baithta ki satayug mein raam raajya aur kaliyug mein raavan raajya hai। raam raajya mein ek hi raajya tha, raavan raajya mein anek raajya hain isliye tum poochhte ho narkavaasi ho ya svargavaasi ho? parantu manushya yeh nahin samajhte hain ki ham kahaan hain? yeh hai kaanton ka jangal, woh hai phoolon ka bageecha। to ab follow father mother aur ananya bachchon ko karna hai, tab hi oonch banenge। baap samjhaate to bahut hain। parantu koi samajhne vaala samjhe। koi to sunkar achhi tarah vichaar saagar manthan karte hain। koi to suna-ansuna kar dete hain। jahaan tahaan likha pada hai - shivbaaba yaad hai? to varsa bhi zaroor yaad aayega। daiveegun honge to devta banenge। agar krodh hoga, aasuri avgun honge to oonch pad pa nahin sakenge। vahaan koi bhoot hota nahin। raavan hi nahin to raavan ke bhoot kahaan se aaye। deh abhimaan, kaam, krodh… yeh hain bade bhoot। inko nikaalne ka ek hi upaay hai - baba ki yaad। baba ki yaad se hi sab bhoot bhaag jaayenge। achha!

meethe meethe sikeeldhe bachchon prati maat pita baapdaada ka yaadapyaar aur good morning। roohaani baap ki roohaani bachchon ko namaste।

raatri class:-

bahut bachchon ki dil hoti hai ham bhi auron ko aap samaan banaane ki service karen। apni praja banaaven। jaise aur hamaare bhaai service karte hain ham bhi karen। maataayen jaasti hain। kalash bhi maataaon par rakha gaya hai। baaki yeh to hai pravritti maarga। donon chaahiye na। baba poochhte hain kitne bachche hain? dekhte hain theek javaab dete hain। 5 to apne hain ek hai shivbaaba। kai to kahne maatra hi kehte hain। kai sachmuch banaate hain। jo vaaris banaate hain woh vijay maala mein piroye jaayenge। jo sach-sach vaaris banaate hain woh khud bhi vaaris bante hain। sachchi dil par saahab raaji.... baaki to sabhi kahne maatra hi kehte hain। is samay paarlaukik baap hi hai jo sabhi ko varsa dete hain isliye yaad bhi unko karna hai jisse 21 janmon ka varsa milta hai। buddhi mein gyaan hai ki yeh to sabhi rahne ke nahin hain। baap harek ki avastha ko dekhte hain sach-sach vaaris banaaya hai ya banaane ka khyaal karte hain। vaaris banaane ka arth samajhte hain। bahut hain jo samajhte hue bhi bana nahin sakte kyonki maaya ke vash hain। is samay ya to eeshvar ke vash ya maaya ke vash। eeshvar ke vash jo honge woh vaaris bana lenge। maala aath ki bhi hoti hai, 108 ki bhi hoti hai। aath to zaroor kamaal karte honge। sachmuch vaaris bana kar hi chhodte honge। bhal vaaris bhi banaate hain varsa to lete hi hain। phir bhi aise oonch vaaris banaane vaalon ke karma bhi aise oonch honge। koi vikarma na ho। vikaar jo bhi hain sabhi vikarma hain na। baap ko chhod doosre kisko yaad karna - yeh bhi vikarma hai। baap maana baap। baap mukh se kehte hain maamekam yaad karo। direction mila na। to ekdam yaad karna - usmein hai bahut mehnat। ek baap ko yaad kare to maaya itna tang na kare। baaki maaya bhi badi jabardasta hai। samajh mein aata hai, maaya bada vikarma karaati hai। bade-bade mahaarthiyon ko bhi giraakar pat kar deti hai। din pratidin centres vriddhi ko paate rahenge। geeta paathshaala va museum khulte rahenge। saari duniya ke manushya baap ki bhi maanenge, brahma ki bhi maanenge। brahma ko hi prajaapita kaha jaata hai। aatmaon ko to praja nahin kahenge। manushya srishti kaun rachte hain? prajaapita brahma ka naam aata hai to woh saakaar, woh niraakaar ho gaya। woh to anaadi hai। woh bhi anaadi kahenge। donon ka naam highest hai। woh roohaani baap, woh prajaapita। donon baith tumko padhaate hain। kitna highest hua! bachchon ko kitna nasha chadhna chaahiye! khushi kitni honi chaahiye! parantu maaya khushi va nashe mein rahne nahin deti hai। aise student agar vichaar saagar manthan karte rahe to service bhi kar sakte hain। khushi bhi rah sakti hai, parantu shaayad abhi time hai। jab karmaateet avastha ho tab khushi bhi rah sake। achha - roohaani bachchon prati roohaani baap daada ka yaadapyaar aur good night।

dhaarna ke liye mukhya saar:-

1) roj raat mein potaamel dekhna hai ki ati meethe baba ko saare din mein kitna yaad kiya? apna show karne ke liye potaamel nahin rakhna hai, gupta purushaartha karna hai।

2) baap jo sunaate hain, us par vichaar saagar manthan karna hai, service ka saboot dena hai। suna ansuna nahin karna hai। andar koi bhi aasuri avgun hai to use check karke nikaalna hai।

vardaan:- vairaagya vritti dvaara is asaar sansaar se lagaav mukta rahne vaale sachche raajarishi bhav

raarishi arthaat raajya hote hue bhi behad ke vairaagi, deh aur deh ki puraani duniya mein jara bhi lagaav nahin kyonki jaante hain yeh puraani duniya hai hi asaar sansaar, ismen koi saar nahin hai। asaar sansaar mein braahmanon ka shreshtha sansaar mil gaya isliye us sansaar se behad ka vairaagya arthaat koi bhi lagaav nahin। jab kisi mein bhi lagaav va jhukaav na ho tab kahenge raajarishi va tapasvi।

slogan:- yuktiyukta bol woh hain jo madhur aur shubh bhaavna sampanna ho।