Daily Murli for Monday 22 July 2024

22-07-2024 praatahmurli om shanti "baapdaada"' madhuban

“meethe bachche - dehi-abhimaani bano to sheetal ho jaayenge, vikaaron ki baans nikal jaayegi, antarmukhi ho jaayenge, phool ban jaayenge''

prashn:- baapdaada sabhi bachchon ko kaun-se do vardaan dete hain? unhein swaroop mein laane ki vidhi kya hai?

uttar:- baba sabhi bachchon ko shanti aur sukh ka vardaan dete hain। baba kehte - bachche, tum shanti mein rahne ka abhyaas karo। koi ulta-sulta bolte hain to tum javaab na do। tumhein shant rehna hai। phaaltu jharmui, jhagmui ki baaten nahin karni hai। kisi ko bhi duhkh nahin dena hai। mukh mein shanti ka muhalra daal do to yeh donon vardaan swaroop mein aa jaayenge।

om shanti। meethe-meethe bachche kabhi sammukh hain, kabhi door chale jaate hain। sammukh phir vahi rehte hain jo yaad karte hain kyonki yaad ki yaatra mein hi sab kuchh samaaya hua hai। gaaya jaata hai na - nazar se nihaal। aatma ki nazar jaati hai parampita mein aur kuchh bhi unko achha nahin lagta। unko yaad karne se vikarma vinaash hote hain। to apne par kitni khabardaari rakhni chaahiye। yaad na karne se maaya samajh jaati hai - inka yog toota hua hai to apni taraph kheenchati hai। kuchh na kuchh ulta karma kara deti hai। aise baap ki ninda karaate hain। bhakti maarga mein gaate hain - baba, mere to ek aap doosra na koi। tab baap kehte hain - bachche, manzil bahut oonchi hai। kaam karte hue baap ko yaad karna - yeh hai oonch te oonch manzil। ismen practice bahut achhi chaahiye। nahin to nindak ban jaate hain, ulta kaam karne vaale। samjho koi mein krodh aaya, aapas mein ladte-jhagadte hain to bhi ninda karaai na, ismen badi khabardaari rakhni hai। apne grihastha vyavhaar mein rehte hue buddhi baap se lagaani hai। aise nahin ki koi sampoorn ho gaya hai। nahin। koshish aisi karni chaahiye - ham dehi-abhimaani banen। deh-abhimaan mein aane se kuchh na kuchh ulta kaam karte hain to goya baap ki ninda karaate hain। baap kehte hain aise satguru ki ninda karaane vaale lakshmi-naaraayan banne ki thaur pa na saken isliye poora purooshaartha karte raho, isse tum bahut hi sheetal ban jaayenge। paanch vikaaron ki baaten sab nikal jaayengi। baap se bahut taakat mil jaayegi। kaam-kaaj bhi karna hai। baap aise nahin kehte ki karma na karo। vahaan to tumhaare karma, akarma ho jaayenge। kaliyug mein jo karma hote hain, woh vikarma ho jaate hain। abhi sangamayug par tumko seekhna hota hai। vahaan seekhne ki baat nahin। yahaan ki shiksha hi vahaan saath chalegi। baap bachchon ko samjhaate hain - baaharmukhta achhi nahin hai। antarmukhi bhav। woh bhi samay aayega jabki tum bachche antarmukh ho jaayenge। sivaae baap ke aur kuchh yaad nahin aayega। tum aaye bhi aise the, koi ki yaad nahin thi। garbha se jab baahar nikle tab pata pada ki yeh hamaare maa-baap hain, yeh phalaana hai। to phir ab jaana bhi aise hai। ham ek baap ke hain aur koi unke sivaae buddhi mein yaad na aaye। bhal time pada hai parantu purooshaartha to poori reeti karna hai। shareer par to koi bharosa nahin। koshish karte rehna chaahiye, ghar mein bhi bahut shanti ho, klesh nahin। nahin to sab kahenge inmen kitni ashaanti hai। tum bachchon ko to rehna hai bilkul shant। tum shanti ka varsa le rahe ho na। abhi tum rehte ho kaanton ke beech mein। phoolon ke beech mein nahin ho। kaanton ke beech rah phool banna hai। kaanton ka kaanta nahin banna hai। jitna tum baap ko yaad karenge utna shant rahenge। koi ulta-sulta bole, tum shanti mein raho। aatma hai hi shant। aatma ka svadharma hai shant। tum jaante ho abhi hamko us ghar mein jaana hai। baap bhi hai shanti ka saagar। kehte hain tumko bhi shanti ka saagar banna hai। phaaltu jharmui-jhagmui bahut nuksaan karti hai। baap direction dete hain - aisi baaten nahin karni chaahiye, isse tum baap ki ninda karaate ho। shanti mein koi ninda va vikarma hota nahin। baap ko yaad karte rahne se aur hi vikarma vinaash honge। ashaanta na khud ho, na auron ko karo। kisko duhkh dene se aatma naaraaz hoti hai। bahut hain jo report likhte hain - baba, yeh ghar mein aate hain to dhamchakra macha dete hain। baba likhte hain tum apne shanti svadharma mein raho। haatamtaai ki kahaani bhi hai na, unko kaha tum mukh mein muhalra daal do to aavaaz niklega hi nahin। bol nahin sakenge।

tum bachchon ko shanti mein rehna hai। manushya shanti ke liye bahut dhakke khaate hain। tum bachche jaante ho hamaara meetha baba shanti ka saagar hai। shanti karaate-karaate vishwa mein shanti sthaapan karte hain। apne bhavishya martabe ko bhi yaad karo। vahaan hota hi hai ek dharma, doosra koi dharma hota nahin। unko hi vishwa mein shanti kaha jaata hai। phir jab doosre-doosre dharma aate hain to hangaamen hote hain। abhi kitni shanti rehti hai। samajhte ho hamaara ghar vahi hai। hamaara svadharma hai shant। aise to nahin kahenge shareer ka svadharma shant hai। shareer vinaashi cheez hai, aatma avinaashi cheez hai। jitna samay aatmaayen vahaan rehti hain to kitna shant rehti hain। yahaan to saari duniya mein ashaanti hai isliye shanti maangate rehte hain। parantu koi chaahe sada shant mein rahen, yeh to ho na sake। bhal 63 janma vahaan rehte hain phir bhi aana zaroor padega। apna part duhkh-sukh ka bajaakar phir chale jaayenge। drama ko achhi reeti dhyaan mein rakhna hota hai।

tum bachchon ko bhi dhyaan mein rahe ki baba hamko vardaan dete hain - sukh aur shanti ka। brahma ki aatma bhi sab sunti hai। sabse nazdeek to inke kaan sunte hain। inka mukh kaan ke nazdeek hai। tumhaara phir itna door hai। yeh jhat sun lete hain। sab baaten samajh sakte hain। baap kehte hain meethe-meethe bachchon! meethe-meethe to sabko kehte hain kyonki bachche to sab hain। jo bhi jeev aatmaayen hain woh sab baap ke bachche avinaashi hain। shareer to vinaashi hai। baap avinaashi hai। bachche aatmaayen bhi avinaashi hain। baap bachchon se vaartaalaap karte hain - isko kaha jaata hai roohaani knowledge। supreme rooh baith roohon ko samjhaate hain। baap ka pyaar to hai hi। jo bhi sab roohen hain, bhal tamopradhaan hain। jaante hain yeh sab jab ghar mein the to satopradhaan the। sabko kalpa-kalpa ham aakar shanti ka raasta bataata hoon। var dene ki baat nahin hai। aise nahin kehte dhanvaan bhav, aayushvaan bhav। nahin। satayug mein tum aise the parantu aasheervaad nahin dete hain। kripa va aasheervaad nahin maangani hai। baap, baap bhi hai, teacher bhi hai - yahi baat yaad karni hai। oho! shivbaaba baap bhi hai, teacher bhi hai, gyaan ka saagar bhi hai। baap hi baith apna aur rachna ke aadi-madhya-ant ka gyaan sunaate hain, jisse tum chakravarti mahaaraaja ban jaate ho। yeh saara all-round chakra hai na। baap samjhaate hain is samay saari duniya raavan raajya mein hai। raavan sirf lanka mein nahin hai। yeh hai behad ki lanka। chaaron taraph paani hai। saari lanka raavan ki thi, ab phir raam ki banti hai। lanka to sone ki thi। vahaan sona bahut hota hai। ek misaal bhi bataate hain dhyaan mein gaya, vahaan ek sone ki eet dekhi। jaise yahaan mitti ki hain, vahaan sone ki hongi। to khyaal kiya sona le jaayen। kaise-kaise naatak banaaye hain। bhaarat to naameegraami hai, aur khandon mein itne heere-javaahar nahin hote। baap kehte hain main sabko vaapis le jaata hoon, guide ban karke। chalo bachche, ab ghar jaana hai। aatmaayen patit hain, paavan hone bigar ghar ja nahin sakti hain। patit ko paavan banaane vaala ek baap hi hai isliye sab yahaan hi hain। vaapis koi bhi ja nahin sakte। law nahin kehta। baap kehte hain - bachche, maaya tumhein aur hi zor se deh-abhimaan mein laayegi। baap ko yaad karne nahin degi। tumko khabardaar rehna hai। is par hi yuddha hai। aakhen bada dhokha deti hain। in okhon ko kabje mein (adhikaar mein) rakhna hai। dekha gaya bhaai-behen mein bhi drishti theek nahin rehti hai to ab samjhaaya jaata hai bhaai-bhaai samjho। yeh to sab kehte hain ham sab bhaai-bhaai hain। parantu samajhte kuchh bhi nahin। jaise medhak tro-tro karte rehte hain, arth kuchh nahin samajhte। abhi tum har ek baat ka yathaartha arth samajh gaye ho।

baap meethe-meethe bachchon ko baith samjhaate hain ki tum bhakti maarga mein bhi aashik the, maashuk ko yaad karte the। duhkh mein jhat unko yaad karte hain - haay raam! he bhagwan raham karo! svarga mein to aise kabhi nahin kahenge। vahaan raavan raajya hi nahin hota hai। tumko raamraajya mein le jaate hain to unki mat par chalna chaahiye। abhi tumko milti hai eeshvareey mat phir milegi daivi mat। is kalyaankaari sangamayug ko koi bhi nahin jaante hain kyonki sabko bataaya hua hai, kaliyug ajun chhota bachcha hai। laakhon varsha pade hain। baba kehte yeh hai bhakti ka ghor andhiyaara। gyaan hai sojhra। drama anusaar bhakti ki bhi noondh hai, yeh phir bhi hogi। ab tum samajhte ho bhagwan mil gaya to bhatakne ki darkaar nahin rehti। tum kehte ho ham jaate hain baba ke paas athva baapdaada ke paas। in baaton ko manushya to samajh na saken। tumhaare mein bhi jinko poora nishchay nahin baithta to maaya ekdam hap kar leti hai। ekdam gaj ko graah hap kar leta hai। aashcharyavat sunanti… puraane to chale gaye, unka bhi gaayan hai, achhe-achhe mahaarthiyon ko maaya hara deti hai। baba ko likhte hain - baba, aap apni maaya ko nahin bhejo। are, yeh hamaari thode hi hai। raavan apna raajya karte hain, ham apna raajya sthaapan kar rahe hain। yeh parmapra se chala aata hai। raavan hi tumhaara sabse bada dushman hai। jaante hain raavan dushman hai, isliye usko har varsha jalaate hain। maisoor mein to dashahra bahut manaate hain, samajhte kuchh nahin। tumhaara naam hai shiv shakti sena। unhonne phir naam bandar sena daal diya hai। tum jaante ho barobar ham bandar misal the, ab shivbaaba se shakti le rahe ho, raavan par jeet paane। baap hi aakar raajayog sikhlaate hain। is par kathaayen bhi anek bana di hain। amraktha bhi kehte hain। tum jaante ho baba hamko amraktha sunaate hain। baaki koi pahaad aadi par nahin sunaate। kehte hain shankar ne paarvati ko amraktha sunaai। shiv shankar ka chitra bhi rakhte hain। donon ko mila diya hai। yeh sab hai bhakti maarga। din-pratidin sab tamopradhaan hote gaye hain। satopradhaan se sato hote hain to do kala kam hoti hain। treta ko bhi vaastav mein svarga nahin kaha jaata hai। baap aate hain tum bachchon ko svargavaasi banaane। baap jaante hain braahmankul aur sooryavanshi-chandravanshi kul donon sthaapan ho rahe hain। raamchandra ko kshatriy ki nishaani di hai। tum sab kshatriy ho na, jo maaya par jeet paate ho। kam marks se paas hone vaale ko chandravanshi kaha jaata hai, isliye raam ko baan aadi de diya hai। hinsa to treta mein bhi hoti nahin। gaayan bhi hai raam raaja, raam praja..... parantu yeh kshatriypan ki nishaani de di hai to manushya moonjhate hain। yeh hathiyaar aadi hote nahin hain। shaktiyon ke liye bhi kataari aadi dikhaate hain। samajhte kuchh bhi nahin hain। tum bachche abhi samajh gaye ho ki baap gyaan ka saagar hai isliye baap hi aadi-madhya-ant ka raaz samjhaate hain। behad ke baap ka jo bachchon par lav hai, woh had ke baap ka ho na sake। 21 janmon ke liye bachchon ko sukhdaai bana dete hain। to lovely baap thahra na! kitna lovely hai baap, jo tumhaare sab duhkh door kar dete hain। sukh ka varsa mil jaata hai। vahaan duhkh ka naam nishaan nahin hota। abhi yeh buddhi mein rehna chaahiye na। yeh bhoolna nahin chaahiye। kitna sahaj hai, sirf murli padhkar sunaani hai, phir bhi kehte hain braahmani chaahiye। braahmani bigar dhaarna nahin hoti। are, satya naaraayan ki katha to chhote bachche bhi yaad kar sunaate hain। main tumko roz-roz samjhaata hoon sirf alf ko yaad karo। yeh gyaan to 7 roz mein buddhi mein baith jaana chaahiye। parantu bachche bhool jaate hain, baba to wonder khaate hain। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) baap se aasheervaad va kripa nahin maangani hai। baap, teacher, guru ko yaad kar apne oopar aapehi kripa karni hai। maaya se khabardaar rehna hai, aakhen dhokha deti hain, inhen apne adhikaar mein rakhna hai।

2) phaaltu jharmui-jhagmui ki baaten bahut nuksaan karti hain isliye jitna ho sake shant rehna hai, mukh mein muhalra daal dena hai। kabhi bhi ulta-sulta nahin bolna hai। na khud ashaanta hona hai, na kisi ko ashaanta karna hai।

vardaan:- baap ki madad se sooli ko kaanta banaane vaale sada nishchint aur trustee bhav

pichhla hisaab sooli hai lekin baap ki madad se woh kaanta ban jaata hai। paristhitiyaan aani zaroor hain kyonki sab kuchh yahaan hi chuktu karna hai lekin baap ki madad unhein kaanta bana deti hai, badi baat ko chhota bana deti hai kyonki bada baap saath hai। isi nishchay ke aadhaar se sada nishchint raho aur trustee ban mere ko tere mein badli kar halke ho jaao to sab bojh ek second mein samaapta ho jaayenge।

slogan:- shubh bhaavna ke stock dvaara negative ko positive mein parivartan karo।