Daily Murli for Wednesday 25 September 2024

25-09-2024 praatahmurli om shanti "baapdaada"' madhuban

“meethe bachche - behad ki scholarship leni hai to abhyaas karo - ek baap ke sivaae aur koi bhi yaad na aaye''

prashn:- baap ka banne ke baad bhi yadi khushi nahin rehti hai to uska kaaran kya hai?

uttar:- 1- buddhi mein poora gyaan nahin rehta। 2- baap ko yathaartha reeti yaad nahin karte। yaad na karne ke kaaran maaya dhokha deti hai isliye khushi nahin rehti। tum bachchon ki buddhi mein nasha rahe - baap humein vishwa ka maalik banaate hain, to sada hullaas aur khushi rahe। baap ka jo varsa hai - pavitrata, sukh aur shanti, ismen full bano to khushi rahegi।

om shanti। om shanti ka arth to bachchon ko achhi reeti maaloom hai - main aatma, yeh mera shareer। yeh achhi reeti yaad karo। bhagwan maana aatmaon ka baap hamko padhaate hain। aise kabhi suna hai? woh to samajhte hain shreekrishna padhaate hain, parantu unka to naam-roop hai na। yeh to padhaane vaala hai niraakaar baap। aatma sunti hai aur paramatma sunaate hain। yeh nai baat hai na। vinaash to hone ka hi hai na। ek hain vinaash kaale vipreet buddhi, doosre hain vinaash kaale preet buddhi। aage tum bhi kehte the eeshvar sarvavyaapi hai, patthar bhittar mein hai। in sab baaton ko achhi reeti samajhna hai। yeh to samjhaaya hai aatma avinaashi hai, shareer vinaashi hai। aatma kabhi ghatti-badhti nahin। woh hai itni chhoti aatma, itni chhoti aatma hi 84 janma lekar saara part bajaati hai। aatma shareer ko chalaati hai। oonch te oonch baap padhaate hain to zaroor martaba bhi oonch milega। aatma hi padhkar martaba paati hai। aatma koi dekhi nahin jaati। bahut koshish karte hain ki dekhen aatma kaise aati hai, kahaan se nikalti hai? parantu maaloom nahin padta hai। karke koi dekhe bhi to bhi samajh nahin sakenge। yeh to tum samajhte ho aatma hi shareer mein nivaas karti hai। aatma alag hai, jeev alag hai। aatma chhoti-badi nahin hoti hai। jeev chhote se bada hota hai। aatma hi patit aur paavan banti hai। aatma hi baap ko bulaati hai - he patit aatmaon ko paavan banaane vaale baba aao। yeh bhi samjhaaya hai - sabhi aatmaayen hain brides (seetaayen) aur woh hai raam, bridegroom ek। vo log phir sabhi ko bridegroom kah dete hain। ab bridegroom sabmen pravesh kare, yeh to ho nahin sakta। yeh buddhi mein ulta gyaan hone ke kaaran hi neeche girte aaye hain kyonki bahut glaani karte, paap karte, defame karte hain। baap ki bahut bhaari ninda ki hai। bachche kabhi baap ki glaani karenge kya! parantu aajkal bigadte hain to baap ko bhi gaali dene lagte hain। yeh to hai behad ka baap। aatma hi behad ke baap ki glaani karti hai - baba aap kachchha-machchha avtaar ho। shreekrishna ki bhi glaani ki hai - raaniyon ko bhagaaya, yeh kiya, maakhan churaaya। ab maakhan aadi churaane ki unko kya darkaar padi। kitne tamopradhaan buddhi ban pade hain। baap kehte hain main aakar tumko paavan banaane ki bahut sahaj yukti bataata hoon। baap hi patit-paavan sarvashaktimaan authority hai। jaise saadhu-santa aadi jo bhi hain, unko shaastron ki authority kehte hain। shankaraachaarya ko bhi vedon-shaastron aadi ki authority kahenge, unka kitna bhabhka hota hai। shivaachaarya ka to koi bhabhka nahin, inke saath koi paltan nahin। yeh to baith sabhi vedon-shaastron ka saar sunaate hain। agar shivbaaba bhabhka dikhaaye to pahle inka (brahma ka) bhi bhabhka chaahiye। parantu nahin। baap kehte hain main to tum bachchon ka servant hoon। baap inmen pravesh kar bachchon ko samjhaate hain ki bachche tum patit bane ho। tum paavan ban phir 84 janmon ke baad patit ban gaye ho। inki hi history-geography phir se repeat hogi। inhonne hi 84 janma bhoge hain। phir unhein hi satopradhaan banne ki yukti bataate hain। baap hi sarvashaktimaan hai। brahma dvaara sabhi vedon-shaastron ka saar samjhaate hain। chitron mein brahma ko shaastra dikhaate hain। parantu vaastav mein shaastron aadi ki baat hai nahin। na baba ke paas shaastra hain, na inke paas, na tumhaare paas shaastra hain। yeh to tumko nitya nai-nai baaten sunaate hain। yeh to jaante ho ki sabhi bhakti maarga ke shaastra hain। main koi shaastra thode hi sunaata hoon। main to tumko mukh se sunaata hoon। tumko raajayog sikhaata hoon, jiska phir bhakti maarga mein naam geeta rakh diya hai। mere paas va tumhaare paas koi geeta aadi hai kya? yeh to padhaai hai। padhaai mein adhyaay, shlok aadi thode hi hote hain। main tum bachchon ko padhaata hoon, hoobhu kalpa-kalpa aise hi padhaata rahoonga। kitni sahaj baat samjhaata hoon - apne ko aatma samjho। yeh shareer to mitti ho jaata hai। aatma avinaashi hai, shareer to ghadi-ghadi jalta rehta hai। aatma ek shareer chhod doosra leti hai।

baap kehte hain main to ek hi baar aata hoon। shiv raatri manaate bhi hain। vaastav mein hona chaahiye shiv jayanti। parantu jayanti kahne se maata ke garbha se janma ho jaata hai, isliye shiv raatri kah dete hain। dvaapar-kaliyug ki raatri mein mere ko dhoondhate hain। kehte hain sarvavyaapi hai। to tere mein bhi hai na, phir dhakke kyon khaate ho! ekdam jaise devta se aasuri sampradaay ke ban jaate hain। devtaayen kabhi sharaab peete hain kya? vahi aatmaayen phir giri hain to sharaab aadi peene lag padi hain। baap kehte hain ab is puraani duniya ka vinaash bhi zaroor hona hai। puraani duniya mein hain anek dharma, nai duniya mein hai ek dharma। ek se anek dharma hue hain phir ek zaroor hona hai। manushya to kah dete kaliyug mein abhi 40 hazaar varsha pade hain, isko kaha jaata hai ghor andhiyaara। gyaan soorya pragta, agyaan andher vinaash। manushyon mein bahut agyaan hai। baap gyaan soorya, gyaan saagar aate hain to tumhaara bhakti maarga ka agyaan mit jaata hai। tum baap ko yaad karte-karte pavitra ban jaate ho, khaad nikal jaati hai। yeh hai yog agni। kaam agni kaala bana deti hai। yog agni arthaat shivbaaba ki yaad gora banaati hai। shreekrishna ka naam bhi rakha hai - shyaam-sundar। parantu arth thode hi samajhte hain। baap aakar arth samjhaate hain। pahle-pahle satayug mein kitne sundar hain। aatma pavitra sundar hai to shareer bhi pavitra sundar leti hai। vahaan kitna dhan daulat sab kuchh naya hota hai। nai dharni phir puraani hoti hai। ab is puraani duniya ka vinaash zaroor hona hai। khoob taiyaariyaan ho rahi hain। bhaaratvaasi itna nahin samajhte hain, jitna woh samajhte hain ki ham apne kul ka vinaash kar rahe hain। koi prerak hai। science dvaara ham apna hi vinaash laate hain। yeh bhi samajhte hain Christ se 3 hazaar varsha pahle paradise tha। in god-goddess ka raajya tha। bhaarat hi praacheen tha। is raajayog se lakshmi-naaraayan aise bane the। woh raajayog phir baap hi sikhla sakte hain। sannyaasi sikhla na saken। aajkal kitni thagi lagi padi hai। baahar mein jaakar kehte hain - ham bhaarat ka praacheen yog sikhlaate hain। aur phir kehte hain anda khaao, sharaab aadi bhal piyo, kuchh bhi karo। ab woh kaise raajayog sikhla sakenge। manushya ko devta kaise banaayenge। baap samjhaate hain aatma kitni oonch hai phir punarjanma lete-lete satopradhaan se tamopradhaan ban jaati hai। ab tum phir se svarga ki sthaapna kar rahe ho। vahaan doosra koi dharma hota hi nahin। ab baap kehte hain narka ka vinaash to zaroor hona hai। yahaan tak jo aaye hain woh phir svarga mein zaroor jaayenge। shivbaaba ka thoda bhi gyaan suna to svarga mein jaayenge zaroor। phir jitna padhenge, baap ko yaad karenge utna oonch pad paayenge। abhi vinaash kaal to sabke liye hai। vinaash kaale preet buddhi jo hain, sivaae baap ke aur koi ko yaad nahin karte hain, vahi oonch pad paate hain। isko kaha jaata hai behad ki scholarship, ismen to race karni chaahiye। yeh hai eeshvareey lottery। ek to yaad, doosra daiveegun dhaaran karne hain aur raaja-raani banna hai to praja bhi banaani hai। koi bahut praja banaate hain, koi kam। praja banti hai service se। museum, pradarshani aadi mein dher praja banti hai। is samay tum padh rahe ho phir sooryavanshi-chandravanshi dynasty mein chale jaayenge। yeh hai tum braahmanon ka kul। baap brahman kul adopt kar unhon ko padhaate hain। baap kehte hain main ek kul aur do dynasty banaata hoon। sooryavanshi mahaaraaja-mahaaraani, chandravanshi raaja-raani। inhon ko kahenge double sirtaaj phir baad mein jab vikaari raajaayen hote hain to unko light ka taaj nahin hota। un double taaj vaalon ke mandir banaakar unko poojte hain। pavitra ke aage maatha tekte hain। satayug mein yeh baaten hoti nahin। woh hai hi paavan duniya, vahaan patit hote nahin। usko kaha jaata hai sukhdhaam, viceless world। isko kaha jaata hai vicious world। ek bhi paavan nahin। sannyaasi gharbaar chhod bhaagte hain, raaja gopeechanda ka bhi misaal hai na। tum jaante ho koi bhi manushya ek-do ko gati-sadgati de nahin sakte hain। sarva ka sadgati daata main hi hoon। main aakar sabko paavan banaata hoon। ek to pavitra ban shantidham chale jaayenge aur doosre pavitra ban sukhdhaam mein jaayenge। yeh hai apvitra duhkhadhaam। satayug mein beemaari aadi kuchh bhi hoti nahin। tum us sukhdhaam ke maalik the phir raavanraajya mein duhkhadhaam ke maalik bane ho। baap kehte hain kalpa-kalpa tum meri shreemat par svarga sthaapan karte ho। nai duniya ka raajya lete ho। phir patit narkavaasi bante ho। devtaayen hi phir vikaari ban jaate hain। vaam maarga mein girte hain।

meethe-meethe bachchon ko baap ne aakar parichay diya hai ki main ek hi baar purooshottam sangamayug par aata hoon। main yuge-yuge to aata hi nahin hoon। kalpa ke sangamayuge aata hoon, na ki yuge-yuge। kalpa ke sangam par kyon aata hoon? kyonki narka ko svarga banaata hoon। har 5 hazaar varsha baad aata hoon। kai bachche likhte hain - baba, hamko khushi nahin rehti hai, ullaas nahin rehta hai। are, baap tumko vishwa ka maalik banaate hain, aise baap ko yaad kar tumko khushi nahin rehti hai! tum poora yaad nahin karte ho tab khushi nahin thaharti hai। pati ko yaad karte khushi hoti hai, jo patit banaate hain aur baap jo double sirtaaj banaate hain, unko yaad karke khushi nahin hoti hai! baap ke bachche bane ho phir bhi kehte ho khushi nahin! poora gyaan buddhi mein nahin hai। yaad nahin karte ho isliye maaya dhokha deti hai। bachchon ko kitna achhi reeti samjhaate hain। kalpa-kalpa samjhaate hain। aatmaayen jo pattharbuddhi ban padi hain, unko paarasbuddhi banaata hoon। knowledgeful baap hi aakar knowledge dete hain। woh har baat mein full hai। purity mein full, pyaar mein full। gyaan ka saagar, sukh ka saagar, pyaar ka saagar hai na। aise baap se tumko yeh varsa milta hai। aisa banne ke liye hi tum aate ho। baaki woh satsang aadi to sab hain bhakti maarga ke। unmein em object kuchh bhi hai nahin। isko to geeta paathshaala kaha jaata hai, ved paathshaala nahin hoti। geeta se nar se naaraayan bante ho। zaroor baap hi banaayenge na। manushya, manushya ko devta bana na saken। baap baar-baar bachchon ko samjhaate hain - bachche, apne ko aatma samjho। tum koi deh thode hi ho। aatma kehti hai main ek deh chhod doosri leti hoon। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) jaise shivbaaba ka koi bhabhka nahin, servant ban bachchon ko padhaane ke liye aaye hain, aise baap samaan authority hote hue bhi nirhankaari rehna hai। paavan bankar paavan banaane ki seva karni hai।

2) vinaash kaal ke samay eeshvareey lottery lene ke liye preet buddhi ban yaad mein rahne va daiveegunon ko dhaaran karne ki race karni hai।

vardaan:- shuddh sankalpon ke gheraav dvaara safety ka anubhav karne aur karaane vaale shaktishaali aatma bhav

shaktishaali aatma woh hai jo dridhta ki shakti dvaara second se bhi kam samay mein vyartha ko samaapta kar de। shuddh sankalp ki shakti ko pahchaano, ek shuddh va shaktishaali sankalp bahut kamaal kar sakta hai। sirf koi bhi dridh sankalp karo to dridhta saphalta ko laayegi। sabke liye shuddh sankalpon ka bandhan, gheraav aisa baandho jo koi thoda kamjor bhi ho, unke liye bhi yeh gheraav ek chhatrachhaaya ban jaae, safety ka saadhan va kila ban jaae।

slogan:- sabse shreshtha bhaagya unka hai jinhen direct bhagwan dvaara paalna, padhaai aur shreshtha jeevan ki shreemat milti hai।