Daily Murli for Wednesday 27 August 2025

27-08-2025 praatahmurli om shanti "baapdaada"' madhuban

“meethe bachche - apni satopradhaan takdeer banaane ke liye yaad mein rahne ka khoob purushaartha karo, sada yaad rahe main aatma hoon, baap se poora varsa lena hai''

prashn:- bachchon ko yaad ka chart rakhna mushkil kyon lagta hai?

uttar:- kyonki kai bachche yaad ko yathaartha samajhte hi nahin hain। baithte hain yaad mein aur buddhi baahar bhatakti hai। shant nahin hoti। woh phir vaayumandal ko kharaab karte hain। yaad karte hi nahin to chart phir kaise likhen। agar koi jhooth likhte hain to bahut danda pad jaata hai। sachche baap ko sach bataana pade।

geet:- takdeer jagaakar aai hoon…

om shanti। roohaani bachchon ko phir bhi roohaani baap roz-roz samjhaate hain ki jitna ho sake dehi-abhimaani bano। apne ko aatma nishchay karo aur baap ko yaad karo kyonki tum jaante ho ham us behad ke baap se behad sukh ki takdeer banaane aaye hain। to zaroor baap ko yaad karna pade। pavitra satopradhaan banne bigar satopradhaan takdeer bana nahin sakte। yeh to achhi reeti yaad karo। mool baat hai hi ek। yeh to apne paas likh do। baanh par naam likhte hain na। tum bhi likh do - ham aatma hain, behad ke baap se ham varsa le rahe hain kyonki maaya bhula deti hai isliye likha hua hoga to ghadi-ghadi yaad rahegi। manushya om ka va krishna aadi ka chitra bhi lagaate hain yaad ke liye। yeh to hai naye te nai yaad। yeh sirf behad ka baap hi samjhaate hain। is samajhne se tum saubhaagyashaali to kya padam bhaagyashaali bante ho। baap ko na jaanne kaaran, yaad na karne kaaran kangaal ban gaye hain। ek hi baap hai jo sadaiv ke liye jeevan ko sukhi banaane aaye hain। bhal yaad bhi karte hain parantu jaante bilkul nahin hain। vilaayat vaale bhi sarvavyaapi kehna bhaaratvaasiyon se seekhe hain। bhaarat gira hai, to sab gire hain। bhaarat hi responsible hai apne ko giraane aur sabko giraane। baap kehte hain main bhi yahaan hi aakar bhaarat ko svarga sachkhanda banaata hoon। aisa svarga banaane vaale ki kitni glaani kar di hai। bhool gaye hain isliye likha hua hai yada yadaahi..... inka bhi arth baap hi aakar samjhaate hain। balihaari ek baap ki hai। abhi tum jaante ho baap aate hain zaroor, shiv-jayanti manaate hain। parantu shiv-jayanti ka kadar bilkul nahin hai। abhi tum bachche samajhte ho zaroor hokar gaye hain, jiski jayanti manaate hain। satayugi aadi sanaatan devi-devta dharma ki sthaapna vahi karte hain। aur sab jaante hain ki hamaara dharma phalaane ne phalaane samay sthaapan kiya। unke pahle hai hi devi-devta dharma। unko bilkul hi nahin jaante ki yeh dharma kahaan gum ho gaya। abhi baap aakar samjhaate hain - baap hi sabse oonch hai, aur kiski mahima hai nahin। dharma sthaapak ki mahima kya hogi। baap hi paavan duniya ki sthaapna aur patit duniya ka vinaash karaate hain aur tumko maaya par jeet pahnaate hain। yeh behad ki baat hai। raavan ka raajya saari behad ki duniya par hai। had ke lanka aadi ki baat nahin। yeh haar-jeet ki kahaani bhi saare bhaarat ki hi hai। baaki to by-plot hain। bhaarat mein hi double sirtaaj aur single taaj raajaayen bante hain aur jo bhi bade-bade baadshaah hokar gaye hain, koi par bhi light ka taaj nahin hota hai sivaae devi-devtaaon ke। devtaayen to phir bhi svarga ke maalik the na। ab shiv-baba ko kaha hi jaata hai parampita, patit-paavan। inko light kahaan denge। light tab den jab bigar light vaala patit bhi ho। woh kabhi bigar light vaala hota hi nahin। bindi par light de kaise sakenge। ho na sake। din-pratidin tumko bahut guhya-guhya baaten samjhaate rehte hain, jo jitna buddhi mein bitha sake। mukhya hai hi yaad ki yaatra। ismen maaya ke vighna bahut padte hain। bhal koi yaad ke chart mein 50-60 percent bhi likhte hain parantu samajhte nahin hain ki yaad ki yaatra kisko kaha jaata hai। poochhte rehte hain - is baat ko yaad kahen? bada mushkil hai। tum yahaan 10-15 minute baithte ho, unmein bhi jaanch karo - yaad mein achhi reeti rehte hain? bahut hain jo yaad mein rah nahin sakte phir woh vaayumandal ko kharaab kar dete hain। bahut hain jo yaad mein na rahne se vighna daalte hain। saara din buddhi baahar bhatakti rehti hai। so yahaan thode hi shant hogi, isliye yaad ka chart bhi rakhte nahin। jhootha likhne se to aur hi danda pade। bahut bachche bhoolen karte hain, chhipaate hain। sach bataate nahin। baap kahe aur sach na bataaye to kitna dosh ho jaata। kitna bhi bada ganda kaam kiya hoga to bhi sach bataane mein lajja aayegi। aksar karke sab jhooth bataayenge। jhoothi maaya, jhoothi kaaya...... hai na। ekdam deh-abhimaan mein aa jaate hain। sach sunaana to achha hi hai aur bhi seekhenge। yahaan sach bataana hai। knowledge ke saath-saath yaad ki yaatra bhi zaroori hai kyonki yaad ki yaatra se hi apna aur vishwa ka kalyaan hona hai। knowledge samjhaane ke liye bahut sahaj hai। yaad mein hi mehnat hai। baaki beej se jhaad kaise nikalta hai, woh to sabko maaloom rehta hai। buddhi mein 84 ka chakra hai, beej aur jhaad ki knowledge hogi na। baap to satya hai, chaitanya hai, gyaan ka saagar hai। unmein knowledge hai samjhaane ke liye। yeh hai bilkul uncommon baat। yeh manushya srishti ka jhaad hai। yeh bhi koi nahin jaante। sab neti-neti karte gaye। duration ko hi nahin jaante to baaki kya jaanenge। tumhaare mein bhi bahut thode hain jo achhi reeti jaante hain, isliye seminar bhi bulaate hain। apni-apni raay do। raay to koi bhi de sakte hain। aise nahin ki jinke naam hain unko hi deni hai। hamaara naam nahin hai, ham kaise deven। nahin, koi ko bhi service arth koi raay ho, advice ho likh sakte ho। baap kehte hain koi bhi raay aaye to likhna chaahiye। baba is yukti se service bahut badh sakti hai। koi bhi raay de sakte hain। dekhenge kis-kis prakaar ki raay di hai। baba to kehte rehte hain - kis yukti se ham bhaarat ka kalyaan karen, sabko paigaam deven। aapas mein vichaar nikaalo, likhkar bhejo। maaya ne sabko sula diya hai। baap aate hi hain jab maut saamne hota hai। ab baap kehte hain sabki vaanaprastha avastha hai, padho na padho, marna zaroor hai। taiyaari karo na karo, nai duniya zaroor sthaapan honi hai। achhe-achhe bachche jo hain woh apni taiyaari kar rahe hain। sudaama ka bhi misaal gaaya hua hai - chaaval mutthi le aaya। baba hamko bhi mahal milne chaahiye। hai hi unke paas chaaval mutthi to kya karenge। baba ne mama ka misaal bataaya hai - chaaval mutthi bhi nahin le aai। phir kitna oonch pad pa liya, ismen paise ki baat nahin hai। yaad mein rehna hai aur aap samaan banaana hai। baba ki to koi fee aadi nahin। samajhte hain hamaare paas paise pade hain to kyon na yagya mein svaaha kar den। vinaash to hona hi hai। sab vyartha ho jaayega, isse kuchh to saphal karen। har ek manushya kuchh na kuchh daan-punya aadi zaroor karte hain। woh hai paap aatmaon ka paap aatmaon ko daan-punya। phir bhi uska alpakaal ke liye phal mil jaata hai। samjho koi university, college aadi banaate hain, paise jaasti hain, dharmashaala aadi bana dete hain to unko makaan aadi achha mil jaayega। parantu phir bhi beemaari aadi to hogi na। samjho kisne hospital aadi banaai hogi to karke tanduroosti achhi rahegi। parantu unse sab kaamnaayen to siddha nahin hoti hain। yahaan to behad ke baap dvaara tumhaari sab kaamnaayen poori ho jaati hain।

tum bante ho paavan to sab paise vishwa ko paavan banaane mein lagaana achha hai na। mukti-jeevanmukti dete ho so bhi aadhaakalpa ke liye। sab kehte hain hamko shanti kaise mile। woh to shantidham mein milti hai aur satayug mein ek dharma hone kaaran vahaan ashaanti hoti nahin। ashaanti hoti hai raavan raajya mein। gaayan bhi hai na - raam raaja raam praja...... woh hai amarlok। vahaan amarlok mein marne ka akshar hota nahin। yahaan to baithe-baithe achaanak mar jaate hain, isko mrityulok usko amarlok kaha jaata hai। vahaan marna hota nahin। puraana ek shareer chhod phir baalak ban jaate hain। rog hota nahin। kitna phaayda hota hai। shri shri ki mat par tum ever healthy bante ho। to aise roohaani centres kitne khulne chaahiye। thode bhi aate hain woh kam hai kya। is samay koi bhi manushya drama ke duration ko nahin jaante hain। poochhenge tumko phir yeh kisne sikhlaaya hai। are, hamko bataane vaala baap hai। itne dher bi.ke. hain। tum bhi bi.ke. ho। shivbaaba ke bachche ho। prajaapita brahma ke bhi bachche ho। yeh hai humanity ka great-great grand father। inse ham bi.ke. nikle hain। biraadriyaan hoti hain na। tumhaare devi-devtaaon ka kul bahut sukh dene vaala hai। yahaan tum uttam bante ho phir vahaan raajya karte ho। yeh kisko buddhi mein rah na sake। yeh bhi bachchon ko samjhaaya hai devtaaon ke pair is tamopradhaan duniya mein pad na sake। jad chitra ka parchhaaya pad sakta hai, chaitanya ka nahin pad sakta। to baap samjhaate hain - bachche, ek to yaad ki yaatra mein raho, koi bhi vikarma na karo aur service ki yuktiyaan nikaalo। bachche kehte hain - baba, ham to lakshmi-naaraayan jaisa banenge। baba kehte tumhaare mukh mein gulaab lekin iske liye mehnat bhi karni hai। oonch pad paana hai to aap samaan banaane ki seva karo। tum ek din dekhenge - ek-ek panda apne saath 100-200 yaatri bhi le aayenge। aage chal dekhte rahenge। pahle se thode hi kuchh kah sakte hain। jo hota rahega so dekhte rahenge।

yeh behad ka drama hai। tumhaara hai sabse mukhya part baap ke saath, jo tum puraani duniya ko nai banaate ho। yeh hai purushottam sangam yug। ab tum sukhdhaam ke maalik bante ho। vahaan duhkh ka naam-nishaan nahin hoga। baap hai hi duhkh harta, sukh karta। duhkh se aakar liberate karte hain। bhaaratvaasi phir samajhte hain itna dhan hai, bade-bade mahal hai, bijliyaan hain, bas yahi svarga hai। yeh sab hai maaya ka pomp। sukh ke liye saadhan bahut karte hain। bade-bade mahal makaan banaate hain phir maut kaise achaanak ho jaata hai, vahaan marne ka dar nahin। yahaan to achaanak mar jaate hain phir kitna shok karte hain। phir samaadhi par jaakar aansu bahaate hain। har ek ki apni-apni rasam-rivaaj hai। anek mat hain। satayug mein aisi baat hoti nahin। vahaan to ek shareer chhod doosra le lete hain। to tum kitna sukh mein jaate ho। uske liye kitna purushaartha karna chaahiye। kadam-kadam par mat leni chaahiye। guru ki va pati ki mat lete hain va to apni mat se chalna hota hai। aasuri mat kya kaam dengi। aasuri taraph hi dhakelegi। ab tumko milti hai eeshvareey mat, oonch te oonch isliye gaaya hua bhi hai - shreemat bhagvaanuvaach। tum bachche shreemat se saare vishwa ko heaven banaate ho। us heaven ke tum maalik bante ho isliye tumhein har kadam par shreemat leni hai parantu kiski takdeer mein nahin hai to phir mat par chalte nahin hain। baba ne samjhaaya hai kisko bhi apna kuchh akla ho, raay ho to baba ko bhej deven। baba jaante hain kaun-kaun raay dene laayak hain। naye-naye bachche nikalte rehte hain। baba to jaante hain na kaun se achhe-achhe bachche hain। dukaandaaron ko bhi raay nikaalni chaahiye - aise yatna karen jo baap ka parichay mile। dukaan mein bhi sabko yaad karaate rahen। bhaarat mein jab satayug tha to ek dharma tha। ismen naaraaz hone ki to baat hi nahin। sabka ek baap hai। baap kehte hain maamekam yaad karo to tumhaare vikarma vinaash ho jaaen। svarga ke maalik ban jaayenge। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) shreemat par chalkar saare vishwa ko svarga banaane ki seva karni hai, bahuton ko aap samaan banaana hai। aasuri mat se apni sambhaal karni hai।

2) yaad ki mehnat se aatma ko satopradhaan banaana hai। sudaama misal jo bhi chaaval mutthi hain woh sab saphal kar apni sarva kaamnaayen siddha karni hai।

vardaan:- ek baap doosra na koi - is dridh sankalp dvaara avinaashi, amar bhav

jo bachche yeh dridh sankalp karte hain ki ek baap doosra na koi.....unki sthiti svatah aur sahaj ekras ho jaati hai। isi dridh sankalp se sarva sambandhon ki avinaashi taar jud jaati hai aur unhein sada avinaashi bhav, amar bhav ka vardaan mil jaata hai। dridh sankalp karne se purushaartha mein bhi vishesh roop se lift milti hai। jinke ek baap se sarva sambandh hain unhein sarva praaptiyaan svatah ho jaati hain।

slogan:- sochna-bolna aur karna teenon ko ek samaan banaao - tab kahenge sarvottam purushaarthi।

avyakt ishaare - sahajyogi banna hai to parmaatma pyaar ke anubhvi bano

jis samay jis sambandh ki aavashyakta ho, usi sambandh se bhagwan ko apna bana lo। dil se kaho mera baba, aur baba kahe mere bachche, isi sneh ke saagar mein sama jaao। yeh sneh chhatrachhaaya ka kaam karta hai, iske andar maaya aa nahin sakti, yahi sahajyogi banne ka saadhan hai।