Daily Murli for Sunday 18 January 2026

18-01-26 praatahmurli om shanti “baapdaada'' madhuban

“baapdaada ke anmol mahaavaakya - pitaashri ji ke punya smriti divas par praatahklaas mein sunaane ke liye''

“meethe bachche, gyaan ratnon se jholi bharkar daan bhi karna hai, jitna doosron ko raasta bataayenge utna aasheervaad milegi''

om shanti। meethe bachchon ko yeh pakka yaad rakhna hai ki shivbaaba hamko padhaate hain। shivbaaba patit-paavan bhi hai, sadgati daata bhi hai। sadgati maana svarga ki raajaai dete hain। baba kitna meetha hai। kitna pyaar se bachchon ko baith padhaate hain। baap, daada dvaara hamko padhaate hain। baba kitna meetha hai, kitna pyaar karte hain। koi takleeph nahin dete। sirf kehte hain mujhe yaad karo aur chakra ko yaad karo। baap ki yaad mein dil ekdam thar jaani chaahiye। (sheetal ho jaani chaahiye) ek baap ki hi yaad sataani chaahiye kyonki baap se varsa kitna bhaari milta hai। apne ko dekhna chaahiye hamaara baap ke saath kitna lav hai? kahaan tak hamaare mein daivi gun hain kyonki tum bachche ab kaanton se phool ban rahe ho। jitna-jitna yog mein rahenge utna kaanton se phool, satopradhaan bante jaayenge। phool ban gaye phir yahaan rah nahin sakenge। phoolon ka bageecha hai hi svarga। jo bahut kaanton ko phool banaate hain unhein hi sachcha khushboodaar phool kahenge। woh kabhi kisi ko kaanta nahin lagaayenge। krodh bhi bada kaanta hai। bahuton ko duhkh dete hain। abhi tum bachche kaanton ki duniya se kinaare par aa gaye ho, tum ho sangam par। jaise maali phoolon ko alag pot (bartan) mein nikaalkar rakhte hain vaise hi tum phoolon ko bhi ab sangamayugi pot mein alag rakha hua hai। phir tum full svarga mein chale jaayenge। kaliyugi kaanten bhasma ho jaayenge।

meethe bachche jaante hain paarlaukik baap se hamko avinaashi varsa milta hai। jo sachche-sachche bachche hain jinka baapdaada se poora lav hai unko badi khushi rahegi। ham vishwa ka maalik bante hain। haan purushaartha se hi vishwa ka maalik bana jaata hai, sirf kahne se nahin। jo ananya bachche hain unhon ko sadaiv yeh yaad rahega ki ham apne liye phir se vahi sooryavanshi, chandravanshi raajdhaani sthaapan kar rahe hain। baap kehte hain meethe bachche, jitna tum bahuton ka kalyaan karenge utna tumko hi ujoora milega। bahuton ko raasta bataayenge to bahuton ki aasheervaad milegi। gyaan ratnon se jholi bharkar phir daan karna hai। gyaan saagar tumko ratnon ki thaaliyaan bhar-bhar kar dete hain। un ratnon ka jo daan karte hain vahi sabko pyaare lagte hain। bachchon ke andar mein kitni khushi honi chaahiye। sensible bachche jo honge woh to kahenge ham baba se poora hi varsa lenge। ekdam chatak padenge। baap se bahut lav rahega kyonki jaante hain praan dene vaala baap mila hai। knowledge ka vardaan aisa dete hain jisse ham kya se kya ban jaate hain। insolvent se solvent ban jaate hain। itna bhandaara bharpoor kar dete hain। jitna baap ko yaad karenge utna lav rahega, kashish hogi। sui saaph hoti hai to chakmak (chumbak) taraph khainch jaati hai na। baap ki yaad se kat nikalti jaayegi। ek baap ke sivaae aur koi yaad na aaye।

baap samjhaate hain meethe bachche ab gaphlat mat karo। svadarshan chakradhaari bano, light house bano। svadarshan chakradhaari banne ki practice achhi ho jaayegi to phir tum jaise gyaan ka saagar ho jaayenge। jaise student padhkar teacher ban jaate hain na। tumhaara dhandha hi yeh hai। sabko svadarshan chakradhaari banaao tab hi chakravarti raaja-raani banenge isliye baba sadaiv bachchon se poochhte hain svadarshan chakradhaari ho baithe ho? baap bhi svadarshan chakradhaari hai na। baap aaye hain tum meethe bachchon ko vaapis le jaane। tum bachchon bigar hamko bhi jaise beaaraami hoti hai। jab samay hota hai to beaaraami ho jaati hai। bas abhi ham jaaoon। bachche bahut pukaarte hain। bahut duhkhi hain। taras padta hai। ab tum bachchon ko chalna hai ghar। phir vahaan se tum aapehi chale jaayenge sukhdhaam। vahaan main tumhaara saathi nahin banoonga। apni avastha anusaar tumhaari aatma chali jaayegi।

jitna tum bachche baap ki yaad mein rahenge utna doosron ko samjhaane ka asar hoga। tumhaara bolna jaasti nahin hona chaahiye। aatma-abhimaani ho thoda bhi samjhaayenge to teer lagega। baap kehte hain bachche beeti so beeti। ab pahle apne ko sudhaaro। khud yaad karenge nahin, doosron ko kehte rahenge, yeh thagi chal na sake। andar dil zaroor khaati hogi। baap ke saath poora lav nahin hai to shreemat par chalte nahin hain। behad ke baap jaisi shiksha to aur koi de na sake। baap kehte hain meethe bachche, is puraani duniya ko ab bhool jaao। pichhaadi mein to yeh sab bhool hi jaana hai। buddhi lag jaati hai apne shantidham aur sukhdhaam mein। baap ko yaad karte-karte baap ke paas chale jaana hai। patit aatma to ja na sake। woh hai hi paavan aatmaon ka ghar। yeh shareer 5 tatvon se bana hua hai। to 5 tatva yahaan rahne liye kheenchate hain kyonki aatma ne yeh jaise property li hui hai, isliye shareer mein mamatva ho gaya hai। ab inse mamatva nikaal jaana hai apne ghar। vahaan to yeh 5 tatva hain nahin। satayug mein bhi shareer yogbal se banta hai। satopradhaan prakriti hoti hai isliye kheenchati nahin। duhkh nahin hota। yeh badi maheen baaten hain samajhne ki। yahaan 5 tatvon ka bal aatma ko kheenchata hai isliye shareer chhodne ki dil nahin hoti hai। nahin to ismen aur hi khush hona chaahiye। paavan ban shareer aise chhodenge jaise makkhan se baal। to shareer se, sab cheezon se mamatva ekdam mita dena hai, isse hamaara koi connection nahin। bas ham jaate hain baba ke paas। is duniya se apna bag baggage taiyaar kar pahle se hi bhej diya hai। saath mein to chal na sake। baaki aatmaon ko jaana hai। shareer ko bhi yahaan chhod dena hai। baba ne naye shareer ka saakshaatkaar kara diya hai। heere javaahron ke mahal mil jaayenge। aise sukhdhaam mein jaane liye kitni mehnat karni chaahiye। thakna nahin chaahiye। dinraat bahut kamaai karni hai isliye baba kehte hain neend ko jeetne vaale bachche maamekam yaad karo aur vichaar saagar manthan karo। drama ke raaz ko buddhi mein rakhne se buddhi ekdam sheetal ho jaati hai। jo mahaarthi bachche honge woh kab hilenge nahin। shivbaaba ko yaad karenge to woh sambhaal bhi karenge।

baap tum bachchon ko duhkh se chhudaakar shanti ka daan dete hain। tumko bhi shanti ka daan dena hai। tumhaari yeh behad ki shanti arthaat yogbal doosron ko bhi ekdam shant kar denge। tum baap ki yaad mein rahkar phir dekho yeh aatma hamaare kul ki hai ya nahin! agar hogi to ekdam shant ho jaayegi। jo is kul ke honge unhon ko hi in baaton se ras baithega। bachche yaad karte hain to baap bhi pyaar karte hain। aatma ko pyaar kiya jaata hai। yeh bhi jaante hain jinhonne bahut bhakti ki hai woh hi jaasti padhenge। unke chehre se maaloom padta jaayega ki baap mein kitna lav hai। aatma baap ko dekhti hai। baap ham aatmaon ko padha rahe hain। baap bhi samajhte hain ham itni chhoti bindi aatma ko padhaata hoon। aage chal tumhaari yeh avastha ho jaayegi। samjhenge ham bhaai-bhaai ko padhaate hain। shakla behen ki hote bhi drishti aatma taraph jaae। shareer par drishti bilkul na jaaye, ismen badi mehnat hai। yeh badi maheen baaten hain। badi oonch padhaai hai। vazan karo to is padhaai ka taraph bahut bhaari ho jaayega। achha!

meethe-meethe sikeeldhe bachchon prati maat-pita baapdaada ka yaadapyaar aur good morning। roohaani baap ki roohaani bachchon ko namaste।

avyakt mahaavaakya -

mahaaveer bachchon ke sangathan ki vishashta - ekras, ektik sthiti - 9-12-75

mahaaveer arthaat vishesh aatma। aise mahaaveer, vishesh aatmaon ke sangathan ki visheshta vartamaan samay yahi honi chaahiye jo ek hi samay sabki ekras, ektik sthiti ho arthaat jitna samay, jis sthiti mein thaharna chaahen, utna samay, us sthiti mein sangathit roop mein sthit ho jaaen, sangathit roop mein sabke sankalp roopi anguli ek ho। jab tak sangathan ki yeh practice nahin hai, tab tak siddhi nahin hogi। sangathan mein abhi order ho ki paanch minute ke liye vyartha sankalp bilkul samaapta kar beejroop powerful sthiti mein ekras sthit ho jaao, to aisa abhyaas hai? aise nahin koi manan karne ki sthiti mein ho, koi roohrihaan kar raha ho aur koi avyakt sthiti mein ho। order hai beejroop hone ka aur kar rahe hain roohrihaan to order nahin maana na! yeh abhyaas tab hoga jab pahle vyartha sankalpon ki samaapti karenge। halchal hoti hi vyartha sankalpon ki hai। in vyartha sankalpon ki samaapti ke liye, apne sangathan ko shaktishaali va ekmat banaane ke liye kaun-si shakti chaahiye?

iske liye ek to faith (vishvaas), doosra-samaane ki shakti chaahiye। sangathan ko jodne ka dhaaga hai - faith। kisi ne jo kuchh kiya, maano wrong bhi kiya, lekin sangathan pramaan va apne sanskaaron pramaan va samay pramaan usne jo kiya uska bhi zaroor koi bhaav-arth hoga। sangathit roop mein jahaan service hai, vahaan uske sanskaaron ko bhi merciful ki drishti se dekhte hue, sanskaaron ko saamne na rakh ismen bhi koi kalyaan hoga, isko saath milaakar chalne mein hi kalyaan hai। aisa faith jab sangathan mein ek doosre ke prati ho tab hi saphalta ho sakti hai। pahle se hi vyartha sankalp nahin chalaane chaahiye। jaise koi apni galti ko mahsoos bhi karte hain lekin usko kabhi phailaayenge nahin balki use samaayenge। doosra usko phailaayega to bhi bura lagega। isi prakaar doosre ki galti ko bhi apni galti samajh phailaana nahin chaahiye। vyartha sankalp nahin chalaane chaahiye balki unhein bhi sama dena chaahiye। itna ek-do mein faith ho! sneh ki shakti se theek kar dena chaahiye। jaise laukik reeti bhi ghar ki baat baahar nahin karte hain, nahin to isse ghar ko hi nuksaan hota hai। to sangathan mein saathi ne jo kuchh kiya usmein zaroor rahasya hoga, yadi usne wrong bhi kiya ho, to bhi usko parivartan kar dena chaahiye। yeh donon prakaar ke faith rakhkar ek-doosre ke samparka mein chalne se, sangathan ki saphalta ho sakti hai, ismen samaane ki shakti jyaada chaahiye। vyartha sankalpon ko samaana hai। beete hue sanskaaron ko kabhi bhi vartamaan samay se tally (milaan) nahin karo arthaat past ko present nahin karo। jab past ko present mein milaate ho tab hi sankalpon ki queue lambi ho jaati hai aur jab tak yeh vyartha sankalpon ki queue hai, tab tak sangathit roop mein ekras sthiti ho nahin sakti।

doosre ki galti so apni galti samajhna - yeh hai sangathan ko majboot karna। yeh tab hoga jab ek-doosre mein faith hoga। parivartan karne ka faith ya kalyaan karne ka faith, ismen samaane ki shakti zaroor chaahiye। dekha aur suna usko bilkul samaakar, vahi aatmik drishti aur kalyaan ki bhaavna rahe। jab agyaaniyon ke liye kehte ho - apkaariyon par upkaar karna hai to sangathan mein bhi ek doosre ke prati raham ki bhaavna rahe। abhi raham ki bhaavna kam rehti hai kyonki aatmik sthiti ka abhyaas kam hai।

aisa powerful sangathan hone se hi siddhi hogi। abhi aap siddhi ka aahvaan karte ho, lekin phir aapke aage siddhi svayan jhukegi। jaise satayug mein prakriti daasi ban jaati hai, vaise siddhi aapke saamne svayan jhukegi। siddhi aap logon ka aahvaan karegi। jab shreshtha knowledge hai, stage bhi powerful hai to siddhi kya badi baat hai? sadaakaal ekras sthiti mein rahne vaalon ko siddhi praapta na ho, yeh ho nahin sakta lekin iske liye sangathan ki shakti chaahiye। ek ne kuchh bola, doosre ne sveekaar kiya। saamna karne ki shakti brahman parivaar ke aage use nahin karni hai। vo maaya ke aage use karni hai। parivaar se saamna karne ki shakti use karne se sangathan powerful nahin hota। koi bhi baat nahin janchati to bhi ek-doosre ka satkaar karna chaahiye। us samay kisi ke sankalp va bol ko kat nahin karna chaahiye isliye ab samaane ki shakti ko dhaaran karo।

sangathit roop mein aap brahman bachchon ki aapas ke samparka ki bhaasha bhi avyakt bhaav ki honi chaahiye। jaise pharishte athva aatmaayen aatmaon se bol rahi hain। kisi ki suni hui galti ko sankalp mein bhi sveekaar na karna aur na karaana hi chaahiye। aisi jab sthiti ho tab hi baap ki jo shubh kaamna hai-sangathan ki, woh practical mein hogi। iske liye vishesh purushaartha athva vishesh anubhvon ki aapas mein len-den karo। sangathit roop mein vishesh yog ke programme chalte rahen to vinaash jvaala ko bhi pankha lagega। yog-agni se vinaash ki agni jalegi। achha। om shanti।

vardaan:- vyakta mein rehte avyakt pharishte roop ka saakshaatkaar karaane vaale saphed vastradhaari aur saphed laaitdhaari bhav

jaise abhi chaaron or yeh aavaaj phail raha hai ki yeh saphed vastradhaari kaun hain aur kahaan se aaye hain! aise ab chaaron or pharishte roop ka saakshaatkaar karaao - isko kaha jaata hai double seva ka roop। jaise baadal chaaron or chha jaate hain, aise chaaron or pharishte roop se pragat ho jaao, jahaan bhi dekhen to pharishte hi nazar aayen। lekin yeh tab hoga jab shareer se detach hokar antahvaahak shareer se chakra lagaane ke abhyaasi honge। mansa powerful hogi।

slogan:- sarva gunon va sarva shaktiyon ke adhikaari banne ke liye aagyaakaari bano।

avyakt ishaare - is avyakti maas mein bandhanmukta rah jeevanmukta sthiti ka anubhav karo

jaise baap sada svatantra hai - aise baap samaan bano। baapdaada ab bachchon ko partantra dekh nahin sakte। agar svayan ko svatantra nahin kar sakte ho, svayan hi apni kamjoriyon mein girte rehte ho to vishwa parivartak kaise banenge! ab is smriti ko badhaao ki main master sarvashaktimaan hoon, isse sahaj sarva pinjadon se mukta udta panchhi ban jaayenge।