Mamma's Murli - gyan-sitar-03

१४.१२.५८

paramatma aur dharma-aatmaon ke kaarya mein mahaan antar

om shanti। ham aatmaayen bahut puraani hain। zaroor hai ki ham aatmaayen kab nai bhi theen। bhala aatma nai aur puraani kaise hoti hai? duniya to samajhti hai ki “aatma nyaari hai, na katti hai, na jalti hai।” aatma ka kisi bhi tarah vinaash nahin hota, kyonki immortal hai।” parantu ab hamne param aatma se jaana hai ki aatma immortal barobar hai। shareer ko jalaate hain to aatma nikal jaati hai। aatma apne karmon ke hisaab-kitaab anusaar doosra shareer lekar part bajaati hai। bhogne vaali aatma hai। aise nahin ki shareer bhogne jaata hai, shareer mein aatma bhogne jaati hai। karmon ka hisaab-kitaab aatma par lagta hai tab to aatma bhogne jaati hai। agar aatma nyaari hoti to bhogne kyoon jaati? duhkh-sukh aatma hi bhogti hai। to zaroor mail chadhi hui hai। ab aatma ko duhkh feel hota hai, to zaroor aatma ko poorn sukh-shanti ka bhi anubhav tha। usi samay aatmaayen bhi nai theen। ab puraani ban gai hain। aatma ke oopar mail bhi anek janmon ki lagi hui hai, na ki ek janma ki। manushya jo kuchh vikarma karte hain uski bhogna bahut hai jo ek janma mein poori nahin ho sakti hai। anek janmon ki mail chadhte-chadhte aatma ab antim stage par aakar pahunchi hai। aisi tamoguni aatmaon ko phir svachchha banaane paramatma ko aana padta hai। ५ bhooton ne hi is tamoguni avastha mein laaya hai। pahle-pahle aatmaon ki sankhya bhi kam thi, phir vriddhi hoti gai। part mein aane se mail chadhti gai। aatmaayen sabhi ikatthi to nahin aati hain। jhaad to dheere-dheere vriddhi ko paata hai। geeta mein bhi mahaavaakya hain ki manushya srishti ulta jhaad hai। ulta kyon hai? kyonki inki jad oopar hai।

sab aatmaayen niraakaari duniya se aati hain to jad vahaan rahi na। ab sab aatmaayen tamoguni hain। unhon ko svachchha banaana—so to ek hi samartha ka kaam hai, aur unki gat-mat vahi jaane। sadgati karne ki mat unki kya hai? kis tarkeeb se karte hain? woh to vahi jaane। manushya aatmaayen to part bajaate-bajaate puraani ho gai hain। woh kaise kisko svachchha banaayegi? woh bal kahaan se aae? sarvashaktivaan to woh ek hi paramatma hai। woh baap bhi aatma hai parantu unko param kehte hain kyonki punarjanma rahit hai। unko koi lep-chhep nahin lagta। unse satoguni sanskaar kab jaate nahin hain। aatmaayen janma-maran mein aati hain to woh sanskaar chale jaate hain। jo bhi svachchha aatmaayen hain woh aati hain apna dharma sthaapan kar unki paalna karne। paramatma aate hain sabko vaapas le jaane aur saath-saath phir nai duniya ki sthaapna karaate hain। to unke kaam niraale hue। paramatma ka kartavya hi apna hai। aatmaayen apne sanskaaron sahit anaadi hain। unhon ko anek janmon ka part bhi kaise bajaana hota hai -- woh bhi samajhna hai। aise nahin ki aatma, paramatma se mili hui ek hi cheej hai।

har ek aatma ke bhinna-bhinna sanskaar hain। Christ, bauddha aadi bhal svachchha aatmaayen hain, parantu un sabke bhi bhinna-bhinna sanskaar hain, apna-apna kartavya hai। to svachchha aatmaon mein bhi bhinnata hui na। yeh sab knowledge paramatma hi de sakte hain jo anaadi kaal se jaante hain। arjun ko bhi kaha hai na ki mujh ek ko jaanne se tum sab kuchh jaan jaayenge। har cheej ka knowledge mil jaata hai। to paramatma sabmen mila hua nahin hai, unke kartavya hi niraale hain। aatma hi aatma mein milkar ek nahin ho sakti hai to paramatma mein milkar ek kaise ho sakti hai? satayug mein aatmaayen pavitra hain, karma-bandhan ke hisaab-kitaab se us stage mein jeevanmukta hain। usi samay mail nahin rehti। phir apne-apne part mein aane se sanskaaron ki mail chadhti jaati hai। manushya ke bhinna-bhinna sanskaar, bhinna-bhinna activity — yeh kis aadhaar par hai? is bhinnata ki bhi stage hain। aatmaayen apni tamoguni stage mein bhi apne-apne sanskaar vaali hain। rajo mein bhi bhinnata hai to tamo mein bhi bhinnata hai। satayug mein jab jeevanmukta hain, yatha raaja-raani tatha praja। to yeh raaja-raani-praja sab the na। bhinnata na hoti to sab raajaayen hote। praja hai to raaja avashya hai। sab raaja hon to phir khel hi na ho। in sabhi maheen baaton ko buddhi se samajhna hai। vivek ko kholna hai। paramatma aakar anubhav, vivek ke aadhaar par samjhaate hain। right wrong kya hai? — so sochna hai jarur।

kehte hain — bhagwan ne aisa khel kyon racha? bachchon ko duhkhi karna — kya yeh baap ka khel hai? baap kehte hain ki mainne jo khel racha hai usmein bhinnata thi। mainne sukh ka khel racha। yeh to phir manushyon ne mujhko bhoolkar apne ko bhulaaya hai aur apne liye karmabhog banaaya hai। mainne to aise karma-bhog se chhudaaya tha, tab to mujhe duhkh-harta sukh-kartta kaha gaya hai। yeh hai samajhne ki baat। yeh sunne vaala bhi regular chaahiye kyonki guhya padhaai hoti jaati hai। bhal vahi baat १० baar suni hogi parantu koi din woh baat poori reeti buddhi mein baith jaaegi। regular padhne se hi poori dhaarna hogi। vinaashi pad paane mein bhi regular padhaai hoti hai na। yeh bhi padhaai hai aur inka time bhi yeh thoda-sa hai। aise nahin ki parampara guruon ki gaddi chalti hai। nahin, paramatma to kehte hain satguru hoon hi main ek। main hi sadgati deta hoon। sadgati ko hi praalabdha kahenge। durgati ko praalabdha nahin kaha jaata hai। sirf satya-satya kahne se na kalyaan hua hai, na hone vaala hai। har baat ko vivek se samajhna chaahiye na। manzil barobar oonch hai। vikaaron ko poora jeetna hai tab to sampoorn banenge। vikaaron se yuddha karni hai। ismen agar khud nahin pahunch sakte to shant mein rahen। auron ki shanti mein vighna daalna, aise ko kalpa pahle bhi paramatma ne kaha hai raahu aur bhasmaasur। apne ko hi bhasma kar dete hain। asur to pahle hi hain। gyaan amrit pi phir ulta bante hain to unko bhasmaasur kaha jaata hai। to gyaan amrit peekar aur hi bhasmaasur to nahin banna chaahiye। apna kaam hai soochna dena। bure bano to bhi kitne tak bano, achha bano to bhi kitne tak bano? buraai mein bhi stages hain — sato, rajo, tamo। aise nahin ki ekdam chaknaachoor ho jaao। bhal bure bano yaani pad ganvaao parantu ekdam bhasmaasur to nahin bano na। khud nahin chal sakte ho to auron ko to vighna nahin daalo। karte to sab apne liye hain na। sachche purushaarthi ko to yeh vighna aadi aur hi force (josh) dilaaenge। baap ka pharja hai sapoot athva kapoot bachchon ko samjhaana। kapoot prati bhi soochna di jaati hai — muphta apna pad bhrashta karte ho। banaane vaale to apna pad bana hi lenge। bigaadenge phir bhi apni। isliye kuchh sochna chaahiye। achha।