Murli du jour du samedi 25 juillet 2020

25-07-2020 praatahmurli om shanti "baapdaada"' madhuban

“meethe bachche - deh-abhimaan chhod dehi-abhimaani bano, dehi-abhimaaniyon ko hi eeshvareey sampradaay kaha jaata hai''

prashn:- tum bachche abhi jo satsang karte ho yeh doosre satsangon se niraala hai, kaise?

uttar:- yahi ek satsang hai jismen tum aatma aur paramatma ka gyaan sunte ho। yahaan padhaai hoti hai। em object bhi saamne hai। doosre satsangon mein na padhaai hoti, na koi em object hai।

om shanti। roohaani bachchon prati roohaani baap samjha rahe hain। roohaani bachche sun rahe hain। pahle-pahle baap sam-jhaate hain jab bhi baitho to apne ko aatma samajhkar baitho। deh na samjho। deh-abhimaani ko aasuri sampradaay kaha jaata hai। dehi-abhimaaniyon ko eeshvareey sampradaay kaha jaata hai। eeshvar ko deh hai nahin। woh sadaiv aatma-abhimaani hai। woh hai supreme aatma, sabhi aatmaon ka baap। param aatma arthaat oonche te ooncha। manushya jab oonche te ooncha bhagwan kehte hain to buddhi mein aata hai woh niraakaar ling roop hai। niraakaar ling ki pooja bhi hoti hai। woh hai paramatma yaani sabhi aatmaon se oonch। hai woh bhi aatma parantu oonch aatma। woh janma-maran mein nahin aate hain। baaki sab punarjanma lete hain aur sabhi hain rachna। rachta to ek hi baap hai। brahma-vishnu-shankar bhi rachna hai। manushya srishti bhi saari hai rachna। rachta ko baap kaha jaata hai। puroosh ko bhi rachta kaha jaata hai। stri ko adopt karte hain phir unse create karte hain, paalna karte hain। bas vinaash nahin karte hain aur jo dharma sthaapak hote hain woh bhi create karte hain, phir unki paalna karte hain। vinaash koi bhi nahin karte। behad ka baap jisko param aatma kaha jaata hai, jaise aatma ka roop bindi hai vaise hi parampita paramatma ka bhi roop bindi hai। baaki itna bada ling jo banaate hain woh sab bhakti maarga mein pooja ke kaaran। bindi ki pooja kaise ho sakti। bhaarat mein roodra yagya rachte hain to mitti ka shivling aur saaligraam banaakar phir unki pooja karte hain। unko roodra yagya kaha jaata hai। vaastav mein asli naam hai raajasva ashvamedh avinaashi roodra geeta gyaan yagya। jo shaastron mein bhi likha hua hai। ab baap bachchon ko kehte hain apne ko aatma samjho। aur jo bhi satsang hain usmein aatma ya paramatma ka gyaan na koi mein hai, na de sakte hain। vahaan to koi em object hoti nahin। tum bachche to abhi padhaai padh rahe ho। tum jaante ho aatma shareer mein pravesh karti hai। aatma avinaashi hai, shareer vinaashi hai। shareer dvaara part bajaati hai। aatma to ashareeri hai na। kehte bhi hain nange aaye hain, nange jaana hai। shareer dhaaran kiya phir shareer chhodkar nange jaana hai। yeh baap tum bachchon ko hi baith samjhaate hain। yeh bhi bachche jaante hain bhaarat mein satayug tha to devi-devtaaon ka raajya tha, ek hi dharma tha। yeh bhi bhaaratvaasi nahin jaante hain। baap ko jisne nahin jaana usne kuchh nahin jaana। praacheen rishi-muni bhi kehte the - ham rachta aur rachna ko nahin jaante hain। rachayita hai behad ka baap, vahi rachna ke aadi-madhya-ant ko jaante hain। aadi kaha jaata hai shuru ko, madhya beech ko। aadi hai satayug, jisko din kaha jaata hai, phir madhya se ant tak hai raat। din hai satayug-treta, svarga hai wonder oph world। bhaarat hi svarga tha, jismen lakshmi-naaraayan raajya karte the, yeh bhaaratvaasi nahin jaante hain। baap abhi svarga ki sthaapna kar rahe hain।

baap kehte hain tum apne ko aatma samjho। ham first class aatma hain। is samay manushyamaatra sab deh-abhimaani hain। baap aatma-abhimaani banaate hain। aatma kya cheez hai, yeh bhi baap batlaate hain। manushya kuchh bhi nahin jaante। bhal kehte bhi hain bhrikuti ke beech chamakta hai ajab sitaara parantu woh kya hai, kaise usmein part bhara hua hai, woh kuchh bhi nahin jaante। abhi tumko baap ne samjhaaya hai, tum bhaaratvaasiyon ko 84 janmon ka part bajaana hota hai। bhaarat hi oonch khanda hai, jo bhi manushya maatra hain, unka yeh teertha hai, sarva ki sadgati karne baap yahaan aate hain। raavan raajya se liberate kar guide ban le jaate hain। manushya to aise hi kah dete, arth kuchh bhi nahin jaante। bhaarat mein pahle devi-devta the। unhon ko hi phir punarjanma lena padta hai। bhaaratvaasi hi so devta phir kshatriy, vaishya, shoodra bante hain। punarjanma lete hain na। is knowledge ko poori reeti samajhne mein 7 roz lagte hain। patit buddhi ko paavan banaana hai। yeh lakshmi-naaraayan paavan duniya mein raajya karte the na। unhon ka hi raajya bhaarat mein tha to aur koi dharma nahin tha। ek hi raajya tha। bhaarat kitna solvent tha। heere-javaahron ke mahal the phir raavan raajya mein pujaari bane hain। phir bhakti maarga mein yeh mandir aadi banaaye hain। somnaath ka mandir tha na। ek mandir to nahin hoga। yahaan bhi shiv ke mandir mein itne to heere javaahar the jo muhammad gajanvi oont bharkar le gaye। itne maal the, oont to kya koi laakhon oont le aaye to bhi bhar na saken। satayug mein sone, heere-javaahron ke to anek mahal the। muhammad gajanvi to abhi aaya hai। dvaapar mein bhi kitne mahal aadi hote hain। woh phir earthquake mein andar chale jaate hain। raavan ki koi sone ki lanka hoti nahin hai। raavan raajya mein to bhaarat ka yeh haal ho jaata hai। 100 percent irreligious, unrighteous, insolvent, patit vicious, nai duniya ko kaha jaata hai viceless। bhaarat shivaalay tha, jisko wonder oph world kaha jaata hai। bahut thode manushya the। abhi to karodon manushya hain। vichaar karna chaahiye na। abhi tum bachchon ke liye yeh purooshottam sangamayug hai, jabki baap tumko purooshottam, paarasbuddhi bana rahe hain। baap manushya se devta banne ki tumhein sumat dete hain। baap ki mat ke liye hi gaaya jaata hai tumhari gat-mat nyaari… iska bhi arth koi nahin jaante। baap samjhaate hain main aisi shreshtha mat deta hoon jo tum devta ban jaate ho। ab kaliyug poora hota hai, puraani duniya ka vinaash saamne khada hai। manushya bilkul hi ghor andhiyaare mein kumbhakran ki neend mein soye pade hain kyonki kehte hain shaastron mein likha hai - kaliyug to abhi bachcha hai, 40 hazaar varsha pade hain। 84 laakh yoniyaan samajhne ke kaaran kalpa ki aayu bhi lambi-chaudi kar di hai। vaastav mein hai 5 hazaar varsha। baap samjhaate hain tum 84 janma lete ho, na ki 84 laakh। behad ka baap to in sabhi shaastron aadi ko jaante hain tab to kehte hain yeh sab hain bhakti maarga ke, jo aadhaakalpa chalte hain, isse koi mujhe nahin milte। yeh bhi vichaar karne ki baat hai ki agar kalpa ki aayu laakhon varsha den phir to sankhya bahut honi chaahiye। jabki Christian ki sankhya 2 hazaar varsha mein itni hui hai। bhaarat ka asul dharma devi-devta dharma hai, woh chala aana chaahiye parantu aadi sanaatan devi-devta dharma ko bhool jaane kaaran kah dete hamaara hindu dharma hai। hindu dharma to hota hi nahin। bhaarat kitna oonch tha। aadi sanaatan devi-devta dharma tha to vishnupuri thi। ab hai raavanpuri। vahi devi-devtaayen 84 janma ke baad kya ban gaye hain। devtaaon ko viceless samajh, apne ko vicious samajh unhon ki pooja karte hain। satayug mein bhaarat viceless tha, nai duniya thi, jisko naya bhaarat kehte hain। yeh hai puraana bhaarat। naya bhaarat kya tha, puraana bhaarat kya hai, nai duniya mein bhaarat hi naya tha, ab puraani duniya mein bhaarat bhi puraana hai। kya gati ho gai hai। bhaarat hi svarga tha, abhi narka hai। bhaarat most solvent tha, bhaarat hi most insolvent hai, sabse bheekh maang rahe hain। praja se bhi bheekh maangate hain। yeh to samajh ki baat hai na। aaj ke deh-abhimaani manushyon ko thoda paisa mila to samajhte hain ham to svarga mein baithe hain। sukhdhaam (svarga) ko bilkul jaante nahin kyonki pattharbuddhi hain। ab unhein paarasbuddhi banaane ke liye 7 roz ki bhatthi mein bithaao kyonki patit hain na। patit ko yahaan to bitha nahin sakte। yahaan paavan hi rah sakte hain। patit ko allow nahin kar sakte।

tum abhi purooshottam sangamayug par baithe ho। jaante ho baba hamko aisa purooshottam banaate hain। yeh sachchi satya naaraayan ki katha hai। satya baap tumko nar se naaraayan banne ka raajayog sikhla rahe hain। gyaan sirf ek baap ke paas hai, jisko gyaan ka saagar kaha jaata hai। shanti ka saagar, pavitrata ka saagar, yeh us ek ki hi mahima hai। doosre koi ki mahima ho nahin sakti। devtaaon ki mahima alag hai, parampita paramatma shiv ki mahima alag hai। woh hai baap, krishna ko baap nahin kahenge। ab bhagwan kaun thahra? abhi bhi bhaaratvaasi manushyon ko pata nahin hai। krishna bhagvaanuvaach kah dete hain। woh to poore 84 janma lete hain। sooryavanshi so chandravanshi so vaishya vanshi....., manushya ham so ka arth bhi samajhte nahin। ham aatma so paramatma kah dete hain, kitna wrong hai। abhi tum samjhaate ho ki bhaarat ki chadhti kala aur utarti kala kaise hoti hai। yeh hai gyaan, woh sab hai bhakti। satayug mein sab paavan the, raaja-raani ka raajya chalta tha। vahaan vajeer bhi nahin hota hai kyonki raaja-raani khud hi maalik hain। baap se varsa liya hua hai। unmein akla hai, lakshmi-naaraayan ko koi ke raay lene ki darkaar nahin hai। vahaan vajeer hote nahin। bhaarat jaisa pavitra desh koi tha nahin। mahaan pavitra desh tha। naam hi tha svarga, abhi hai narka। narka se phir svarga baap hi banaayega। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) ek baap ki sumat par chalkar manushya se devta banna hai। is suhaavne sangamayug par svayan ko purooshottam paarasbuddhi banaana hai।

2) 7 roz ki bhatthi mein baith patit buddhi ko paavan buddhi banaana hai। satya baap se satya naaraayan ki sachchi katha sun nar se naaraayan banna hai।

vardaan:- pharishtepan ki sthiti dvaara baap ke sneh ka return dene vaale samaadhaan swaroop bhav

pharishte pan ki sthiti mein sthit hona - yahi baap ke sneh ka return hai, aisa return dene vaale samaadhaan swaroop ban jaate hain। samaadhaan swaroop banne se svayan ki va anya aatmaon ki samasyaayen svatah samaapta ho jaati hain। to ab aisi seva karne ka samay hai, lene ke saath dene ka samay hai। isliye ab baap samaan upkaari ban, pukaar sunkar apne pharishte roop dvaara un aatmaon ke paas pahunch jaao aur samasyaaon se thaki hui aatmaon ki thakaavat utaaro।

slogan:- vyartha se beparvaah bano, maryaadaaon mein nahin।