Murli du jour du samedi 15 août 2020

15-08-2020 praatahmurli om shanti "baapdaada"' madhuban

“meethe bachche - kadam-kadam par jo hota hai woh kalyaankaari hai, is drama mein sabse adhik kalyaan unka hota hai jo baap ki yaad mein rehte hain''

prashn:- drama ki kis noondh ko jaanne vaale bachche apaar khushi mein rah sakte hain?

uttar:- jo jaante hain ki draamaanusaar ab is puraani duniya ka vinaash hoga, natural calamities bhi hongi। lekin hamaari raajdhaani to sthaapan honi hi hai, ismen koi kuchh kar nahin sakta। bhal avasthaayen neeche-oopar hoti rahengi, kabhi bahut umang, kabhi thande thaar ho jaayenge, ismen moonjhana nahin hai। sabhi aatmaon ka baap bhagwan hamko padha rahe hain, is khushi mein rehna hai।

geet:- mahphil mein jal uthi shama …

om shanti। meethe-meethe nambarvaar purooshaartha anusaar chaitanya parvaanon ko baba yaad-pyaar de rahe hain। tum sab ho chaitanya parvaane। baap ko shama bhi kehte hain, parantu unko jaante bilkul nahin hain। shama koi badi nahin, ek bindi hai। kiski bhi buddhi mein nahin hoga ki ham aatma bindi hain। hamaari aatma mein saara part hai। aatma aur paramatma ka knowledge aur kiski buddhi mein nahin hai। tum bachchon ko hi baap ne aakar samjhaaya hai, aatma ka realisation diya hai। aage yeh pata nahin tha ki aatma kya hai, paramatma kya hai! isliye deh-abhimaan ke kaaran bachchon mein moh bhi hai, vikaar bhi bahut hain। bhaarat kitna oonch tha। vikaar ka naam bhi nahin tha। woh tha viceless bhaarat, abhi hai vicious bhaarat। koi bhi manushya aise nahin kahenge jaise baap samjhaate hain। aaj se 5 hazaar varsha pahle hamne inko shivaalay banaaya tha। mainne hi shivaalay sthaapan kiya tha। kaise? so bhi tum abhi samajh rahe ho। tum jaante ho kadam-kadam par jo hota hai woh kalyaankaari hi hai। ek-ek din jaasti kalyaankaari unka hai jo baap ko achhi reeti yaad kar apna bhi kalyaan karte rehte hain। yeh hai hi kalyaankaari purooshottam banne ka yug। baap ki kitni mahima hai। tum jaante ho abhi sachcha-sachcha bhaagvat chal raha hai। dvaapar mein jab bhakti maarga shuru hota hai to pahle-pahle tum bhi heeron ka ling banaakar pooja karte ho। abhi tumko smriti aai hai, ham jab pujaari bane the tab mandir banaaye the। heere maanik ka banaate the। woh chitra to abhi mil na saken। yahaan to yeh log chaandi aadi ka banaakar pooja karte hain। aise pujaariyon ka bhi maan dekho kitna hai। shiv ki pooja to sab karte hain। lekin avyabhichaari pooja to hai nahin।

yeh bhi bachche jaante hain - vinaash bhi aane ka hai zaroor, taiyaariyaan ho rahi hain। natural calamities ki bhi drama mein noondh hai। koi kitna bhi maatha maare, tumhaari raajdhaani to sthaapan honi hi hai। koi ki bhi taakat nahin jo ismen kuchh kar sake। baaki avasthaayen to neeche-oopar hongi hi। yeh hai bahut badi kamaai। kabhi tum bahut khushi mein achhe khyaalaat mein rahenge, kabhi thande pad jaayenge। yaatra mein bhi neeche-oopar hote hain, ismen bhi aise hota hai। kabhi to subah ko uth baap ko yaad karne se bahut khushi hoti hai oho! baba hamko padha rahe hain। wonder hai। sabhi aatmaon ka baap bhagwan hamko padha rahe hain। unhonne phir krishna ko bhagwan samajh liya hai। saari duniya mein geeta ka maan bahut hai kyonki bhagvaanuvaach hai na। parantu yeh kisko pata nahin hai ki bhagwan kisko kaha jaata hai। bhal kitni bhi position vaale bade-bade vidvaan, pandit aadi hain, kehte bhi hain god father ko yaad karte hain parantu woh kab aaya, kya aakar kiya yeh sab bhool gaye hain। baap sab baaten samjhaate rehte hain। drama mein yeh sab noondh hai। yeh raavanraajya phir bhi hoga aur hamko aana padega। raavan hi tumko agyaan ke ghor andhiyaare mein sula dete hain। gyaan to sirf ek gyaan saagar hi batlaate hain jisse sadgati hoti hai। sivaae baap ke aur koi sadgati kar na sake। sarva ka sadgati daata ek hai। geeta ka gyaan jo baap ne sunaaya tha woh phir praayah lop ho gaya। aise nahin, yeh gyaan koi parampara chala aata hai। auron ke kuraan, Bible aadi chale aate hain, vinaash nahin ho jaate। tumko to jo gyaan abhi main deta hoon, inka koi shaastra banta nahin hai। jo parampara anaadi ho jaae। yeh to tum likhte ho phir khatma kar dete ho। yeh to sab natural jalkar khatma ho jaayenge। baap ne kalpa pahle bhi kaha tha, abhi bhi tumko kah rahe hain - yeh gyaan tumko milta hai phir praalabdha jaakar paate ho phir is gyaan ki darkaar nahin rehti। bhakti maarga mein sab shaastra hain। baba tumko koi geeta padhkar nahin sunaate hain। woh to raajayog ki shiksha dete hain, jiska phir bhakti maarga mein shaastra banaate hain to agdam bagdam kar dete hain। to tumhaari mool baat hai ki geeta ka gyaan kisne diya! unka naam badli kar diya hai, aur koi ke bhi naam badli nahin hue hain। sabke mukhya dharma shaastra hain na। ismen mukhya hai Deityism, Islamism, Buddhism। bhal karke koi kehte hain ki pahle Buddhism hai peechhe Islamism। bolo, in baaton se geeta ka koi tailuk nahin hai। hamaara to kaam hai baap se varsa lene ka। baap kitna achhi reeti samjhaate hain - yeh hai bada jhaad। achha hai, jaisa flower vase hai। 3 tubes nikalti hain। kitna achhi samajh se banaaya hua jhaad hai। koi bhi jhat samajh jaayenge ki ham kis dharma ke hain। hamaara dharma kisne sthaapan kiya? yeh dayaanand, arvinda ghos aadi to abhi hokar gaye hain। vo log bhi yog aadi sikhlaate hain। hai sab bhakti। gyaan ka to naam-nishaan nahin। kitne bade-bade title milte hain। yeh bhi sab drama mein noondh hai, phir bhi hoga - 5 hazaar varsha baad। shuru se lekar yeh chakra kaise chala hai, phir kaise repeat hota rehta hai? tum jaante ho। abhi ka present phir past ho future ho jaayega। past, present, future। jo past ho jaata hai woh phir future hota hai। is samay tumko knowledge milti hai phir tum raajaai lete ho, in devtaaon ka raajya tha na। us samay aur koi ka raajya nahin tha। yeh bhi ek kahaani misal bataao। badi sundar kahaani ban jaayegi। long-long 5 hazaar varsha pahle yeh bhaarat satayug tha, koi dharma nahin tha, sirf devi-devtaaon ka hi raajya tha। unko sooryavanshi raajya kaha jaata tha। lakshmi-naaraayan ka raajya chala 1250 varsha, phir unhonne raajya diya doosre bhaaiyon kshatriyon ko phir unka raajya chala। tum samjha sakte ho ki baap ne aakar padhaaya tha। jo achhi reeti padhe woh sooryavanshi banen। jo fail hue unka naam kshatriy pada। baaki ladaai aadi ki baat nahin hai। baba kehte hain bachche tum mujhe yaad karo to tamhaare vikarma vinaash ho jaayenge। tumhein vikaaron par jeet paani hai। baap ne ordinance nikaala hai, jo kaam par jeet paayenge vahi jagatjeet banenge। peechhe aadhaakalpa baad phir vaam maarga mein girte hain। unhon ke bhi chitra hain। shakla devtaaon ki bani hui hai। raam raajya aur raavan raajya aadha-aadha hai। unki kahaani baith banaani chaahiye। phir kya hua, phir kya hua। yahi satya naaraayan ki kahaani hai। satya to ek hi baap hai, jo is samay aakar saare aadi-madhya-ant ka tumko knowledge de rahe hain, jo aur koi de na sake। manushya to baap ko hi nahin jaante। jis drama mein actor hain, unke creator-director aadi ko nahin jaante। to baaki kaun jaanenge! abhi tumko baap bataate hain - drama anusaar yeh phir bhi aise hoga। baap aakar tum bachchon ko phir padhaayenge। yahaan doosra koi aa na sake। baap kehte hain main bachchon ko hi padhaata hoon। koi naye ko yahaan bitha nahin sakte। indraprastha ki kahaani bhi hai na। neelam pari, pukhraaj pari naam hai na। tumhaare mein bhi koi heere jaisa ratna hai। dekho ramesh ne aisi baat nikaali pradarshani ki jo sabka vichaar saagar manthan hua। to heere jaisa kaam kiya na। koi pukhraaj hai, koi kya hai! koi to bilkul kuchh nahin jaante। yeh bhi jaante ho ki raajdhaani sthaapan hoti hai। unmein raajaayen-raaniyaan aadi sab chaahiye। tum samajhte ho ham brahman shreemat par padhkar vishwa ke maalik bante hain। kitni khushi honi chaahiye। yeh mrityulok khatma hona hai। yeh baba to abhi hi samajhte rehte hain ki ham jaakar bachcha banenge। bachpan ki woh baaten abhi hi saamne aa rahi hain, chalan hi badal jaati hai। aise hi vahaan bhi jab boodhe honge to samjhenge ab yeh vaanaprastha shareer chhod ham kishor avastha mein chale jaayenge। bachpan hai satopradhaan avastha। lakshmi-naaraayan to yuva hain, shaadi kiye hue ko kishor avastha thode hi kahenge। yuva avastha ko rajo, vriddha ko tamo kehte hain isliye krishna par lav jaasti rehta hai। hain to lakshmi-naaraayan bhi vahi। parantu manushya yeh baaten nahin jaante hain। krishna ko dvaapar mein, lakshmi-naaraayan ko satayug mein le gaye hain। abhi tum devta banne ka purooshaartha kar rahe ho।

baap kehte hain kumaariyon ko to bahut khada hona chaahiye। kunvaari kanya, adhar kumaari, delvaada aadi jo bhi mandir hain, yeh tumhaare hi accurate yaadgaar hain। woh jad, yeh chaitanya। tum yahaan chaitanya mein baithe ho, bhaarat ko svarga bana rahe ho। svarga to yahaan hi hoga। mool vatan, sookshm vatan kahaan hai, tum bachchon ko sab maaloom hai। saare drama ko tum jaante ho। jo past ho gaya hai so phir future hoga phir past hoga। tumko kaun padhaate hain, yeh samajhna hai। hamko bhagwan padhaate hain। bas khushi mein thande thaar ho jaana chaahiye। baap ki yaad se sab ghotaale nikal jaate hain। baba hamaara baap bhi hai, hamko padhaate bhi hain phir hamko saath bhi le jaayenge। apne ko aatma samajh paramatma baap se aisi baaten karni hain। baba hamko abhi maaloom pada hai, brahma aur vishnu ka bhi maaloom pada hai। vishnu ki naabhi se brahma nikla। ab vishnu dikhaate hain ksheersaagar mein। brahma ko sookshm vatan mein dikhaate hain। vaastav mein hai yahaan। vishnu to hua raajya karne vaala। agar vishnu se brahma nikla to zaroor raajya bhi karega। vishnu ki naabhi se nikla to jaise ki bachcha ho gaya। yeh sab baaten baap baith samjhaate hain। brahma hi 84 janma poore kar ab phir vishnupuri ke maalik bante hain। yeh baaten bhi koi poori reeti samajhte nahin hain, tab to woh khushi ka paara nahin chadhta। gop-gopiyaan to tum ho। satayug mein thode hi honge। vahaan to honge prince-princess। gop-gopiyon ka gopi vallabh hai na। prajaapita brahma hai sabka baap aur phir sab aatmaon ka baap hai niraakaar shiv। yeh sab hain mukh vanshaavli। tum sab bi.ke. bhaai-behen ho gaye। criminal aai ho na sake, ismen hi maaya haar khilaati hai। baap kehte hain abhi tak jo kuchh padha hai use buddhi se bhool jaao। main jo sunaata hoon woh padho। seedhi to badi first class hai। saara madaar hai ek baat par। geeta ka bhagwan kaun? krishna ko bhagwan kah nahin sakte। woh to sarvagun sampanna devta hai। unka naam geeta mein de diya hai। saanvara bhi unko banaaya hai aur phir lakshmi-naaraayan ko bhi saanvara kar dete। koi hisaab-kitaab hi nahin। raamchandra ko bhi kaala kar dete। baap kehte hain kaam chita par baithne se saanvara hua hai। naam karke ek ka liya jaata hai। tum sab brahman ho। abhi tum gyaan chita par baithte ho। shoodra kaam chita par baithe hain। baap kehte hain - vichaar saagar manthan kar yuktiyaan nikaalo ki kaise jagaayen? jaagenge bhi drama anusaar। drama bada dheere-dheere chalta hai। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) sada isi smriti mein rehna hai ki ham gopi vallabh ke gop-gopiyaan hain। isi smriti se sada khushi ka paara chadha rahe।

2) abhi tak jo kuchh padha hai, use buddhi se bhool baap jo sunaate hain vahi padhna hai। ham bhaai behen hain is smriti se criminal aai ko khatma karna hai। maaya se haar nahin khaani hai।

vardaan:- reality dvaara royalty ka pratyaksha roop dikhaane vaale saakshaatkaar moorta bhav

abhi aisa samay aayega jab har aatma pratyaksha roop mein apne reality dvaara royalty ka saakshaatkaar karaayegi। pratyakshata ke samay maala ke manke ka number aur bhavishya raajya ka swaroop donon hi pratyaksha honge। abhi jo race karte-karte thoda sa rees ki dhool ka parda chamakte hue heeron ko chhipa deta hai, ant mein yeh parda hat jaayega phir chhipe hue heere apne pratyaksha sampanna swaroop mein aayenge, royal family abhi se apni royalty dikhaayegi arthaat apne bhavishya pad ko spashta karegi isliye reality dvaara royalty ka saakshaatkaar karaao।

slogan:- kisi bhi vidhi se vyartha ko samaapta kar samartha ko emerge karo।