Murli du jour du vendredi 11 février 2022

11-02-2022 praatahmurli om shanti "baapdaada"' madhuban

“meethe bachche - maaya ki beemaari se chhootne ke liye gyaan aur yog ka apple (seb) roz khaate raho।''

prashn:- karmaateet avastha mein jaane ka purooshaartha kya hai?

uttar:- aisa abhyaas karo jo buddhi mein sivaae baap ke aur koi ki yaad na rahe। ant mati so gati… jab aisi avastha ho jo buddhi mein koi bhi yaad na rahe tab sada harshit bhi rahenge aur karmaateet avastha ko bhi pa lenge। tumhaara purooshaartha hi hai aatma-abhimaani banne ka। aatma, aatma ko dekhe, aatma se baat kare to khushi hoti rahegi। sthiti achal ho jaayegi।

geet:- tumhi ho maata...

om shanti। gaayan to yathaartha hai kyonki saari srishti ka rachayita aur phir jin dvaara rachna karte hain usko hi kaha jaata hai maat-pita। rachta koi bhi saakaar va aakaar ko nahin kaha jaata। rachta ek niraakaar ko hi kaha jaata hai। abhi yeh samajh tum bachchon ko aai hai woh to sirf gaate hain। bhakton ki buddhi mein sirf yahi rehta ki bas bhakti karni hai, parantu kiski bhakti karni hai, kuchh bhi pata nahin। bhakti karni chaahiye ek bhagwan ki, jise maat-pita kehte hain, na ki saikdon ki। kehte hain bhagwan aakar bhakton ko bhakti ka phal denge। phal athva varsa ek hi baat hai। bachcha paida hota hai to maat-pita ke varse ka phal milta hai। baaki yeh gaayan to hai bhakti maarga ka। yaad karte hain ki aakarke hamko bhakti ka phal do। gyaan aur bhakti bhi kehte hain। bhakti ka phal hai gyaan। barobar tum ab jaante ho bhakti kab se shuru hui hai। yeh koi ko pata nahin, gyaan ka samay hai din। bhakti ka samay hai raat। din aur raat so to zaroor aadha-aadha hoga, shaastron mein kalpa ki aayu lambi likh di hai। gyaan ko bahut samay de diya hai aur bhakti ko thoda samay diya hai। dvaapar kaliyug ki aayu kam dikhaai hai। yeh raat aur din ka poora hisaab to thahra nahin। krishna paksha aur shukla paksha bhi kehte hain। shaastron mein yeh akshar hain। kehte hain tum log shaastron ko nahin maante ho phir shaastron ke akshar kyon lete ho। to tumko samjhaana hai - shaastron ka saar to baba hi bataate hain। phalaane shaastra mein yeh right nahin hai, yeh right hai। reference to zaroor dena pade। jaise ab pradarshani mein chitra dikhaate hain hanoomaan, ganesh, vaaman avtaar aadi aadi... samjhaane liye dikhaana to pade na। jo baaten wrong hain woh varnan kar phir right kya hai, woh samjhaate hain।

ab baba ki mahima gaate hain shivaae namah phir likha hai tvamev maataashcha pita.. naam to dena pade na। manushyon ko yeh pata nahin ki hamaara baap kaun hai। kehte bhi hain O god father। buddhi udhar jaati hai। manushya praarthana aadi karte hain to jaante hain parampita paramatma parlok mein nivaas karte hain। brahma, vishnu, shankar ko yaad karenge to buddhi sookshm vatan mein jaayegi। first, second phir third floor hai। ab mukhya baat hai baap ko bhoole hain। baap aakar ulhana dete hain। tumne hamaari kitni glaani ki hai। baap jo sarva ko sadgati dene vaala hai, unki phir sarva ne baith glaani ki hai। bhagvaanuvaach hai na yada yadaahi... bhaaratvaasi apne dharma ki glaani karte hain। kehte hain eeshvar sarvavyaapi hai। kya sabmen eeshvar hai? to kah dete hai kachchha avtaar, machchha avtaar, vaaraah avtaar... baap to bhaaratvaasi bachchon ko hi kehte hain kyonki bachche hi glaani karte hain। yeh murabbi bachcha (brahma) bhi glaani karta tha। yeh glaani bhi drama mein noondhi hui thi। tab to paap aatma bante hain। baap ne to sabko paavan banaaya tha kyonki patit-paavan hai। paavan banaakar vishwa ka maalik banaate hain। banaane vaale baap ko kitni gaali dete hain। jab samjhaate hain to us samay maan lete hain, samaachaar bhi aata hai, itnon ne sahi ki ki barobar aapki baat right hai। ab kehte hain shreemat bhagvat geeta, to bhagwan ki hai shreshtha te shreshtha mat,... oonche te oonche ki mat bhi oonchi hogi na। woh aakar patit bhrashtaachaari ko shreshthaachaari banaate hain। to pahle-pahle ek ka parichay dena padta hai। tum bachchon mein bhi nambarvaar to hain hi। bahut bachche likhte hain baba kya karen, maaya ka toofaan hamko thaharne nahin deta hai। hamko yeh-yeh vikaar tang karte hain। baap kehte hain tumko in par vijay paani hai। nahin to pad bhrashta ho jaayega। shikshak hi agar aisa kuchh kaam karenge to zaroor auron ko sanshay padega ki khud ki chalan to aisi hai, aur doosron ko aise samjhaate hain। vikaar bhi koi semi hota hai, sato rajo tamo har baat mein hota hai। satayug ko sato oonch kaha jaata hai, kaliyug ko tamo neech kaha jaata hai। duniya bhrashtaachaari kehte hain। parantu apne ko koi bhrashtaachaari samajhte nahin hain। baap samjhaate hain is raavan raajya mein ek bhi shreshthaachaari nahin hai। samjho koi se poochha jaata hai oonche te ooncha kaun? to kahenge bhagwan hai। unka occupation jaante ho? nahin। ya to kahenge sannyaasi hi oonch hain kyonki pavitra rehte hain। khud bhi sannyaasiyon ko follow karte hain। namaste karte hain to unhon se poochhna chaahiye, sannyaasiyon se bhi zaroor koi ooncha hoga! sannyaasi bhi bhagwan ki saadhna karte hain। aajkal to chitra bhi bahut banaaye hain। sabse ooncha paramatma ko hi rakhte hain। ab raam va krishna ke aage shivling rakhna yeh bhi badaai hai। nahin to woh koi shiv ki pooja thode hi karte hain। woh to khud hi raajya karte hain। jab woh patit bante hain tab poojne lagte hain। oonche te oonch niraakaar paramatma ko hi kaha jaata hai - patit-paavan sarva ka sadgati daata, sabka liberator। apne saath sabko le jaayenge। tum jaante ho woh hamaara baap hai। ham sab is samay beemaar hain, gyaan se ever healthy aur ever wealthy ban jaate hain। kehte bhi hain roz apple khaao to ever healthy ban jaayenge। yeh to tum practical dekh rahe ho। maaya ne sabko beemaar bana diya hai। ab sabko healthy, wealthy banaane vaala ek baap hi hai। sookshm vatan mein bhi aatmaayen healthy hain। yahaan unhealthy aatmaayen hain phir mool vatan se pahle jab aatmaayen aayengi to sukh hi dekhengi। to baap brahma dvaara hamko bahut sukh dete hain। ab vinaash to hona hi hai। is yagya se hi vinaash jvaala nikli hai। vo log raay kar rahe hain shanti kaise ho, parantu yeh bhi gaaya jaata hai nar chaahat kuchh aur... shanti bhi tab hogi jab vinaash hoga। phir sabhi aatmaayen muktidhaam mein chali jaayengi। vinaash hone ke sivaae aur koi upaay to ho hi nahin sakta। yeh bhi unhon ko bataave kaun? in bheeshma-pitaamah aadi ko to pichhaadi mein gyaan milna hai।

manushya shanti ke liye upaay dhoondhate hain ki aapas mein milkar ek ho jaaen। parantu aisa to hona hi nahin hai। aage bhi vinaash hua tha। yaadav aur kaurav bhi the। geeta ka bhagwan bhi aaya tha। ab patit duniya hai, ismen shreshthaachaari koi ho na sake। sabse shreshtha hain lakshmi-naaraayan, yahi satayug mein raajya karte the। ab to bhrashtaachaar ki vriddhi hoti gai hai, to zaroor vinaash hona hi hai। vinaash ke baad hi sab sukh shanti ko pa sakenge। sabko samjhaana hai ki ham aadi sanaatan devi-devta dharma ke hain। pahle vahi dharma tha, ab nahin hai। phir se uski sthaapna ho rahi hai। is samay ham brahman hain na ki devta। jab koi bhaashan karne ke liye stage par aate hain to kuchh na kuchh khyaal karke, vichaar karke aate hain, to yeh-yeh bolenge। hamaare bachche to samajhte hain kya bolna hai। shanti sthaapan karne vaala to ek hi sarva ka sadgati daata baap hai, vahi liberator hai। yeh samay hi hai - sabko vaapis le jaane ka।

baba bachchon se poochhte hain bachche, tum apne ko satayug mein chalne ke laayak samajhte ho? raavan par vijay paai hai? kehte hain baba vijay paane ke liye purooshaartha kar rahe hain। haath to sab uthaate hain kyonki lajja aati hai। baba kehte hain apni shakla to dekho, kitna samay baap ko yaad karte hai? aisi avastha chaahiye jo ant mein koi bhi yaad na aaye, tab ant mati so gati hogi। karmaateet avastha ke sameep ja sakenge। sada harshit bhi tab rah sakenge jab doosron ki seva karenge। tum roohaani social worker ho। tumhaare bigar rooh ko injection koi bhi laga na sake। gaaya bhi jaata hai gyaan anjan satguru diya... aatma ko ab maaloom pada hai ki mujhe saari srishti ke aadi madhya ant ka gyaan mil gaya hai। yeh aatma ne kaha shareer dvaara - gyaan saagar ko। ab hamko vaapas jaana hai - yeh bahut khushi ki baat hai। puraana chola chhodkar naya chola lena hai। is kaaran naam hi hai shyaam sundar।

tum jaante ho ham sundar the, ab shyaam bane hain phir sundar banenge। baba sundar banaate hain, maaya raavan shyaam banaata hai। kaam chita par baithne se shyaam ban jaate hain। yeh badi samajhne ki sahaj baaten hain। knowledge to student ki buddhi mein nambarvaar hi dhaaran hoti hai। koi to bahut dullhead hain। teacher kehte hain padhne vaale bahut dull hain। deh-abhimaan bahut hai। aatma-abhimaani rahen to sada harshit rahen। aatma, aatma ko dekhe arthaat apne bhaai ko dekhkar khush hoti rahe। baba bachchon ko dekh khush hote hain।

baba kehte hain bachche main aaya hoon tumko maaya se liberate kar vaapis saath le jaane। is tan mein shivbaaba ki praveshta hoti hai; woh bhi zaroor bhrakuti ke beech mein hi aayenge। aise thode hi oopar se ganga bahegi। shiv ki savaari bail par dikhaate hain। bail ki bhrakuti mein shiv ka chitra dikhaaya hai। aatma to zaroor bhrakuti mein hi rahegi। jo aatma ka sthaan hai zaroor vahaan hi baithegi। guru log apne chele ko baaju mein bithaate hain। to woh satguru bhi aakar baaju mein baithte hain। guru brahma kehte hain, vishnu ko va shankar ko guru nahin kahenge। vahi brahma phir vishnu ke do roop bante hain। guru to shiv ko kah sakte hain kyonki sabki sadgati karte hain। oonche te oonch phir bhi bhagwan hai। kitna achhi reeti samjhaaya jaata hai। achha!

meethe-meethe sikeeldhe bachchon prati maat-pita baapdaada ka yaadapyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) sada harshit rahne ke liye aatma-abhimaani banna hai। ham aatma bhaai-bhaai hain, yeh drishti pakki karni hai।

2) roohaani social worker ban aatma ko gyaan ka injection lagaana hai। sabki roohaani seva karni hai।

vardaan:- santushtata ke aadhaar par duaayen dene aur lene vaale sahaj purooshaarthi bhav

sarva ki duaayen unhein milti hain jo svayan santushta rahkar sabko santushta karte hain। jahaan santushtata hai vahaan duaayen hain। yadi sarva gun dhaaran karne va sarva shaktiyon ko control karne mein mehnat lagti ho, to use bhi chhod do, sirf amritvele se lekar raat tak duaayen dene aur duaayen lene ka ek hi kaarya karo to ismen sab kuchh aa jaayega। koi duhkh bhi de to bhi aap duaayen do to sahaj purooshaarthi ban jaayenge।

slogan:- jo samarpit sthiti mein rehte hain unke aage sarva ka sahayog svatah samarpit ho jaata hai।

maateshvari ji ke anmol mahaavaakya - “manushya aatma apni poori kamaai anusaar bhavishya praalabdha bhogta hai''

dekho, bahut manushya aise samajhte hain hamaare poorva janmon ki achhi kamaai se abhi yeh gyaan praapta hua hai parantu aisi baat hai hi nahin, poorva janma ka achha phal hai yeh to ham jaante hain। kalpa ka chakra phirta rehta hai sato, rajo, tamo badli hota rehta hai parantu drama anusaar purushaartha se praalabdha banne ki margin rakhi hai tab to vahaan satayug mein koi raaja-raani, koi daasi, koi praja pad paate hain। to yahi purushaartha ki siddhi hai, vahaan dvait, eershya hoti nahin, vahaan praja bhi sukhi hai। raaja-raani praja ki aisi sambhaal karta hai jaise maa baap apne bachchon ki sambhaal karta hai, vahaan gareeb saahookaar sab santushta hai। is ek janma ke purushaartha se 21 peedhi ke liye sukh bhogenge। yeh hai avinaashi kamaai, jo is avinaashi kamaai mein avinaashi gyaan se avinaashi pad milta hai। ham abhi satayugi duniya mein ja rahe hain, yeh practical khel chal raha hai, yahaan koi chhu mantra ki baat nahin hai। achha - om shanti।