Murli du jour du dimanche 8 mai 2022

08-05-22 praatahmurli om shanti ''avyakt-baapdaada'' revise 31-12-90 madhuban

tapasya hi bade te bada samaaroh hai, tapasya arthaat baap se mauj manaana

aaj baapdaada chaaron or ke sarva nai knowledge dvaara har samay naye jeevan, nai vritti, nai drishti, nai srishti anubhav karne vaale bachchon ko mohabbat ki mubaarak de rahe hain। is samay chaaron or ke bachche apne dil roopi doordarshan dvaara vartamaan samay ke divya drishya ko dekh rahe hain। sabhi ka ek hi sankalp door hote sameep anubhav karne ka hai। baapdaada bhi sabhi bachchon ko dekh rahe hain। sabhi ke naye umang-utsaah ke dil ki mubaarkon ke saaj sun rahe hain। sabhi ke variety sneh bhare saaj bahut sundar hain isliye sabhi ko saath-saath return respond kar rahe hain। naye varsha ki, naye umang-utsaah ki har samay apne mein divyata laane ki sada ki mubaarak ho। sirf aaj naye varsha ke kaaran mubaarak nahin, lekin avinaashi baap ki avinaashi preet nibhaane vaale bachchon prati sangamayug ki har ghadi jeevan mein naveenta laane vaali hai isliye har ghadi avinaashi baap ki avinaashi mubaarken hain। baapdaada ki vishesh khushiyon bhari badhaaiyon se hi sarva brahman vriddhi ko praapta kar rahe hain। brahman jeevan ki paalna ka aadhaar badhaaiyaan hain। badhaaiyon ki khushi se hi aage badhte ja rahe ho। baap ke swaroop mein har samay badhaaiyaan hain। shikshak ke swaroop se har samay shaabaas shaabaas ka bol paas with honour bana raha hai। sadguru ke roop mein har shreshtha karma ki duaaen sahaj aur mauj vaali jeevan anubhav kara rahi hain isliye padmaapdam bhaagyavaan ho। bhaagyavidhaata bhagwan ke bachche ban gaye arthaat sampoorn bhaagya ke adhikaari ban gaye। log to vishesh din par vishesh mubaarak dete hain aur aapko sirf naye varsha ki mubaarak milti hai kya? pahli taareekh se doosri taareekh ho jaayegi to mubaarak bhi khatma ho jaayegi kya? aapke liye har samay, har ghadi vishesh hai। sangamayug hai hi vishesh yug, mubaarkon ka yug। amritvele har roz baap se mubaarken lete ho na! ye to nimitta maatra din ko manaate ho। lekin sada yaad rakho ki har ghadi maujon ki ghadi hai। mauj hi mauj hai na? koi poochhe aapke jeevan mein kya hai? to kya uttar denge? mauj hi mauj hai na! saare kalpa ki maujen is jeevan mein anubhav karte ho kyonki baap se milan ki maujon ka anubhav saare kalpa ke raajya adhikaari aur poojya adhikaari donon ka anubhav karaata hai। poojyapan ki mauj aur raajya karne ki mauj - donon ka knowledge abhi hai, isliye mauz ab hai।

is varsha kya karenge? naveenta karenge na! is varsha ko samaaroh varsha manaana। soch rahe ho tapasya karni hai ya samaaroh manaana hai? tapasya hi bade te bada samaaroh hai kyonki hathayog to karna nahin hai। tapasya arthaat baap se mauj manaana। milan ki mauj, sarva praaptiyon ki mauj, sameepta ke anubhav ki mauj, samaan sthiti ki mauj। to ye samaaroh hua na। seva ke bade-bade samaaroh nahin karenge, lekin tapasya ka vaataavran vaani ke samaaroh se bhi jyaada aatmaon ko baap ki taraph aakarshit karega। tapasya roohaani chumbak hai jo aatmaon ko shanti aur shakti ke anubhav ka door se anubhav hoga। to apne mein kya naveenta laayenge? naveenta hi sabko priy lagti hai na। to sadaiv apne ko check karo ki aaj ke din mansa arthaat svayan ke sankalp shakti mein vishesh kya visheshta laai? aur anya aatmaon ke prati mansa seva arthaat shubh bhaavna, shubh kaamna ke vidhi dvaara kitna vriddhi ko praapta kiya? arthaat shreshthata ki naveenta kya laai? saath-saath bol mein madhurta, santushtata, saralta ki naveenta kitni laai? brahman aatmaon ke bol saadhaaran bol nahin hote। bol mein in teenon baaton mein se apne ko aur anya aatmaon ko anubhooti ho। isko kaha jaayega naveenta। saath mein har karma mein naveenta arthaat har karma sva ke prati va anya aatmaon ke prati praapti ka anubhav karaayega। karma ka pratyakshaphal va bhavishya jama ka phal anubhav ho। vartamaan samay pratyakshaphal sada khushi aur shakti ki prasannata ki anubhooti ho aur bhavishya jama ka anubhav ho। to sadaiv apne ko bharpoor sampanna anubhav karenge। karma roopi beej praapti ke vriksha se bharpoor ho। khaali nahin ho। bharpoor aatma ka natural nasha alaukik hota hai। to aise naveenta ke karma kiye? saath mein sambandh-samparka ismen naveenta kya laani hai?

is varsha daata ke bachche master daata - is smriti swaroop mein anubhav karo। chaahe brahman aatma ho, chaahe saadhaaran aatma ho lekin jiske bhi samparka-sambandh mein aao,un aatmaon ko master daata dvaara praapti ka anubhav ho। chaahe himmat mile, chaahe umang-utsaah mile, chaahe shanti va shakti mile, sahaj vidhi mile, khushi mile - anubhav ki vriddhi ki anubhooti ho। harek ko kuchh na kuchh dena hai, lena nahin hai, dena hai। dene mein lena samaaya hua hai। lekin mujh aatma ko master daata banna hai। isi pramaan apne svabhaav sanskaar mein baap samaan ki naveenta laani hai। mera svabhaav nahin, jo baap ka svabhaav so mera svabhaav। jo brahma ke sanskaar vo braahmanon ke sanskaar। aise har roz apne mein naveenta laate hue naye sansaar ki sthaapna svatah hi ho jaayegi। to samjha naye varsha mein kya karenge? jo beet chuka to beete varsha ka samaapti samaaroh manaana aur vartamaan ki samaanta aur sameepta ka samaaroh manaana aur bhavishya ka sada saphalta ka samaaroh manaana। samaaroh varsha manaate udte rehna।

double videshi maujon mein rehna pasanda karte hain na! to maujon ke liye do bol yaad rakhna ek dot aur doosra not। not kisko karna hai - yeh to jaante ho na। maaya ko not allow। not karna aata hai? ki thoda-thoda allow karenge। dot laga do to not ho hi jaayega। double nasha hai na।

bhaaratvaasi kya karenge? bhaarat mahaan desh hai - yeh aajkal ka slogan hai। aur bhaarat ki hi mahaan aatmaaen mahaatmaaen gaai hui hain। to bhaarat mahaan arthaat bhaaratvaasi mahaan aatmaaen। to har samay apni mahaanta se bhaarat mahaan aatmaon ka sthaan, dev aatmaon ka sthaan saakaar roop mein banaayenge। chitra samaapta ho chaitanya dev aatmaon ka sthaan sabhi ko dikhaayenge। to double videshi aur bhaarat nivaasi nahin, lekin donon hi abhi madhuban nivaasi ho। achha।

chaaron or ke sarva master daata aatmaon ko, sada baap dvaara mubaarak praapta karne vaale vishesh aatmaon ko, sada mauj mein rahne vaale bhaagyavaan aatmaon ko, sada svayan mein naveenta laane vaali mahaan aatmaon ko, pharishta so dev aatma banne vaali sarvashreshtha aatmaon ko baapdaada ka yaadapyaar। har ghadi ki mubaarak aur namaste।

party se avyakt baapdaada ki mulaakaat

(1) achal-adol aatmaaen hain - aisa anubhav karte ho? ek taraph hai halchal aur doosri taraph aap brahman aatmaaen sada achal hain। jitni vahaan halchal hai utni aapke andar achal-adol sthiti ka anubhav badhta ja raha hai। kuchh bhi ho jaaye, sabse sahaj yukti hai - nothing new। koi nai baat nahin hai। kabhi aashcharya lagta hai ki yeh kya ho raha hai, kya hoga? aashcharya tab ho jab nai baat ho। koi bhi baat sochi nahin ho, suni nahin ho, samjhi nahin ho aur achaanak hoti hai to aashcharya lagta hai। to aashcharya nahin lekin fullstop ho। duniya moonjhane vaali aur aap mauj mein rahne vaale ho। duniya vaale chhoti-chhoti baat mein moonjhenge - kya karen, kaise karen…। aur aap sada mauj mein ho, moonjhana khatma ho gaya। brahman arthaat mauj, kshatriy arthaat moonjhana। kabhi mauj, kabhi moonjh। aap sabhi apna naam hi kehte ho - brahmaakumaar aur kumaariyaan। kshatriy kumaar aur kshatriy kumaari to nahin ho na? sada apne bhaagya ki khushi mein rahne vaale ho। dil mein sada, svatah ek geet bajta rehta - vaah baba aur vaah mera bhaagya! yeh geet bajta rehta hai, isko bajaane ki aavashyakta nahin hai। yeh anaadi bajta hi rehta hai। haay-haay khatma ho gai, abhi hai vaah-vaah। haay-haay karne vaale to bahut majority hain aur vaah vaah karne vaale bahut thode ho। to naye varsha mein kya yaad rakhenge? vaah-vaah। jo saamne dekha, jo suna, jo bola - sab vaah-vaah, haay-haay nahin। haay ye kya ho gaya! nahin, vaah, ye bahut achha hua। koi bura bhi kare lekin aap apni shakti se bure ko achhe mein badal do। yahi to parivartan hai na। apne brahman jeevan mein bura hota hi nahin। chaahe koi gaali bhi deta hai to balihaari gaali dene vaale ki, jo sahan shakti ka paath padhaaya। balihaari to hui na, jo master ban gaya aapka! maaloom to pada aapko ki sahan shakti kitni hai, to bura hua ya achha hua? braahmanon ki drishti mein bura hota hi nahin। braahmanon ke kaanon mein bura sunaai deta hi nahin, isliye to brahman jeevan maujon ki jeevan hai। abhi-abhi bura, abhi-abhi achha to mauj nahin ho sakegi। sada mauj hi mauj hai। saare kalpa mein brahmaakumaar aur kumaari shreshtha hain। dev aatmaaen bhi braahmanon ke aage kuchh nahin hain। sada is nashe mein raho, sada khush raho aur doosron ko bhi sada khush rakho। raho bhi aur rakho bhi। main to khush rehta hoon, ye nahin। main sabko khush rakhta hoon - yeh bhi ho। main to khush rehta hoon - yeh bhi svaartha hai। braahmanon ki seva kya hai? gyaan dete hi ho khushi ke liye।

(2) vishwa mein jitni bhi shreshtha aatmaaen gaai jaati hain unse aap kitne shreshtha ho। baap aapka ban gaya। to aap kitne shreshtha ban gaye! sarvashreshtha ho gaye। sadaiv yeh smriti mein rakho - oonche te oonche baap ne sarvashreshtha aatma bana diya। drishti kitni oonchi ho gai, vritti kitni oonchi ho gai! sab badal gaya। ab kisi ko dekhenge to aatmik drishti se dekhenge aur sarva ke prati kalyaan ki vritti ho gai। brahman jeevan arthaat har aatma ke prati drishti aur vritti shreshtha ban gai।

(3) apne aapko saphalta ke sitaare hain - aise anubhav karte ho? jahaan sarvashaktiyaan hain, vahaan saphalta janma siddha adhikaar hai। koi bhi kaarya karte ho, chaahe shareer nirvaah arth, chaahe eeshvareey seva arth। kaarya mein kaarya karne ke pahle yeh nishchay rakho। nishchay rakhna achhi baat hai lekin practical anubhvi aatma ban nishchay aur nashe mein raho। sarva shaktiyaan is brahman jeevan mein saphalta ke sahaj saadhan hain। sarva shaktiyon ke maalik ho isliye kisi bhi shakti ko jis samay order karo, us samay haazir ho। jaise koi sevaadhaari hote hain, sevaadhaari ko jis samay order karte hain to seva ke liye taiyaar hota hai aise sarva shaktiyaan aapke order mein ho। jitna-jitna master sarvashaktivaan ki seat par set honge utna sarvashaktiyaan sada order mein rahengi। thoda bhi smriti ki seat se neeche aate hain to shaktiyaan order nahin maanengi। servant bhi hote hain to koi obedient hote hain, koi thoda neeche-oopar karne vaale hote hain। to aapke aage sarvashaktiyaan kaise hain? obedient hain ya thodi der ke baad pahunchti hain? jaise in sthool karmendriyon ko, jis samay, jaisa order karte ho, us samay vo order se chalti hain, aise hi ye sookshm shaktiyaan bhi aapke order par chalne vaali hon। check karo ki saare din mein sarvashaktiyaan order mein raheen? kyonki jab ye sarvashaktiyaan abhi se aapke order par hongi tab hi ant mein bhi aap saphalta ko praapta kar sakenge। iske liye bahutkaal ka abhyaas chaahiye। to is naye varsha mein order par chalaane ka vishesh abhyaas karna kyonki vishwa ka raajya praapta karna hai na। vishwa raajya adhikaari banne ke pahle svaraajya adhikaari bano।

nishchay aur nasha har ek bachche ko udti kala ka anubhav kara raha hai। double foreigners lucky hain jo udti kala ke time par aa gaye। chadhne ki mehnat nahin karni padi। vijay ka tilak sada mastak par chamak raha hai। yahi vijay ka tilak auron ko khushi dilaayega kyonki vijayi aatma ka chehra sada hi harshit rehta hai। to aapke harshit chehre ko dekhkar sab khushi ke peechhe aakarshit hote hain kyonki duniya ki aatmaaen khushi ko dhoondh rahi hain aur aapke chehron par jab khushi ki jhalak dekhte to khud bhi khush hote। vo samajhte hain inhon ko kuchh praapti hui hai। aage chalkar aapke chehre khushi ki aakarshan se aur najdeek laayenge। kisi ko sunne ka samay nahin bhi hoga to second mein aapka chehra un aatmaon ki seva karega। aap sabhi bhi pyaar aur khushi ko dekhkar brahman bane na। to tapasya varsha mein aisi seva karna।

(4) ek baap, doosra na koi - aisi sthiti mein sada sthit rahne vaali sahayogi aatma ho? ek ko yaad karna sahaj hai। anekon ko yaad karna mushkil hota hai। anek vistaar ko chhod saar swaroop ek baap - is anubhav mein kitni khushi hoti hai। khushi janma siddha adhikaar hai, baap ka khajaana hai to baap ka khajaana bachchon ke liye janma siddha adhikaar hota hai। apna khajaana hai to apne par naaz hota hai - apna hai। aur mila bhi kisse hai? avinaashi baap se। to avinaashi baap jo dega, avinaashi dega। avinaashi khajaane ka nasha bhi avinaashi hai। yeh nasha koi chhuda nahin sakta kyonki yeh nuksaan vaala nasha nahin hai। yeh praapti karaane vaala nasha hai। woh praaptiyaan ganvaane vaala nasha hai। to sada kya yaad rehta? ek baap, doosra na koi। doosra-teesra aaya to khitkhit hogi। aur ek baap hai to ekras sthiti hogi। ek ke ras mein lavleen rehna bahut achha lagta hai kyonki aatma ka original swaroop hi hai - ekras।

vidaai ke samay naye varsha ke shubhaarambha ki badhaaeeh chaaron or ke lovely aur lucky sabhi bachchon ko vishesh naye umang, naye utsaah ki har ghadi ki mubaarak। svayan bhi diamond ho aur jeevan bhi diamond hai aur diamond morning, evening, diamond night sada rahe। isi vidhi se bahut jaldi apna raajya sthaapan karenge aur raajya karenge। apna raajya pyaara lagta hai na। to abhi jaldi-jaldi laao aur raajya karo। apna raajya saamne dikhaai de raha hai na। to abhi pharishta bano aur devta bano। chaaron or ke bachchon ko vishesh padmaguna yaadapyaar sveekaar ho। videsh vaale, chaahe desh vaale tapasya ke umang-utsaah mein achhe hain aur jahaan tapasya hai vahaan seva hai hi hai। sada saphalta ki mubaarak ho। har ek aisi naveenta dikhaana jo saara vishwa aapki or dekhe। naveenta ke light house banna। achha। har ek apne liye yaadapyaar aur mubaarak sveekaar kare।

vardaan:- shuddh sankalp aur shreshtha sang dvaara halke ban khushi ki dance karne vaale alaukik pharishte bhav

aap brahman bachchon ke liye roz ki murli hi shuddh sankalp hain। kitne shuddh sankalp baap dvaara roz savere-savere milte hain, inheen shuddh sankalpon mein buddhi ko busy rakho aur sada baap ke sang mein raho to halke ban khushi mein dance karte rahenge। khush rahne ka sahaj saadhan hai - sada halke raho। shuddh sankalp halke hain aur vyartha sankalp bhaari hain isliye sada shuddh sankalpon mein busy rah halke banon aur khushi ki dance karte raho tab kahenge alaukik pharishte।

slogan:- parmaatma pyaar ki paalna ka swaroop hai - sahajyogi jeevan।