Murli du jour du lundi 9 mai 2022

09-05-2022 praatahmurli om shanti "baapdaada"' madhuban

“meethe bachche - jis baap ko tumne aadhaakalpa yaad kiya, ab uska pharmaan milta hai to use paalan karo isse tumhaari chadhti kala ho jaayegi''

prashn:- tum bachchon ko apni nature-cure aapehi karni hai, kaise?

uttar:- ek baap ki yaad mein rahne aur yagya ki pyaar se seva karne se nature-cure ho jaati hai kyonki yaad se aatma nirogi banti hai aur seva se apaar khushi rehti hai। to jo yaad aur seva mein busy rehte hain unki nature cure hoti rehti hai।

geet:- toone raat ganvaai…

om shanti। bachchon ne geet suna। maalaayen pherte-pherte yug beete। kitne yug? do yug। satayug treta mein to koi bhi maala nahin pherte hain। koi ki bhi buddhi mein yeh nahin hai ki ham oonch jaate hain phir neeche aate hain। hamaari ab chadhti kala hoti hai। hamaari arthaat bhaarat ki। jitni bhaaratvaasiyon ki chadhti kala aur utarti kala hoti hai utna aur koi ki bhi nahin। bhaarat hi shreshthaachaari aur bhrashtaachaari banta hai। bhaarat hi nirvikaari, bhaarat hi vikaari। aur khandon va dharmon se itna tailuk nahin hai। woh koi heaven mein nahin aate hain। bhaaratvaasiyon ke hi chitra hain। barobar raajya karte the। to baap samjhaate hain tumhaari ab chadhti kala hai। jiska haath pakda hai woh tumko saath le jaayenge। ham bhaaratvaasiyon ki hi chadhti kala hai। mukti mein jaakar phir jeevanmukti mein aayenge। aadhaakalpa devi-devta dharma ka raajya chalta hai। 21 peedhi chadhte hain, phir utarti kala ho jaati hai। kehte hain chadhti kala tere bhaane sarva ka bhala। ab sarva ka bhala hota hai na। parantu chadhti kala aur utarti kala mein tum aate ho। is samay bhaarat jitna karz leta hai utna aur koi nahin lete। bachche jaante hain hamaara bhaarat sone ki chidiya tha। bahut saahookaar the। abhi bhaarat ki utarti kala poori hoti hai। vidvaan aadi to samajhte hain kaliyug ki aayu ajun 40 hajaar varsha chalni hai। bilkul hi ghor andhiyaare mein hain। samjhaana bhi badi yukti se hai, nahin to bhagat log chamak jaate hain। pahle-pahle to parichay do baap ka dena hai। bhagvaanuvaach hai ki geeta sabka maai baap hai। varsa geeta se milta hai, baaki sab hain unke bachche। bachchon se varsa mil na sake। tum bachchon ko geeta se varsa mil raha hai na। geeta maata ka phir pita bhi hai। Bible aadi koi ko bhi maata nahin kahenge। to pahle-pahle poochhna hi yeh hai ki parampita paramatma se tumhaara kya tailuk hai? sabhi ka baap ek hai na। sabhi aatmaayen bhaai-bhaai hain na। ek baap ke bachche। baap manushya srishti rachte hain prajaapita brahma dvaara, to phir tum aapas mein bhaai-behen ho jaate ho। to zaroor pavitra rehte honge। patit-paavan baap hi aakar tumko paavan banaate hain yukti se। bachche jaante hain pavitra banenge to pavitra duniya ke maalik banenge। bahut bhaari aamadni hai। kaun aisa hoga - jo 21 janma ki baadshaahi lene ke liye pavitra nahin banega। aur phir shreemat bhi milti hai, jis baap ko aadhaakalpa yaad kiya hai, unka pharmaan tum nahin maanenge! unke pharmaan par nahin chalenge to tum paap aatma ban jaayenge। yeh duniya hi paap aatmaon ki hai। raam raajya punya aatmaon ki duniya thi। ab raavan raajya paap aatmaon ki duniya hai। abhi tum bachchon ki chadhti kala hai। tum vishwa ke maalik bante ho। kaise gupta baithe ho। sirf baap ko yaad karna hai। maala aadi pherne ki koi baat nahin। baap ko yaad karte tum kaam karo। baba aapke yagya ki seva sthool, sookshm donon ham kaise ikatthe karte hain। baba ne pharmaan kiya hai aise yaad karo। nature-cure karaate hain na। tumhaari aatma cure hone se shareer bhi cure ho jaayega। sirf baap ki hi yaad se tum patit se paavan bante ho। paavan bhi bano aur yagya ki seva bhi karte raho। service karne mein badi khushi hogi। hamne itna samay baap ki yaad mein rah apne ko nirogi banaaya athva bhaarat ko shanti ka daan diya। bhaarat ko tum shanti aur sukh ka daan dete ho shreemat par। duniya mein aashram to dher hain। parantu vahaan kuchh bhi hai nahin। unko yeh pata nahin ki 21 peedhi svarga ka raajya kaise milta hai।

tum abhi raajayog ki padhaai karte ho। vo log bhi kehte rehte hain ki god father aa gaya hai। kahaan hai zaroor। so to zaroor hoga na। vinaash ke liye bombs bhi nikal chuke hain। zaroor baap hi heaven ki sthaapna, hell ka vinaash karaate honge। yeh to narka hai na। kitni ladaai maaraamaari aadi hain। bahut dar hai। bachchon ko kaise bhagaakar le jaate hain। kitne upadrav hote hain। abhi tum jaante ho ki yeh duniya badal rahi hai। kaliyug badal phir satayug ho raha hai। ham satayug ki sthaapna mein baba ke madadgaar hain। brahman hi madadgaar hote hain। prajaapita brahma se brahman paida hote hain। woh hain kukh vanshaavli, tum ho mukhvanshaavli। woh brahma ki santaan to ho na saken। tumko adopt kiya jaata hai। tum brahman ho-brahma ki aulaad। prajaapita brahma to sangam par hi ho sakta hai। brahman so phir devi-devta bante hain। tum un braahmanon ko bhi samjha sakte ho ki tum kukh vanshaavli ho। kehte ho brahman devi devtaae namah। braahmanon ko bhi namaste, devtaaon ko bhi namaste karte hain। parantu braahmanon ko namaste tab karen jabki abhi hon। samajhte hain yeh brahman log hain, tan-man-dhan se baba ki shreemat par chalte hain। woh brahman jismaani yaatra par le jaate hain। yeh tumhaari hai roohaani yaatra। tumhaari yaatra kitni meethi hai। woh jismaani yaatraayen to dher hain। guru log bhi dher hain। sabko guru kah dete। abhi tum bachche jaante ho ham meethe shivbaaba ki mat par chal unse varsa le rahe hain brahma dvaara। varsa shivbaaba se lete hain। tum yahaan aate ho to phat se poochhta hoon - kiske paas aaye ho? buddhi mein hai yeh shivbaaba ka loan liya hua rath hai। ham unke paas jaate hain। sagaai brahman log karaate hain। parantu connection sajni saajan ka aapas mein hota hai, na ki sagaai karaane vaale brahman se। stri pati ko yaad karti hai ya hathiyaala baandhane vaale ko yaad karti hai? tumhaara bhi saajan hai shiv। phir kisi dehdhaari ko tum kyon yaad karte ho? yaad karna hai shiv ko। yeh locket aadi bhi baba ne banvaaye hain samjhaane ke liye। baba khud hi dalaal ban sagaai karaate hain। to dalaal ko yaad nahin karna hai। sazniyon ka yog saajan ke saath hai। mama baba aakar tum bachchon dvaara murli sunaate hain, baba kehte hain bahut aise bachche hain jinki bhrakuti ke beech ham baith murli chalaata hoon - kalyaan karne arth। koi ko saakshaatkaar karaane, murli sunaane, koi ka kalyaan karne aata hoon। braahmaniyon mein itni taakat nahin, jaanta hoon inko yeh braahmani utha nahin sakegi to main aisa teer lagaata hoon jo woh braahmani se bhi teekha jaaye। braahmani samajhti hain inko hamne samjhaaya। deh-abhimaan mein aa jaate hain। vaastav mein yeh ahankaar bhi nahin aana chaahiye। sab kuchh shivbaaba karne vaala hai। yahaan to tumko kehte hain baba ko yaad karo। connection shivbaaba se hona chaahiye। yeh to beech mein dalaal hai, inko uska evja mil jaata hai। phir bhi yeh vriddha anubhvi tan hai। yeh badal nahin sakta। drama mein noondh hai। aise nahin doosre kalpa mein doosre ke tan mein aayenge। nahin, jo last mein hai unko hi phir pahle jaana hai। jhaad mein dekho pichhaadi mein khade hain na। abhi tum sangam par baithe ho। baba ne is prajaapita brahma mein pravesh kiya hai। jagat amba hai kaamdhenu aur kapildev bhi kehte hain। couple arthaat jodi, baap-daada maat-pita, yeh couple jodi hui na। maata se varsa nahin milega। varsa phir bhi shivbaaba se milta hai। to unko yaad karna pade। main aaya hoon tumko le jaane inke dvaara। brahma bhi shivbaaba ko yaad karte hain। shankar ke aage bhi shiv ka chitra rakhte hain। yeh sab hain mahima ke liye। is samay to shiv-baba aakar apna bachcha banaate hain। phir tum baap ko baith thode hi poojenge। baap aakar bachchon ko gul-gul banaate hain। gutter se nikaalte hain। phir pratigya bhi karte hain ham kabhi patit nahin banenge। baap kehte hain god lekar phir kaala munh nahin karna। agar kiya to kul kalankit ban padenge। haarne se ustaad ka naam badnaam kar denge। maaya se haare to pad bhrashta ho padega। aur koi sannyaasi aadi yeh baaten nahin sikhlaate hain। koi hain jo kahenge maas mein ek baar vikaar mein jaao। koi kehte 6 maas mein ek baar jaao। koi to bahut ajaamil hote hain। baba ne to bahut guru kiye hue hain। woh aise kabhi nahin kahege ki pavitra bano। samajhte hain ham hi nahin rah sakte hain। sensible jo hoga, woh jhat kahega tum hi nahin rah sakte ho, hamko kaise kehte ho। phir bhi kehte hain janak misal second mein jeevanmukti ka raasta bataao। phir guru log kehte hain - brahm ko yaad karo to tum nirvaandhaam mein jaayenge। jaate to koi nahin hain, taakat hi nahin। sarva aatmaon ke rahne ka sthaan hai mool vatan, jahaan ham aatmaayen star misal rehti hain। yeh pooja ke liye bada ling banaate hain। bindi ki pooja kaise hogi? kehte bhi hain bhrakuti ke beech chamakta hai ajab sitaara। to aatma ka baap bhi aise hoga na। baap ko deh nahin hai। us star ki pooja kaise ho sakti। baap ko param aatma kaha jaata hai। woh to father hai। jaise aatma hai vaise paramatma hai। woh koi bada nahin hai। unmein yeh knowledge hai। is behad ke jhaad ko aur koi bhi nahin jaante hain। baap hi knowledgeful hai। gyaan mein bhi full hai, pavitrata mein bhi full hai। sarva ka sadgati daata hai। sarva ko sukh-shanti dene vaala। tum bachchon ko kitna bhaari varsa milta hai aur koi ko mil na sake। manushya to kitna guru ko poojte hain। apne baadshaah ko bhi itna nahin poojte hain। to yeh sab andhashraddha hai na। kya-kya karte rehte hain। sabmen glaani hi glaani hai। krishna ko lord bhi kehte hain to god bhi kehte hain। god krishna heaven ka pahla prince, lakshmi-naaraayan ke liye bhi kehte hain yeh donon god-goddess hain। puraane-puraane chitron ko bahut khareed karte hain। puraani-puraani stamps bhi bikti hain na। vaastav mein sabse puraana to shivbaaba hai na। parantu kisko pata nahin। mahima saari shivbaaba ki hai। woh cheez to mil na sake। puraane te puraani cheez kaun si hai? number one shivbaaba। koi bhi samajh nahin sakte ki hamaara father kaun hai? unka naam roop kya hai? kah dete unka koi naam roop nahin hai, tab poojte kisko ho? shiv naam to hai na। desh bhi hai, kaal bhi hai। khud kehte hain main sangam par aata hoon। aatma shareer dvaara bolti hai na। abhi tum bachche samajhte ho shaastron mein kitni danta kathaayen laga di hain, jisse utarti kala ho gai hai। chadhti kala satayug treta, utarti kala dvaapar kaliyug। ab phir chadhti kala hogi। baap bigar koi chadhti kala bana na sake। yeh sab baaten dhaaran karni hoti hain। to koi bhi kaam aadi karte yaad mein rehna hai। jaise shreenaath dvaare mein munh ko kapda baandh kaam karte hain। shreenaath krishna ko kehte hain। shreenaath ka bhojan banta hai na। shivbaaba to bhojan aadi nahin khaate hain। tum pavitra bhojan banaate ho to yaad mein rah banaana chaahiye, to usse bal milega। krishna lok mein jaane ke liye vrat nem aadi rakhte hain। abhi tum jaante ho ham krishnapuri mein ja rahe hain isliye tumko laayak banaaya jaata hai। tum baap ko yaad karte to phir baba guarantee karte hain tum krishnapuri mein zaroor jaayenge। tum jaante ho ham apne liye krishnapuri sthaapan kar rahe hain phir ham hi raajya karenge। jo shreemat par chalenge woh krishnapuri mein aayenge। lakshmi-naaraayan se bhi adhik krishna ka naam baala hai। krishna chhota bachcha hai to mahaatma ke samaan hai। baal avastha satopradhaan hai isliye krishna ka naam jaasti hai। achha !

meethe-meethe sikeeldhe bachchon prati maat-pita baapdaada ka yaadapyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) apna poora connection ek shivbaaba se rakhna hai। kabhi kisi bhi dehdhaari ko yaad nahin karna hai। kabhi apne ustaad (baap) ka naam badnaam nahin karna hai।

2) apne dvaara yadi kisi ka kalyaan hota hai, to mainne iska kalyaan kiya, is ahankaar mein nahin aana hai। yeh bhi deh-abhimaan hai। karaane vaale baap ko yaad karna hai।

vardaan:- amritvele teen bindiyon ka tilak lagaane vaale kyoon, kya ki halchal se mukta achal-adol bhav

baapdaada sada kehte hain ki roz amritvele teen bindiyon ka tilak lagaao। aap bhi bindi, baap bhi bindi aur jo ho gaya, jo ho raha hai nothing new, to fullstop bhi bindi। yeh teen bindi ka tilak lagaana arthaat smriti mein rehna। phir saara din achal-adol rahenge। kyoon, kya ki halchal samaapta ho jaayegi। jis samay koi baat hoti hai usi samay fullstop lagaao। nothing new, hona tha, ho raha hai... saakshi ban dekho aur aage badhte chalo।

slogan:- parivartan shakti dvaara vyartha sankalpon ke bahaav ka force samaapta kar do to samartha ban jaayenge।