Murli du jour du mardi 10 mai 2022

10-05-2022 praatahmurli om shanti "baapdaada"' madhuban

“meethe bachche - baap aaye hain - tumhein shreshtha mat dekar sada ke liye sukhi, shant banaane, unki mat par chalo, roohaani padhaai padho aur padhaao to ever healthy wealthy ban jaayenge''

prashn:- kaun sa chance saare kalpa mein is samay hi milta hai, jo miss nahin karna hai?

uttar:- roohaani seva karne ka chance, manushya ko devta banaane ka chance abhi hi milta hai। yeh chance miss nahin karna hai। roohaani service mein lag jaana hai। serviceable banna hai। khaas kumaariyon ko eeshvareey government ki seva karni hai। mama ko poora-poora follow karna hai। agar kumaariyaan baap ka bankar jismaani service hi karti rahen, kaanton ko phool banaane ki service nahin karen to yeh bhi jaise baap ka disregard hai।

geet:- jaag sajniyaan jaag …

om shanti। sajniyon ko kisne samjhaaya? kehte hain saajan aaya sajniyon ke liye। kitni sajniyaan hain? ek saajan ko itni sajniyaan.. wonder hai na! manushya to kehte krishna ko 16108 sajniyaan theen, parantu nahin। shivbaaba kehte hain mujhe to karodon sajniyaan hain। sab sajniyon ko main apne saath sweet hom mein le jaaoonga। sajniyaan bhi samajhti hain hamko phir se baba le jaane aaye hain। jeev aatma sajni thahri। dil mein hai saajan aaya hai hamko shreemat de shrringaar karaane ke liye। mat to har ek ko dete hain। purush stri ko, baap bachche ko, saadhu apne shishya ko, parantu inki mat to sabse nyaari hai, isliye inko shreemat kaha jaata hai, aur sab hain manushya mat। woh sab mat dete hain apne shareer nirvaah ke liye। saadhu santa aadi sabko taat lagi hui hai shareer nirvaah ki। sabhi ek do ko dhanvaan banne ki mat dete rehte hain। sabse achhi mat saadhuon, gurooon ki maani jaati hai। parantu woh bhi apne pet ke liye kitna dhan ikattha karte hain। mujhe to apna shareer nahin hai। main apne pet ke liye kuchh nahin karta hoon। tumko bhi apne pet ka hi kaam hai ki ham mahaaraaja mahaaraani banen। sabko taat hai pet ki। phir koi jvaar ki roti khaate to koi ashoka hotel mein khaate। saadhu log dhan ikttha kar bade mandir aadi banaate hain। shivbaaba shareer nirvaah arth to kuchh karte nahin hain। tumko sab kuchh dete hain - sada sukhi banaane ke liye। tum ever healthy, wealthy banenge। main to ever healthy banne ka purushaartha nahin karta hoon। main hoon hi ashareeri। main aata hi hoon tum bachchon ko sada sukhi banaane ke liye। shiv-baba to hai niraakaar। baaki sabko pet ki lagi rehti hai। dvaapar mein bade-bade sannyaasi, tatva gyaani, brahm gyaani the। yaad mein rehte the to ghar baithe unko sab kuchh mil jaata tha। pet to sabko hai, sabko bhojan chaahiye। parantu yog mein rehte hain isliye unko dhakka nahin khaana padta hai। ab baap tum bachchon ko yukti batlaate hain ki tum sada sukhi kaise rah sakte ho। baba apni mat dekar vishwa ka maalik banaate hain। tum chiranjeevi raho, amar raho। sabse achhi mat unki hai। manushya to bahut mat dete hain। koi imtahaan paas kar barrister ban jaate, parantu woh sab hain alpakaal ke liye। purooshaartha karte hain apne aur baal bachchon ke pet ke liye।

ab baba tumko shreemat dete hain he bachche shreemat par chal yeh roohaani padhaai padho jo manushya vishwa ka maalik ban jaaven। sabko baap ka parichay do to baap ki yaad mein rahne se ever healthy, wealthy ban jaayenge। woh hai avinaashi surgeon। tum baap ke bachche bhi roohaani surgeon ho, ismen koi takleeph nahin। sirf mukh se aatmaon ko shreemat di jaati hai। sarvottam seva tum bachchon ko karni hai। aisi mat tumko koi de na sake। ab ham baap ke bachche bane hain to baap ka dhandha karen ya jismaani dhandha karen। baba se ham avinaashi gyaan ratnon ki jholi bharte hain। shiv ke aage kehte hain bhar de jholi। woh samajhte hain - 10-20 hajaar mil jaayenge। agar mil gaye to bas un par balihaar jaayenge, bahut khaatiri karenge। woh sab hai bhakti maarga। ab sabko baap ka parichay do aur behad ki history-geography sunaao। bahut easy hai। had ki history-geography mein to bahut baaten hain। yeh behad ki history-geography hai ki behad ka baap kahaan rehte hain, kaise aate hain! ham aatmaon mein kaise 84 janmon ka part bhara hua hai। bas jaasti kuchh nahin samjhaao sirf alpha aur be। aham aatma baap ko yaad karke vishwa ka maalik ban jaayengi। abhi padhna aur padhaana hai। alpha maana allaah, be maana baadshaahi। ab socho yeh dhandha karen ya jismaani dhandha kar 2-4 sau kamaayen!

baba kehte hain agar koi hoshiyaar bachchi ho to main unke mitra sambandhiyon ko bhi de sakta hoon, jisse unka bhi shareer nirvaah chalta rahe। parantu bachchi achhi ho, serviceable ho, andar baahar saaph ho, boli ki badi meethi ho। vaastav mein kumaari ki kamaai maa baap kha nahin sakte। baba ka bankar phir bhi us jismaani service mein dhyaan bahut dena - yeh to disregard ho gaya। baap kehte hain manushya maatra ko heaven ka maalik banaao। bachche phir jismaani service mein maatha maaren! school kholna to government ka kaam hai। ab bachchiyon ko buddhi se kaam lena hai। kaun si service karen - eeshvareey government ki ya us government ki? jaise yeh baba javaahraat ka dhandha karte the phir bade baba ne kaha yeh avinaashi gyaan ratnon ka dhandha karna hai, isse tum yeh banenge। chaturbhuj ka bhi saakshaatkaar kara diya। ab woh vishwa ki baadshaahi leven ya yeh karen। sabse achha dhandha yeh hai। bhal kamaai achhi thi parantu baba ne ismen pravesh hokar mat di ki alpha aur be ko yaad karo। kitna sahaj hai। chhote bachche bhi padh sakte hain। shivbaaba to har ek bachche ko samajh sakte hain। yeh bhi seekh sakte hain। yeh hai baahrayaami, shivbaaba hai antaryaami। yeh baba bhi har ek ki shakla se, bol se, act se sab kuchh samajh sakte hain। bachchiyon ko roohaani service ka chance ek hi baar milta hai। ab dil mein aana chaahiye ham manushya ko devta banaayen ya kaanto ko kaanta banaayen? socho kya karna chaahiye? niraakaar bhagvaanuvaach - deh sahit deh ke sab sambandh todo। apne ko aatma samajh baap ko yaad karte raho। brahma ke tan se baap braahmanon se hi baat karte hain। woh brahman log bhi kehte hain - brahman devi devtaae namah, woh kukh vanshaavli, tum ho mukh vanshaavli। baba ko zaroor brahma bachcha chaahiye। kumaarka bataao baba ko kitne bachche hain? koi kehte 600 karod, koi kehte ek brahma .. bhal tum trimoorti kehte ho parantu occupation to alag-alag hai na। vishnu ki naabhi se brahma nikla। brahma ki naabhi se vishnu, to ek ho gaye। vishnu 84 janma lete hain va brahma - baat to ek hi hai। baaki raha shankar। aise to nahin shankar so shiv hota hai। nahin, trimoorti kahlaaya jaata hai। parantu righteous bachche do hue। yeh sab gyaan ki baaten hain।

to bachchiyon ke liye yeh service karna achha hai ya matric aadi padhna achha hai? vahaan to alpakaal ka sukh milega। thodi tanakhvaah milegi। yahaan to tum bhavishya 21 janmon ke liye maalaamaal ho sakte ho। to kya karna chaahiye? kanya to nirbandhan hai। adhar kanya se kuvaanri kanya teekhi ja sakti hai kyonki pavitra hai। mama bhi kumaari thi na। paise ki to baat hi nahin। kitni teekhi gai to follow karna chaahiye khaas kanyaaon ko। kaanto ko phool banaayen। eeshvareey padhaai ka chance len ya us padhaai ka? kanyaaon ka seminar karna chaahiye। maataaon ko to pati aadi yaad padta hai। sannyaasiyon ko bhi yaad bahut padta rehta hai। kanyaaon ko to seedhi chadhni nahin chaahiye। sang ka rang bahut lag jaata hai। koi bade aadmi ka bachcha dekha dil lag gai, shaadi ho gai। khel khatma। centre se sunkar baahar jaate hain to khel khatma ho jaata hai। yeh hai madhuban। yahaan aise bhi bahut aate hain, kehte hain ham jaakar centre kholenge। baahar jaakar gum ho jaate hain। yahaan gyaan ka garbha dhaaran karte, baahar jaane se nasha gum ho jaata hai। maaya opposition bahut karti hai। maaya bhi kehti hai vaah! isne baba ko bhi pahchaana hai phir bhi baba ko yaad nahin karte to ham bhi ghoonsa maarengi। aise nahin kaho ki baba aap maaya se kaho hamko ghoonsa na maare। yuddha ka maidaan hai na। ek taraph hai raavan ki sena, doosre taraph hai raam ki sena। bahaadur ban raam ki taraph jaana chaahiye। aasuri sampradaay ko hi daivi sampradaay banaane ka dhandha karna hai। jismaani vidya tum jinko padhaayenge, jab tak woh padhkar bade ho tab tak vinaash bhi saamne aa jaayega। aasaar bhi tum dekh rahe ho। baba ne samjhaaya hai donon Christian bhaai-bhaai aapas mein mil jaaen to ladaai ho na sake। parantu bhaavi aisi nahin hai। unhon ko samajh mein hi nahin aata hai। ab tum bachche yogbal se raajdhaani sthaapan kar rahe ho। yeh hai shiv shakti sena। jo shivbaaba se bhaarat ka praacheen gyaan aur yog seekh kar bhaarat ko heere jaisa banaate ho। baap kalpa ke baad hi aakar patiton ko paavan banaate hain। tum sab raavan ki jel mein ho। shok vaatika mein ho, sab duhkhi ho। phir raam aakar sabko chhudaae ashok vaatika svarga mein le jaate hain। shreemat kehti hai - kaanton ko phool, manushya ko devta banaao। tum master duhkh harta sukh karta ho। yahi dhandha karna chaahiye। shreemat par chalne se hi tum shreshtha banenge, baap to raay dete hain। ab baap kehte hain arji hamaari marji aapki। achha!

meethe-meethe sikeeldhe bachchon prati maat-pita baapdaada ka yaadapyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) serviceable banne ke liye andar baahar saaph banna hai। mukh se bahut meethe bol bolne hain। deh sahit deh ke sab sambandhon se buddhiyog hataana hai। sang se apni sambhaal karni hai।

2) baap samaan master duhkh harta sukh karta banna hai। roohaani seva kar sachchi kamaai karni hai। roohaani baap ki mat par roohaani social worker banna hai।

vardaan:- “main aur mera baba'' is vidhi dvaara jeevanmukta sthiti ka anubhav karne vaale sahajyogi bhav

brahman banna arthaat deh, sambandh aur saadhnon ke bandhan se mukta hona। deh ke sambandhiyon ka deh ke naate se sambandh nahin lekin aatmik sambandh hai। yadi koi kisi ke vash, parvash ho jaate hain to bandhan hai, lekin brahman arthaat jeevanmukta। jab tak karmendriyon ka aadhaar hai tab tak karma to karna hi hai lekin karmabandhan nahin, karma-sambandh hai। aisa jo mukta hai vo sada saphaltaamoorta hai। iska sahaj saadhan hai - main aur mera baba। yahi yaad sahajyogi, saphaltaamoorta aur bandhanmukta bana deti hai।

slogan:- main aur merepan ki alloy (khaad) ko samaapta karna hi real gold banna hai।

maateshvari ji ke anmol mahaavaakya

yeh jo manushya geet gaate hain O geeta ke bhagwan apna vachan nibhaane aa jaao। ab vo svayan geeta ka bhagwan apna kalpa pahle vaala vachan paalan karne ke liye aaye hain aur kehte hain he bachche, jab bhaarat par ati dharma glaani hoti hai tab main isi samay apna anjaam paalan karne (vaayda nibhaane) ke liye avashya aata hoon। ab mere aane ka yeh matlab nahin ki main koi yuge yuge aata hoon। sabhi yugon mein to koi dharma glaani nahin hoti, dharma glaani hoti hi hai kaliyug mein, to paramatma kaliyug ke ant samay mein aata hai। aur kaliyug phir kalpa kalpa aata hai, to zaroor woh kalpa-kalpa aata hai। kalpa mein phir chaar yug hain, usko hi kalpa kehte hain। aadhaakalpa satayug treta mein satogun satopradhaan hai, vahaan paramatma ke aane ki koi jarurat nahin aur dvaapar yug se to phir doosre dharmon ki shuruaat hai, us samay bhi ati dharma glaani nahin hai, isse siddha hai ki paramatma teenon yugon mein to aata hi nahin hai, baaki raha kaliyug, uske ant mein ati dharma glaani hoti hai। usi samay paramatma aae adharma vinaash kar sat dharma ki sthaapna karte hain। agar dvaapar mein aaya hota to phir dvaapar ke baad satayug hona chaahiye phir kaliyug kyon? aise to nahin kahenge paramatma ne ghor kaliyug ki sthaapna ki, ab yeh to baat nahin ho sakti isliye paramatma kehte hain main ek hoon aur ek hi baar aae adharma athva kaliyug ka vinaash kar satayug ki sthaapna karta hoon to mere aane ka samay sangamayug hai। achha - om shanti।