Murli du jour du mardi 4 octobre 2022

04-10-2022 praatahmurli om shanti "baapdaada"' madhuban

meethe bachche - tumhein baap ko yaad karne ki race karni hai, baap ko bhoolenge to maaya ka gola lag jaayega

prashn:- is drama ke kis guhya rahasya ko tum bachche hi jaante ho?

uttar:- tum jaante ho is drama mein bhinna-bhinna variety actor hain, har ek ka alag-alag part hai। ek ka part, ek ke features doosre se nahin milte hain। jo all-rounder hero paartadhaari hain unka hi gaayan hai। baaki jo thoda samay ek do janma part bajaate woh kamjor paartadhaari hue। 2. sabhi paartadhaariyon mein paramatma vyaapak ho akela hi dance nahin karta। woh to is behad drama ka director hai। woh naam roop se nyaara nahin। agar nyaara ho to yeh jo gaayan hai - tumhaari gat mat tum hi jaano… woh wrong ho jaae।

om shanti। jaise baap ne kaha hai ki main saadhaaran boodhe tan mein aata hoon arthaat jiski vaanaprastha mein rahne ki avastha hoti hai। vaanaprastha arthaat vaani se pare, woh to hua nirvaandhaam। sukhdhaam, duhkhadhaam arthaat jahaan manushya rehte hain। sukhdhaam mein manushya rehte hain। vahaan unhon ko sukh milta hai to naam sukhdhaam rakha hai। dhaam mein koi rehte hain। achha phir shantidham kehte hain। vahaan to manushya rahne vaale nahin hain। shantidham kahne se phir siddha hota hai vahaan aatmaayen rehti hain। vahaan manushya rah nahin sakte। aise nahin ki manushya satayug mein shanti mein rehte hain to koi gupha mein rehte hain va man ko aman kar dete hain, nahin। vahaan to hai hi ek advet dharma, dvet ki baat nahin। phir jitne dharma badhte jaate hain to dvet badhta jaata hai, jahaan dvet hai vahaan ashaanti hai। vaanaprastha, unko kaha jaata hai nirvaandhaam। ab tum bachchon ko pata hai ki ham aatmaon ko rehna nirvaandhaam mein hota hai, unko phir muktidhaam kaha jaata hai। vahaan shanti mein to sirf aatmaayen rehti hain। sukhdhaam mein to shareer hai na। shareer ke saath kabhi shanti rah nahin sakti। hathayog, praanaayaam aadi chadhaakar 10-20 din va maas bhi rehte hain। parantu kahaan tak shanti mein rahenge? mukti jeevanmukti mein to ja na saken। yeh drama hai na। is samay sabhi aatmaayen yahaan karmakshetra par aa jaani chaahiye kyonki nambarvaar aana hai। aatmaayen bhi namba-ravaar hain na। koi satopradhaan hain, koi sato, rajo, tamo hain। jo pichhaadi mein thoda part bajaate hain woh to jaise kamjor aatmaayen hain। bilkul thoda part hai। unka itna prabhaav nahin ho sakta, itna gaaye nahin jaate hain। vichaar karo kaun-kaun gaaye jaate hain। oonche te ooncha hai bhagwan। bhaarat ki hi baat hai। doosri jagah kiska gaayan karen? dharma sthaapkon ka। jaise Christ phir pope aate hain, unke bhi chitra hain। gaayan hota hai jin aatmaon ka, unka bhaari part hai। tum bachche srishti ke aadi-madhya-ant ko jaan gaye ho। drama mein kaun se first class actors hain। akhbaar mein bhi daalte hain to manushyon ko khainch ho ki phalaane ko dekhen। koi ko pata nahin ki yeh behad ka 5 hajaar varsha ka drama hai। vilaayat vaale bhi bahut gapode maarte hain। sabse jaasti yahaan vaale gapode maarte hain। to baap aakar hamko saari knowledge dete hain। tumhaari buddhi mein yeh zaroor baithna chaahiye। mukhya creator, director, principal actor kaun hai? shivbaaba। vahi knowledgeful, blissful hai। ham shivbaaba ko actor kah sakte hain। manushya to kehte ki woh kabhi act karte hi nahin। woh naam roop se nyaara hai। phir kehte hain woh to sarvavyaapi hai। to kya ek hi actor hai jo sabmen dance karta hai? nahin, yeh to har ek ki act bhinna-bhinna hai। ek na mile doosre se। kitne anek manushya hain, ek ke features doosre se mil nahin sakte। bachche jaante hain yeh world drama hoobhu repeat hota rehta hai। tumhaare paas geet bhi hai ki phir se geeta ka gyaan sunaana pada। baap kehte hain tumko main kitna baari gyaan sunaata hoon! ham tum aur saari duniya ab hai, kalpa pahle bhi thi। kalpa-kalpa phir milte rahenge। doosri aur duniya hoti nahin। baap kehte hain ham ek hain to rachna bhi ek hai। god is one। doosre naam nishaan nahin। oonche te ooncha hai hi ek shivbaaba। phir kehte hain trimoorti brahma। trimoorti mein brahma ko jaasti rakhte hain। trimoorti shankar nahin kahenge। gaaya bhi jaata hai dev-dev mahaadev। pahle brahma aata hai। in teen devtaaon mein number one hai brahma। brahma ko hi guru kehte hain। shankar ko va vishnu ko kabhi guru nahin kahenge। trimooti mein mukhya brahma hai। woh sookshmavtanvaasi to hai sampoorn brahma। features to ek jaise hi hain। to oonch te oonch hua shivbaaba, sabhi ka baba। phir gaaya jaata hai great-great grand father, jisse manushya srishti roopi sijra nikalta hai। yeh manushya srishti roopi jhaad hai। pahle-pahle Adam arthaat aadi dev, aadi devi, unse rachna rachte hain। parantu brahmaakumaar kumaari koi sab thode hi bante hain। jo brahman bante hain vahi phir devta bante hain। yeh padhaai hai। yagya mein chaahiye bhi brahman। woh brahman log material yagya rachne vaale hain। tumhaara yagya hai roohaani। unka yagya kuchh samay chalta hai। phir pichhaadi mein aahuti daalte hain - til, ghrit aadi। yeh to bada bhaari yagya hai, ismen saari duniya svaaha ho jaani hai। satayug, treta mein kabhi yagya hota nahin। woh yagya rachte hain upadrav mitaane ke liye। upadrav shuru hote hain dvaapar se। baap kehte hain is yagya ke baad phir aadhaakalpa koi yagya hota nahin। samjhaaya jaata hai ab judge karo - right kaun hai? yeh chhote-chhote yagya sab had ke hain। yeh hai behad ka yagya। is yagya mein saari aahuti padegi। phir aadhaakalpa koi yagya nahin। koi mandir pooja ke liye nahin hota। mandir bante hi hain bhakti maarga mein। to oonche te oonch shivbaaba ko sab bhagat yaad karte hain। parantu pahchaan na hone kaaran neti-neti kah dete hain। rachna aur rachta ka paaraavaar ham pa nahin sakte। aur phir gaate hain bhagwan tumhaari gat mat nyaari, aapehi jaano। zaroor koi cheez hai tab to kehte hain na aap hi jaano। zaroor naam roop vaala hoga tab to kehte hain he bhagwan - aapki gat mat nyaari। parantu manushya to iska arth samajhte nahin hain। baap samjhaate hain meri mat sabse nyaari hai। tumko shoodra se brahman banaakar phir shreshtha devta banaata hoon। jeevanmukti daata hoon। main sarva ka liberator hoon। kaliyug poora ho phir satayug hota hai। satayug mein duhkh ki baat hoti nahin। baap ab duhkh se liberate karte hain। baaki sab shantidham mein chale jaayenge। kaliyug ke ant mein hi liberator aate hain। aakar narka ko svarga banaate hain। yahaan to bahut duhkh hai, inko svarga nahin kah sakte। puraani duniya ko nai duniya thode hi kahenge। nai duniya mein lakshmi-naaraayan ka raajya tha। puraani duniya mein kya laga pada hai। yeh phir nai duniya banti hai। oonche te oonch baba hi aakar puraani duniya se nai duniya banaate hain। sookshm vatan vaasi brahma, vishnu, shankar ko devta kehte hain। aise kahaan bhi likha hua nahin hai ki prajaapita brahma sookshm vatan vaasi hai। sookshm vatan mein thode hi praja hoti hai। prajaapita brahma to zaroor yahaan hi chaahiye। oonch te oonch shivbaaba phir second number mein hai brahma। shivbaaba in brahma dvaara baith service karte hain। braahmanon ko devta banaate hain। yeh to hai hi paap aatmaon ki duniya, raavan raajya। jo kuchh karte hain, unse manushyon ke paap hi hote hain bhrashtaachaariyon se hi len-den hogi। bhrashtaachaar shuru hota hai dvaapar se। phir ant mein baap aakar mahaan shreshthaachaari banaate hain। kala kamti hone mein 5 hajaar varsha lagte hain, jo shreshtha te shreshtha devta the vahi phir neeche utarte hain। yeh khel hi aisa hai। kitna achhi reeti baap baith samjhaate hain। koi baith samjhe to achhi tarah se samajh sakte hain। tum to karaachi mein bhatthi mein pade, samajhne ke liye aate the। partition ke baad sab bhaag gaye, tum to vahaan rahe pade the। tumko kiska sang nahin tha। sang se door hote bhi nambarvaar purooshaartha kiya। sab to ek jaisa purooshaartha kar bhi nahin sakte। school mein bhi sab ek jaise number koi lete nahin hain। do student ko 99 marks mil nahin sakte। class mein ek do ke oopar thode hi baithenge। ghodon ki bhi race hoti hai, usmein bhi ek jaise do ho nahin sakte। iska naam rakha hai raajasva ashvamedh, ashva kaha jaata hai ghode ko, tum ho roohaani ghode। tumhaari daudi hai ghar ki taraph ki pahle ham baap ke paas pahunche। vahaan to saaikilon ki, ghodon ki race hoti hai। yuddha ki bhi race hoti hai। tumhaari yuddha ki yuddha, race ki race hai। tumhaari maaya par jeet paane ki yuddha hai aur baap ko yaad karne liye hi kaha jaata hai। koi yeh nahin kaha jaata hai ki guroonaanak ko yaad karo ya koi aur ko yaad karo। sarva ka sadgati daata ek hai। vaastav mein sarva par daya karne vaala bhi ek hai। sarva ka sadgati daata, patit-paavan bhi ek hai। unhonne apne oopar naam rakhaaya hai to jhootha hua na। sarva ko sukh dene vaala ek hai। sukhdhaam mein bhi baap hi le jaate hain। to baap se hi sukhdhaam ka varsa lena chaahiye। aadhaakalpa raavan ne shraap diya hai। ab baap se varsa lo। yeh to hai hi paap aatmaon ki duniya। devtaaon ki hai punya aatmaon ki duniya। paap ki duniya mein punya hota nahin। yeh to gapoda maarte hain ki phalaana mara svargavaasi hua। are svarga hai hi nahin to phir svarga mein janma kaise milega। yeh bhi samajhne vaala samjhe। samajhne ke liye koi yahaan baithna nahin hai। bhal vilaayat mein raho। parantu 7 roz baba ke sang mein zaroor rehna pade kyonki sang taare kusang bore। agar teer lag gaya to kahega aur 7 roj rehna hai। to baba pareeksha bhi lete hain ki poora nishchay hai, dil lagti hai, teer lagta hai - baap padhaate hain। are baap ke paas to rehna chaahiye na। jab pakka rang lag jaae to vilaayat mein bhi ja sakte hain। abhi pavitra banenge to 21 janmon ki raajaai milegi। kam baat hai kya? ek janma pavitra bano, koi badi baat hai। baba yuktiyaan to bahut bataate hain। aahiste-aahiste yukti se chalo, jisse khitpit na ho, dosti bhi rahe aur apne aapko chhudaate bhi raho। baba raanjhu-ramajbaaj hai, to ramaj (yukti) bataate hain - aise-aise karo। bahut bachchiyaan bhoon-bhoon karke pati ko le aati hain। phir pati stri ke charnon par girte hain ki isne mujhe bachaaya। woh brahman to vikaar ka hathiyaala bandhavaate hain। yahaan brahma aur brahman hathiyaala baandhate hain pavitrata ka। woh cancel karte hain। bachche kehte bhi hain baba aap hamko svarga mein le jaate ho। aapki ham kyon nahin maanenge! khushi se pavitrata ka kangan baandhate hain। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) pavitra banne ki yukti aapehi rachni hai। 21 janmon ki raajaai ke liye pavitrata ki pratigya karni hai।

2) shreshtha te shreshtha banne ke liye shreshthaachaariyon se len-den karni hai। baap ke sang mein rahkar nirbhay banna hai।

vardaan:- sarvashaktimaan ke saath ki smriti dvaara sada saphalta ka anubhav karne vaale combined roopdhaari bhav

sarvashaktimaan baap ko apna saathi bana lo to shaktiyaan sada saath rahengi। aur jahaan sarva shaktiyaan hain vahaan saphalta na ho - yeh asambhav hai। lekin yadi baap se combined rahne mein kami hai, maaya combined roop ko alag kar deti hai to saphalta bhi kam ho jaati hai, mehnat karne ke baad saphalta hoti hai। master sarvashaktimaan ke aage saphalta to aage peechhe ghoomti hai।

slogan:- sabki duaayen leni hain to haan ji karte hue sahayog ka haath badhaate chalo।