Murli du jour du mercredi 5 octobre 2022

05-10-2022 praatahmurli om shanti "baapdaada"' madhuban

“meethe bachche, is samay tumhaara yeh janma heere samaan hai kyonki tum eeshvareey santaan bane ho, svayan eeshvar tumhein padhaate hain, tum dooraadeshi, vishaal buddhi bante ho''

prashn:- tum bachche kis purushaartha se dooraadeshi aur vishaal buddhi ban rahe ho?

uttar:- baap ki yaad se dooraadeshi aur padhaai se vishaalbuddhi bante ho। dooraadeshi arthaat doordesh mein rahne vaale baap ko yaad karna। manamna bhav ka arth hai dooraadeshi hona। vishaalbuddhi arthaat srishti ke aadi-madhya-ant ka gyaan buddhi mein ho। tumhein pahle dooraadeshi phir vishaal buddhi banna hai।

geet:- hamaare teertha nyaare hain…

om shanti। bachchon ne geet suna ki hamaare teertha nyaare hain। hamaara teertha bahut door hai isliye bachchon ko kaha jaata hai dooraadeshi bhav। doordesh mein rahne vaale phir kehte hain vishaalbuddhi bhav। sabki buddhi is samay tuchchha hai na। maaya ne tuchchha buddhi bana diya hai। to bachchon ki hai dooraadeshi buddhi arthaat door ke rahne vaale ki yaad aur vishaalbuddhi arthaat saare srishti ke aadi madhya ant ka gyaan buddhi mein hai। aur sab hain alpagya buddhi arthaat alpa buddhi, sirf kehte hain paramatma, parantu jaante nahin। yahaan koi mahaatma nahin hai। yeh to baap aakar dooraadeshi banaate hain, parantu dooraadeshi bachche kam hain। bhal gyaan bahut hai parantu dooraadeshi kam hain arthaat baap ki yaad mein kam rehte hain। baaki saadhu to saadhna karte hain yatha raajaaraani tatha praja saari duniya is samay patit hai। bhal mahaatma naam daal dete hain parantu mahaan aatma koi hai nahin। kai phir shreekrishna ko mahaatma kehte hain। yeh phir bhi right hai kyonki vahaan shreshthaachaari duniya hai। yeh to hai bhrashtaachaari duniya। yatha raaja raani tatha praja parantu is samay raaja koi hai nahin। praja ka praja par raajya hai। baap kehte hain shaastra padhne se tum mere se mil nahin sakte aur na hi koi mukti mein ja sakte hain। jab tak mere dvaara koi mere ko na jaane aur jab tak kalpa ke ant mein main na aaoon। manushya to shreekrishna ko yaad karte hain woh to is desh ka hai। dooraadeshi hai nahin। to baap ko yaad karna maana dooraadeshi banna। manamnaabhav ka arth hai dooraadeshi bhav। jo baap ko jaante nahin to baap se varsa kaise mile। agar aaye nahin to raasta kaise mile। badi samajh ki baat hai। saajan se bada pyaar chaahiye। kehte hain ek tu jo mila to sab kuchh mila। to ek se hi sab kuchh praapti ho jaati hai। aise saajan se bahut lav chaahiye। yeh hai behad ki knowledge। viraat drama arthaat variety, jismen anek matbhed hain tabhi kehte hain dvet raajya, dvet ya daitya ek hi baat hai। daitya kaha jaata hai raavan ko। devta banaane vaala ek hi baap hai। kehte hain manushya se devta, kitni sahaj baat hai। tum ho vishaal buddhi। shaastra padhne vaale ko vishaal buddhi nahin kahenge। woh hai bhakti। gyaan alag cheez hai, bhakti alag cheez hai। gyaan to gyaan saagar baap dete hain। tum heere jaisa the, ab kaudi jaise ban gaye ho। ab baap heere jaisa banaate hain। tum vishaal buddhi hone se vishwa par raajya karte ho। vahaan akhanda atal raajya hai, to vishaal buddhi gyaan mein hote hain।

tum jaante ho satayug mein sukh tha phir dheere-dheere neeche seedhi utarni hai। chadhne mein ek second jump lagaana patit se paavan banne ki chhalaang lagaana। utarne mein 5 hajaar varsha। tum sab nambarvaar purushaartha anusaar vishaalbuddhi bane ho। yeh gyaan abhi milta hai, satayug mein yeh gyaan hota nahin। sangam par baap aate hain - hoobhu kalpa pahle muaaphik। satayug mein vishaalbuddhi nahin kahenge। heere jaisa janma bhi satayug mein nahin kahenge। heere jaisa janma is samay hai kyonki is samay tum ho eeshvareey santaan। eeshvar tumko padhaate hain। yeh mahima baap ki hai jabki paramatma patit-paavan hai to sarvavyaapi kaise ho sakta hai। parantu manushya alpagya buddhi hain, kitna bhi samjhaao, samajhte nahin hain। to samjho woh brahman kul ka nahin hai। jo devta kul ka hoga vahi gyaan ko samajh brahman banenge। baap gyaan ka saagar hai। tum bhi gyaan ke saagar bante ho, phir tum sukh shanti ke saagar bante ho। satayug mein sukh apaar rehta hai। to baap dvaara tumko sarva sukhon ki praapti hoti hai। so bhi ant mein gyaan, sukh, shanti ke saagar banenge kyonki auron ko bhi dete ho। abhi dekho kitna duhkh ashaanti hai। badon-badon ko neend nahin aati hai। tum bachchon ko to kitni khushi hai kyonki tum baap ko jaante ho। duniya kehti hai O god father, parampita paramatma parantu jaanti nahin। kitne samay se bhakta bhakti karte, yaad karte aaye hain, jaante kuchh nahin। baap apna aur apni rachna ka parichay khud aakar dete hain। tumko auron ko dena hai। tum jaante ho yeh baap hai, koi mahaatma nahin hai। baba ko khyaal aaya, form mein likha ho to aap kisse milne aaye ho? to kahenge mahaatma se। bolo, mahaatma to yeh hai nahin। naam hai brahmaakumaar kumaariyaan to inka baap prajaapita brahma hoga na। to mahaatma kaise hua। argue karne vaale achhe chaahiye। buddhi vaala chaahiye। samjho woh likhkar bhi jaate hain parantu samajhte kuchh bhi nahin, bilkul buddhu hain। shakla se maaloom pad jaata hai - buddhi mein gyaan nahin hai। shivbaaba to jaante hain, antaryaami hai। yeh baba to baahrayaami hain। baap kehte hain main aata hi us tan mein hoon jo pahla number hai। ab last mein hai। inmen pravesh karta hoon kyonki inko phir vahi naaraayan banna hai। to inko is tan ko dene ka kiraaya milta hai tab to kehte hain saubhaagyashaali rath, bhaageerath ne koi paani ki ganga nahin laai। yeh guhya gyaan ki baaten hain, jo raavan mat par hone kaaran manushya samajhte nahin hain। ab tumne samjha hai to auron ko samjhaane ki yukti nikaalo। tumko khyaal aana chaahiye ki auron ko kaise dooraadeshi banaayen। kaise baap ka parichay den। woh brahm ko yaad karte hain। brahm to tatva hai jahaan paramatma rehte hain। parantu woh brahm ko hi paramatma samajhte hain। jaise hindu koi dharma nahin hai। hindustaan mein rahne ke kaaran hindu naam rakh diya hai। vaastav mein hindustaan to rahne ka sthaan hai। brahm tatva bhi paramatma ke rahne ka sthaan hai। parantu manushyon ki alpa buddhi hone ke kaaran samajhte nahin। yahaan gyaan ki baat hai। duniya ki baaton ko to sab achhi tarah jaante hain। yeh khud jauhri tha to sab kuchh jaanta tha। baaki gyaan ki baaton mein alpa buddhi, tuchchha buddhi the, kuchh nahin jaante the। to baba aakar pahchaan dete hain। jab tak koi brahman na banen to baap se varsa le na sake, praja to banni hai। kisi ne bhi thoda suna to praja ban jaayenge। agar vikaar mein jaata rahega to unko saja bhogni padegi। phir aakar saadhaaran praja banenge। abhi sabka maut hai। kabradaakhil hona hi hai। kabristaan banna hi hai। is samay manushyon ki koi value nahin hai। tumhaari bhi nahin thi। ab value ban rahi hai। baaki jab vinaash hoga to machchharon sadrishya marenge। jaise deepaavli par machchhar kitne marte hain, to sabko marna hai hi kyonki sabko ghar vaapis jaana hai। satayug mein yeh nahin kahenge ki yeh mara kyonki vahaan akaale mrityu hota nahin। kaal par jeet paate hain। marna shabd vahaan nahin hota। satayug mein jaante hain ki ham marte nahin hain। sirf ek puraana chola chhod, naya lete hain - so bhi samay par। sarpa ka misaal hai ki puraani khaal chhod nai lete hain to sarpa ka misaal satayug se lagta hai, yahaan se nahin। bhramri ka misaal yahaan ka hi hai, sannyaasi bhi yeh misaal dete hain kyonki yahaan ka hi yaadgaar bhakti maarga mein chalta hai।

abhi tum bachche jitni-jitni dhaarna karenge utna vishaal buddhi banenge, utni kamaai karenge। jaise surgeon jitni vishaal buddhi vaala hota hai, jitni davaai aadi buddhi mein adhik rakhta hai utna kamaai karta hai। to yahaan bhi aise hain। koi 250 roopaya kamaai karte, koi to phir hajaaron kamaate hain। koi raaja ko theek kar diya to laakh-laakh bhi de dete hain। yahaan bhi aise hi hai। koi ko to gyaan ke points ki dhaarna nahin aur koi to bade dooraadeshi, vishaalbuddhi hain to auron ko bhi banaate hain। pahle dooraadeshi peechhe vishaal buddhi kahenge। samajhne ki baat hai na। braahmanon jaisa saubhaagyashaali koi hai nahin। ekdam sabko oopar le jaate hain। oopar mein paramatma hai na, to uska parichay dete ho। to tum jaankaar ho na। bachchon ko to baap ki jaankaari hoti hi hai। ab paarlaukik baap aaye hain tumko paavan banaakar vaapas le jaane ke liye। ek kheroot (kheti karne vaale) bachchi ki kahaani hai na - ki raaja bachchi ko le aaya use achha nahin laga, to unko vaapis bhej diya। yahaan bhi aise hain। jinki buddhi mein gyaan ki dhaarna nahin hoti hai to woh khud hi chale jaate hain, ismen baap kya kare। samjhaane vaala hai to parampita paramatma। woh brahma dvaara vedon shaastron ka saar sunaate hain ki ved shaastra koi dharma shaastra hai nahin। yeh to patte hain, baal bachche hain। mukhya dharma hain chaar। usmein brahman dharma bhi hai mukhya। heere jaisa janma devtaaon ka nahin kahenge kyonki yeh kalyaankaari leap dharmaau yug hai। leap maas, dharmaau ko kehte hain। yeh hai sangamayug, kalyaankaari aur jitne bhi yug hain vahaan akalyaan hi hota hai kyonki degree kam hoti jaati hai। dinaprati-din kala kam hi hoti jaati hai। yeh yug hi hai kalyaankaari। to har ek ko maatha maarna pade ki auron ko kaise samjhaayen। yoon to ustaad bata rahe hain ki raasta kaise bataao phir har ek ka dhandha apna-apna hai। to yeh aana chaahiye ki kaise auron ko duban (daldal) se nikaaloon। kai to dal-dal se nikaalne jaate phir khud phans jaate hain। to samjhaane ki badi yukti chaahiye। pahle alpha ko samjhaao to be baadshaahi ko bhi jaan jaayen aur srishti chakra ko bhi jaan jaayen। pahle alpha ko to jaano। koi hajaar dapha likhkar den ki alpha kaun hai, tab yahaan baith sake। kai to blood se bhi likhkar dete hain phir chale jaate hai। maaya koi kam thode hi hai। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) dooraadeshi ban baap ki yaad mein rehna hai aur doosron ko doordesh mein rahne vaale baap ka parichay dena hai।

2) kalyaankaari yug mein sabhi ka kalyaan karne ki yukti nikaalni hai। sabko duban (daldal) se nikaalne ki seva karni hai।

vardaan:- sada umang-utsaah ke pankhon dvaara udti kala ki sthiti ka anubhav karne vaale karmayogi bhav

umang-utsaah aap braahmanon ke udti kala ke pankh hain। agar kaarya arth neeche bhi aate ho to udti kala ki sthiti se, karmayogi ban karma mein aate ho। yeh umang-utsaah braahmanon ke liye bade se badi shakti hai। neeras jeevan nahin hai। umang-utsaah ka ras hai to kabhi dilshikasta nahin ho sakte, sada dilkhush। umang-utsaah, toofaan ko bhi tohpha bana deta hai। pareeksha va samasya ko manoranjan anubhav karaata hai।

slogan:- jo ashareeri sthiti ke abhyaasi hain unhein shareer ki aakarshan aakarshit nahin kar sakti।

maateshvari ji ke anmol mahaavaakya

ham manushya aatmaon ko pahle-pahle kaunsi mukhya point buddhi mein rakhni hai, jis par khoob attention rakhna hai? 1- pahle-pahle to apne ko yeh pakka nishchay rakhna hai ki hamko padhaane vaala kaun hai? 2- doosri point hai, ham sabhi manushya aatmaayen hain aur paramatma hamaara pita hai। ham aatma bachche aur paramatma baap donon alag-alag cheez hai। 3- teesri point eeshvar beant bhi nahin hai, eeshvar sarvatra bhi nahin hai, ab yahi knowledge buddhi mein rakhni hai isliye apni knowledge auron se nyaari hai, bhale duniyaavi manushya samajhte hain hamko paramatma ka gyaan hai, ab unse poochho aap mein kaunsa gyaan hai? to kahenge eeshvar sarvavyaapi hai। ab paramatma to kehta hai mera gyaan mere dvaara hi milta hai, jaise barrister dvaara barristry, do. dvaara doktari seekhi jaati hai, bhal vahaan barrister bhi anek hote hain, ek barrister se na padha to doosra padhaayega। ek doctor se na padha to doosra doctor padhaayega, magar yeh eeshvareey knowledge sivaae ek paramatma bigar koi bhi manushya aatma chaahe saadhu, sant, mahaatma ho vo bhi nahin padha sakega। to ham kaise samjhen ki inhon mein koi paramatma ka gyaan hai aur 4- chauthi point paramatma yuge yuge nahin aata balki paramatma kalpa kalpa ek hi baar is sangamayug par arthaat kaliyug ke ant aur satayug ke aadi sangam samay par aata hai, aur anek adharmon ka vinaash karaae ek aadi sanaatan satdharma ki sthaapna karaata hai। ab log kaise kehte hain ki paramatma yuge yuge aata hai aur aise bhi kehte hain geeta ka bhagwan shreekrishna, vo dvaapar mein aaya hai। ab in sabhi baaton ko siddha karna hai, geeta ka bhagwan shreekrishna nahin hai, shiv paramatma hai aur vo bhi dvaapar mein nahin aata sangam samay par aaya hai। 5- paanchavi point guru bigar ghor andhiyaara kaise hua hai, vo guru kaun hai? manushya srishti ulta jhaad kaise hai aur hamko apne paanch vikaaron par jeet kaise pahanni hai? 6- chhatveen point ham vahi paandav yauddhe hain, jiske saath saakshaat paramatma hai usi taraph hi jeet hai aur saatveen point paramatma khud sarvashaktivaan hai to jinhonne paramatma ka poora saath liya hai, unhon ko hi paramatma dvaara light might donon taaj milte hain। ab yeh sabhi baaten buddhi mein rakhna isko hi gyaan kaha jaata hai। achha। om shanti।