Murli du jour du samedi 26 novembre 2022

26-11-2022 praatahmurli om shanti "baapdaada"' madhuban

“meethe bachche - tum roohaani yaatra par ho, tumhein vaapis is mrityulok mein nahin aana hai, tumhaara uddeshya hai manushya se devta banna aur banaana''

prashn:- 16 kala sampoorn banne vaalon ki nishaani kya hogi?

uttar:- woh apni jholi gyaan ratnon se achhi tarah se bharkar doosron ki bhi bharenge। gyaan ratnon ka daan kar apna martaba oonch banaayenge। 2- woh pakke mahaaveer honge, unhein maaya jara bhi hila nahin sakti। woh akhanda-achal shuru se ant tak chalte rahenge ।

prashn:- paapon se mukta ho punya aatma banne ki yukti kya hai?

uttar:- is antim janma ki kahaani baap ko sunaakar raay lo। saath-saath baap ko yaad karte gyaan ratnon ka daan karte raho to punya aatma ban jaayenge।

geet:- bholenaath se niraala…

om shanti। baba ne om ka arth samjhaaya hai। baap bhi kehte hain - om shanti। om shanti। aatma ka apna swaroop va lakshya shanti hai। aatma ka dharma shant hai। baba bhi apna parichay dete hain। jaise parampita paramatma ka parichay vaise aatmaon ka। manushya om ka arth kitna lamba karte hain। om arthaat bhagwan bhi kah dete hain। bholaanaath ki bhi mahima hai। bholaanaath shankar ko nahin kahenge kyoki shankar aadi-madhya-ant ka raaz nahin samjhaate hain। woh to bholaanaath hi bataate hain। bholaanaath varsa dete hain - shankar varsa nahin dete। aise bhi nahin shankar koi shanti dete hain। nahin। shanti dene liye bhi saakaar mein aakar samjhaana pade। shankar to saakaar mein aate nahin। bholaanaath hi shanti, sukh, sampatti, badi aayu bhi dete hain। har cheez avinaashi dete hain kyonki avinaashi baap hai, varsa bhi avinaashi dete hain। drama ko bhi avinaashi kaha jaata hai। had ke drama va naatak to abhi bane hain। yeh to anaadi drama hai। yeh behad ka naatak hai। sthool naatak manushyon ke hote hain। woh repeat hote hain। jaise kans vadh ka khel banaaya hai phir vahi khel dikhaayenge। yeh behad ka drama satayug se shuru hota hai। kaliyug ant tak khalaas ho phir repeat hota hai। world repeat kaha jaata hai। kaun si world? barobar satayugi world jo thi woh ab repeat honi hai। aadhaakalpa ke baad puraani world ki history-geography repeat hoti hai। nai ko din, puraani ko raat kaha jaata hai। yeh sab baaten baap samjhaate hain। woh hai gyaan saagar। shuru se lekar ant tak gyaan lena hai। padhna hai। woh padhaai 15-20 varsha chalti hai। yeh bada bhaari imtahaan hai, inka uddeshya hai manushya se devta banna। jo bhi sir par paap hain unko jalaana hai। iske liye baba ne roohaani yaatra sikhlaai hai। jahaan se vaapis is mrityulok mein nahin aana hai। jismaani yaatra to janma-janmaantar bahut ki, tum bachchon ne aadi ko bhi jaana hai, madhya ko bhi jaana hai। madhya mein kitni badi-badi baaten hoti hain। raavan raajya shuru hota hai। bhakti maarga shuru hota hai। manushya bhrashtaachaari banne shuru hote hain। sampoorn bhrashtaachaari banne mein aadhaakalpa lagta hai। maaya ka raajya dvaapar se shuru hota hai। to bhakti aur raavan raajya donon naam girne ke hain। bhakti ke baad bhagwan milega। baap kehte hain tum sabse jaasti bhakti karte ho। phir gyaan bhi tum hi lete ho। gyaan aur bhakti ke sangam par tumko vairaagya chaahiye। tum sannyaas karte ho 5 vikaaron ka। unko sikhlaane vaala shankaraachaarya hai, unka hai hath yog। anek prakaar ke yog seekhte hain। gharbaar chhod brahm ke saath yog rakhte hain। unko tatva gyaani, tatva yogi kehte hain। gyaan dete bhi hain tatva ka। samajhte hain chakra phirna hai, hamko part bajaana hai। yeh baaten unke aage aise hain jaise bandar ke aage damru bajaayen। ab bandar misal manushyon ko mandir laayak banaane ke liye yeh gyaan dance karte hain, gyaan dance ko unhonne damru naam rakh diya hai। aur kehte hain raam ne bandar sena li। baba samjhaate hain tum sab bandar the। shivbaaba gyaan damru bajaae bandar se mandir banaate hain। woh samajhte hain lanka mein raavan ka raajya tha। baap kehte hain saari duniya saagar ke beech khadi hai। is samay saari duniya mein raavan raajya hai। woh had ki baaten sunaate hain। baap to behad ka raaz samjhaate hain। saari duniya raavan ki janjeeron mein phasi hui hai। saari duniya ko vikaaron ke kaaran patit kaha jaata hai। patit pukaarte hain ki he patit-paavan aao, aakar hamko paavan banaao। aatma ko hi paavan ban vaapis ghar jaana hai।

tum jaante ho ek baap ke bachche ham bhaai behen thahre। to zaroor prajaapita brahma bhi chaahiye। shivbaaba kehte hain ki tum niraakaar aatmaayen shiv vanshi ho phir saakaar mein bhaai behen bante ho। niraakaar mein sab bhaai-bhaai ho। phir prajaapita brahma saakaar mein aate hain to tumko bhaai behen banaate hain। roohaani reeti se bhaai-bhaai jismaani reeti se bhaai behen ho। to yeh nishchay rakhna hai ki ham shivvanshi prajaapita brahmaakumaar kumaariyaan hain। varsa paana hai baap se। baap ko avinaashi surgeon bhi kaha jaata hai। har ek ka karmabandhan alag-alag hai। baap aakar karma, akarma aur vikarma ki gati samjhaate hain। har ek ko apni-apni jeevan kahaani sunaani hoti hai। yeh to jaante ho dvaapar se lekar tum patit bante ho। ab yeh tumhaara antim janma hai, jo kuchh paap kiye hain woh sab kuchh jama hote aaye hain। ab hamko punya jama karne hain। itne janma ke paap kaise katen aur ham punya aatma kaise banen? baap kehte hain - mujhe yaad karo to tumhaare vikarma vinaash honge aur gyaan ratnon ka daan karna hai। jo bahut daan karenge woh oonch martaba paayenge। bhaarat jaisa daan koi karta nahin। ab unko milta kahaan se hai? behad ka baap sabse bada philanthropist hai। baap aakar jeeydaan dete hain। jholi bharkar tripta kar dete hain। apni jholi kam va jaasti bharna woh to bachchon ke oopar hai। nambarvaar jholi bharte hain। kitne brahman braahmaniyaan hain। kitne centres hain। vriddhi ko paate jaayenge। shivbaaba ka sizra hai avinaashi। yeh phir saakaar sijra banta hai। drama anusaar shoodra se brahman banna hi hai। tum nahin bano - yeh nahin ho sakta। drama anusaar itne banne hain jitne drama anusaar bane the, vahi satayug ke devta bante hain। jhaad vriddhi ko paata rehta hai। kitne jhad bhi jaate hain। koi to aise pakke mahaaveer bante hain jo maaya unko hila na sake। woh akhanda achal rehte hain। akhanda arthaat shuru se lekar chalte aate hain। mahaaveer bhi tum bachchon ko kaha jaata hai। achal sthir banna hai, aisa koi kah na sake ki ham 16 kala ban gaye hain। nahin। banna zaroor hai। 16 kala sampoorn banne ki nishaani kya hai? jo achhi reeti apni jholi bharkar auron ki bharte hain। drama anusaar kalpa pahle jisne gyaan ki dhaarna ki hai, so karenge। ham saakshi hokar dekhte hain। purushaartha to zaroor karna pade। purushaartha ke bigar praalabdha nahin mil sakti। woh sab manushya, manushya ke dvaara purushaartha karte hain। shaastra bhi manushyon ne banaaye hain। ab tumko parampita paramatma ki shreemat milti hai। oonche te ooncha hai bhagwan। oonche te ooncha unka thaanv hai। baap aaya hai sukhdhaam, shantidham ka maalik banaane। sabko shantidham le jaate hain। kitna bada behad ka panda hai। woh ek hai, baaki jismaani yaatra par le jaane vaale to anek pande hain। kumbha ke mele par dher pande hote hain। yeh sachcha-sachcha kumbha ka mela hai। parantu panda ek hi hai। tum ho paandav sena। unhone to 5 paandav dikhaaye hain। vaastav mein gaayan inka hai। yeh hai shakti sena, vande maatram। mukhya hai bhaarat। yeh sabka maata-pita hai, sabko paavan banaate hain। shreekrishna ko to sab nahin maante। shreekrishna ka naam geeta mein daalne ke kaaran bhaarat ko itna oonch teertha samajhte nahin hain। baap kehte hain geeta padhte-padhte manushyon ki kya haalat ho gai hai। baap to sabko varsa dete hain। gyaan to athaah hai। saagar ko syaahi banaao to bhi beanta, ant nahin paaya jaata। geeta mein shivbaaba ke badle shreekrishna ka naam daal diya hai। ab tumko andhon ki laathi banna hai। baap ka parichay dena hai ki oonche te oonch kaun hai? parampita paramatma। varsa kisse milega? unse। kalpa pahle bhi brahma dvaara varsa liya tha। sthaapna hui thi। varnon ko zaroor phirna hai। tum shoodra se brahman bante ho। braahmanon dvaara yagya racha jaata hai। tum ho sachche brahman, woh hain jhoothe brahman। bhagvaanuvaach - main tum bachchon ko raajayog sikhlaata hoon। yahaan tumko bhagwan padhaate hain। vahaan manushya, manushya ko padhaate hain। sabko pahle baap ka parichay dena hai। parampita paramatma se aapka kya sambandh hai? kitna bhi samjhaao phir bhi kah dete hain paramatma sarvavyaapi hai। pattharbuddhi hain। are ham sambandh poochhte hain, sarvavyaapi ka sambandh hota hai kya? pradarshani karte jaao to vriddhi hoti jaayegi। tumko bahut votes milti jaayengi। baba likhte rehte hain - dharma ke netaaon aadi ko nimantran dena hai। phir pahra bhi poora rakhna hai। agar tumne yeh do teen baaten siddha kar di to un sabka dhandha hi thanda ho jaayega।

to bachchon ko service jor-shor se badhaani hai। bahut samajhte bhi hain। parantu baahar nikle aur khalaas। srishti chakra ko samajh le woh mushkil hain। aise-aise jo sahi kar jaate hain unko phir chitthi likhni chaahiye ki tum form bharkar phir so gaye kyon? mehnat chaahiye parantu drama anusaar jo bachchon ne mehnat ki hai woh theek hai। drama mein jo tha so repeat hua। jitni service badhni thi, jitne brahman banne the utne bane hain। vriddhi hoti jaayegi। koi second mein baap ko pahchaanenge। koi 7 din mein, koi ek maas mein, koi chalte-chalte thande ho padte hain। phir sanjeevni booti se khade ho jaate hain। bachche jaante hain - shreemat par ham bhaarat ko svarga banaane ke responsible bane huai hain। shreemat se svargavaasi banaana hai। yeh khel hai। ab tum shivaalay mein chalte ho। pahle tum svargavaasi the phir itne janmon ke baad raavan ne narkavaasi banaana shuru kiya। ab poore narkavaasi, kangaal ban gaye hain।

baba kehte hain tum bachche svadarshan chakradhaari bante ho। raavan ka sir kaatte ho। raavan dushman par jeet paate ho। raavan foreigner hai। hamaara raamraajya tha। ab saari duniya ne raavan se haraaya hai। yeh shok vaatika hai। satayug ashok vaatika hai। yahaan ashoka hotel naam rakha hai। jaise sannyaasiyon ne shiv naam rakha hai। shiv aur vishnu ki maala mashhoor hai। braahmanon ki maala ban na sake। yeh hai rudra maala। vishnu ki maala pravritti maarga ki hai। manushya kahenge in jaisa paavan banaao। em object saamne khada hai। tum shyaam se sundar ban rahe ho। puraani duniya ko laat maarte ho। shreekrishna ki aatma gauri thi, isliye svarga ka gola unke haath mein de diya hai। krishna, naaraayan, shiv sabko kaala bana diya hai। jo shiv paramatma sarva ka rachayita hai, use bhi jaante nahin। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste ।

dhaarna ke liye mukhya saar:-

1) baap samaan manushya aatmaon ko jeeydaan dena hai। behad ke baap se daan lekar doosron ko dena hai। mahaadaani zaroor banna hai।

2) svadarshan chakradhaari ban raavan ka sir kaatna hai। behad ka vairaagi ban vikaaron ka sannyaas karna hai।

vardaan:- sangamayug par sada pratyaksha va taaja phal khaane vaale shaktishaali va tandaroosta bhav

sangamayug ki hi visheshta hai jo ek ki padamguna praapti hoti hai aur pratyakshaphal bhi milta hai। abhi-abhi seva ki aur abhi-abhi khushi roopi phal mila। to jo pratyakshaphal arthaat taaja fruit khaane vaale hain woh shaktishaali va tandaroosta hote hain। koi kamjori unke paas aa nahin sakti। kamjori tab aati hai jab albele hokar kumbhakran ki neend mein so jaate ho। alert raho to sarva shaktiyaan saath rahengi aur sada tandaroosta rahenge।

slogan:- follow ek brahma baap ko karo baaki sabse gun grahan karo।