Murli du jour du mardi 13 décembre 2022

13-12-2022 praatahmurli om shanti "baapdaada"' madhuban

“meethe bachche - shivjayanti ka tyohaar bade te bada tyohaar hai, ise tum bachchon ko bahut dhoomdhaam se manaana hai, jisse saari duniya ko baap ke avatran ka pata pade''

prashn:- tum bachchon ko kis baat mein susti nahin aani chaahiye? agar susti aati hai to uska kaaran kya hai?

uttar:- padhaai va yog mein tumhein jara bhi susti nahin aani chaahiye। lekin kai bachche samajhte hain sabhi to vijay maala mein nahin aayenge, sab to raaja nahin banenge - isliye susta ban jaate hain। padhaai par dhyaan nahin dete। lekin jiska baap se poora love hai woh accurate padhaai padhenge, susti aa nahin sakti।

prashn:- chalte-chalte kai bachchon ki avastha dagmag kyon ho jaati hai?

uttar:- kyonki baap ko bhool deh-ahankaar mein aa jaate hain। deh-ahankaar ke kaaran ek do ko bahut tang karte hain। chalan se aisa dikhaai padta hai jaise devta banne vaala hi nahin hai। kaam-krodh ke vasheebhoot ho jaate hain।

om shanti। sabhi braahmanon ko yeh pata hai ki shiv jayanti hai mukhya। aajkal birth de to sabka manaate hain। parantu shiv jayanti ke sanvat ka koi ko pata nahin hai। manushyon ka sanvat to gaate aaye hain। Christ ka sanvat poochhenge to jhat bataayenge। unka bhi birth de manaate hain। tumne shivjayanti pahle itna dhoomdhaam se nahin manaai hai। ab bachchon ko vichaar chalaana hai ki duniya ko kaise pata pade kyonki ab shivjayanti aane vaali hai। to aisa dhoomdhaam se jayanti manaao jo saari duniya ko pata pad jaae। mehnat karni hai। sab bachchon ko maaloom kaise pade ki saari duniya ka jo creator hai unki jayanti hai, woh is samay yahaan hai। bachchon ko maaloom kaise pade। akhbaaren to bahut chhapti hain। unko kaha jaata hai advertisement, jisse naam mashhoor ho। akhbaar ka kharcha bhi bahut hota hai। ab shivjayanti ka to sabko maaloom padna chaahiye। tumko saari duniya ka ona rakhna hai। baap ka parichay sabko dena hai। gaaya bhi hua hai ki bachchon ne ghar-ghar mein baap ka sandesh pahunchaaya hai ki baap aaya hai, jisko varsa lena ho to aakar lo। parantu lenge vahi jinhonne kalpa pahle liya hoga। aatma to jaanti hai, ab sabko maaloom padega to aa jaayenge kyonki aur aur dharmon mein bahut convert ho gaye hain। tum bhi apne ko devi-devta thode hi samajhte the। shoodra dharma mein the। ab tumko baap ne samjhaaya hai। tum ab samajh sakte ho ki hamko kaun padhaate hain। phir bhi ghadi-ghadi bhool jaate hain, jis kaaran unhon ki avastha bhi aisi hi rehti hai। devta banne ke jaise laayak hi nahin bante hain। kaam ka bhoot va deh-abhimaan ka bhoot hone se baap ko yaad nahin kar sakte। dehi-abhimaani jab banen tab baap ko yaad karen। baap ke saath love bhi rahe aur padhaai mein bhi accurate rahen। yeh bahut valuable gyaan ratna hain, jiska bahut nasha rehna chaahiye। jismaani padhaai mein bhi register rehta hai। usmein manners bhi dikhaate hain। good, better aur best… yahaan bhi aise hai। koi to bilkul kuchh bhi jaante nahin hain। bhal bachche bane hain। baap ke paas rahe pade hain। to bhi kaeeyon se ghar mein rahne vaalon ki chalan achhi hoti hai। phir bhi service karte hain। mukhya baat hai service ki। vijay maala mein bhi vahi piroyenge, baaki to praja banenge। praja to bahut banti hai। koi bade ghar mein janmata hai to sab unko badhaaeeyaan bhejte hain। baaki duniya mein to bahut janmate rehte hain। tum to baap ke vaaris bane ho। to us behad ke baap ka janma-din to manaana chaahiye। dhoomdhaam se trimooti shiv jayanti manaani hai। kya karen jo bahuton ko maaloom pade? yeh phurna rehta hai na। kis prakaar ki service karen jo hamaare kalpa pahle vaale brahman kul bhooshan phir se aa jaaen। yuktiyaan rachi jaati hain। baap kehte hain sivaae akhbaar ke to mushkil hai। akhbaar sab taraph jaati hai। akhbaar ke 2-4 page lena pade। jab silver jubilee manaate hain to akhbaar mein 2-4 page le lete hain। ab woh to common paai paise ki silver jubilee manaate hain। tumhaari yeh golden jubilee sabse nyaari hai। hamesha golden, silver jubilee manaate hain, copper iron jubilee nahin manaate। 50 varsha hote hain to unko golden jubilee kaha jaata hai। ab tumko baap ki jayanti manaani hai, jo sabko maaloom pade। akhbaar mein do page daalen to koi harja nahin hai। bahuton ko pata padna chaahiye। samay naazuk aata jaata hai। nahin to phir deri pad jaayegi। ab shiv jayanti ke liye pahle se hi taiyaari karni chaahiye। akhbaar ke do page leve jismen trimooti jhaad aur aajkal ki points likhi jaayen। ganga snaan se sadgati nahin hoti hai। jaise 4 page vaala literature hai, vaise aage peechhe bhi daala jaae। utarti kala aur chadhti kala vaala chitra aur jo mukhya chitra hain। vichaar karna chaahiye kaun-kaun se mukhya chitra hain? jisse manushya samajh jaayen ki barobar durgati hui hai। baba bachchon ka dhyaan khinchavaate hain, vichaar saagar manthan karna chaahiye। is baat par bahut thode bachche hain jinka khyaal chalta hai। 4-5 hajaar kharcha hoga, harja nahin। dher bachche hain, boond-boond talaav ho jaayega। tumko maaloom hai aagaakhaan ko bhi heeron mein vajan kiya। woh to kuchh bhi nahin। yeh to kalyaankaari baap hai, woh to sab paise jaate hain vikaaron mein। tum bachchon ko in vikaaron se chhudaaya jaata hai। manushya se devta banaaya jaata hai। tumhaare mein na kaam ki hinsa, na krodh ki hinsa hai। to akhbaaron mein 4-5 page zaroor lene chaahiye jo bhi serviceable bachche hain, samajhte hain ham service kar rahe hain। pradarshani, projector ke liye chitra bana rahe hain, jinki buddhi chalti hai unhon ke liye baba samjha rahe hain। baap kehte hain himmate bachche madde baap baitha hai। jo buddhivaan padhe likhe bachche hain woh jhat akhbaar ke liye matter likhkar taiyaar karenge। akhbaar mein koi cheez daali jaati hai to unhon ko drishti bhi deni hai। abhi shivjayanti mein do adhaai maas hain। tum bahut kaam kar sakte ho। do-chaar akhbaaron mein daalna chaahiye - hindi aur angreji mukhya hain। in donon mein chhap jaae। shivjayanti is reeti manaana theek hoga। saari duniya ke baap ka birth de hai, yeh sabko maaloom pad jaae। akhbaaren to door tak jaati hain। sensible editor jo hote hain, dharmi khyaalaat vaale hote hain woh paise nahin lete hain। yeh to sabke kalyaan ke liye hai। karke thoda kharcha hoga। himmate bachche madde baap। aise-aise khyaalaat chalne chaahiye। manushya yeh nahin jaante kalyaan, akalyaan kisko kaha jaata hai। kalyaan ki mat kaun de sakta hai? kuchh bhi samajhte nahin hain। tum bachche jaante ho। tumhaare mein bhi bahut thode hain jo vijay maala mein aayenge। baaki praja banenge। yeh hai raajayog, raajaai praapta karne ka। padhaai va yog mein susti karne se raajaai nahin praapta kar sakenge। limit hai - itne raajaayen banne hain। jaasti ban na saken। jo achhi khyaalaat vaale honge unka jhat pata lag jaayega ki yeh raajaai kul mein aa sakta hai va nahin। to ab centres par raay nikaalte hain। bade-bade dukaan baba ke bahut hain। sab centres (dukaan) ek jaise to chal na saken। koi manager achha hota hai to dukaan ko achha chalaate hain। koi par grahchaari baith jaati hai to achhe-achhe bhi fail ho padte hain। baap kehte hain ab din najdeek aate jaate hain। ladaai ki taiyaariyaan bhi hoti jaati hain। aapdaayen bhi aani hain। bahut thoda samay hai, yog lagaane mein badi mehnat hai। yog se hi vikarma vinaash karne hain। agar yog mein rah golden ej tak nahin pahunche to royal gharaane mein aa na sake। praja mein chale jaayenge। achhe purushaarthi jo honge woh kabhi nahin kahenge ki jo takdeer mein hoga। drama anusaar aise-aise khyaalaat vaale praja mein jaae naukar banenge। pad ooncha paana hai to advertise karni pade। nahin to ulhana denge, isliye akhbaar mein daalte hain। apna chitra aur mukhya-mukhya baaten likhni hain। trimooti gola bhi daalna hai। utarti kala, chadhti kala vaala chitra bhi daalna hai। bhaarat di heaven, bhaarat di hell। heaven mein kitna samay rehte, hell mein kitna samay rehte। ab baba direction de rahe hain। agar koi murli miss kar den to direction ka pata nahin padega। madadgaar ban nahin sakenge।

baba poochhte rehte hain yeh matter taiyaar kiya? sensible bachchon ki jahaan tahaan mahima hoti hai। koi-koi bahut tang karte hain। deh-abhimaani ban jaate hain। centre ke head bane, deh-abhimaan aaya to yeh mara। baap ko kabhi ahankaar aa na sake। baba kehte hain ham obedient servant hain। dekho yahaan bahut bade-bade aadmi aate hain। dekhte hain bartan haath se maanjate hain to khud bhi maanjane lag padte hain। parantu koi-koi ko deh-ahankaar aa jaata hai। thaali katora nahin saaph kar sakte। aise deh-abhimaan vaale gir padte hain। apna akalyaan kar baithte hain। baba thode hi kabhi service lete hain। shivbaaba ko to shareer hi nahin hai jo service leve। woh to service karte hain। baba dehi-abhimaani banna sikhlaate hain। maa-baap ko bachche kabhi allow nahin karenge ki bartan maanjen। parantu maa-baap se rees nahin karni chaahiye। pahle maa-baap jaisa banna chaahiye। padhte tumhaare saath woh bhi hain parantu kaayde anusaar saakshaatkaar hota jaata hai ki pahle number mein yeh paas hote hain। service ka shauk bahut rakhna hai। ghar-ghar mein geeta paathshaala kholni hai to vriddhi hoti jaayegi। likh dena chaahiye aao to tumko apne paarlaukik baap ka parichay den। behad ke baap se behad ka varsa kaise milta hai, woh aakar samjho। ek second mein jeevanmukti kaise mil sakti hai। koi aisa buddhivaan hai nahin jo samajh sake। tumhaare mein bhi haddi gyaan bahut thodon mein hai, jinko gyaan ka nasha chadha hua hai woh apni raay nikaalte rehte hain। slogan ki samjhaani bhi likhni pade। dehli baambe mein bahut samjhu bachche hain, jinko bahuton ka parichay hai, woh yeh kaam kar sakte hain। editors ko samjhaana chaahiye। unhon ke haath mein bahut hota hai। half daam mein deven, quarter mein deven। religious baaten free mein bhi daal sakte hain। baba raay dete hain - is shiv jayanti ko bahut dhoomdhaam se manaaya jaae, aisi prerna aai hai। kharche ka harja nahin। chitra chhapaao। rangeen weekly chhoti hoti hai, ismen chitra bade clear chaahiye। baba serviceable bachchon ko raay dete hain aur serviceable bachche hi respond karenge। idea likhenge, matter taiyaar karenge। alag matter chhapaakar bhi akhbaar ke saath bhej sakte hain। woh bhi akhbaar vaalon se prabandha kara sakte hain। akhbaar ke andar parcha daal denge। aage aise alag kaagaj chhapaakar doosron ki advertise ka akhbaar mein daal dete the, abhi shaayad band kar diya hai। parantu purushaartha karne se ho sakta hai। nahin to sabko maaloom kaise pade - trimooti shiv jayanti ka। pradarshani bhi 7 roz chalti। shivjayanti ka to ek din hai, woh dhoomdhaam se manaana hai। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) baap ka madadgaar ban, sabhi ko baap ka parichay dene ki yukti rachni hai। vichaar saagar manthan karna hai। gyaan ke nashe mein rehna hai।

2) deh-anhakaar chhod dehi-abhimaani banna hai। apni seva doosron se nahin leni hai। maa-baap se rees nahin karni hai। unke samaan banna hai।

vardaan:- sneh ki shakti dvaara mehnat se mukta hone vaale parmaatma snehi bhav

sneh ki shakti mehnat ko sahaj kar deti hai, jahaan mohabbat hai vahaan mehnat nahin hoti। mehnat manoranjan ban jaati hai। bhinna-bhinna bandhanon mein bandhi hui aatmaayen mehnat karti hain lekin parmaatma snehi aatmaayen sahaj hi mehnat se mukta ho jaati hain। yeh sneh ka vardaan sada smriti mein rahe to kitni bhi badi paristhiti ho, pyaar se, sneh se paristhiti roopi pahaad bhi parivartan ho paani ke samaan halka ban jaata hai।

slogan:- sada nirvighna rehna aur doosron ko nirvighna banaana - yahi yathaartha seva hai।