Murli du jour du samedi 8 avril 2023

08-04-2023 praatahmurli om shanti "baapdaada"' madhuban

“meethe bachche - kisi bhi kaaran se kul kalankit nahin banna hai, dharat pariye dharma na chhodiye, baap se kiya hua vachan sada yaad rahe''

prashn:- bachchon ko kaun-si khabardaari har qadam par rakhna bahut zaroori hai?

uttar:- eeshvar ke saamne jo vachan liya hai, vaayda va pratigya ki hai woh kisi bhi haalat mein nibhaana hai। yeh khabardaari rakhna bahut zaroori hai। kabhi bhi baap ka banne ke baad keechak ban ulte karma nahin karna। agar ulta karma kiya to dharmaraaj poora-poora hisaab lenge। manmat va parmat par nahin chalna, har kadam par shreemat yaad rahe।

geet:- tumheen ho maata, pita tumheen ho…

om shanti। shiv bhagvaanuvaach apne bachchon saaligraamon prati। saaligraam aatma ko kaha jaata hai। bachche jaante hain hamaara parampita paramatma hai, jiska naam niraakaar shiv hi hai। vyaapaari log shiv dot (bindu) ko kehte hain। baba ne samjhaaya hai aatma bhi dot (bindu) hai, jo bhrikuti ke beech mein rehti hai। chamakta hai ajab sitaara। yeh aatma ki baat hai। yeh to pahle nishchay karna hai। barobar hamaara niraakaar baba shiv hamko padhaate hain। hamaara baap shiv hai। aham aatma hain। roodra kahen to bhi niraakaar hai। sirf naam alag hai, cheez ek hi hai। woh hai parampita param aatma, pare te pare rahne vaala manushya srishti ka beejroop। sarva aatmaon ka baap। yeh niraakaar aatma bolti hai saakaar shareer se। tum bachche sammukh baithe ho to nasha chadhta hai ki barobar shivbaaba hamko padhaate hain। baba ka apna shareer nahin hai। baaki har ek aatma ke shareer ka naam apna-apna hai। paramatma ka ek hi naam hai। to baap samjhaate hain main niraakaar shiv hoon। main tum bachchon ke muaaphik manushya srishti par punarjanma lene liye shareer nahin dhaaran karta hoon। tum sab saakaari ho, main saakaari sirf abhi hi banta hoon। abhi hi sirf pravesh kar padhaata hoon, inki aatma aur tumhaari aatma sunti hai। yeh achhi reeti dhaaran ho tab baap ke saath lav ho। parantu shakla dikhaati hai ki itna lav kiska hai nahin। baba kehte hi mukhda khil jaana chaahiye। jaise kanya pati ke saath milti hai, jevar aadi pahanti hai to mukhda khil jaata hai। tum bachchon ko gyaan shrringaar karaaya jaata hai, to khushi ka paara chadh jaana chaahiye। baba tumhein koi saakaar roop mein nahin phansaate hain। aur sab to deh-abhimaani, apne saakaar tan mein hi phansaate rehte hain। yeh to baap kehte hain mujh niraakaar baap ko yaad karo। he laadle bachche, he aatmaayen, main param aatma is brahma tan se tum bachchon ko padhaata hoon। nahin to kaise padhaaoon। paavan banaane liye zaroor shareer chaahiye। yeh drama mein noondh hai। shareer bigar to main aa nahin sakta hoon। jaise braahmanon ko khilaate hain to aatma ko bulaate hain। brahman ko kuchh hota thode hi hai। aatma bolti hai, samaachaar sunaati hai। woh bhi hota hai drama anusaar। drama mein noondh hai, so sunaaya। usko pitra kaha jaata hai। soul ko pitra kaha jaata hai, jo ek shareer chhod jaae doosra leti hai। ab tum bachche jaante ho baba hai gyaan-saagar। paani ke saagar ki koi baat nahin।

manushya to deh-abhimaan mein aate-aate kitne kaale ban gaye hain। ab phir tum dehi-abhimaani ban gore bante ho। aatma pure banti jaati hai। jitna tum baba ko yaad karenge to is yog se tumhaare vikarma dagdha honge। paap naash honge। tum jaante ho mama baba kitni mehnat karte honge to bhi karmabhog to chuktu karna padta hai। janma-janmaantar ka bojha sir par raha hua hai। woh ant mein hisaab-kitaab chuktu hona hai nambarvaar purushaartha anusaar। bachchon ko pata hai roodra maala hai na। 8 ki bhi maala hai, 108 aur 16108 ki bhi maala hai। praja to anginat hai। hai to roodra maala hi na। saari duniya mein jo bhi aatmaayen hain sab roodra maala hai। baap ke sab bachche hain। saara sijra banta hai na। manushya bahut bada sijra rakhte hain phir woh surname pad jaata hai। yeh hai shri shri shivbaaba ki maala। baap kehte hain bachche dehi-abhimaani bankar baap ko poora yaad karna hai। tum apne ko aatma samajh baap ko yaad karenge to tumhaare vikarma dagdha honge। nahin to bahut dande khaane padenge।

baap baar-baar kehte hain bachche bhoolo mat, parantu phir bhi maaya bhula deti hai। baap kehte hain bachche apne paas chart rakho - kitna samay ham shivbaaba ko yaad karte hain। ek ghadi yaad karna shuru karo phir practice padti jaayegi। aisi avastha jamaao jo ant mein baba ki yaad rahe। aisi yaad mein rahne vaale hi vijay maala ke 8 ratna bante hain, mehnat chaahiye। jitna jo karenge so paayenge। sannyaasi log to gharbaar chhod jaate hain phir mahlon mein aakar baithte hain। vaastav mein yeh law nahin hai। tumko to vahaan athaah sukh milta hai। baap gale lagaakar puchkaar karte hain - meethe bachche, tum chaahte ho ham saahookaar te saahookaar banen to aisa purushaartha karo bhavishya ke liye। baaki yahaan ki saahookaari to mitti mein mil jaani hai। kiski dabi rahi dhool mein.. accident hote aag lagti rehti hai। aeroplane girte hain to chor log jhat loot-maar kar saamaan chori kar bhaag jaate hain। so abhi to yeh bombs aadi bane hain, isse to dher ke dher marenge। yeh abhi ki baaten phir gaai hui hain। jo bhi lakhapti aadi hain sab khatma ho jaayenge। America kitna saahookaar hai। is mrityulok mein America jaise svarga hai। parantu roonya ke paani misal (mrigtrishna samaan) hai। yeh tum jaante ho woh khud bhi samajhte hain maut to beshak saamne khada hai। zaroor bhagwan bhi hoga na। parampita paramatma aate hi hain sthaapna aur vinaash ka karma karaane। karan-karaavanhaar hai na। brahma dvaara sthaapna.. ab tum baithe ho na। bachche hi brahman kahlaate hain। tum daade se varsa lete ho। shreemat shreshtha gaai hui hai to us par chalna hai। devta banna hai। baap kehte hain is samay har ek duryodhan aur dropdi hai। ek katha mein hai dropdi kiske ghar mein rahi to keechak unke pichhaadi pade। dropdiyaan to vaastav mein sab thahri। kumaari athva maata sab dropdiyaan hain। kanyaayen service par jaati hain to keechak pichhaadi mein padte hain। phir likha hai bheem ne keechak ko maara। keechak maana ekdam gande, jo pichhaadi padte hain। to dropdiyon ko baap aakar nangan hone se bachaate hain। kanyaaon ki to bahut sambhaal karni padti hai। keechak aadi ki abhi ki baat hai, unse bahut sambhaal karte rehna hai। agar baap ke paas aaye aur phir keechak bane to pata nahin dharmaraaj kya haal kar denge। woh in bachchon ko saakshaatkaar karaaya hua hai। bahut sajaayen khaate the। phir baba se poochha tha, baba ne kaha saakshaatkaar karaayenge to zaroor sahan karna padega। inka hisaab-kitaab unke paapon se kat jaayega। baba rakhta to kiska bhi nahin hai। to baap samjhaate hain - keechak athva duryodhan nahin bano। kans, jaraasandhi, shishupaal aadi kitne naam pade hue hain। kans arthaat jo vikaari hote hain। kanyaaon ko bahut sataate hain।

ab tum baap ke bachche brahman bane ho, devta banne liye। to brahman kul ko kalank nahin lagaana hai। kalank lagaayenge to kul kalankit ban jaayenge। kul kalankit ka to kabhi mukh bhi nahin dekhna chaahiye। un jaisa paap aatma duniya mein koi hota nahin। to yahaan behad ka baap jo aakar svarga ka maalik banaate hain, unko bhi talaak de dete hain। unko ajaamil paapi kaha jaata hai। parantu ajaamil jaise paapiyon ka bhi uddhaar to hona hi hai। sajaayen khaakar bahut peedit hote hain। aatmaon ko bada duhkh hota hai। parampita paramatma behad ke baap ko phaarakti de dete hain। in jaisa paap aatma is duniya mein koi hota nahin। duniya to bahut gandi hai। badi khabardaari rakhni hai। pahle-pahle jab bhatthi mein rahe to kitni maat-pita ko sambhaal karni padi। maaya badi jabardasta hai isliye baba kehte hain bachche itni taakat hai jo pavitra rah baap se varsa lo? buddhi kehti hai - jab ham bachche bane hain to bachche bankar baap ka naam badnaam thode hi karenge। baap kehte hain main aakar tum bachchon ko paavan banaane ki kitni mehnat karta hoon। patit duniya, patit shareer mein aata hoon। phir bhi kalank lagaaya to yaad rakhna bahut kadi sajaayen khaani padengi। yahaan to praapti bahut hai। svarga ka maalik bante ho। lekin chalte-chalte baap ka haath chhoda to ekdam mitti mein mil jaayenge। sammukh rahne vaalon ko bhi maaya naak se pakad leti hai, iseelie bahut khabardaar rehna hai। baap ka bankar pratigya kar aur phir pavitra na rahe to bhi bahut kadi saza khaani padegi। eeshvar ke saath vachan kar (pratigya karke) poora nibhaana hai। eeshvar saath vachan athva pratigya karna yeh baat abhi hi hoti hai। shivbaaba kehte hain pratigya karo ham pavitra ban bhaarat ko svarga banaayenge। agar pratigya todi to khalaas। dharat pariye dharma na chhodiye। mar jaao to bhi yeh pratigya nahin todna। jabaan karke phir badal jaate hain na। abhi tum jabaan karte ho parampita paramatma ke saath। agar jabaan kar badal gaye to dharmaraaj dvaara danda bahut khaana padega। phal dene vaala to baap hai na। daan-punya ka bhi phal dilaate hain, to paap ki saja bhi dilaate hain। karnakraavanhaar hai to tumko bada khabardaar rehna hai। yahaan to sammukh baithe ho। baahar mein to hans ko bagulon ke saath rehna padta hai। baap kehte hain grihastha vyavhaar mein rehte kaake, maame, chaache ko dekhte ek baap ko hi yaad karna hai। yeh koi woh common satsang nahin hai, jahaan dher aakar ikatthe ho। woh Christian log to ek hi baar lecture mein kitne Christian bana lete hain। yahaan aise nahin ho sakta। yahaan to jeete ji marna padta hai। shreemat par chalna padta hai। deh-abhimaan chhod apne ko aatma samajhna hai। aatma-paramatma alag rahe bahukaal... ab jabki woh satguru mila hai dalaal ke roop mein। kehte hain mujh baap ko yaad karo to tumhaara beda paar ho sakta hai। haath chhoda to khatma। mahaan paap-aatma ban jaate hain। aise mahaan paapaatma bhi dekhne ho to yahaan dekho। baap kehte hain tum bachche aise patit nahin banna। punya aatma banna। paapon se bachenge tab jab yog mein rahenge। boxing mein khabardaari chaahiye। nahin to maaya kabhi peeth par ghoonsa maar degi। maaya par jeet paana maasi ka ghar nahin hai। yeh hai satopradhaan sannyaas। tum bachchon ko bahut sambhaal rakhni hai। doosri mat par chala yeh mara। baba ko likhte hain - baba, maaya ko kaho ham par kshama kare। baba kehte - nahin, abhi to maaya ko ham order karte hain ki khoob toofaan machaao। duhkh ke, vikarmon ke ekdam pahaad giraao। achhi tarah naak se pakadkar phathkaao। dekho, svarga ke laayak hai? aise thode hi kahenge kripa karo, aasheervaad karo। school mein teacher kis par bhi kripa karte hain kya? unhein to padhna hai। yeh knowledge hai, andhashraddha ki koi baat nahin। yeh koi common satsang nahin hai। yeh hai eeshvareey satsang। achha!

maat-pita baapdaada ka meethe-meethe sikeeldhe bachchon prati nambarvaar purushaartha anusaar yaadapyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) baap se jo pratigya ki hai us par kaayam rehna hai। kabhi bhi jabaan de badalna nahin hai। bahut-bahut khabardaar rehna hai।

2) apna aur doosron ka gyaan shrringaar karna hai। kabhi bhi deh-abhimaani ban saakaar shareer mein na phansana hai, na kisi ko phansaana hai।

vardaan:- har aatma ko second mein mukti-jeevanmukti ka adhikaar dilaane vaale master satguru bhav

abhi tak master daata va master shikshak ka part baja rahe ho। lekin abhi satguru ke bachche ban gati aur sadgati ke vardaata ka part bajaana hai। master satguru arthaat sampoorn follow karne vaale। satguru ke vachan par sada sampoorn reeti chalne vaale। aise master satguru hi second mein nazar se nihaal karne arthaat mukti jeevanmukti ka adhikaar dilaane ki seva kar sakte hain।

slogan:- aagyaakaari bano to baapdaada ke dil ki duaayen praapta hoti rahengi।