Murli du jour du mardi 29 août 2023

29-08-2023 praatahmurli om shanti "baapdaada"' madhuban

“meethe bachche - shreemat par gyaan ka chandan ghisna va pavitra banna hi svaraajya lena hai, tum pavitrata ki pratigya karo to sooryavanshi gharaane ka tilak milega''

prashn:- tum bachchon ko raakhi kaun baandhata hai, tilak kaun deta hai aur mukh meetha karaane ki rasma kyon hai?

uttar:- tumhein badi mummy (brahma maa) raakhi baandhati hai, pavitra banaati hai, jab tum pavitra banne ki pratigya kar lete ho to baap svaraajya ka teeka dete hain। mukh meetha karaana arthaat sarva vardaan de dena। baap ne svaraajya ke tilak ke saath-saath sarva vardaan bhi diye hain, isi ki rasma yaadgaar mein chali aai hai।

geet:- idhar muhabbat udhar jamaana…

om shanti। bhagvaanuvaach। achha, bhagwan ka naam chaahiye kyonki bhagwan ka ek hi naam hota hai। manushyon ke to anek naam padte hain। jaisa shareer dhaaran karte jaate, naam badalta jaata hai। shareer to zaroor sabko hai aur janma-maran mein bhi aate hain। to anek naam padte hain। muhabbat bhi bahuton se hoti hai। chaacha, maama, kaaka, guru-gosaai aadi dher se muhabbat hoti hai। kitne sambandhi hain! ab yeh sambandh to hai ek। woh anek sambandh to neeche le jaate hain, giraate hi rehte hain। yeh ek hi sambandh oonch te oonch hai। yeh oonch hi le jaate hain। abhi tum jeev aatmaon ki muhabbat lagi hai parampita paramatma se। woh tumko bahut oonch le jaate hain। woh hai hi paramdham mein rahne vaala। yeh to nishchay hai na? agar kahen pata nahin, to tum aaye kahaan se? oopar se hi yahaan aaye ho na। tum bhi asal mein oonch te oonch paramdham, mool vatan mein rahne vaale ho, beech mein hai sookshm vatan aur yeh hai sthool vatan। barobar tum vahaan se aaye ho। bhinna-bhinna naam-roop lete ho। ab 84 janma poore kiye, ab phir vaapis jaana hai। ab tumhaari muhabbat baap se hai। jaante ho ham maat-pita ke sammukh baithe hain। yeh bhi jaante ho pahle-pahle hamko pavitrata ki raakhi baandhate hain। baap kehte hain - he bachche, is kaam mahaashatru ko jeeto va maaya raavan par jeet paao, iske liye purushaartha karna hai। andhashraddha ki baat nahin। zaroor baap ko hi yaad karna pade। baap kehte hain main brahma dvaara tumko raakhi baandhata hoon। isko kaha jaata hai raakhi baandhane ka utsav, pavitrata ki pratigya karne ka utsav। phir kya hoga? main svaraajya paane ka teeka doonga। yeh baap tumhaare sammukh baithe hain। tum jaante ho pavitrata ke liye hi takleeph sahan karte hain। tumhaare mitra-sambandhi aadi sab dushman ban padte hain। baap tumhein direct kehte hain - bachche, pavitra bano। behad ka baap shiv-baba aakar tumko sachcha svaraajya dete hain। aatmaon ko raajaai milti hai। abhi aatmaon ko gadaai hai।

raakhi parva ko raakhi utsav nahin kahenge। utsav mein to bahut shaadmaana karte hain। is pavitrata ki raakhi baandhane mein koi kharche aadi ki baat nahin। baap khud kehte hain - bachche, mere se pratigya karo phir tum svaraajya paayenge। svaraajya ka teeka khud baith dete hain। bachchon ko baba ne saakshaatkaar bhi karaaya tha - vahaan kaise baap hi bachchon ko tilak dekar apne takhta par bithaate hain। to jo sooryavanshi banenge vahi gaddi par baithenge। maa-baap hi bachche ko raajya-bhaagya dete hain। samajhte hain bachcha hi gaddi-nasheen hoga। yeh baap bhi khud aakar tum aatmaon ko gyaan-amrit se saaph karte hain। gyaan-amrit koi jal nahin hai। baap kehte hain tumne 63 janma vishay saagar mein gote khaaye hain। sikeeldhe bachche, ab tumhaare 84 janma poore hue, ab yeh antim janma tum pavitra bano। meri mat par chalo। tum svaraajya paane ke liye baap ke paas aaye ho na। raaja ke paas bachcha aata hai, samajhta hai main raajaai paaoonga। parantu usko koi svaraajya nahin kaha jaata। sva maana aatma। to aatma ko raajya milta hai। parantu gyaan nahin hai ki ham aatma ne prince ka shareer dhaaran kiya hai mahaaraaja-mahaaraani banne ke liye। teeke ka bhi utsav gaaya jaata hai। bachche gyaan chandan ghisen, pavitra banen, shreemat par chalen to baap teeka lagaayenge। baap khud to raajya nahin lete hain, khud gaddi par nahin baithte hain। aisa baap kabhi dekha, jo bachchon ko gaddi par bithaate hain, khud nahin baithte?

yeh brahma bhi purushaarthi hai। shivbaaba hai purushaartha karaane vaala। yeh apni badaai kuchh bhi nahin karte hain। shivbaaba aakar inko bhi heere jaisa banaate hain। to mukhya baat hai pavitra rehna। bhal ghar mein ikatthe rehte ho lekin pavitra raho। baap ne yeh roodra gyaan yagya racha hai। yagya hamesha braahmanon dvaara racha jaata hai। shreekrishna kahe ki main yagya rachta hoon, yeh ho nahin sakta। tum ho brahman, brahma ke mukh vanshaavli। tum shreemat par chal rahe ho। brahma ko shri nahin kah sakte hain। yahaan to aatma aur shareer donon patit hain। tum shri ban rahe ho। abhi tumko shri nahin kahenge। abhi tum shreshtha ban rahe ho। oonche te oonch baap hi aakar tumko shreshtha banaate hain, lakshmi-naaraayan jaisa। aisa shreshtha 16 kala sampoorn tumko banna hai। baap poochhte hain tumko lakshmi-naaraayan banne ka nasha hai ya raam-seeta ka nasha hai? kahenge lakshmi-naaraayan ka nasha hai। ham to sooryavanshi banenge। do kala kam ham chandravanshi kyon banen? ham to naaraayan ko athva lakshmi ko varenge। tumhaare mama aur baba bhi sooryavanshi banenge। jagat amba aur jagat pita donon sooryavanshi bante hain to tum unke bachche jo baba-mama kehte ho tumko bhi purushaartha karna chaahiye। baba teeka bhi lagaate hain aur mukh bhi meetha karaate hain arthaat tumko vardaan dete hain na। vijay ka teeka lagaakar vardaan dete hain ki tum sada aisa svaraajya paayenge। yatha raaja-raani tatha praja raajya-bhaagya bhogte hain। parampita paramatma dvaara ek hi baar raajya sthaapan hota hai। yeh hai almighty authority raajya। viceless duniya bhi gaai hui hai। sarvagun sampanna, 16 kala sampoorn, maryaada purushottam devtaayen kabhi kaam kataari se hinsa nahin karte hain। 63 janma to tum ek-do par kaam kataari chalaate aaye ho। amarlok mein kaam kataari nahin hoti। yahaan kaam kataari se tum patit hote-hote tamopradhaan ban pade ho।

abhi tum bachche samajhte ho - barobar, baap svarga ki sthaapna karte hain। bhaarat mein hi janma lete hain। baap ne vaikuntha ki saugaat laai hai। aadhaakalpa radiyaan maari hai - O god father, raham karo, mehar karo। bhakti maarga mein gaate hain na। satayug mein thode hi radiyaan maarenge। vahaan to sadaiv sukh hai। duhkh mein simran sab kare, sukh mein kare na koi। anek prakaar ke duhkh hote hain na। devaala maarte hain to kitna duhkh hota hai। beemaari aadi hoti hai to duhkh hota hai na। svarga mein duhkh ka naam-nishaan nahin। baap aakar tum bachchon ko raajya-bhaagya ka teeka dete hain। yeh hai duhkhadhaam, woh hai sukhdhaam। shantidham mein to aatma kuchh bolti nahin hai। yahaan phir talkie banti hai। tumhaara svadharma hi hai shanti। abhi tumko sukh-shanti ka svaraajya milta hai। to baap ka bachcha bankar unki shreemat par chalna chaahiye। padhaai ke samay saara attention padhaai mein dena hota hai। padhaai ke samay aur vyartha baaton ka varnan nahin chalta। agar koi ulta-sulta bolte hain to kahenge - attention please। to baap bachchon ko kehte hain tumhaari buddhi bhatakni nahin chaahiye। baahar dhakke khaane vaalon ke khyaalaat idhar-udhar daudte rahenge। samjhenge kahaan chhutti ho to ghar jaayen। ab tum bachchon ko padhna aur padhaana hai। braahmanon ka dhandha hi hai geeta sunaana। woh brahman bhi geeta sunaate hain, shareer nirvaah bhi karte hain। tumko bhi aise kaha jaata hai grihastha vyavhaar mein kamal phool samaan pavitra rehna hai। pratigya karni hai - yeh antim janma pavitra rahenge। yeh apvitra duniya vinaash honi hai। vinaash ki taiyaari bhi dekh rahe ho। holika jalegi। vaastav mein yeh sab utsav is samay ke hain। baap tumko tilak dete hain। tumhaari buddhi kehti hai - baba hamko satayug ka, vishwa ka maalik banaane ke liye padhaate hain athva svaraajya ka tum tilak paate ho। baap hi tilak dete hain। yahaan to tum sammukh baithe ho। raajya-bhaagya woh lenge jo pavitra rahenge। raakhi ka mahatva bada bhaari hai। kehte hain - behen bhaai ko teeka lagaakar raakhi baandhati hain। to bahnen tum bhaaiyon ko tilak lagaayengi, raakhi baandhengi aur mukh meetha karaayengi। yeh utsav kahaan se shuru hua? sangamayug se, jabki parampita paramatma pavitra rahne ki pratigya karaate hain। shivraatri ka bhi utsav hai, phir raakhi ka utsav, phir hai dashahra, phir deepaavli ka utsav, navraatri ka utsav - yeh sab utsav chalte aaye hain। tumko to khushi hoti hai। dashahra arthaat vinaash ke baad phir deepaavli aayegi। ghar-ghar mein svarga hoga।

tum shivbaaba ki, brahma-vishnu-shankar ki, lakshmi-naaraayan, raam-seeta aadi sabki jeevan kahaani bata sakte ho। saare chakra ko tum jaante ho। baaki 8-10 bhujaayen to koi ko ho nahin sakti। manushyon ne kitne chitra baithkar banaaye hain, isko kaha jaata hai vesta oph time, vesta oph mani, vesta oph energy। abhi tum jaante ho - ham aaye hain svaraajya ka varsa lene। ham shreemat par kyon nahin chalenge, jaise maat-pita chal rahe hain। yeh to samajhne ki baat hai। baap hai manushya srishti ka rachayita। behad ka baap hai na। kitne bachche adopt karte hain। prajaapita hai na। woh laukik baap to karke ek bachche ko god mein lete hain। unko prajaapita to nahin kahenge na। kai aise bhi hote hain, adopt karte hain phir bachcha ho jaata hai to us bachche par jaasti pyaar ho jaata hai। god mein liye hue bachche ko phir kam pyaar karte hain। ab tum to samajhte ho ham eeshvareey god mein jaate hain। eeshvar hamko teeka lagaayenge - pavitrata ka। tum dil andar pratigya karte ho - baba, aap aaye ho, ham aapka sapoot bachcha ban, pavitra ban aapse varsa lenge।

abhi sabki kayaamat ka samay hai। paapon ka hisaab-kitaab chuktu kar punya ka jama karna hai। baap ki yaad se hi jama hota hai। jitna yaad karte jaayenge aur avinaashi gyaan-ratnon ka daan karte jaayenge to khaata jama hoga। jitna service karenge utna jama hoga। jama hote-hote raajdhaani ban jaayegi। 8 hain mukhya ratna। 8 ratna ka jevar bhi banaate hain na। deviyon ke saath devtaayen bhi honge na। parantu majority maataaon ki hone ke kaaran adhiktar deviyon ki pooja hoti hai। achha, raakhi kaun baandhate hain? shivbaaba khud tumhaare sammukh baithe hain। to shivbaaba raakhi bhi baandhenge, tilak bhi denge, mukh bhi meetha karaayenge। iska matlab tum bhavishya mein sada sukhi rahenge। tum phir baba ko saugaat dete ho na। kya saugaat dete ho? apna sab kuchh। to baba kehte hain - main phir tumko 21 janma ka varsa deta hoon, len-den ka hisaab hai na। baba saudaagar hai। lete kya hain aur dete kya hai? kehte hain eeshvar arth daan diya kyonki jaante hain eeshvar bhaada dega। baap kehte hain bhakti maarga mein bhi main tumko bhaada deta hoon। abhi phir direct aaya hoon। tumko kitna avinaashi ratnon ka daan deta hoon। tum bhi phir auron ko daan karte ho। tum to sab bhaai-bhaai ho, tumko phir yeh badi mummy raakhi baandhati hai। baap tilak lagaate hain। yeh maat-pita donon ikatthe hain। maa raakhi baandhe, baap tilak de to tum raaja-raani ban jaayenge। tumhaari muhabbat paramatma se hai, jo bhaaratvaasiyon ko tilak dene aaya hai। bhaarat ko svarga kisne banaaya? baap aaya hai na। shreekrishna to hai rachna number one aur shivbaaba hai rachayita number one। to tum bachchon ko khushi ka paara naakhoon se choti tak rehna chaahiye। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) dil ki muhabbat ek baap se rakhni hai, dehdhaariyon se nahin kyonki sarva sambandhi ek baap hai।

2) padhaai ke samay apna full attention padhaai mein dena hai, vyartha baaton ka varnan-chintan nahin karna hai। buddhi ko bhatkaana nahin hai।

vardaan:- asoch ban, baap ki shakti madad ke rup mein anubhav karne vaale chintaamukta bhav

kai bachche sochte hain - seva kaise badhegi, achhe-achhe jigyaasu pata nahin kab aayenge, kab tak seva ki bhaag-daud karni padegi। lekin sochne se seva nahin badhti। asoch ban buddhi ko free rakho to baap ki shakti madad ke roop mein anubhav karenge aur seva ki vriddhi svatah hogi। baba karaavanhaar hai aur karne ke nimitta main aatma hoon - isko kehte hain asoch arthaat ek ki yaad। unhein koi chinta ho nahin sakti। jahaan shubhchintan hai vahaan koi chinta nahin।

slogan:- apni upraam sthiti dvaara sarva baaton se kinaara kar lo to ek baap ke sahaare ka anubhav hoga।