Murli du jour du mercredi 30 août 2023

30-08-2023 praatahmurli om shanti "baapdaada"' madhuban

“meethe bachche - pavitra rahne ki kasam lena hi sachcha rakshaabandhan hai, baap kalpa mein ek hi baar yeh raakhi tum bachchon ko baandhate hain''

prashn:- pavitrata ki pratigya karne vaalon ko bhi yog mein rahne ka ishaara kyon milta hai?

uttar:- kyonki yog ki shakti se hi vaayumandal ko shant bana sakte ho। saari duniya ko shanti ka varsa dene ka upaay hi yog hai। tum baap ko yaad karte ho - vishwa mein shanti phailaane ke liye। jitna baap ko yaad karenge utna maaya ka asar nahin hoga। baap ka yahi farmaan hai - bachche, ashareeri bhav।

geet:- bhaiya mere raakhi ke bandhan ko nibhaana…

om shanti। behad ke baap ka bachchon prati farmaan hai ki ashareeri hokar raho arthaat apne ko aatma nishchay kar in karmendriyon se apne ko alag samjho। yeh shareer depend karta hi hai aatma ke oopar। aatma alag ho jaati hai to shareer koi kaam ki cheez nahin rehta, jisko phir jalaaya jaata hai। jab aatma nikal jaati hai to jaise murda, kichda ho jaata। kichda hota hai to kehte hain ki is kichde ko jala do। aatma bigar yeh shareer kaam ka nahin hai। to aham aatma immortal hai। yeh shareer jo part bajaane liye milta hai, yeh vinaashi hai। aatma nikal jaati hai to yeh shareer koi kaam ka nahin rehta। badbu ho jaati hai। shareer ke bigar aatma silence rehti hai। baap samjhaate hain tumhaari aatma ka svadharma hai silence। tum jaante ho ham aatma vaastav mein paramdham ki rahne vaali hain। parampita paramatma bhi vahaan rehte hain। jab koi duhkh hota hai to baap ko yaad karte hain - mujhe is duhkh se chhudaao। aatma hi sukh-duhkh mein aati hai। bahut sannyaasi aadi hain jo kehte hain aatma nirlep hai parantu nahin, aatma mein hi khaad padti hai। sachche sone mein silver padti hai to sona 24 carat se 22 carat ban jaata hai। sachche sone mein khaad daal dete hain to jevar mulamme ka ho jaata hai। aatma hi mukhya hai। aatmaon ka baap hai parampita paramatma। vahi aakar is samay bachchon ko kehte hain ab shareer ka bhaan chhod do। main aatma hoon, baap ke paas jaata hoon। ham hain paandav। paandavon ka plan yeh hai। pahle yaadav yooropvaasi phir kaurav aur yeh hain paandav। barobar mahaabhaari ladaai lagi aur phir jayjaykaar ho gaya। yeh raajayog hai hi nai duniya svarga ke liye। paandavon ki jayjaykaar hui aur sab khalaas ho gaye। jayjaykaar hoti hi hai satayug mein।

raakhi ka tyohaar bhaaratvaasi manaate hain। raakhi baandhate hain। abhi yeh bachche jaante hain raakhi ek hi baar baandhate hain, jo phir ham 21 janma pavitra rahen। to zaroor kaliyug ant mein raakhi baandhane vaala chaahiye। raakhi kaun aakar baandhate hain? kaun pratigya karaate hain? svayan baap aur jo unke vanshaavli brahman hain। sachche-sachche brahman tum ho। brahman hi raakhi baandhate hain। behen bhaai ko baandhe - yeh bhi jhoothi banaavat hai। bujurga log jaante hain - aage brahman hi aakar dhaage ki raakhi baandhate the। woh koi aise nahin kehte ki tumko pavitra rehna hai। pavitrata ko woh jaante hi nahin। to yeh raakhi utsav zaroor sangam par hua hai। kitna varsha hua? 5 hajaar varsha। sangam par baap ne raakhi baandhi phir ham satayug-treta ant tak pavitra rahe phir bhakti maarga se yeh raakhi tyohaar shuru ho gaya। kehte hain - yeh utsav parampara se manaate aaye hain। parantu aise to hai nahin। 5 hajaar varsha mein ham ek hi baar raakhi baandhate hain। jab dvaapar se patit bante hain to varsha-varsha raakhi baandhate hain kyonki apvitra bante hain। jaise varsha-varsha raavan ko bhi jalaate hain, vaise varsha-varsha raakhi bhi baandhate hain। vaastav mein inka arth tum samajhte ho। baap aakar kehte hain - bachche, pratigya karo। raakhi baandhane se kuchh nahin hota hai। yeh to kasam uthaaya jaata hai ki - baba, ham abhi pavitra rahenge। to drama mein in utsavon ki noondh hai। satayug-treta mein raakhi baandhane ki darkaar nahin rehti। woh hai hi viceless world। is samay apni hai chadhti kala। phir to utarna hota hai। ham phir so satopradhaan devta banenge। brahman kehte hain ham abhi eeshvar ki santaan hai phir so devta bante hain। banaane vaala hai parampita paramatma। manushya se devta niraakaar parampita paramatma banaate hain। manushya nahin bana sakte। unhonne manushya ka naam daal diya hai। shreekrishna ko bhi dvaapar mein le gaye hain। tum patit se paavan kaliyug ant mein bante ho। phir satayug aana hai। agar dvaapar mein aaye to phir kaliyug ka naam gum ho jaana chaahiye। yeh wrong baat hai, jab wrong ho tab to baap aakar right banaaye na। abhi sab jhoothe hain। jhoothi maaya, jhoothi kaaya…। baap aakar bachchon ko sachcha banaate hain। satayug-treta mein kabhi jhooth bolte hi nahin। yahaan to paap karte jhooth bolte rehte hain। paap aatmaon ko punya aatma to baap hi banaayenge। jaise deepmaala par saare varsha ka hisaab-kitaab chuktu karte hain na। tumhaara phir aadhaakalpa ka jo paapon ka khaata hai woh bhasma hota hai aur punya ka khaata tum jama karte jaate ho। yahaan hi jama karenge tab 21 janma liye phal milega। baap ko yaad karne se hi vikarma vinaash honge। naya koi paap nahin karna chaahiye। puraana khaata khalaas karna hai। baap ko batlaate hain ki baba hamse yeh paap hua। achha, aadha maaph hai। is jeevan mein bhi chhotepan mein paap kiya hai to woh batlaane se aadha danda kat jaayega। baaki aadha ke liye phir bhi mehnat karni padegi। is janma ki jeevan kahaani se aage ka bhi pata pad jaata hai kyonki sanskaar le aate hain na। phir unki avastha ka pata pad jaata। yeh to samajhte hain din-pratidin neeche hi girte aaye hain। duniya tamopradhaan banti jaati। paap badhte jaate hain। phir patit-paavan baap aakar raakhi baandhate hain arthaat pratigya karaate hain to tum pavitra ban jaate ho। parampara arthaat har paanch hajaar varsha baad yeh sachchi-sachchi raakhi baap se bandhavaate phir uski rasma-rivaaj aadha kalpa chalti hai। uska mahatva bahut hai। pahle-pahle mahatva hai jo raakhi baandhate hain। unka utsav hai mukhya। oonch te oonch utsav hai shiv jayanti, jiska koi ko pata nahin hai ki woh kab aaye, kya aakar kiya? ibraahim, buddha, Christ aadi kab aaye yeh to sab jaante hain na। unse aage satayug-treta mein kya tha - woh history-geography koi jaante nahin। devi-devtaaon ki raajdhaani kaise sthaapan hui, kitna samay chali - yeh koi jaante nahin। mukh se kehte hain - satayug ke lakshmi-naaraayan sarvagun sampanna, 16 kala sampoorn, sampoorn nirvikaari the। lakshmi-naaraayan to hue mahaaraaja-mahaaraani। unhon ka bachpan bhi chaahiye। bachchon ka kisko pata nahin hain। raadhe-krishna ko phir ulta dvaapar mein le jaate hain। yeh manushyon ki apni kalpana hai। satayug ki aayu bhi laakhon varsha likh di hai, itni to honi nahin chaahiye। khud bhi kehte hain - 3 hajaar varsha before Christ barobar devi-devtaaon ka raajya tha। to phir satayug ko itne varsha kyon dete hain? sahaj baat hai na। parantu maaya pattharbuddhi bana deti hai jo bilkul hi bhool jaate hain ki ham devi-devta the। number one hi jab naaraayan banta to unko yeh gyaan nahin hota। gyaan praayahlop ho jaata hai। baap kehte hain abhi tumko gyaan deta hoon - manushya se devta banaane ka। devta ban gaye phir kya sikhlaayenge? darkaar hi nahin। to raakhi ka utsav bhi tum jaante ho। yeh sab utsav varsha-varsha hote hain। kumbha ka mela, saagar-nadi ka mela bhi bada bhaari lagta hai। saagar aur brahm putra nadi ka mela mashhoor hai। saagar to baap hai। unse pahle yeh brahm putra nikli phir vriddhi hoti jaati hai। saagar aur brahm putra ka mela dekhne mein aata hai। vahaan phir hai nadiyon ka mela, usmein bhi saaph paani aur maila paani dikhaai padta hai। vahaan bhi har varsha mela lagta hai। varsha-varsha jaakar patit se paavan banne snaan karte hain। abhi tum sangamayug par ho। barobar is samay tum gyaan saagar se aakar mile ho। yeh hai sangam ka suhaavna samay jabki aatmaon ka parampita paramatma se milan hota hai।

tum bachche jaante ho - jo bhi parva manaate hain woh sab abhi ke hain। aaj hai rakshaabandhan। baba thodi raakhi bhi le aaye hain। ab baba poochhte hain - kisko shivbaaba se raakhi bandhavaani hai woh haath uthaaven (pahle do chaar ne haath uthaaya) phir baba ne kaha - shivbaaba se jinko raakhi bandhavaani ho woh haath uthaave। to majority ne haath uthaaya। baapdaada bole - kya tum sab paavan nahin bane ho jo raakhi bandhavaate ho? phir mama se baapdaada ne poochha to mama boli raakhi to baandhi hi hui hai। dekho, baba ne bachchon ki pareeksha li to sab fail ho gaye। mama ne theek kaha। tum to pavitra ho hi। baaki gyaan ki dhaarna par madaar hai। khajaana to milta hi rahega। jab tak jeete ho tab tak khajaana ikattha karte raho। pavitra to tum ho parantu yaad mein rahne se tum vaayumandal ko shant banaate ho। saari duniya ko shanti ka varsa de rahe ho। pavitrata ki hi pratigya ki jaati hai। baap ko yaad karte ho - shanti phailaane liye। yeh bhi tum jaante ho jitna baap ko yaad karenge, maaya ka asar nahin hoga। maaya ke toofaan bhi aate hain na। baap tum bachchon ko padhaakar trikaaldarshi bana rahe hain। drama ke aadi-madhya-ant ko tum jaante ho। tumhaara yeh bhoolna bhi drama mein hai isliye phir se mujhe aana padta hai - tum bachchon ko raajayog sikhlaane। shiv jayanti manaate hain parantu arth nahin samajhte। baba ne raakhi laai thi kyonki ek bachcha naya aaya tha। yeh paan ka beeda uthaana hota hai। baba ham raakhi bandhavaate hain। ham pavitra ban kyon nahin behad ke baap se varsa lenge kyonki ismen pavitrata hai first। behad ka baap kehte hain aadha kalpa tumne vishay gutter mein bahut gote khaaye hain। yeh hai hi kumbhi paak narka। 63 janma gote khaaye hain ab pratigya karo - baba, ham bhi pavitra duniya mein chal sukh ka varsa loonga। parantu himmat nahin dekhte hain। yeh hai gyaan maan sarovar। ismen gyaan snaan karne se manushya svarga ki pari ban jaate hain। bhaaratvaasi lakshmi-naaraayan aadi ke mandir banaate hain parantu unko pata thode hi hai ki woh kab aaye the, to yeh hui andhashraddha।

tum bachchon ko ab baap ne aap samaan master gyaan saagar banaaya hai। jaise barrister padhkar aap samaan banaate hain, phir number-vaar purushaartha anusaar paas hote hain। yeh bhi padhaai hai। em object clear likha hua hai। shivbaaba ka bhi chitra hai। parantu samajhte kuchh nahin hain। gaate hain patit-paavan seetaaraam। yeh hai hi raavan sampradaay isliye baap kehte hain apni shakla dekho - 16 kala sampoorn, sampoorn nirvikaari ho? apne ko aatma nishchay karte ho? tumhaari aatma ka baap kaun hai? unko nahin jaante to tum naastik thahre। phir naastik lakshmi ko kaise varenge? tum jaante ho barobar ham bandar sampradaay the। ab ham shri naaraayan ko varne laayak bante hain। baap kehte hain main tumko maaya raavan ke raajya se liberate karne aaya hoon। phir raavan ka but kabhi jalaayenge hi nahin। yeh samajhne ki baaten hain। jitna purushaartha karenge utna achha varsa paayenge। baba bata sakte hain - tum is samay ke purushaartha anusaar kya banenge? aajkal manushyon ki maut to badi cheap (sasti) hai। vahaan to samay par aayu poori hui jhat maaloom padega hamko yeh chola chhod doosra naya lena hai। nai-nai aatmaayen aati hain to pahle-pahle unhon ki mahima hoti hai, phir kam ho jaati hai। sato, rajo, tamo se harek ko paas karna padta hai। baba aakar satopradhaan banaate hain। yeh bhi wonder hai। itni karod aatmaon ko apna avinaashi part mila hua hai jo kabhi vinaash nahin ho sakta। aatma itni chhoti-si bindi hai, unmein saara avinaashi part bhara hua hai, isko kudrat kaha jaata hai। naya koi in baaton ko samajh na sake। badi guhya baaten hain। shiv ka roop to yahi dikhaate hain na। agar ham inka roop badla den to kahen inki to duniya se nyaari baaten hain। nai duniya ke liye nai baaten abhi tum sunte ho। phir kalpa baad bhi tum hi aakar sunenge। to patit-paavan baap ne pratigya karaai thi, jinhon ne yeh pratigya ki vahi svarga ke maalik banen isliye yeh tyohaar manaaya jaata hai। sachche-sachche brahman tum ho। sarasvati braahmani oonchi gaai jaati hai। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) puraane vikarmon ka khaata khalaas kar punya ka khaata jama karna hai। yaad mein rah shanti ka vaayumandal banaana hai।

2) pavitrata ki pratigya kar pavitra rahne ki sachchi raakhi harek ko baandhani hai।

vardaan:- sada dilkhush mithaai khaane aur khilaane vaale sachche sevaadhaari khushmijaaz bhav

jo roz amritvele dilkhush mithaai khaate hain ve svayan bhi saara din khush rehte hain aur doosre bhi unko dekh khush hote hain। yeh dilkhush ki khuraak kaisi bhi paristhiti ko chhota bana deti hai। pahaad ko rooi bana deti hai। to sada yahi smriti rakho ki ham dilkhush mithaai khaane aur doosron ko khilaane vaale hain। rone ki paristhiti mein bhi man sada khush rahe tab kahenge khushmijaaz। unke chehre se bhi seva hoti hai। unki soorat gyaan ki seerat ko pratyaksha karti hai।

slogan:- jiske har sankalp se anekon ko shreshtha jeevan banaane ki prerna praapta ho - vahi punyaatma hai।